ពលរដ្ឋមួយចំនួននៅបន្ទាយមានជ័យនៅតែទាមទារឱ្យអាជ្ញាធរជ្រើសជនក្រីក្រឱ្យមានតម្លាភាព
2020.06.29
ប្រជាពលរដ្ឋមួយចំនួននៅស្រុកមង្គលបូរី ខេត្តបន្ទាយមានជ័យនៅតែអះអាងថា អាជ្ញាធរខេត្តនេះជ្រើសរើសឈ្មោះជនក្រីក្រដើម្បីទទួលប្រាក់ឧបត្ថម្ភពីរដ្ឋាភិបាលប្រកាន់បក្សពួកនិយម។ ពលរដ្ឋទាំងនេះបញ្ជាក់ថា គ្រួសារក្រីក្រពិតប្រាកដជាច្រើននាក់មិនជាប់ឈ្មោះទៅទទួលប្រាក់ឧបត្ថម្ភនេះទេ។ អាជ្ញាធរខេត្តបន្ទាយមានជ័យបដិសេធនឹងការលើករបស់ក្រុមប្រជាពលរដ្ឋនេះ។
ប្រជាពលរដ្ឋនៅភូមិផ្លូវសៀម ឃុំគយម៉ែង ស្រុកមង្គលបូរី ថ្លែងសុំមិនឱ្យបញ្ចេញឈ្មោះឱ្យដឹងនៅថ្ងៃទី២៩ មិថុនា ថា អាជ្ញាធរមូលដ្ឋានមិនបានដាក់ឈ្មោះគ្រួសាររបស់គាត់បញ្ចូលក្នុងបញ្ជីជនក្រីក្រ ដើម្បីទទួលប្រាក់ឧបត្ថម្ភពីរដ្ឋាភិបាលនោះទេ បើទោះបីជាគ្រួសាររបស់លោកស្រីរកព្រឹកខ្វះល្ងាចនិងគ្មានទីជម្រកសមរម្យស្នាក់នៅក៏ដោយ។ ពលរដ្ឋរូបនេះបន្តថា គ្រួសាររបស់គាត់មានសមាជិក៤នាក់ គឺកូនតូចអាយុក្រោម ៨ឆ្នាំ ២នាក់ និងមនុស្សធំ ២នាក់ស្នាក់នៅជាម្ដាយចាស់ជរាទៀតផង។លោកស្រីបញ្ជាក់ថា ពួកគាត់គ្មានប្រាក់ទិញស្បៀងអាហារហូបចុកនោះទេ ព្រោះចាប់តាំងពីខែមីនាមក ប្ដីរបស់លោកស្រីធ្វើការសំណង់បាន ២ថ្ងៃ ក្នុងមួយសប្ដាហ៍ប៉ុណ្ណោះ ហើយពុំមានរបរផ្សេងរកប្រាក់ចំណូលដោះស្រាយជីវភាពគ្រួសារឡើយ៖ «អត់មានជួយអ្នកក្រមែនទែនផងហ្នឹង ទោះមិនឱ្យលុយកាក់ឱ្យអង្កហូបចុកក៏សប្បាយចិត្តដែរ។ ខ្ញុំស្នើសុំឱ្យស្មើភាពគ្នាកុំឱ្យអ្នកក្រខ្សត់មែនទែនអត់បាន អ្នកមេម៉ាយក៏អត់បានតែអ្នកគេអ្នកមានផ្ទះ មានគ្រួសារពេញលេញបានទ្រព្យសម្បត្តិបែរជាបានប្រាក់ តែអ្នកមេម៉ាយទៅជាអត់បាន ដូចអុំខ្ញុំអីពីរបីនាក់ណោះ ដែលប្ដីរបស់គាត់ស្លាប់ចោលយូរគាត់ធ្វើទាហាន»។
ចំណែកពលរដ្ឋនៅភូមិផ្លូវសៀមម្នាក់ទៀតថ្លែងថា ម្ដាយរបស់លោកស្រីរួមទាំងអ្នកភូមិក្បែរខាងជាច្រើនគ្រួសារទៀតពុំមានប្រាក់ចំណូលដោះស្រាយជីវភាពនោះទេ ក៏ប៉ុន្តែអាជ្ញាធរមិនបានដាក់ឈ្មោះជនក្រីក្រទទួលប្រាក់ឧបត្ថម្ភនោះឡើយ ដោយសារតែពួកគាត់គាំទ្រគណបក្សសង្គ្រោះជាតិ និងពុំជាប់ខ្សែស្រឡាយអាជ្ញាធរមូលដ្ឋាន។ ពលរដ្ឋរូបនេះបន្ថែមថា អ្នកភូមិភាគច្រើនមិនពេញចិត្តនឹងការជ្រើសឈ្មោះអ្នកក្ររបស់អាជ្ញាធរនោះទេ ប៉ុន្តែមិនហ៊ានតវ៉ាព្រោះខ្លាចអាជ្ញាធរបង្កការលំបាកក្នុងពេលធ្វើលិខិតស្នាមផ្សេងៗ៖ «ខ្ញុំចង់ឱ្យមកមើលផ្ទះណាស់មានតែផ្ទះហើយនឹងដីមួយបាត់ផ្ទះ និងមានម៉ូតូចាស់ហើយខូចមួយគ្រឿងហ្នឹងគាត់និយាយដូចមិនមើលសោះគេតវ៉ាពេញផ្លូវព្រឹកមិញគេថាអ្នកក្រប៉ុណ្ណឹងរបស់គេសោះគ្រាន់តែដាក់ឈ្មោះគាត់បញ្ចូលក្នុងបញ្ជីទៅមិនបានចាំបាច់រើសមុខមាន អ្នកធ្វើក្នុងមូលដ្ឋានគេថា ខ្ញុំមិនដឹងទេ លើប្រធានភូមិហើយហេតុអីបានមេភូមិនិយាយអត់ដឹងទេថ្នាក់លើគេដើរគាត់ឈ្មោះខ្ញុំមិនជឿទេ»។
ពលរដ្ឋទាំងនេះទទូចឱ្យរដ្ឋាភិបាលជ្រើសឈ្មោះជនក្រីក្រសារឡើងវិញឱ្យស្មើភាពគ្នា ដោយគ្មានការរើសអើងនិន្នាការគណបក្សនយោបាយ។
ប្រតិកម្មរបស់ពលរដ្ឋនេះបន្ទាប់ពីអាជ្ញាធរខេត្តនេះបានហៅពលរដ្ឋម្នាក់នៅភូមិផ្លូវសៀមទៅស្ដីបន្ទោសដោយសារតែលោកស្រីផ្ដល់សម្ភាសន៍ឱ្យវិទ្យុអាស៊ីសេរី តវ៉ារឿងអាជ្ញាធរមិនដាក់ឈ្មោះគាត់ជាជនក្រីក្រ កាលពីថ្ងៃទី២៧ មិថុនា។ ពលរដ្ឋរូបនេះក្រោយពេលជួបអាជ្ញាធរហើយភ័យខ្លាចមិនហ៊ាននិយាយជុំវិញអាជ្ញាធរហៅទៅសាកសួរនោះឡើយ។
ឆ្លើយតបនឹងបញ្ហានេះប្រធានមន្ទីរផែនការ ខេត្តបន្ទាយមានជ័យអ្នកស្រី ព្រំ ស៊ីណា ប្រាប់អាស៊ីសេរីថា អាជ្ញាធរជ្រើសរើសឈ្មោះពលរដ្ឋដោយស្មើភាពគ្នាគ្រប់និន្នាការគណបក្សនយោបាយ។ អ្នកស្រីបញ្ជាក់ថា អាជ្ញាធរដែលជ្រើសឈ្មោះពលរដ្ឋមានសមាជិក ៣នាក់ រួមមានមេឃុំសមាជិកក្រុមប្រឹក្សាឃុំ និងមេភូមិ។ ចំណែកពលរដ្ឋម្នាក់ដែលអាជ្ញាធរហៅទៅជួបនោះ អ្នកស្រីថ្លែងថា កាលពី៣ឆ្នាំមុនគាត់ជាប់ឈ្មោះជាប្រជាពលរដ្ឋក្រីក្រពិតប្រាកដមែន ក៏ប៉ុន្តែសព្វថ្ងៃជីវភាពរបស់គាត់បានងើបផុតពីជនក្រីក្រហើយ៖ «យើងបានធ្វើកាលពីឆ្នាំ២០១៨ម្ដងហើយ ដល់ពេលយើងធ្វើក្នុងដំណាក់មានវិបត្តិជំងឺកូវីដ១៩នេះ គេក៏មានកម្មវិធីនេះមួយមកបំពេញបន្ថែមដោយអ្នកដែលមានហើយត្រូវដកចេញ ហើយគ្រួសារណាដែលធូរធារហើយត្រូវដកចេញ គ្រួសារណាដែលក្រខ្សត់ត្រូវដាក់ពាក្យស្នើសុំ។ អីចឹងមេឃុំគាត់មានសិទ្ធិជ្រើសរើសប្រជាជនដែលធូរធារហើយដកចេញ ហើយអ្នកក្រីក្របញ្ចូលបន្ថែមក្នុងអំឡុងជំងឺកូវីដ១៩ រហូតដល់ដាច់ឆ្នាំ២០២០»។
អ្នកស្រីបន្តថាគិតត្រឹមថ្ងៃទី២៩ មិថុនា អាជ្ញាធរបានជ្រើសឈ្មោះពលរដ្ឋក្រីក្រកម្រិត ១ និងកម្រិត ២បានជិត ៣ពាន់គ្រួសារ (២,៩៩៤) ហើយ ក្នុងនោះពលរដ្ឋមួយចំនួនក៏បានបើកប្រាក់ឧបត្ថម្ភខែដំបូងពីរដ្ឋាភិបាលរួចហើយដែរ។
ប្រធានអង្គការតម្លាភាពកម្ពុជាលោក ប៉ិច ពិសី មានប្រសាសន៍ថា ការជ្រើសឈ្មោះពលរដ្ឋក្រីក្រគួរតែធ្វើឱ្យបានស្មើភាពគ្នា ទើបអ្នកក្រីក្រពិតប្រាកដបានទទួលប្រាក់ឧបត្ថម្ភពីរដ្ឋាភិបាល។ លោកបញ្ជាក់ថា អាជ្ញាធរជ្រើសឈ្មោះពលរដ្ឋបែបនេះមិនទាន់គ្រប់គ្រាន់ទេ ព្រោះមានតែអាជ្ញាធរមូលដ្ឋានដែលចេញពីគណបក្សកាន់អំណាចដោយពុំមានសង្គមស៊ីវិល ឬស្ថាប័នឯករាជផ្សេងទៀតចូលរួមនោះឡើយ៖ «បើសិនជាយើងចង់ឱ្យដំណើរការរើសនេះបានល្អជាងនេះ យើងតែមានការចូលរួមពីភាគីពាក់ព័ន្ធនៅក្នុងមូលដ្ឋាន មានអាជ្ញាធរម្ខាងទៅហើយមានអង្គការដែលធ្វើការនៅមូលដ្ឋានហ្នឹងតែម្ដងដើម្បីឱ្យគាត់ជួយ។ អីចឹងបើសិនជាមានការចូលរួមពីមេភូមិមេឃុំហើយនឹងអង្គការទាំងនោះឬក៏ក្រុមឯករាជផ្សេងទៀតនៅក្នុងភូមិហ្នឹង ក្រុមយុវជនដែលធ្វើការឯករាជក្ដីយើងអាចជំរុញឱ្យរើសអាចផ្ដល់លទ្ធភាពឱ្យការវិនិច្ឆ័យហ្នឹងសុក្រឹតជាង»។
ធនាគារពិភពលោកព្យាករណ៍កាលពីពេលថ្មីៗនេះថា ពលរដ្ឋខ្មែរជិត ២លាននាក់នឹងធ្លាក់ខ្លួនក្រីក្រដោយសារវិបត្តិជំងឺកូវីដ-១៩ ក្នុងឆ្នាំ២០២០ នេះ ធ្វើឱ្យចំនួនអ្នកក្រនៅកម្ពុជានឹងកើនឡើងដល់ ៤ លាននាក់ ក្នុងចំណោមពលរដ្ឋសរុបជាង ១៥លាននាក់។
ទោះជាយ៉ាងណា លោកនាយករដ្ឋមន្ត្រី ហ៊ុន សែន បានប្រកាសកាលពីថ្ងៃទី២៤ មិថុនា ថា រដ្ឋាភិបាលរបស់លោកគ្រោងចំណាយថវិកាប្រមាណ ២៥លានដុល្លារអាមេរិកក្នុងមួយខែសម្រាប់ផ្ដល់ជូនពលរដ្ឋក្រីក្រចំនួនជាង ៥ សែន ៦ ម៉ឺនគ្រួសារ (៥៦២.៦៨៦) ដោយការផ្តល់ថវិកានេះចាប់ចុងខែមិថុនាតទៅ។ ពលរដ្ឋនឹងទទួលបានថវិកាខុសៗគ្នាទៅតាមកម្រិតនៃភាពក្រីក្រ និងទីតាំងដែលពួកគាត់រស់នៅជាឧទាហរណ៍ អ្នករស់នៅជនបទពួកគាត់អាចទទួលបានយ៉ាងតិចបំផុត២០ ដុល្លារអាមេរិក ហើយនៅទីប្រជុំជន និងរាជធានីភ្នំពេញ ពួកគាត់អាចបានទាបបំផុត ៣០ដុល្លារ ក្នុងមួយខែ។ ពលរដ្ឋក្រីក្រនឹងទទួលបានប្រាក់ឧបត្ថម្ភជាក់ស្ដែងច្រើនជាងនេះ ដោយសារការបូកថែមសមាជិកគ្រួសារម្នាក់ៗ និងលក្ខខណ្ឌមួយចំនួនទៀត។
លោកនាយករដ្ឋមន្ត្រី ហ៊ុន សែន អះអាងថា រដ្ឋាភិបាលនឹងបន្តស្រង់ទិន្នន័យពលរដ្ឋក្រីក្របន្តទៀត ហើយកញ្ចប់ថវិកាដែលត្រូវឧបត្ថម្ភដល់ពលរដ្ឋនោះ អាចនឹងឡើងដល់ពី ៣០ ទៅ ៥០លានដុល្លារក្នុងមួយខែ៕