សាលាក្រុង​ភ្នំពេញ​ផ្អាក​ឡានក្រុង​សាធារណៈ​និង​កាណូត​ដើម្បី​ទប់ស្កាត់​ការ​ឆ្លង​ជំងឺ​កូវីដ​១៩

ដោយ មួង ណារ៉េត
2020-03-27
អ៊ីម៉ែល
មតិ
Share
បោះពុម្ព
អ្នក​ធ្វើ​ដំណើរ​កំពុង​ប្រជ្រៀត​គ្នា​ឡើង​រថយន្ត​ក្រុង​ដឹក​ជញ្ជូន​ឥត​បង់​ថ្លៃ​ពី​ភ្នំពេញ​ទៅ​ខេត្ត​បន្ទាយមានជ័យ ដែល​សាលា​រាជធានី​ភ្នំពេញ​ផ្ដល់​ជា​សាធារណៈ។
អ្នក​ធ្វើ​ដំណើរ​កំពុង​ប្រជ្រៀត​គ្នា​ឡើង​រថយន្ត​ក្រុង​ដឹក​ជញ្ជូន​ឥត​បង់​ថ្លៃ​ពី​ភ្នំពេញ​ទៅ​ខេត្ត​បន្ទាយមានជ័យ ដែល​សាលា​រាជធានី​ភ្នំពេញ​ផ្ដល់​ជា​សាធារណៈ។
រូប​ពី៖ ហ្វេសប៊ុក​រដ្ឋបាល​សាលា​រាជធានី​ភ្នពេញ ថ្ងៃ​ទី៣១ ខែ​កញ្ញា ឆ្នាំ២០១៩

អាជ្ញាធរ​រាជធានី​ភ្នំពេញ បាន​សម្រេច​ផ្អាក​សេវា​ដឹកជញ្ជូន​ពលរដ្ឋ​តាម​រថយន្តក្រុង​សាធារណៈ និង​កាណូត​សាធារណៈ​ចាប់ពី​ថ្ងៃ​ទី​២៦​មីនា តទៅ ដើម្បី​ទប់ស្កាត់​ការ​រាតត្បាត​ជំងឺ​កូ​វីដ​១៩ (Covid-19)​។ ឯ​ក្រសួង​អប់រំ យុវជន​និង​កីឡា ក៏បាន​ចាប់ផ្ដើម​អនុញ្ញាត​ឱ្យ​មន្ត្រីរាជការ​ក្នុង​ក្រសួង​ធ្វើការ​ពី​ផ្ទះ​ទៅ ដើម្បី​បង្ការ​ជំងឺ​នេះ​ដែរ​។​

សាលា​រាជធានី​ភ្នំពេញ ឱ្យ​ដឹង​ថា ការ​ផ្អាក​សេវា​សាធារណៈ​ទាំងនេះ​ជា​ការ​រួមចំណែក​ជាមួយ​រដ្ឋាភិបាល និង​ក្រសួង​សុខាភិបាល ក្នុង​ការ​ទប់ស្កាត់​ការ​រីក​រាលដាល និង​ទប់ស្កាត់​ការ​ចម្លង​ជំងឺ​កូវីដ​១៩​។ អាជ្ញាធរ​ស្នើសុំ​ឱ្យ​ពលរដ្ឋ ដែល​ប្រើប្រាស់​សេវា​រថយន្តក្រុង​សាធារណៈ និង​កាណូត​យោគយល់ និង​មិនទាន់​បញ្ជាក់​ថ្ងៃ​បើក​ឱ្យ​ដំណើរការ​វិញ​ទេ​។ ពលរដ្ឋ​រស់នៅ​រាជធានី​ភ្នំពេញ ឱ្យ​ដឹង​ថា បើ​ទោះ​មិន​មាន​ការ​ផ្អាក ក៏​ពលរដ្ឋ​មិនសូវ​ទៅ​ជិះ​រថយន្តក្រុង និង​កាណូត​សាធារណៈ​ដូច​មុន​ដែរ ដោយសារ​ពលរដ្ឋ​ភ័យ​ព្រួយ​ពី​ជំងឺ​កាច​សាហាវ​នេះ។

ប្រធាន​សមាគម​កម្មករ​កម្ពុជា​សេដ្ឋកិច្ច​ក្រៅ​ប្រព័ន្ធ លោក សុខ ឈុនអឿង យល់​ថា ការ​ផ្អាក​សេវាកម្ម​រថយន្តក្រុង​សាធារណៈ និង​កាណូត នៅ​ពេល​នេះ មិន​ទាល់​ខុស​ទេ គ្រាន់តែ​ធ្វើ​ឱ្យ​បាត់បង់​ប្រយោជន៍​កម្មករ​ខ្លះ ដែល​ធ្លាប់​ធ្វើដំណើរ​តាម​ឡានក្រុង​សាធារណៈ​ទៅ​ធ្វើ​ការ​។ លោក សុខ ឈុនអឿង បន្ត​ថា ក្រៅពី​សេវា​ដឹកជញ្ជូន​របស់​រដ្ឋអាជ្ញាធរ​ក៏​គួរ​រក​វិធី​ដោះស្រាយ​ចំពោះ​សេវា​ដឹកជញ្ជូន​តាម​រថយន្តក្រុង​របស់​ក្រុមហ៊ុន​ឯកជន និង​ឡាន​ដឹក​កម្មករ ដែល​ជា​បញ្ហា​ប្រឈម​របស់​អ្នក​ធ្វើ​ដំណើរ និង​កម្មករ​។ លោក​ថា អាជ្ញាធរ​ក្រុងភ្នំពេញ គួរតែ​ដោះស្រាយ​បញ្ហា​នេះ ដោយ​គួរ​ប្ដូរ​មធ្យោបាយ​ដឹក​កម្មករ​ទៅ​ធ្វើ​ការ​ពី​ការ​ជិះ​ឡាន​ឈរ​ប្រជ្រៀត​គ្នា ទៅជា​បំបែក​កម្មករ​ជា​ក្រុមៗ ឱ្យ​ជិះ​រ៉ឺម៉ក​សណ្ដោង​ឬ​ឱ្យ​អង្គុយ​ឆ្ងាយៗ​ពី​គ្នា៖ «យើង​មើល​ឃើញ សាលា​រាជធានី​ភ្នំពេញ បិទ​តែ​ឡាន​របស់​សាលា​រាជធានី​ភ្នំពេញ ហើយ​សម្រាប់​ឡានក្រុង​ដូច​អត់​មាន​ចាប់អារម្មណ៍​។ ជាពិសេស​ជាង​ហ្នឹង​ទៅទៀត ឡាន​ដឹក​កម្មករ​នៅ​រាជធានី​ភ្នំពេញ ដូចជា​មិន​សាក​សម​បណ្ដោយ​ទេ​សម្រាប់​សាលា​រាជធានី​ភ្នំពេញ​ណា»

មកដល់ពេលនេះ រដ្ឋាភិបាល​បាន​បង្ហាញ​វិធានការ​មួយ​ចំនួន ដើម្បី​ទប់ស្កាត់​ជំងឺ​កូវីដ​១៩ ដូចជា​ការ​បិទ​សាលារៀន​ទូទាំង​ប្រទេស​ឱ្យ​វ៉ាកង​មុន​កាលកំណត់ បង្កើន​វិធានការ​ផ្សព្វផ្សាយ​ពី​ជំងឺ​កូវីដ​១៩ ដល់​មូលដ្ឋាន បង្កើត​គណៈកម្មការ​ប្រឆាំង​ជំងឺ​កូវីដ រៀបចំ​មន្ទីរពេទ្យ សណ្ឋាគារ សាលារៀន​ត្រៀម​ទទួល​អ្នកជំងឺ​កូវីដ ជាដើម​។ ប៉ុន្តែ​វិធានការ​ទាំងឡាយ មិនទាន់​អាច​ធ្វើ​ឱ្យ​ពលរដ្ឋ​ទុកចិត្ត​ទាំងស្រុង​ទេ​។ ទន្ទឹម​នឹង​នោះ ពលរដ្ឋ​ខ្លះ​ក៏​បង្កើន​ការប្រុងប្រយ័ត្ន​ជាង​មុខ​ដែរ។

ស្រប​ពេល​គ្នា​នេះ​ក្រសួង​អប់រំ យុវជន និង​កីឡា ក៏បាន​បន្ថែម​វិធានការ​ទប់ស្កាត់​ការ​រាតត្បាត​ជំងឺ​កូវីដ​១៩​ថែមទៀត ដោយ​អនុញ្ញាត​ឱ្យ​មន្ត្រី​អប់រំ ធ្វើការ​នៅផ្ទះ​រៀង​ៗ​ខ្លួន តាម​ប្រព័ន្ធ​អនឡាញ (Online) ហើយ​ផ្អាក​ការ​ត្រួតពិនិត្យ​អវត្តមាន​ស្កែន (Scan) កាត និង​ក្រយៅដៃ (​ខ្ចៅដៃ​)​មួយរយៈ​។ រាល់​ឯកសារ​ត្រូវ​ធ្វើ​ឡើង​តាម​ប្រព័ន្ធ​ឌីជីថល (Digital)។ ប៉ុន្តែ​ត្រូវ​រៀបចំ វេន​ការងារ​ប្រចាំ​ការិយាល័យ​នីមួយៗ ឱ្យ​មាន​ដំណើរការ​។ ក្នុង​សេចក្ដីណែនាំ​ចុះ​នៅ​ថ្ងៃ​ទី​២៦ មីនា ក្រសួង​អប់រំ ក្រើនរំលឹក​ម្ដងទៀត​ហាម​ផ្ដាច់​មិន​ឱ្យ​មានការ​បង្រៀន​គួរ​ក្នុង​ពេល​យុទ្ធនាការ​ប្រឆាំង​ជំងឺ​កវីដ​១៩ ដាច់ខាត ហើយ​ក្រសួង​ព្រមាន​ប្រើ​វិធានការ​រដ្ឋបាល ប្រឆាំង​នឹង​គ្រូបង្រៀន​ណា​ល្មើស​ការណែនាំ​នេះ។

អ្នកនាំពាក្យ​ក្រសួង​អប់រំ យុវជន និង​កីឡា លោក រស់ សុវាចា ប្រាប់​អាស៊ីសេរី​បន្ថែម​ថា វិធានការ​របស់​ក្រសួង​អប់រំ កន្លងមក ជា​ការ​ទប់ស្កាត់​ការ​រីក​រាលដាល ជំងឺ​កូវីដ​១៩ ស្របតាម​ក្រសួងសុខាភិបាល និង​អង្គការ​សុខភាព​ពិភពលោក​កម្ពុជា៖ «ស្នើ​ឱ្យ​បងប្អូន​អ្នកសារព័ត៌មាន​ទាំងអស់ មេត្តា​ពិនិត្យ​លទ្ធភាព​បង្វែរ​មុំ​ផ្សព្វផ្សាយ​ដោយ​បន្ថែម​ខ្លឹមសារ​ស្ដីពី​វិធានការ​លើកកម្ពស់​អនាម័យ​របស់​បុគ្គលិក​អប់រំ​គ្រប់​លំដាប់​ថ្នាក់ និង​សិស្សានុសិស្ស​គ្រប់​កម្រិតសិក្សា ដោយ​យោង​លើ​ប្រភព​ព័ត៌មាន​របស់​ក្រសួង​អប់រំ យុវជន និង​កីឡា ក្រសួងសុខាភិបាល និង​អង្គការ​សុខភាព​ពិភពលោក ស្ដីពី​វិធានការ​ទប់ស្កាត់​ការ​រាល​ដាល​កូវីដ​១៩​។ ទង្វើ​នេះ អាច​មានគុណ​តម្លៃ​បន្ថែម​សម្រាប់​គ្រប់​ភាគី​ពាក់ព័ន្ធ»

ក្រៅពី​ក្រសួង​អប់រំ​ហើយ​នោះ​រដ្ឋសភា​ក៏បាន​ប្រកាស​ផ្លូវការ​ឱ្យ​បុគ្គលិក​ផ្នែក​រដ្ឋបាល​អាច​ធ្វើ​ការ​ពី​ផ្ទះ​បាន​ដែរ ដើម្បី​បង្ការ​ជំងឺ​កូវីដ។ ចំណែក​ក្រសួងការបរទេស​និង​សហប្រតិបត្តិការ​អន្តរជាតិ​និង​ក្រសួង​ឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍ ក៏​ត្រូវ​បាន​រដ្ឋមន្ត្រី​អនុញ្ញាត​ឱ្យ​ធ្វើការ​ពី​ផ្ទះ​ដែរ តែ​មិន​ប្រកាស​ផ្លូវការ​ទេ គឺ​តាមរយៈ​សារ​សំឡេង​បែក​ធ្លាយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល