ពលរដ្ឋនៅក្រុងប៉ោយប៉ែត ខេត្តបន្ទាយមានជ័យ រិះគន់អាជ្ញាធរ ដែលឱ្យប្រជាពលរដ្ឋចេញថ្លៃធ្វើផ្លូវបេតុង និងដាក់លូមុខផ្ទះ ដែលមានតម្លៃថ្លៃជាងទីផ្សារជាច្រើនដង ខណៈសមិទ្ធផលទាំងនោះ គ្មានគុណភាព និងសមស្របទៅតាមចំនួនទឹកលុយរបស់ពួកគាត់ឡើយ។ ពួកគាត់ស្នើឱ្យអាជ្ញាធរ កសាងដែលហេដ្ឋារចនាសម្ព័ន្ធ ដោយប្រើប្រាស់ថវិកាជាតិ និងបញ្ឈប់ការកេងប្រវ័ញ្ចលុយពីប្រជាពលរដ្ឋ ដោយសំអាងទៅលើពាក្យថាអភិវឌ្ឍ។
ក្រោយមានការរិះគន់រឿងដើរប្រមូលលុយពីប្រជាពលរដ្ឋតាមផ្ទះ យកមកធ្វើផ្លូវបេតុង និងកេងប្រវ័ញ្ចលុយ ពេលនេះអាជ្ញាធរក្រុងប៉ោយប៉ែត ត្រូវប្រជាពលរដ្ឋរិះគន់រឿងបង្ខំឱ្យដាក់លូតម្លៃថ្លៃកប់ពពកវិញម្ដង។
ពលរដ្ឋនៅសង្កាត់ផ្សារកណ្ដាល ក្រុងប៉ោយប៉ែត ថ្លែងក្នុងលក្ខខ័ណ្ឌមិនបញ្ចេញឈ្មោះ ដោយបារម្ភពីសុវត្ថិភាព អះអាងប្រាប់វិទ្យុអាស៊ីសេរី នៅថ្ងៃទី១១ ខែកុម្ភៈ ថា បន្ទាប់ពីក្រុមហ៊ុនបានកាយប្រឡាយរំដោះទឹកនៅមុខផ្ទះរបស់លោករួច អាជ្ញាធរបានបង្ខំឱ្យលោកទិញលូពីក្រុមហ៊ុនសាងសង់ ដែលមានតម្លៃ ៤០ដុល្លារក្នុងមួយកង់ ដើម្បីដាក់មុខផ្ទះ ដោយសរុបទាំងឈ្នួលដាក់អស់ជាង ៤រយដុល្លារ។ ពលរដ្ឋរូបនេះត្អូញត្អែរថា តម្លៃលូ ដែលក្រុមហ៊ុនលក់ឱ្យលោក គឺថ្លៃជាងតម្លៃនៅលើទីផ្សារដែលមានតម្លៃត្រឹមតែ ១០ដុល្លារក្នុងមួយកង់។
ពលរដ្ឋ៖«តើហេតុអ្វីបានខុសគេតែក្រុងប៉ោយប៉ែត មួយ។ ខ្ញុំដើរគ្រប់ខេត្តដូចអត់ឃើញមានបែបនេះទេ។ ខេត្តបន្ទាយមានជ័យ ក៏គេអត់មានយកលុយដាក់លូបែបនេះដែរ។ ចុះហេតុអ្វីខុសគេតែក្រុងប៉ោយប៉ែតមួយនេះ។ គ្មាននរណាមួយកោះរបើកសោះ។ ប្រជាពលរដ្ឋផ្សាយបន្តផ្ទាល់ផង បង្ហោះសារក្នុងហ្វេសប៊ុកផង»។
កាលពីថ្ងៃទី៨ ខែកុម្ភៈ មានស្ត្រីម្នាក់ដែលជាពលរដ្ឋនៅសង្កាត់ប៉ោយប៉ែត បានបង្ហោះវីដេអូ នៅលើគណនីហ្វេសប៊ុក ឈ្មោះ ម៉ាឡាយ យូ (MaLay yu) ដោយបានត្អូញត្អែរពីអាជ្ញាធរក្រុងប៉ោយប៉ែត កំពុងធ្វើផ្លូវ និងកាយប្រឡាយសងខាងផ្លូវ ហើយតម្រូវឱ្យពលរដ្ឋត្រូវបង់ថ្លៃ ទិញលូខាងមុខផ្ទះរបស់ពួកគេ ដែលលូមួយមានតម្លៃ ៤០ដុល្លារ ដែលធ្វើឱ្យលោកស្រី និងពលរដ្ឋមួយចំនួនទៀត គ្មានលទ្ធភាព ដើម្បីដាក់លូបានឡើយ ដ្បិតក្នុងមួយគ្រួសារត្រូវដាក់លូយ៉ាងហោចណាស់ចាប់ពី ៥កង់ឡើងទៅ។
លោកស្រី ម៉ាឡា យូ៖«ធម្មតាគ្នាដែលជាប្រជាពលរដ្ឋ រកតែបាយហូបមិនបានផង ហើយទារលូមួយតម្លៃ ៤០ដុល្លារ តើគ្នាទៅរកនៅឯណា។ ក្នុងមួយផ្ទះមិនមែនមានតែលូមួយទេ គឺក្នុងមួយផ្ទះ លូ ៥ទៅ ១០ ២០លូ ហើយប្រជាពលរដ្ឋ អត់មានលុយដាក់លូ»។
ក្រោយការរិះគន់នេះ រដ្ឋបាលសង្កាត់ប៉ោយប៉ែត បានចេញសេចក្ដីបំភ្លឺព័ត៌មានមួយ កាលពីថ្ងៃទី៩ ខែកុម្ភៈ ដោយបកស្រាយថា កន្លងទៅមានប្រជាពលរដ្ឋ នៅភូមិចាន់គិរី បានស្នើសុំអាជ្ញាធរនៅសង្កាត់ប៉ោយប៉ែត ធ្វើផ្លូវ និងកាយប្រឡាយ។ រដ្ឋបាលសង្កាត់ប៉ោយប៉ែត អះអាងទៀតថា ចំពោះការដាក់លូ គឺដោយសារប្រជាពលរដ្ឋមួយចំនួន ដែលមានលទ្ធភាពបានទំនាក់ទំនងជាមួយក្រុមហ៊ុន ឱ្យមកដាក់លូខាងមុខផ្ទះរបស់គាត់ ដោយមានការព្រមព្រៀងក្នុងតម្លៃមួយកង់ថ្លៃ ៤០ដុល្លារ រួមទាំងកម្លាំងពលកម្មផង។
ទោះជាបែបនេះក្ដី ពលរដ្ឋអះអាងថា ពួកគាត់មិនបានហៅក្រុមហ៊ុនមកដាក់លូនៅពីមុខផ្ទះពួកគាត់ឡើយ ប៉ុន្តែអាជ្ញាធរបានហៅក្រុមហ៊ុននេះមកដោយខ្លួនឯង និងហាមមិនឱ្យពួកគាត់ទិញលូដាក់ដោយខ្លួនឯងឡើយ។ ពួកគាត់ចោទថា កន្លងទៅអាជ្ញាធរក្រុងប៉ោយប៉ែត ថែមទាំងបានរៃអង្គាសប្រាក់ពីប្រជាពលរដ្ឋ យកមកធ្វើផ្លូវបេតុងនៅតាមមុខផ្ទះ ដោយក្នុងមួយម៉ែត្រការ៉េតម្លៃ ១០ដុល្លារ ហើយការរៃអង្គាសនេះ មិនមែនធ្វើឡើងដោយស្ម័គ្រចិត្តឡើយ ដោយអាជ្ញាធរបានបង្ខំពលរដ្ឋដោយប្រយោល។
ពលរដ្ឋអះអាងទៀតថា ក្រុមហ៊ុនដែលទទួលម៉ៅការកសាងផ្លូវបេតុងនៅក្នុងក្រុងប៉ោយប៉ែត នេះ គឺជាក្រុមបក្ខពួកសាច់ញាតិរបស់អភិបាលក្រុងប៉ោយប៉ែត លោក គាត ហុល ហើយក្រុមហ៊ុននេះមិនបានចាក់បេតុងទៅតាមមាត្រដ្ឋាន ដែលមានកម្រាស់ ១០សង់ទីម៉ែត្រ និងក្រាលឆ្អឹងដែកឡើយ ដោយក្រុមហ៊ុនចាក់ស៊ីម៉ងត៍កម្រាស់តែ ៥សង់ទីម៉ែត្រប៉ុណ្ណោះ ហើយការដែលចាក់ស្ដើងបែបនេះ បានធ្វើឱ្យផ្លូវបេតុងទាំងនោះគ្មានគុណភាព និងឆាប់ខូច។
វិទ្យុអាស៊ីសេរី មិនអាចទាក់ទងអភិបាលក្រុងប៉ោយប៉ែត លោក គាត ហ៊ុល និងអភិបាលខេត្តបន្ទាយមានជ័យ លោក អ៊ុំ រាត្រី ដើម្បីសុំការបកស្រាយ ជុំវិញការចោទប្រកាន់នេះបានទេ នៅថ្ងៃទី១១ ខែកុម្ភៈ។
ជុំវិញរឿងនេះ ប្រធានសមាគមពង្រឹងសេដ្ឋកិច្ចក្រៅប្រព័ន្ធកម្ពុជា(CIREA) លោក ឌិន ពុទ្ធី អះអាងថា ពិតជាមានករណីអាជ្ញាធររៃអង្គាសលុយពីប្រជាពលរដ្ឋនៅក្រុងប៉ោយប៉ែត យកទៅសាងសង់ផ្លូវ និងដាក់លូពិតប្រាកដមែន។ លោក ឌិន ពុទ្ធី លើកឡើងថា ការរៃអង្គាសថវិកាពីប្រជាពលរដ្ឋ គួរធ្វើឡើងដោយការស្ម័គ្រចិត្ត ព្រោះការសាងសង់ផ្លូវថ្នល់ និងប្រព័ន្ធលូរំដោះទឹកនេះ គឺជាកាតព្វកិច្ចរបស់រដ្ឋជាអ្នកចំណាយ។
លោក ឌិន ពុទ្ធី៖«រដ្ឋឥឡូវមិនក្រទេ រដ្ឋមានណាស់។ ផ្លូវហ្នឹងគួរតែធ្វើឱ្យមានស្តង់ដារទៅ ហើយរដ្ឋជាអ្នកចំណាយទៅ ព្រោះប្រជាពលរដ្ឋ ចំណាយទាំងអស់ ១រយភាគរយ តើប្រជាពលរដ្ឋឯណាទៅមានលទ្ធភាព?ព្រោះប្រជាពលរដ្ឋ ពួកគាត់ត្រូវរកចិញ្ចឹមគ្រួសារផង បង់ពន្ធឱ្យរដ្ឋផង។ ប៉ុន្តែនៅពេលរដ្ឋធ្វើផ្លូវ ដែលជាតួនាទី ឬភារកិច្ចរបស់ខ្លួន ទៅជាឱ្យប្រជាពលរដ្ឋអ្នកចេញលុយធ្វើផ្លូវទៀត។ ករណីនេះ មើលទៅដូចជាមិនសូវសម»។
ប្រជាពលរដ្ឋនៅក្រុងប៉ោយប៉ែត ស្នើឱ្យរដ្ឋាភិបាល ចុះមកស៊ើបអង្កេតលើគម្រោងអភិវឌ្ឍក្នុងសហគមន៍របស់អាជ្ញាធរក្រុងប៉ោយប៉ែត ព្រោះពួកគាត់សង្កេតឃើញថា ការរៃអង្គាសអាជ្ញាធរនេះ បានបង្កផលប៉ះពាល់ដល់ជីវភាពរបស់ពួកគាត់ ខណៈអាជ្ញាធរបានយកសមិទ្ធផលដែលជាញើសឈាមរបស់ប្រជាពលរដ្ឋនេះ ទៅឃោសនាឱ្យគណបក្សប្រជាជនកម្ពុជាទៅវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។