សង្គម​ស៊ីវិល​បារម្ភ​ខ្លាំង​ពី​ការ​កើន​ឡើង​ស្លាប់​ពលរដ្ឋ ៦​នាក់​សង្ស័យ​ពុល​ស្រា​ស​នៅ​ខេត្ត​ក្រចេះ

ដោយ អាស៊ីសេរី
2018-10-21
អ៊ីម៉ែល
មតិ
Share
បោះពុម្ព
ផែនទី​ខេត្ត​ក្រចេះ។
ផែនទី​ខេត្ត​ក្រចេះ។
Photo: RFA

មន្ត្រី​សង្គម​ស៊ីវិល​សម្ដែង​ក្តី​បារម្ភ​ខ្លាំង ពី​សុខុមាលភាព​របស់​ពលរដ្ឋ​កំពុង​ឋិត​នៅ​ភាព​​ផុយ​ស្រួយ​​នៅ​​ឡើយ ក្រោយ​ពី​ចំនួន​ជនរងគ្រោះ​ពុល​ស្រា​ស្លាប់​នៅ​ខេត្ត​ក្រចេះគិតត្រឹម​ថ្ងៃ​តី២១ តុលា បាន​កើន​ឡើង ៦​នាក់ និង ៧៨​នាក់ បញ្ជូន​ទៅ​សង្គ្រោះ​បន្ទាន់​ដោយ​សង្ស័យ​ពុល​ស្រា​ស។

សមាជិក​គ្រួសារ​ជន​រង​គ្រោះ​នៅ​ភូមិ​ដំរែ ឃុំ​បឹងចារ លោក សុខ ណា ឲ្យ​ដឹង​ថា​ បង​ប្រុស​របស់​លោក​ម្នាក់​បាន​ស្លាប់ កាល​ពី​ថ្ងៃ​ទី​២១ តុលា ដោយ​សង្ស័យ​ថា​ពុល​ស្រា​ស​ ដែល​ពី​អ្នក​ភូុមិ​ផលិត និង​ចែកចាយ​នៅ​ក្នុង​មូលដ្ឋាន។ លោក​បន្ត​ថា មុន​ពេល​ស្លាប់ ជន​រង​គ្រោះ​មាន​អាការ​ខុស​ប្រក្រតី ដូច​ជា​ថប់​ដង្ហើម ក្អួត​ចង្អោរ ទន់ដៃ​ជើង និង​វិល​មុខ។ លោក​បន្ថែម​ថា ក្នុង​ចំណោម​ជន​រងគ្រោះ​ចំនួន ៦នាក់​នោះ មាន​ប្ដី​ប្រពន្ធ​ស្លាប់​ទាំង​ពីរ​នាក់។

អ្នកនាំពាក្យ​ក្រសួង​សុខាភិបាល លោក លី សុវណ្ណ ប្រាប់​កាសែត​ក្នុងស្រុក​កាលពី​ថ្ងៃ​ទី២០ តុលា​ថា ក្រុម​មន្ត្រី​ជំនាញ​ថ្នាក់​ជាតិ និង​ថ្នាក់​ខេត្ត បាន​ចុះ​មូលដ្ឋាន​រក​ឃើញ​អ្នក​ពុល​ស្រា នៅ​ក្នុង​ភូមិ​ចំនួន​បី​ទៀត ក្នុង​ឃុំ​បឹងចារ ស្រុក​សំបូរ និង​បាន​បញ្ជូន​​ពលរដ្ឋ​ទៅ​ព្យាបាល​នៅ​មន្ទីរពេទ្យ​ខេត្ត​បន្ថែម។ លោក​ថា មន្ត្រី​ជំនាញនៅតែ​បន្ត​ចុះ​អង្កេត​ទៅ​ភូមិ​ផ្សេងៗ​ ទៀត ដើម្បី​ឲ្យ​ប្រាកដ​ថា គ្មាន​ករណី​ពុល​ស្រា​នៅ​កន្លែង​ដទៃ​ទៀត។

អ្នកនាំពាក្យ​សមាគម​អាដហុក លោក សឹង សែនករុណា អង្កេត​ឃើញ​ថា ករណី​ពុល​ស្រា​ស​នេះ ពុំ​មែន​កើត​មាន​ឡើង​លើក​ទី​១ ទេ ហើយ​អាជ្ញាធរ​ហាក់​មិន​ចាត់វិធានការ​ម៉ឺងម៉ាត់​ណាមួយ ឲ្យ​មាន​ប្រសិទ្ធភាព ការពារ​សុខុមាលភាព​ពលរដ្ឋ​នោះ​ឡើយ បង្ក​ឲ្យ​ពលរដ្ឋ​នៅតែ​ជួប​គ្រោះថ្នាក់​ពុល​ស្រា​ស ដដែលៗ។

លោក​បន្ថែម​ថា ពលរដ្ឋ​នៅ​ជនបទ ទទួលទាន​ស្រា​ស ជា​លក្ខណៈ​ប្រពៃណី​ទៅ​ហើយ ដែល​ទាមទារ​ឲ្យ​អាជ្ញាធរ​គួរតែ​ត្រូត​ពិនិត្យ​មើល​លក្ខណៈ​បច្ចេកទេស និង​រក​ប្រភព​មូលហេតុ​ឲ្យ​បាន​ច្បាស់​លាស់ ដើម្បី​រក​មធ្យោបាយ​ទប់ស្កាត់ កុំ​ឲ្យ​ករណី​នេះ​កើត​មាន​ឡើង​ដដែលៗ​៖ «មិន​គួរ​កើត​មាន​ករណី ដដែលៗ​អ៊ីចឹង​ទេ អាជ្ញាធរ​គួរតែ​មាន​វិធានការ​ណាមួយ ឲ្យ​ច្បាស់លាស់​ដើម្បី​កុំ​ឲ្យ​ពលរដ្ឋ​ចេះតែ​បន្ត​រងគ្រោះ​របៀប​នេះ។ ករណី​នេះ​យើង​ឃើញ ការ​តាំង​ពី​មុន​មក​រហូត​មក​ទល់​ពេល​នេះ អាជ្ញាធរ​មិន​ចាត់​វិធានការ​ច្បាស់លាស់ ថា​តើ​មូលហេតុ​ការ​ស្លាប់​ផ្ដោត​លើ​អ្វី​ឲ្យ​ច្បាស់លាស់»

ក្រោយពី​កើត​មាន​បាតុភាព​នេះ សមត្ថកិច្ច​ខេត្ត​ក្រចេះ បាន​ឃាត់ខ្លួន​ម្ចាស់​ផលិត​ស្រា​ស​មួយ​កន្លែង​នៅ​មូលដ្ឋាន និង​ស្រាវជ្រាវ​បន្ត​ទៀត ដើម្បី​បង្ហាញ​អំពី​មូលហេតុ​ច្បាស់លាស់។

ចាប់​តាំង​ពី​ចុង​ឆ្នាំ​២០១៦ រហូត​មក​ដល់​បច្ចុប្បន្ន​នៅ​ខេត្ត​ក្រចេះ មាន​មនុស្ស​ស្លាប់​ជាង ៤០​នាក់ និង​ជាង ៤០០​នាក់ ត្រូវ​បញ្ជូន​ទៅ​សង្គ្រោះ​​​បន្ទាន់​នៅ​មន្ទីរពេទ្យ បន្ទាប់​ពី​ពលរដ្ឋ​ពិសា​ស្រា​ស សាច់​ឆ្កែ​ដែល​គេ​បំពុល ពុល​ត្រី​កំពត ពុល​ទឹកក្រូច និង​ករណី​ពុល​ទឹក​ព្រែក​ទេរ ជាដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល