សាលាក្រុងមិនទាន់ឆ្លើយតបនឹងសំណើសហជីព១៨សុំធ្វើវេទិកាសាធារណៈ
2014.02.28
ប្រធានសម្ព័ន្ធសហជីពកម្ពុជា អ្នកស្រី យ៉ាង សុភ័ណ្ឌ ដែលដឹកនាំកម្មករធ្វើបាតុកម្មទាមទារដំឡើងប្រាក់ខែ ផ្ដល់បទសម្ភាសន៍នាទីលានប្រជាធិបតេយ្យ នៅថ្ងៃទី៣០ ធ្នូ ឆ្នាំ២០១២។
មេដឹកនាំសហព័ន្ធសហជីព និងសមាគមចំនួន ១៨ស្ថាប័ន ជូនដំណឹងទៅមន្ត្រីសាលារាជធានី និងសមាគមរោងចក្រស្ដីពីគម្រោងរៀបចំវេទិកាសាធារណៈនៅទីលានប្រជាធិបតេយ្យ ថ្ងៃទី៨ ខែមីនា មានមនុស្សចូលរួមរាប់ម៉ឺននាក់។ វេទិកានេះ មន្ត្រីសហជីពគ្រោងនឹងអញ្ជើញតំណាងស្ថាប័នពាក់ព័ន្ធនៃរាជរដ្ឋាភិបាលខ្លះ ឲ្យមកឆ្លើយបំភ្លឺស្ដីពីការទាមទារប្រាក់ខែគោលកម្មករ និងការចាប់ខ្លួនសកម្មជនសិទ្ធិមនុស្ស និងក្រុមកម្មករ កាលពីដើមខែមករា។
អ្នកស្រី យ៉ាង សុភ័ណ្ឌ ប្រធានសម្ព័ន្ធសហជីពកម្ពុជា បានឲ្យដឹងនៅថ្ងៃសុក្រ ទី២៨ ខែកុម្ភៈ ថា សហជីពទាំង ១៨ស្ថាប័ន បានដាក់លិខិតជូនសាលារាជធានីភ្នំពេញ ស្ដីពីការរៀបចំវេទិកាសាធារណៈ នៅព្រឹកថ្ងៃទី៨ ខែមីនា រួចហើយ។
អ្នកស្រីបន្តថា វេទិកានេះសហជីពក៏បានអញ្ជើញមន្ត្រីក្រសួងពាក់ព័ន្ធនៃរាជរដ្ឋាភិបាលខ្លះ មានដូចជា មន្ត្រីក្រសួងសេដ្ឋកិច្ច ក្រសួងយុត្តិធម៌ និងក្រសួងការងារ ជាដើម មកឆ្លើយបំភ្លឺជុំវិញការទាមទារដំឡើងប្រាក់ខែកម្មករ និងការចាប់ខ្លួនមេដឹកនាំសមាគមកម្មកររបស់សមត្ថកិច្ច។
សហជីពឲ្យដឹងថា វេទិកាសាធារណៈនៅព្រឹកថ្ងៃទី៨ ខែមីនា អាចមានកម្មករ មន្ត្រីរាជការ និងពលរដ្ឋប្រមាណ ៣ម៉ឺននាក់ចូលរួម។
ទោះយ៉ាងណា អ្នកស្រី យ៉ាង សុភ័ណ្ឌ បញ្ជាក់ថា វេទិកាសាធារណៈនេះមិនទាន់មានការឆ្លើយតបពីស្ថាប័នពាក់ព័ន្ធណាមួយទេ នៅថ្ងៃសុក្រ ទី២៨ ខែកុម្ភៈ។ ប៉ុន្តែ ជំហរសហជីពនឹងបន្តរៀបចំពិធីនេះតាមការគ្រោងទុក៖ «យើងអញ្ជើញឯកឧត្តមរដ្ឋមន្ត្រី លោក គាត ឈន់ ដែលនាយករដ្ឋមន្ត្រីប្រកាសថា គាត់ជាប្រធានគណៈកម្មការប្រាក់ឈ្នួលកម្មករ។ លោក ជីវ កេង ប្រធានតុលាការ និងឯកឧត្តម អ៊ឹត សំហេង រដ្ឋមន្ត្រីក្រសួងការងារ ដើម្បីឲ្យគាត់មកឆ្លើយបំភ្លឺរឿងប្រាក់ឈ្នួលកម្មករ»។
ទាក់ទិនបញ្ហានេះ លោកនាយករដ្ឋមន្ត្រី ហ៊ុន សែន ប៉ុន្មានថ្ងៃមកនេះបានប្រកាសដកបម្រាមប្រមូលផ្តុំមានមនុស្សលើសពី ១០នាក់ ឲ្យមកធម្មតាវិញ។ ទន្ទឹមគ្នានេះ លោកបានព្រមានដល់ក្រុមមេដឹកនាំសហជីព ដែលដឹកនាំកម្មករធ្វើបាតុកម្ម ថាអាចឈានដល់រោងចក្របិទទ្វារនាថ្ងៃអនាគត។
ករណីនេះដែរ សម្រាប់មន្ត្រីក្រសួងមហាផ្ទៃ និងសាលារាជធានីភ្នំពេញ បានឲ្យដឹងថា ទោះបីប្រមុខដឹកនាំបានដកបម្រាមជួបជុំចេញក្តី ប៉ុន្តែអ្នករៀបចំការប្រមូលផ្តុំណាមួយនាថ្ងៃអនាគត ត្រូវសុំច្បាប់ពីអាជ្ញាធរពាក់ព័ន្ធជាមុន។
លោក ឡុង ឌីម៉ង់ មន្ត្រីនាំពាក្យសាលារាជធានីភ្នំពេញ ថ្លែងថា បានទទួលលិខិតជូនដំណឹងរបស់មេដឹកនាំសហជីពរួចហើយ ហើយកំពុងដាក់ជូនថ្នាក់ដឹកនាំសម្រេច៖ «យើងបានទទួលហើយលិខិតរបស់សហជីព ហើយកំពុងដាក់ជូនថ្នាក់ដឹកនាំលោកអភិបាលលោកសម្រេចសិន»។
កាលពីថ្ងៃទី២៦ ខែកុម្ភៈ សហព័ន្ធសហជីពចំនួន១៨ បានផ្ញើលិខិតជូន លោក វ៉ាន់ ស៊ូអៀង ប្រធានសមាគមរោងចក្រកាត់ដេរកម្ពុជា ឲ្យចូលរួមរកដំណោះស្រាយលើការទាមទារចំនួន ៧ចំណុច របស់ពួកគេ មានដូចជា ស្នើដោះលែងមនុស្ស ២១នាក់ ស្នើសុំចរចាដំឡើងប្រាក់ខែកម្មករ ១៦០ដុល្លារ និងស្នើឲ្យដកពាក្យបណ្ដឹងតំណាងសហជីព និងកម្មករ ជាដើម។
ទាក់ទិនបញ្ហានេះ លោក កេន លូ អគ្គលេខាធិការសមាគមរោងចក្រកាត់ដេរ ធ្លាប់បានឲ្យដឹងថា សមាគមគ្មានសិទ្ធិសម្រេចទៅលើចំណុចទាំង៧ របស់មេសហជីពកម្មករទេ ដោយអះអាងថា បញ្ហាទាំងនេះជាបន្ទុករបស់រដ្ឋាភិបាល ឬច្បាប់ជាអ្នកដោះស្រាយ។
យ៉ាងណាក៏ដោយ មន្ត្រីសហជីពកម្មករថ្លែងថា បើសិនជាមិនមានដំណោះស្រាយណាមួយពីផ្នែកពាក់ព័ន្ធ ទៅលើសំណូមពរទាំង ៧ចំណុចរបស់ខ្លួនទេ មហាកូដកម្មទ្រង់ទ្រាយធំរបស់ក្រុមកម្មករនៅទូទាំងប្រទេស ដែលគ្រោងធ្វើចាប់ពីថ្ងៃទី១២ ខែមីនា ខាងមុខ ទំនងជាមិនអាចជៀសផុតទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សាលាដំបូងរាជធានីភ្នំពេញ តម្កល់សាលក្រមកំបាំងមុខទៅលើប្រធានសហជីព លោក ម៉ម រិទ្ធី ឱ្យជាប់ពន្ធនាគារ ១៨ខែ
- សភាអឺរ៉ុប ជំរុញឱ្យសើរើប្រព័ន្ធអនុគ្រោះពន្ធ EBA នៅសល់៨០% និងដាក់ទណ្ឌកម្មជាក់លាក់លើរដ្ឋាភិបាលកម្ពុជា
- លោក ហ៊ុន សែន ស្នើមេដឹកនាំចិនឱ្យផ្ដល់ជំនួយ និងប្រាក់កម្ចីបន្ថែម ក្នុងគ្រាដែលកម្ពុជាអាចប្រឈមនឹងទណ្ឌកម្មសេដ្ឋកិច្ចពីសំណាក់សហភាពអឺរ៉ុប
- អ្នកវិភាគជំរុញឱ្យលោក ហ៊ុន ម៉ាណែត ឱ្យក្លាហានហ៊ាននិយាយជាមួយអ្នកសារព័ត៌មាន
- លោក ហ៊ុន សែន ប្ដេជ្ញាបន្តប្រកាន់ជំហរគោលនយោបាយចិនតែមួយ និងថា ប្រទេសចិនបានជួយនយោបាយកម្ពុជាឱ្យមានឯករាជ្យ
