សមាគម​សម្ព័ន្ធ​កសិករ​ជំរុញ​ឱ្យ​អាជ្ញាធរ​ចុះ​ស្រង់​ស្ថិតិ​ជន​ក្រីក្រ​ឱ្យ​ទូលំទូលាយ​និង​ចំ​គោលដៅ

ដោយ ម៉ៅ សុធានី
2020-06-13
អ៊ីម៉ែល
មតិ
Share
បោះពុម្ព
អគ្គលេខាធិការ​សម្ព័ន្ធ​សហគមន៍​កសិករ​កម្ពុជា លោក ថេង សាវឿន (ឆ្វេង) ចូលរួម​វេទិកា​អ្នក​ស្ដាប់​វិទ្យុ​អាស៊ីសេរី នៅ​យប់​ថ្ងៃ​អង្គារ ទី​១៨ ខែ​តុលា ឆ្នាំ​២០១៦។
អគ្គលេខាធិការ​សម្ព័ន្ធ​សហគមន៍​កសិករ​កម្ពុជា លោក ថេង សាវឿន (ឆ្វេង) ចូលរួម​វេទិកា​អ្នក​ស្ដាប់​វិទ្យុ​អាស៊ីសេរី នៅ​យប់​ថ្ងៃ​អង្គារ ទី​១៨ ខែ​តុលា ឆ្នាំ​២០១៦។
RFA

ប្រធាន​សមាគម​សម្ព័ន្ធ​កសិករ​កម្ពុជា​លោក ថេង សាវឿន ជំរុញ​ឱ្យ​អាជ្ញាធរ​មូលដ្ឋាន ចុះ​ស្រង់​ស្ថិតិ​ធ្វើ​បច្ចុប្បន្នភាព កំណត់​ផ្ដល់​អត្តសញ្ញាណ​កម្ម​គ្រួសារ​ក្រីក្រ ឱ្យ​បាន​ទូលំទូលាយ និង​ចំ​គោលដៅ​ពិតប្រាកដ។

លោក ថេ​ង សាវឿន ប្រាប់​អាស៊ីសេរី កាលពី​យប់​ថ្ងៃ​ទី១២ ខែ​មិថុនា ថា មាន​ប្រជាពលរដ្ឋ​ក្រីក្រ​ជាច្រើន ដែល​ជា​ក្រុម​ងាយ​រងគ្រោះ ជាពិសេស​គឺ​កសិករ​ខ្នាត​តូច នៅ​មិនទាន់​បាន​ទទួល​ព័ត៌មាន និង​ទទួល​ការ​ណាត់​ជួប​សម្ភាសន៍ ពី​មន្ត្រី​អាជ្ញាធរ​មូលដ្ឋាន​នៅ​ឡើយ​ទេ។ លោក​ស្នើ​ឱ្យ​ក្រុម​ប្រឹក្សាឃុំ​សង្កាត់ ចុះ​ស្រង់​ស្ថិតិ​និង​ជួប​សម្ភាសន៍​នេះ ដោយ​តម្លាភាព និង​កុំ​ប្រកាន់​និន្នាការ​នយោបាយ៖ «យើង​ស្នើ​ឱ្យ​មានការ​ផ្សព្វផ្សាយ និង​បញ្ជាក់​ពី​វិធីសាស្ត្រ និង​ការវាយតម្លៃ អំពី​ការ​ធ្វើ​អត្តសញ្ញាណ​កម្ម​គ្រួសារ​ក្រីក្រ​នេះ ឱ្យ​បាន​ល្អ​ប្រសើរ​។ មួយវិញទៀត​យើង​ស្នើ ដល់​រដ្ឋាភិបាល និង​ក្រសួងផែនការ ធ្វើ​យ៉ាងណា ផ្ដល់​អត្តសញ្ញាណ​កម្ម​គ្រួសារ​ក្រីក្រ ដោយ​ឈរ​លើ​សេវា​សាធារណៈ កុំ​ឱ្យ​មាន​ការ​រើសអើង ជាពិសេស​ពលរដ្ឋ​មាន​បញ្ញា​ដីធ្លី​ក្រីក្រ​លំបាក កំពុង​រង​ទុក្ខ​នោះ រហូត​មក​ដល់​ពេល​នេះ ពុំ​ទាន់​មាន​អាជ្ញាធរ មូលដ្ឋាន​ណា​ទាក់ទង​មក​ទេ»

ការ​ស្នើសុំ​របស់​ប្រធាន​សមាគម​សម្ព័ន្ធ​កសិករ​កម្ពុជា​នេះ ធ្វើ​ឡើង ក្រោយ​ដែល​ក្រសួង​ផែនការ​បាន​ផ្សព្វផ្សាយ នៅ​ក្នុង​ទំព័រ​ហ្វេសប៊ុក របស់​ខ្លួន កាល​ពី​ថ្ងៃ​ទី១២ ខែ​មិថុនា ដោយ​អំពាវនាវ​ឱ្យ​ប្រជា​ពលរដ្ឋ​ក្រីក្រ ប្រញាប់​រូតរះ ដាក់​ពាក្យ​ស្នើសុំ ជួប​សម្ភាសន៍​ជាមួយ​ក្រុម​ប្រឹក្សាឃុំ-សង្កាត់ ឱ្យ​បាន​មុន​ថ្ងៃទី៣០ មិថុនា ដែល​ជា​ថ្ងៃ​ផុត​កំណត់ នៃ​នីតិវិធី​ធ្វើ​បច្ចុប្បន្នភាព​កំណត់​អត្តសញ្ញាណកម្ម​គ្រួសារ​ក្រីក្រ។ ក្រសួង​ផែនការ​បញ្ជាក់​ថា គ្រួសារ​ក្រីក្រ និង​គ្រួសារ​ដែល​រងគ្រោះ​ដោយសារ​ការ​រាលដាល​នៃ​ជំងឺ​កូវីដ​១៩ នឹង​ទទួល​បាន​ប្រាក់​ឧបត្ថម្ភ ពី​រដ្ឋាភិបាល​ក្នុង​ពេល​ឆាប់ៗ​នេះ ប៉ុន្តែ​គេ​នៅ​ពុំ​ទាន់​ដឹង​ពី​ចំនួន​ទឹកប្រាក់​ប៉ុន្មាន​នៅ​ឡើយ​ទេ។

ក្រសួង​ផែនការ​បាន​បង្ហាញ​សិ្ថតិ​ថា គិត​ត្រឹម​ថ្ងៃ​ទី១ ខែ​មិថុនា មាន​ប្រជាពលរដ្ឋ​ក្រីក្រ សរុប​ជិត ៦០​ម៉ឺន​គ្រួសារ (៥៦៧,៥០៥) ដែល​មាន​សរុប​ប្រមាណ​ជិត ២​លាន​៣​សែន​នាក់ នៅ​ទូទាំង​ប្រទេស បាន​ធ្វើ​អត្តសញ្ញាណ​កម្ម​គ្រួសារ​ក្រីក្រ ក្នុង​អំឡុង​ពេល​ការ​រាលដាល​នៃ​ជំងឺ​កូវីដ-១៩ (Covid-19)

ក៏ប៉ុន្តែ​បើ​តាម​ការ​ព្យាករណ៍​របស់​ធនាគារ​ពិភពលោក​ថ្មីៗ​នេះ ឱ្យ​ដឹង​ថា ពលរដ្ឋ​ខ្មែរ​ជិត ២​លាន​នាក់​បន្ថែម​ទៀត នឹង​ធ្លាក់​ខ្លួន​ក្រីក្រ ដោយសារ​វិបត្តិ​ជំងឺ​រាតត្បាត​ជា​សាកល​កូវីដ១៩ (Covid-19) ក្នុង​ឆ្នាំ​២០២០​នេះ ដែល​អត្រា​នេះ គឺ​កើន​ឡើង​ដល់​ទៅ ១១​ភាគរយ បន្ថែម​ទៀត លើ​ចំនួន​ពលរដ្ឋ​ក្រីក្រ​ដែល​មាន​ស្រាប់ កាលពី​មុន​ពេល​មាន​វិបត្តិ​ជំងឺ​កូវីដ-១៩។ ការ​កើន​ឡើង​នេះ មានន័យថា ចំនួន​ពលរដ្ឋ​រស់នៅ​ក្រោម​បន្ទាត់​ក្រីក្រ ដែល​គ្មាន​លទ្ធភាព​ចំណាយ​ប្រាក់​លើស​ពី ១,៩០ ដុល្លារ​ក្នុង​មួយថ្ងៃ អាច​នឹង​ត្រូវ​កើន​ឡើងវិញ​រហូត​ដល់​ជិត ២៥% ឬ​ស្មើ​នឹង​ប្រមាណ ៤​លាន​នាក់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល