នៅថ្ងៃទី៤ ឧសភា ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្មនៃរដ្ឋសភា បញ្ជាក់ថា កម្ពុជាត្រូវប្រើពេលរង់ចាំបូមប្រេងបន្តទៀត បើពុំមានការពុំកែប្រែ យ៉ាងហោចណាស់ រហូតដល់ឆ្នាំ២០១៦។
ថ្លែងនៅក្នុងវេទិកាយុវជនស្ដីពីអភិបាលកិច្ចក្នុងវិស័យឧស្សាហកម្ម និស្សារណកម្ម នៅវិទ្យាស្ថានជាតិអប់រំ រាជធានីភ្នំពេញ លោក ជាម យៀប និយាយថា ប្រទេសកម្ពុជា ពុំទាន់មានលទ្ធភាពក្នុងការជំរុញការបូមប្រេងកាតទៅតាមការកំណត់របស់ខ្លួនបាននៅឡើយទេ។
លោក ជាម យៀប ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្មនៃរដ្ឋសភា មានប្រសាសន៍នៅថ្ងៃទី៤ ឧសភា ថា អ្វីដែលកម្ពុជា ត្រូវខកខានគោលនយោបាយរបស់ខ្លួនទៅតាមការសន្យាដើម្បីជំរុញឲ្យមានតំណក់ប្រេងកាតជាលើកដំបូង នៅថ្ងៃទី១២ ខែ១២ ឆ្នាំ២០១២ នោះ ព្រោះថា កម្ពុជានៅបន្តរង់ចាំការតាក់តែងច្បាប់ក្នុងន័យថា ដើម្បីឲ្យការគ្រប់គ្រងមួយប្រកបដោយសុក្រិត្យ និងតម្លាភាព។
លោកអះអាងថា ពុំមានប្រទេសច្រើនទេនៅក្នុងពិភពលោកដែលប្រើប្រាស់ធនធានធម្មជាតិទាំងនេះត្រឹមត្រូវ និងចំទិសដៅ។ តែផ្ទុយមកវិញ ការទាញយកផលប្រយោជន៍ដែលមានស្រាប់ត្រូវប្រឈមមុខនឹងបណ្ដាសាទៅវិញ។ លោកគិតថា ហេតុនេះដើម្បីទទួលពរពីការធ្វើអាជីវកម្មប្រេងនេះ ដោយប្រសិទ្ធភាព ពោលត្រូវទាមទារការសិក្សា បទដ្ឋានគតិយុត្តិជាស្តង់ដារឲ្យបានស៊ីជម្រៅពីប្រទេសដែលទទួលបានជោគជ័យលើការវិនិយោគនេះ។
លោក ជាម យៀប៖ «ពិសេសប្រេង និងហ្គាស៍ហ្នឹង គឺចាំបាច់ត្រូវមានច្បាប់បីហ្នឹង។ ទីមួយ គឺច្បាប់គ្រប់គ្រងប្រេង និងហ្គាស៍ ទីពីរថា ស្ដីពីការយកពន្ធដារលើអាជីវកម្មប្រេង និងហ្គាស៍ ទីបី គឺច្បាប់យកលើប្រាក់ចំណេញ ពន្ធដារលើប្រាក់ចំណេញនៃការធ្វើអាជីវកម្មប្រេងឥន្ធនៈហ្នឹង»។
ក្រុមហ៊ុន ឆេវរ៉ុន ដែលទទួលបានសិទ្ធិរុករកអណ្ដូងប្រេងកាតនៅក្នុងសមុទ្រខ្មែរ នឹងមានទុនវិនិយោគរបស់ខ្លួនក្នុងប្លុកអេ (Block A) ចំនួន ៣០ភាគរយផងនោះ កំពុងប្រតិបត្តិការលើផ្នែកនេះ។
ក្រុមហ៊ុនមួយនេះដែលជាប្រតិបត្តិការបានរកឃើញរណ្ដៅប្រទេសកាតចំនួន ៤ទីតាំង ក្នុងប្លុកអេ ដោយមិនគិតដល់ ៥ប្លុកផ្សេងទៀត នៅក្នុងបាតសមុទ្រខ្មែរនោះទេ។ រណ្ដៅទីមួយឈ្មោះថា ពិស្ណុការរកឃើញថ្ងៃទី១៣ តុលា ឆ្នាំ២០០៤ មានជម្រៅជាង ១ម៉ឺន១ពាន់ហ្វ៊ីតថ៍រណ្ដៅ ទីពីរឈ្មោះ សុវណ្ណភូមិ រកឃើញនៅថ្ងៃទី៤ វិច្ឆិកា ឆ្នាំ២០០៤ មានជម្រៅជាង ១ម៉ឺន២ពាន់ហ្វ៊ីតថ៍ រណ្ដៅទីបី ឈ្មោះ សេរីសម្បត្តិ រកឃើញនៅថ្ងៃទី៨ ខែធ្នូ ឆ្នាំ២០០៤ មានជម្រៅជាង ១ម៉ឺន១ពាន់ហ្វ៊ីតថ៍ និងរណ្ដៅទី៤ ឈ្មោះ វិមានអាកាស រកឃើញនៅថ្ងៃទី៧ ខែធ្នូ ឆ្នាំ២០០៤ ដែលមានជម្រៅជាង ១ម៉ឺន១ពាន់ហ្វ៊ីតថ៍។
វិទ្យុអាស៊ីសេរី ពុំអាចស្នើសុំការបំភ្លឺពីអ្នកនាំពាក្យទីស្ដីការគណៈរដ្ឋមន្ត្រីស្ដីពីដំណើរការតាក់តែងច្បាប់គ្រប់គ្រងប្រេងកាតនេះបានទេ នៅថ្ងៃទី៤ ឧសភា។ ប៉ុន្តែអគ្គនាយករងនៃអាជ្ញាធរប្រេងកាតជាតិកម្ពុជា លោក ម៉ែន ដែន បញ្ជាក់ថា កម្ពុជាគឺជាអាជ្ញាធរក្នុងការត្រួតពិនិត្យបន្ថែមទាំងលើផ្នែកបច្ចេកទេស និងដំណើរការរុករកអណ្ដូងប្រេងកាត។
លោកបន្តថា៖ «ជួនកាលក្រុមហ៊ុនមានតែលុយទេ ហើយជំនាញទេ ប៉ុន្តែសម្ភារៈអត់មានទេ។ ក្រុមហ៊ុនត្រូវរក Sub-Constructor (អ្នកម៉ៅការបន្ត) ទៀត ដែលស្តង់ដារ (Standard)។ ឧបមាន សាប់ ខនត្រាក់ទ័រ ឧទាហរណ៍ដូចថា ឥឡូវ ឆេវរ៉ុន គឺជា ខនត្រាក់ទ័រ សាប់ ខនត្រាក់ទ័រណាខាងខួង។ អ៊ីចឹងគេមានជំនាញគេខាងខួងផ្សេងទៀត។ ប៉ុន្តែ ឆេវរ៉ុន មានអ្នកត្រួតពិនិត្យលើអាហ្នឹង ហើយយើងត្រួតពិនិត្យ ឆេវរ៉ុន ហើយត្រួតពិនិត្យលើ សាប់ ខនត្រាក់ទ័រ ទៀត។ អ៊ីចឹងទាល់តែស្តង់ដារបានយើងឲ្យ»។
និស្សិតឆ្នាំទី៣ នៃសកលវិទ្យាល័យបញ្ញាសាស្ត្រកម្ពុជា លោក ខាន់ វត្ថាណា គិតថា ប្រសិនរដ្ឋាភិបាលយកពន្ធលើការវិនិយោគ នោះតម្លៃប្រេងទំនងជាពុំមានការធ្លាក់ចុះដូចការនាំចូលឡើយ៖ «បើតាមគំនិតខ្ញុំផ្ទាល់ បើសិនយើងនៅតែយកពន្ធដារលើប្រេងហ្នឹង វាអាចធ្វើឲ្យតម្លៃប្រេងនៅតែមានការតម្លៃខ្ពស់ដដែល»។
របាយការណ៍របស់អាជ្ញាធរប្រេងកាតជាតិកម្ពុជា ឲ្យដឹងថា ប្រទេសកម្ពុជា មានតំបន់ប្រេងកាត ៦កន្លែងនៅបាតសមុទ្រ រួមមានតំបន់ A B C D E និង F រួមនិងតំបន់ត្រួតស៊ីគ្នាជាមួយប្រទេសថៃ ថែមទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។