រយៈពេល ២៥ឆ្នាំមកនេះ វិទ្យុអាស៊ីសេរីកាន់តែមានសារៈសំខាន់សម្រាប់មនុស្សរាប់លាននាក់ ដែលគាំទ្រចង់បានព័ត៌មានប្រកបដោយវិជ្ជាជីវៈ ការទទួលខុសត្រូវ និងផ្តល់អំណាចដល់អ្នកស្ដាប់
ថ្ងៃទី២៩ កញ្ញា គឺជាខួបលើកទី ២៥ឆ្នាំហើយ នៃការបង្កើតស្ថាប័នវិទ្យុអាស៊ីសេរី ( Radio Free Asia) ដែលមានទីស្នាក់ការកណ្ដាលនៅរដ្ឋធានីវ៉ាស៊ីនតោន (Washington DC) សហរដ្ឋអាមេរិក។
វិទ្យុអាស៊ីសេរី បានចាប់ផ្ដើមផ្សាយជាលើកដំបូងជាភាសាចិន កុកងឺ (Mandarin-language) នៅថ្ងៃទី២៩ ខែកញ្ញា ឆ្នាំ១៩៩៦។ មួយឆ្នាំក្រោយមក គឺនៅឆ្នាំ១៩៩៧ វិទ្យុអាស៊ីសេរី បានចាប់ផ្ដើមកម្មវិធីផ្សាយជាភាសាខ្មែរ ។
ប្រធានវិទ្យុអាស៊ីសេរី អ្នកស្រី ប៊េ ហ្វាង (Bay Fang) មានប្រសាសន៍នៅក្នុងសេចក្ដីប្រកាសព័ត៌មាន កាលពីថ្ងៃទី២៩ កញ្ញាថា" យើងអបអរខួប ២៥ ឆ្នាំនៃការបង្កើតស្ថាប័នវិទ្យុអាស៊ីសេរី។ ប៉ុន្មានឆ្នាំកន្លងមកនេះ យើងបានឃើញនូវការផ្លាស់ប្ដូរយ៉ាងច្រើននៅក្នុងប្រវត្តិសាស្ត្រ និងបច្ចេកវិទ្យា ដែលបានកែប្រែអំពីរបៀបរបបដែលយើង ប្រាស្រ័យទាក់ទងគ្នា របៀបដែលយើងឃើញគ្នាទៅវិញទៅមក និងអំពីរបៀបរបប ដែលយើងចែករំលែកព័ត៌មាន។ ទោះបីជាយ៉ាងនេះក្ដី អ្នកស្រី បន្ថែមថា ក្រៅពីនេះ យើងក៏ឃើញមាន ការផ្សព្វផ្សាយព័ត៌មានមិនពិតដ៏ស្មុគស្មាញដែរ ។ ការធ្លាក់ចុះនៃសេរីភាពសារព័ត៌មាននៅជុំវិញពិភពលោក ដោយសារតែរបបផ្ដាច់ការ និងតួអង្គ និយាយបង្កាច់បង្ខូចដទៃទៀតបានផ្លាស់ប្ដូរ និងកែប្រែមុខមាត់របស់ពួកគេ ទៅតាមពេលវេលា»។
អ្នកស្រីសង្កាត់ធ្ងន់ថា បញ្ហានេះហើយ ដែលធ្វើឱ្យកេរ្តិ៍ឈ្មោះ និងវិជ្ជាជីវៈរបស់វិទ្យុអាស៊ីសេរីកាន់តែមានសារសំខាន់សម្រាប់មនុស្សរាប់លាននាក់ដែលគាំទ្រយើង ដែលជាស្ថាប័នព័ត៌មានប្រកបដោយវិជ្ជាជីវៈ ប្រកបដោយការទទួលខុសត្រូវ និងផ្តល់អំណាចដល់អ្នកស្ដាប់/ទស្សនារបស់យើង។
សព្វថ្ងៃនេះ វិទ្យុអាស៊ីសេរីបានជួយដល់អ្នកស្ដាប់ និងទស្សនា ប្រមាណជា ៦លាននាក់ (៥៩,៨លាននាក់) ជារៀងរាល់សប្ដាហ៍ ឱ្យទទួលបានព័ត៌មានឯករាជ្យ គ្មានការរឹតត្បិត និងកម្មវិធីព័ត៌មានវប្បធម៌ ដែលត្រូវបានរដ្ឋាភិបាលមួយចំនួនរាំងខ្ទប់ ឬមិនអើពើ។
គិតចាប់តាំងពីឆ្នាំ១៩៩៦ មក វិទ្យុអាស៊ីបានផ្សាយភាសាជាច្រើនទៀត គឺមាន ៩ភាសា ដូចជា ភាសាទីបេ (Tibetan) កូរ៉េ (Korean) ភូមា (Burmese) វៀតណាម (Vietnam) ខ្មែរ (Khmer) ឡាវ (Lao) ចិនកន្តាំង (Cantonese) អ៊ុយហ្គ័រ (Uyghur) និងចិនកុកងឺ (Mandarin)។ យើងបានផ្សាយដល់អ្នកស្ដាប់ នៅប្រទេសចិន កូរ៉េខាងជើង និងអាស៊ីអាគ្នេយ៍ ដែលជាតំបន់មានបរិយាកាសប្រព័ន្ធផ្សព្វផ្សាយអាក្រក់បំផុតក្នុងពិភពលោក។
ក្នុងរយៈពេលប៉ុន្មានឆ្នាំមកនេះ វិទ្យុអាស៊ីសេរីបានពង្រីកវិសាលភាពផ្សព្វផ្សាយបន្តតាមប្រព័ន្ធអនឡាញ ដូចជា BenarNews and WHYNOT/WAINAOជាដើម ទៅដល់ប្រជាពលរដ្ឋនៅប្រទេសបង់ក្លាដេស (Bangladesh) ឥណ្ឌូនេស៊ី (Indonesia) ថៃ (Thailand) ម៉ាឡេស៊ី (Malaysia) និង ហ្វីលីពីន (Philippines) ព្រមទាំងយុវជននិយាយភាសាចិននៅទូទាំងពិភពលោក។ វិទ្យុអាស៊ីសេរីមានអ្នកគាំទ្រចំនួន ៣០លាននាក់ នៅលើបណ្ដាញសង្គម និងអ្នកចូលទស្សនាវីឌីអូ ក្នុងឆ្នាំ២០២១ នេះ មានជាង ២ពាន់ ៨រយលានដង (២,៨ប៊ីលលានដង)។
នាឱកាសខួបលើកទី ២៥ឆ្នាំ នៃការបង្កើតស្ថាប័នវិទ្យុអាស៊ីសេរីនេះ ក៏មានសមាជិកព្រឹទ្ធសភា និងតំណាងរដ្ឋាភិបាលអាមេរិក បានចូលរួមក្នុងកម្មវិធីអបអរសាទរនេះដែរ៕