តើ ជួប សម្លាប់ ជា​នរណា​ហើយ​មាន​ស្ថានភាព​ដូចម្ដេច​ក្នុង​ពន្ធនាគារ?

ដោយ យ៉ង ចាន់តារា
2023.07.09
តើ ជួប សម្លាប់ ជា​នរណា​ហើយ​មាន​ស្ថានភាព​ដូចម្ដេច​ក្នុង​ពន្ធនាគារ? ជន​ត្រូវ​ចោទ ជួប សម្លាប់ ដែល​គេ​ស្គាល់​ឈ្មោះ​ពិត​ថា អឿត អាង ពេល​នាំ​ចេញ​ក្រោយ​សាកសួរ នៅ​សាលាដំបូង​រាជធានី​ភ្នំពេញ កាល​ពី​ថ្ងៃ​ទី​១៦ ខែ​កញ្ញា ឆ្នាំ​២០១៦។
RFA File

តើ​លោក​អ្នកនាង​នៅ​ចងចាំ​ដែរ​ឬ​ទេ អំពី​បុរស​ម្នាក់​ឈ្មោះ អឿត អាង ដែល​ហៅ​ខ្លួន​ឯង​ថា ជួប សម្លាប់ នោះ? បុរស​ម្នាក់​នេះ គឺ​ជា​បុគ្គល​តែ​ម្នាក់​គត់​ដែល​កំពុង​ជាប់​ទោស​ក្នុង​សំណុំរឿង​ឃាតកម្ម​លើ​បណ្ឌិត កែម ឡី អ្នក​វិភាគ​នយោបាយ និង​សង្គម​ដ៏​មាន​ប្រជាប្រិយភាព កាល​ពី​ឆ្នាំ​២០១៦។ តើ ជួប សម្លាប់ មាន​ប្រវត្តិ​ដូចម្ដេច ហើយ​តើ​ស្ថានភាព​របស់​គាត់​ក្នុង​ពន្ធនាគារ​យ៉ាងណា​ដែរ?

អឿត អាង ឬ ជួប សម្លាប់ កំពុង​ជាប់​ឃុំ​ក្នុង​ពន្ធនាគារ​ព្រៃស តាម​អំណាច​សាលក្រម​ស្ថាពរ​របស់​តុលាការ​ក្រុង​ភ្នំពេញ ក្នុង​សំណុំរឿង​ឃាតកម្ម​លើ​បណ្ឌិត កែម ឡី។ តុលាការ​បាន​ផ្ដន្ទាទោស​រូប​គេ​ឱ្យ​ជាប់​ពន្ធនាគារ​អស់​មួយ​ជីវិត​ពី​បទ «ឃាតកម្ម​គិត​ទុក​ជា​មុន» និង «កាន់កាប់​អាវុធ​ដោយ​គ្មាន​ការ​អនុញ្ញាត» កាល​ពី​ចុង​ខែ​មីនា ឆ្នាំ២០១៧។

អ្នកនាំពាក្យ​អគ្គនាយកដ្ឋាន​ពន្ធនាគារ​នៃ​ក្រសួង​មហាផ្ទៃ លោក នុត សវនា អះអាង​ថា ស្ថានភាព​របស់ អឿត អាង នៅ​ក្នុង​ពន្ធនាគារ មិន​មាន​អ្វី​ខុស​ប្រក្រតី​នោះ​ទេ ពោល​គឺ​ទណ្ឌិត​រូប​នេះ​កំពុង​ជាប់ឃុំ​ជាមួយ​អ្នក​ទោស​ដទៃ​ទៀត​ក្នុង​ពន្ធនាគារ។ លោក​បញ្ជាក់​ថា មិន​មាន​ករណី​ស្នើ​លើក​លែង​ទោស ឬ​បន្ធូរ​បន្ថយ​ណាមួយ​ចំពោះ​ទណ្ឌិត​រូប​នេះ​ទេ។

លោក នុត សវនា៖ «ដាក់​ដូច​ជន​ជាប់​ឃុំ​ធម្មតា​តើ អត់​មាន​ដាក់​ដោយ​ឡែក​អ្វី​ទេ។ ខ្ញុំ​គិត​ថា ដូចជា​មិន​មាន​អ្វី​ខុស​ប្រក្រតី​ទេ។ ប្រសិនបើ​មាន​បញ្ហា ហ្នឹង​ខាង​ក្រោម​គេ​រាយការណ៍​មក​ហើយ ដូចជា​អត់​មាន​ឮ​ព័ត៌មាន​អ្វី​ខុស​ប្រក្រតី​ពី​គាត់​ផង»

អឿត អាង បាន​ជាប់​ឃុំ​អស់​រយៈពេល ៧ ឆ្នាំ​មក​ហើយ ចាប់​តាំង​ពី​មាន​អំពើ​ឃាតកម្ម​លើ​បណ្ឌិត កែម ឡី កាល​ពី​ថ្ងៃ​ទី១០ ខែ​កក្កដា ឆ្នាំ២០១៦។

ប្រវត្តិ​សង្ខេប

អឿត អាង កើត​នៅ​ឆ្នាំ ១៩៧២ ក្នុង​ភូមិ​ទន្លេស ឃុំ​នគរភាស ស្រុក​អង្គរជុំ ខេត្ត​សៀមរាប។ លោក​បាន​រស់នៅ​ជាមួយ​ម្ដាយ​នៅ​ឃុំ​នគរភាស​នេះ រហូត​ដល់​អាយុ ១០​ឆ្នាំ ទើប​ផ្លាស់​ទៅ​រស់នៅ​ជាមួយ​អ៊ំប្រុស​របស់​លោក​នៅ​ឃុំ​គោកដូង ស្រុក​អង្គរជុំ។ លោក​បាន​ចូល​ធ្វើ​ជា​ទាហាន​របប​សាធារណរដ្ឋ​ប្រជាមានិត​កម្ពុជា​នៅ​អាយុ ១៥​ឆ្នាំ តែ​ក្រោយ​មក ក៏​ទៅ​ធ្វើ​ជា​ទាហាន​ខ្មែរ​ក្រហម​វិញ ដោយ​ពុំ​ដឹង​មូលហេតុ។

ក្រោយ​ឈប់​ធ្វើ​ជា​ទាហាន អឿត អាង បាន​ទៅ​ធ្វើ​ជា​កម្មករ​ស៊ីឈ្នួល​គេ​នៅ​ប្រទេស​ថៃ អស់​រយៈពេល​ជាច្រើន​ឆ្នាំ មុន​នឹង​ត្រឡប់​មក​បួស​ជា​សង្ឃ នៅ​ស្រុក​កំណើត​វិញ។ អឿត អាង បួស​បាន​ប្រមាណ ៤ វស្សា ប៉ុន្តែ​មិន​បាន​សម​ប្រកប​ជា​អ្នក​កាន់​សីល​នោះ​ទេ។ លោក​ត្រូវ​បាន​បណ្ដេញ​ចេញ​ពី​វត្ត​ចំនួន ៣ ដង ដោយសារ​តែ​មិន​គោរព​បដិបត្តិ​ព្រះធម៌​ឱ្យ​បាន​ត្រឹមត្រូវ ចូលចិត្ត​និយាយ​អួតអាង​ហួស​មាឌ ចេញ​ពី​វត្ត​យូរ​ថ្ងៃ ដោយ​គ្មាន​ដំណឹង និង​មាន​រឿង​អាស្រូវ​ស្នេហា​ក្នុង​ពេល​បួស​ជា​សង្ឃ។

ព្រះចៅ​អធិការ​វត្ត​ប្រាសាទ​ធ្នង់ ហៅ​វត្តក្រឡាញ់ ក្នុងស្រុកអង្គរជុំ ព្រះអង្គ សោម សឿន មាន​ថេរ​ដីកា​ប្រាប់​អាស៊ីសេរី​កាល​ពី​ឆ្នាំ​២០១៧ ថា អឿត អាង ជា​អនក្ខរជន ឬ​ជន​មិន​ចេះ​អក្សរ ចូលចិត្ត​អួតអាង​រឿង​បាញ់​បោះ ឆាប់​ជឿ​គេ និង​ងាយ​លុះ​តាម​ការ​អូស​ទាញ​របស់​អ្នក​ដទៃ។

ព្រះអង្គ សោម សឿន «ភាគច្រើន​លោក​និមន្ត​ទៅ​ក្រៅ អត់​ដឹង​ពី​មូលហេតុ។ ជួនកាល​ទៅ​កន្លែង​ដែល​អគោចរ មាន​ន័យ​ថា កន្លែង​ដែល​គេ​ហាម​ប្រាម គេ​អត់​ឱ្យ​ទៅ។ សម្រាប់​ព្រះសង្ឃ​ហាមប្រាម​ដូចជា​កន្លែង​ទីប្រជុំជន ផ្សារ កន្លែង​ស្រី កន្លែង​ទាហាន​ជាដើម អាហ្នឹង​កន្លែង​អគោចរ ព្រះសង្ឃ​មិន​គួរ​នឹង​ទៅ​ទេ។ ហើយ​សម្ដី​សំដៅ ការ​និយាយ​អ្វី​ហ្នឹង គឺ​អួត​ហួស និយាយ​ហួស​អ្វី​ដែល​ខ្លួន​ឯង​ធ្វើ»

តួអង្គ​តែ​ម្នាក់​គត់​ក្នុង​រឿង​ក្ដី​ឃាតកម្ម​ដ៏​កក្រើក

តាម​ការ​បញ្ជាក់​ពី​ប្រភព​ជាច្រើន ទណ្ឌិត អឿត អាង គឺជា​ជន​ក្រីក្រ គ្មាន​មុខ​របរ និង​ទីលំនៅ​ពិត​ប្រាកដ ព្រមទាំង​មាន​ប្រវត្តិ​មិន​ល្អ​ប៉ុន្មាន​ឡើយ។ ប៉ុន្តែ​បុគ្គល​ដែល​រក​តែ​បាយ​ហូប​គ្មាន និង​ដើរ​សុំ​ផ្ទះ​គេ​ជ្រក​រូប​នេះ បែរ​ជា​អះអាង​ថា បណ្ឌិត កែម ឡី ជំពាក់​លុយ​គេ ៣ ពាន់​ដុល្លារ​ទៅ​វិញ។ គឺ​រឿង​លុយ ៣ ពាន់​ដុល្លារ​នេះ​ហើយ ដែល អឿត អាង អះអាង​ដោយ​គ្មាន​ភស្តុតាង និង​សាក្សី​ថា ជា​មូលហេតុ​ដែល​រូប​គេ​បាញ់​សម្លាប់​បណ្ឌិត កែម ឡី។ ដោយ​មិន​បាន​ស៊ើប​អង្កេត​ត្រឹមត្រូវ និង​ស៊ីជម្រៅ ពួក​មន្ត្រី​តុលាការ​រៀន​អស់​ថ្នាក់​នៅ​ស្រុក​ខ្មែរ តាំង​ពី​សាលាដំបូង​ដល់​តុលាការ​កំពូល​ក៏​នាំ​គ្នា​សម្រេច​ក្ដី​តាម​គ្នា គឺ​កាត់ទោស អឿត អាង ឱ្យ​ជាប់គុក​អស់​មួយ​ជីវិត ប៉ុន្តែ​បន្សល់​ទុក​នូវ​មន្ទិល​សង្ស័យ​ជាច្រើន​ដល់​គ្រួសារ​បណ្ឌិត កែម ឡី និង​មជ្ឈដ្ឋាន​ជាតិ និង​អន្តរជាតិ ដោយ​ពួកគេ​ចាត់​ទុក​ថា ជា​សាលក្រម​ក្លែងក្លាយ

សាលក្រម​ក្លែងក្លាយ គឺ​ដោយសារ​រឿង​ក្ដី​នេះ​មិន​បាន​ស៊ើប​អង្កេត​គ្រប់ជ្រុងជ្រោយ​ទៅ​លើ​អង្គហេតុ​ជាច្រើន ដោយ​តុលាការ​ព្យាយាម​កាត់​តម្រឹម​ត្រឹម​បុគ្គល អឿត អាង តែ​ម្នាក់​គត់ ហើយ​ដែល​មិន​ប្រាកដ​ថា គាត់​ជា​ឃាតក​ពិត​សម្លាប់​បណ្ឌិត កែម ឡី ឬ​អត់​នោះ​ទៀតលើសពីនេះ សាលក្រម​នេះ​មិន​បាន​ជម្រះ​មន្ទិល និង​លាង​សម្អាត​កេរ្តិ៍​ឈ្មោះ បណ្ឌិត កែម ឡី ដែល អឿត អាង ចោទ​ថា បណ្ឌិត កែម ឡី ជំពាក់​លុយពាន់​ដុល្លារ មិន​ព្រម​សង ទើប​គាត់​ផ្ដាច់​ជីវិត​របស់​លោក​ចោល​នោះ​ថែម​ទៀងផ

សេចក្ដី​សម្រេច​របស់​តុលាការ​ដែល​គេ​មើល​ឃើញ​ថា ជា​យុត្តិធម៌​ក្លែងក្លាយ​នេះ បាន​ធ្វើ​ពលរដ្ឋ​ខ្មែរ​ជាច្រើន និង​សហគមន៍​អន្តរជាតិ​ផង នាំ​គ្នា​បញ្ចេញ​ប្រតិកម្ម​មិន​ពេញ​ចិត្ត និង​ទាមទារ​រក​យុត្តិធម៌​បន្ថែម​ទៀត​ជូន​បណ្ឌិត កែម ឡី។ ទំនង​ជាដើម្បី​ស្អំ​ចិត្ត​មហាជន តុលាការ​ក៏​ធ្វើ​ជា​បំបែក​សំណុំរឿង​មួយ​ទៀត​ដើម្បី​ស៊ើបអង្កេត​រក​អ្នក​ពាក់ព័ន្ធ ប៉ុន្តែ ៧ ឆ្នាំ​មក​នេះ សំណុំរឿង​ទីពីរ​នេះ​ស្ងាត់​ដូច​ចោរ​លួច​សេះ។

អ្នកនាំពាក្យ​ក្រសួង​យុត្តិធម៌ លោក ជិន ម៉ាលីន និង​មន្ត្រី​តុលាការ​ក្រុង​ភ្នំពេញ​ធ្លាប់​អះអាង​ដដែលៗ​ថា សំណុំរឿង​ទីពីរ​នេះ​នៅ​ស្ថិត​ក្រោម​ការ​ស៊ើបអង្កេត​នៅ​ឡើយ ប៉ុន្តែ​ខាង​នគរបាល​យុត្តិធម៌​បាន​អះអាង​ថា ពួកគេ​មិន​ដែល​ទទួល​បាន​ដីកា​ពី​តុលាការ​ដើម្បី​ឱ្យ​ស៊ើបអង្កេត​រក​អ្នក​ពាក់ព័ន្ធ​ក្នុង​សំណុំរឿង​ទីពីរ​នេះ​ឡើយ។

អ្នកនាំពាក្យ​អគ្គស្នងការដ្ឋាន​នគរបាល​ជាតិ លោក ឆាយ គឹមខឿន ធ្លាប់​ប្រាប់​វិទ្យុ​អាស៊ីសេរី​កាល​ពី​ឆ្នាំ​២០២០ ថា មន្ត្រី​នគរបាល​យុត្តិធម៌​មិន​បាន​ស៊ើបអង្កេត​រឿង​នេះ​ទៀត​ទេ ព្រោះ​គ្មាន​បញ្ជា​ពី​តុលាការ។

លោក ឆាយ គឹមខឿន៖ «យើង​ជា​មន្ត្រីនគរបាល​យុត្តិធម៌​ ប្រសិន​បើ​ព្រះរាជអាជ្ញា ឬតុលាការ​មិន​ចេញ​បញ្ជា​អ្វី​ថ្មី យើង​អត់​មានធ្វើ​អ្វី​ទៀត​ទេ។ ដោយ​ឡែក អ្នក​ដែល​មិន ​អស់​ចិត្ត អ្នក​មិន​សុខ​ចិត្ត​ហ្នឹង គាត់​គ្រាន់​តែ​បញ្ចេញ​ទស្សនៈ ការ​យល់​ឃើញ​ជា​ឯកជន​របស់​គាត់​ទេ​ តែ​គាត់​ក៏​អត់​មាន​ឆន្ទានុសិទ្ធិ​ ឬ​គ្មាន​អំណា​ច​ដូច​តុលាការ​​ដើម្បី​បញ្ជា​មកឱ្យ​​ខាង​មន្ត្រីយុត្តិធម៌​​អនុវត្តដែរ»

វិទ្យុ​អាស៊ីសេរី​បាន​ព្យាយាម​ទាក់ទង​លោក ឆាយ គឹមខឿន ជា​បន្តបន្ទាប់​ដើម្បី​សាកសួរ​រឿង​នេះ​បន្ថែម ប៉ុន្តែ​លោក​លែង​លើក​ទូរស័ព្ទ។ វិទ្យុ​អាស៊ី​សេរី​ក៏​បាន​ព្យាយាម​ទាក់ទង​អ្នកនាំពាក្យ​តុលាការ​ក្រុង​ភ្នំពេញ លោក អ៊ី រិន្ទ និង​អ្នកនាំពាក្យ​អយ្យការ​អម​តុលាការ​ក្រុង​ភ្នំពេញ លោក ប្លង់ សុផល ដើម្បី​សាកសួរ​រឿង​នេះ​ដែរ ប៉ុន្តែ​មិន​ទទួល​បាន​ការ​ឆ្លើយ​តប​នោះ​ទេ។

រីឯ​អ្នកនាំពាក្យ​អគ្គនាយកដ្ឋាន​ពន្ធនាគារ​លោក នុត សវនា វិញ លោក​បញ្ជាក់​ថា ខាង​ពន្ធនាគារ​មិន​ធ្លាប់​ទទួល​បាន​លិខិត​ពី​ខាង​តុលាការ​បង្គាប់​ឱ្យ​បញ្ជូន​ទណ្ឌិត អឿត អាង ទៅ​សាកសួរ ឬ​បំពេញ​នីតិវិធី​ណាមួយ​ទៀត​នោះ​ដែរ។

លោក នុត សវនា៖ «គេ​កាត់​ទោស​អស់​ហើយ អ៊ីចឹង​មាន​ជាប់​នីតិវិធី​អ្វី​ទៀត។ [សាលក្រម] ចូល​ជា​ស្ថាពរ​ហើយ កំពុង​អនុវត្ត​មក​ដល់​ថ្ងៃ​នេះ។ ដូចជា​អត់​មាន​អ្វី​ត្រូវ​ឡើង​តុលាការ​ទៀត​ទេ»

ជាប់ឃុំ​ដោយ​កម្រ​មាន​អ្នក​បាន​ទៅ​ក្បែរ

អ្នក​ធ្លាប់​ឃុំ​ជា​ច្រើន​នាក់​ដែល​អាស៊ី​សេរី​បាន​សម្ភាស​ឱ្យ​ដឹង​ថា ជួប សម្លាប់ មិន​ត្រូវ​បាន​ឃុំខ្លួន​ជាមួយ​អ្នក​ទោស​នយោបាយ ឬ​សកម្មជន​នោះ​ទេ ដោយ​ខាង​ពន្ធនាគារ​ឃុំ​ខ្លួន​គាត់​ជាមួយ​អ្នកទោស​ក្នុង​សំណុំរឿង​ចោរកម្ម និង​បទឧក្រិដ្ឋ​ផ្សេង​ទៀត។ ជាមួយ​គ្នា​នេះ អាជ្ញាធរ​ពន្ធនាគារ​ក៏​មិន​អនុញ្ញាត​ឱ្យ អឿត អាង ជួប​អ្នក​ជាប់​ឃុំ​នយោបាយ និង​សកម្មជន​នោះ​ដែរ។

អនុប្រធាន​គណបក្ស​ភ្លើង​ទៀន លោក រ៉ុង ឈុន ធ្លាប់​បាន​ដាក់​លិខិត​ទៅ​ខាង​មន្ត្រី​ពន្ធនាគារ ដើម្បី​ស្នើសុំ​ជួប អឿត អាង ដោយ​ផ្ទាល់ ពេល​លោក​កំពុង​ជាប់​ឃុំ​ក្នុង​ឆ្នាំ ២០២០ ប៉ុន្តែ​សំណើ​នេះ​ត្រូវ​បាន​បដិសេធ។

ត្រង់​ចំណុច​នេះ អ្នកនាំពាក្យ​អគ្គនាយកដ្ឋាន​ពន្ធនាគារ លោក នុត សវនា បកស្រាយ​ថា អឿត អាង ជា​អ្នក​ទោស​ឧក្រិដ្ឋ ដែល​មន្ត្រី​ពន្ធនាគារ​មិន​អាច​អនុញ្ញាត​ឱ្យ​ជួប​បាន​នោះ​ទេ។

លោក នុត សវនា៖ «ជួប​មើល​តែ​មនុស្ស​ទូទៅ​សាធារណៈ​យ៉ាង​ម៉េច​ហ្នឹង? ជនល្មើស​ប្រភេទ​កម្រិត​សន្តិសុខ​ខ្ពស់​បំផុត​ហើយ ចង់​ជួប​ដូច​នៅ​តាម​ផ្លូវ តាម​ផ្សារ​យ៉ាងម៉េច»

ចំណុច​មួយ​ទៀត​ដែល​ធ្វើ​ឱ្យ អឿត អាង ខុស​ពី​អ្នក​ជាប់ឃុំ​ផ្សេងទៀត គឺ​គ្រួសារ និង​សាច់ញាតិ​របស់​ទណ្ឌិត​រូប​នេះ​មិន​បាន​ទៅ​សួរ​សុខទុក្ខ​គាត់​នៅ​ក្នុង​ពន្ធនាគារ​នោះ​ទេ​ជាច្រើន​ឆ្នាំ​មក​នេះ។

ប្រពន្ធ និង​សាច់ញាតិ​របស់ អឿត អាង ដែល​កំពុង​រស់នៅ​ស្រុក​អង្គរជុំ ខេត្ត​សៀមរាប បាន​ប្រាប់​វិទ្យុ​សំឡេង​ប្រជាធិបតេយ្យ (VOD) កាល​ពី​ឆ្នាំ២០២២ ថា ពួកគាត់​មិន​ដែល​បាន​ទៅ​សួរ​សុខទុក្ខ អឿត អាង នៅ​ពន្ធនាគារ​ព្រៃស​នោះ​ឡើយ ហើយ​ក៏​មិន​ទទួល​បាន​ព័ត៌មាន​ណាមួយ​អំពី​ស្ថានភាព​គាត់​នៅ​ក្នុង​ពន្ធនាគារ​នោះ​ដែរ។

នាយក​ទទួល​បន្ទុក​កិច្ចការ​ទូទៅ​នៃ​អង្គការ​សិទ្ធិមនុស្ស​លីកាដូ (LICADHO) លោក អំ សំអាត មាន​ប្រសាសន៍​ថា វា​ជា​រឿង​ចម្លែកដែល​ជនជាប់ឃុំ​ម្នាក់​ គ្មាន​សាច់ញាតិ ឬគ្រួសារ​មក​សួរសុខទុក្ខ​អស់រយៈពេល​ជាច្រើន​ឆ្នាំ​មក​នេះ។ លោក​បន្ថែម​ថា សំណុំរឿង​ឃាតកម្ម​លើ​បណ្ឌិត កែម ឡី នៅតែ​បង្កប់​រឿងរ៉ាវ​អាថ៌កំបាំង​ជាច្រើន ខណៈ​សំណុំរឿង​​ទីពីរ​ដែល​ត្រូវ​ស៊ើបអង្កេត​រក​អ្នក​ពាក់ព័ន្ធ​ផ្សេង​ទៀត​នោះវិញ បែរ​ជា​ស្ងប់ស្ងាត់​បាត់ឈឹង។

លោក អំ សំអាត៖ «ខាង​អង្គការ​សង្គម​ស៊ីវិល​យើង​ក៏​មិន​ដែល​បាន​ជួប​ជាមួយ​គាត់​ដែរ ជាពិសេស​គាត់​ស្ថិត​ក្នុង​លក្ខខណ្ឌ​មួយ​ដែល​គេ​មាន​ភាព​ប្រយ័ត្នប្រយែង​ផង​ដែរ​ក្នុង​ការ​ជួប​ជាមួយ​អ្នកណា​មួយ។ អ៊ីចឹង​រឿង​នេះ​វា​នៅ​តែ​ភ្ជាប់​ដោយ​អាថ៌កំបាំង បើ​សំណុំរឿង​ទីពីរ​មិន​ទាន់​ត្រូវ​បាន​បំបែក​នោះ»

យុត្តិធម៌​នៅ​ឆ្ងាយ​ដូច​ជើង​មេឃ

ករណី​ឃាតកម្ម​លើ​បណ្ឌិត កែម ឡី នេះ ត្រូវ​បាន​អ្នកសង្កេតការណ៍ និង​អ្នក​ជំនាញ​សិទ្ធិមនុស្ស​អន្តរជាតិ​ចាត់​ទុក​ថា ជា​ឃាតកម្ម​នយោបាយ។ ហេតុដូច្នេះ យុត្តិធម៌​ពិត​ប្រាកដ​ទំនងជា​មិន​អាច​កើត​មាន​នោះ​ទេ ​ក្រោម​របប​ដឹកនាំ​របស់​លោក ហ៊ុន សែន ព្រោះ​របប​ដឹកនាំ​មួយ​នេះ​បាន​ដាំដុះ​ពូជ «និទណ្ឌភាព ឬ​ទម្លាប់​ឱ្យ​ជនល្មើស​រួច​ទោស» ​ជាង ៣ ទសវត្សរ៍​មក​ហើយ ជាពិសេស​ជនល្មើស និង​អ្នក​ពាក់ព័ន្ធ​ដែល​សម្លាប់​សកម្មជន ឬ​អ្នក​នយោបាយ​ប្រឆាំង ព្រមទាំង​សកម្មជន​ការពារ​សិទ្ធិ​កម្មករ និង​បរិស្ថាន

ម្យ៉ាងវិញទៀត ពេល​វេលា​កាន់​តែ​រំកិល​ទៅ​មុខ អឿត អាង ដែល​ជា​ទណ្ឌិត​ផង និង​ជា​សាក្សី​ដ៏​សំខាន់​ម្នាក់​ផង​នោះ ក៏​កាន់តែ​មាន​វ័យ​ចាស់ ដូច្នេះ​រឿងរ៉ាវ​ទាំងឡាយ​ដែល​ពលរដ្ឋ​ខ្មែរ​មួយ​នគរ​ចង់​ដឹង​ចង់ឮ​ថា តើ​អ្នកណា​ខ្លះពាក់ព័ន្ធ​​ក្នុង​រឿង​ក្ដី​ឃាតកម្ម​ដ៏​កក្រើក​មួយ​នេះ ក៏​អាច​នឹង​កប់​បាត់​ទៅ​តាម​នោះ​ដែរ ប្រសិនបើ អឿត អាង លែង​មាន​វត្តមាន​លើ​ភព​ផែនដី​នេះ​នៅ​ថ្ងៃ​ណា​មួយ​នោះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។