ពលរដ្ឋមួយចំនួនរស់នៅខេត្តសៀមរាប ប្រតិកម្មមិនពេញចិត្តចំពោះទង្វើរបស់អាជ្ញាធរខេត្តនេះដែលបានប្តូរឈ្មោះសួនព្រះរាជដំណាក់ ប្តូរទៅជាឈ្មោះសួនតេជោសន្តិភាព។
ពួកគេចាត់ទុកទង្វើនេះថា កំពុងព្យាយាមលុបបំបាត់ទីតាំងប្រវត្តិសាស្ត្ររបស់ព្រះមហាក្សត្រជំនាន់មុនៗ ដែលភ្ញៀវទេសចរតែងតែធ្វើដំណើរកម្សាន្តក្នុងតំបន់នោះ។
ពលរដ្ឋរស់នៅខេត្តសៀមរាប ទទូចឱ្យអាជ្ញាធរគួរតែរក្សាកេរមរតកដើមដែលជាស្នាព្រះហស្តរបស់ព្រះរាជាជំនាន់មុន ឱ្យក្លាយជាទីតាំងប្រវត្តិសាស្ត្រទាក់ទាញភ្ញៀវទេសចរ និងដើម្បីឱ្យកូនខ្មែរជំនាន់ក្រោយសិក្សាស្វែងយល់បន្ថែម។
ពលរដ្ឋរស់នៅខេត្តសៀមរាបលោកស្រី ផន រតនា មិនសប្បាយចិត្តចំពោះការផ្លាស់ប្តូរឈ្មោះសួនព្រះរាជដំណាក់នេះទេ ព្រោះទីតាំងនេះជាកន្លែងរំលឹកគុណបុព្វបុរសសម័យអង្គរអម ដោយរូបសំណាក់ព្រះអង្គចេក-ព្រះអង្គចមព្រមទាំងមានរូបសំណាកមេទ័ពជាច្រើននាក់ទៀតកាលពីសម័យអង្គរ។
លោកស្រីថា សួននេះ គឺជាកន្លែងដំណាក់របស់សម្តេចព្រះនរោត្តមសីហនុ តស៊ូរំដោះជាតិ ពីអាណានិគមបារាំងគួរតែ ថែរក្សាឈ្មោះដើមឱ្យល្អ។
លោកស្រី ផន រតនា៖«កន្លែងទឹកដីព្រះរាជដំណាក់របស់ស្ដេចគឺជាទឹកដីកំណើតទឹកដីរបស់ខ្ញុំយូរមកហើយ ដល់គេចង់ដូចអញ្ចឹងទៅមានអារម្មណ៍ថាពិបាកទទួលយក។ ខ្ញុំសំណូមពរចង់ឱ្យរក្សាដូចដើមវិញ ព្រោះខ្ញុំអ្នកនៅទឹកដីនេះកំណើតផ្ទាល់ ខ្ញុំអត់ចង់ឱ្យដូរទេ សុំតែប៉ុណ្ណឹង»។
ពលរដ្ឋម្នាក់ទៀតរស់នៅខេត្តសៀមរាប លោកស្រី ឡូន ហាំ យល់ថា ទីតាំងប្រវត្តិសាស្ត្រនេះជាកន្លែងដែលពលរដ្ឋខ្មែរគោរពបូជា និងមកលេងកម្សាន្តមិនគួរផ្លាស់ប្តូរឈ្មោះដើមនោះឡើយ។
លោកស្រីបញ្ជាក់ថា សួនព្រះរាជដំណាក់ជាឈ្មោះដើមដែលអ្នកខេត្តសៀមរាបតែងតែហៅតៗគ្នាច្រើនជំនាន់មកហើយ ហើយពួកគាត់ចាត់ទុកថា ជាកន្លែងរំលឹកអនុស្សាវរីយ៍មនុស្សជំនាន់មុន៖
លោកស្រី ឡូន ហាំ៖«កន្លែងនេះជាកន្លែងអុជធូបគោរពយាយទេព និងព្រះអង្គចេកព្រះអង្គចម ឈ្មោះសួនព្រះរាជដំណាក់គឺស័ក្តិសមបំផុត តែបើដាក់សួនតេជោសន្តិភាព គឺមិនស័ក្តិសមទេ»។
ប្រកិម្មរបស់ពលរដ្ឋធ្វើឡើងក្រោយពី អាជ្ញាធរខេត្តសៀមរាបថ្មីៗនេះបានជូនដំណឹងរៀបចំកែលម្អកសាងសួនតេជោសន្តិភាពប៉ែកខាងលិច ដើម្បីត្រៀមរៀបចំព្រឹត្តិការណ៍ អង្គរសង្ក្រាន្ត ឆ្នាំ២០២៥។
វិទ្យុអាស៊ីសេរីមិនទាន់អាចទាក់ទងសុំការបំភ្លឺជុំវិញរឿងនេះ ពីរដ្ឋមន្ត្រីក្រសួងព្រះបរមរាជវាំង លោក គុយ សុផល បាននៅឡើយទេ នៅថ្ងៃទី ១០ កុម្ភៈ។ រីឯអ្នកនាំពាក្យសាលាខេត្តសៀមរាប លោក លី វណ្ណៈ ក៏វិទ្យុអាស៊ីសេរី មិនទាន់អាចទាក់ទងបានដែរនៅថ្ងៃដដែលនេះដោយទូរសព្ទហៅចូលតែគ្មានអ្នកលើក។
ក៏ប៉ុន្តែ លោក លី វណ្ណៈ បានប្រាប់សារព័ត៌មានថ្មីៗថា អត្ថន័យនៃសួនតេជោសន្តិភាព គឺផ្តោតលើការទទួលបានសន្តិភាពពេញលេញចាប់តាំងពីឆ្នាំ១៩៩៨ រហូតមក ដោយសារតែនយោបាយឈ្នះឈ្នះនិងការដឹងគុណដល់យុទ្ធជនពលីក្នុងសង្គ្រាម។ លោកថា រដ្ឋបាលខេត្តសៀមរាបបានសុំគោលការណ៍រៀបចំសួនច្បារនេះ ដោយឱ្យឈ្មោះថា «សួនតេជោសន្តិភាព» ។
សួនព្រះរាជដំណាក់ឋិតនៅទល់មុខនឹង ព្រះរាជដំណាក់ស្តេច ជាប់នឹងរូបសំណាកព្រះអង្គចេក-ព្រះអង្គចម និងរូបសំណាកយាយទេព។ សួននេះមានទំហំប្រមាណ ៤ ហិកតារ មានដើមឈើធំៗជាច្រើនដើមផ្តល់ម្លប់ត្រជាក់ អមដោយសត្វបក្សាបក្សីស្រែកអឺងកងទាក់ទាញអ្នកទេសចរព្រមទាំងមានស្រះទឹក និងសួនផ្កាដែលភ្ញៀវទេសចរចូលចិត្តដើរលេងកម្សាន្ត និងរត់ហាត់ប្រាណគយគន់ទេសភាព។
មកទល់ពេលនេះសួនព្រះរាជដំណាក់នៅប៉ែកខាងលិច អាជ្ញាធរកំពុងដាក់ដីលុបស្រះទឹក និង កែលម្អបរិស្ថានសួននេះជាបណ្តើរៗ។
ជុំវិញរឿងនេះ អ្នកគ្រប់គ្រងប្រចាំការិយាល័យអង្គការលីកាដូ ខេត្តបន្ទាយមានជ័យលោក អ៊ិន គង់ជិត យល់ថា អាជ្ញាធរខេត្តសៀមរាបគួរតែទទួលយកមតិយោបល់របស់ពលរដ្ឋពិចារណាដោះស្រាយ ព្រោះពួកគាត់ចង់ថែរក្សាកេរដំណែលឱ្យគង់វង្ស។
លោក អ៊ិន គង់ជិត៖«ក្នុងនាមអាជ្ញាធរខេត្តក្តី ឬអភិបាលខេត្តក្ដីគួរណាស្ដាប់មតិប្រជាពលរដ្ឋដែលលោកបានលើកឡើង ហើយអាជ្ញាធរខេត្តគួរតែសម្លឹងមើលកន្លែងផ្សេងដើម្បីធ្វើទើបជាការប្រសើរទាំងសងខាង។ ដោយទុកព្រះរាជដំណាក់រក្សាដដែល ដល់មនុស្សជំនាន់ក្រោយបានស្គាល់និងបានឃើញ»។
សួនព្រះរាជដំណាក់ឋិតនៅចំកណ្តាលក្រុងសៀមរាប ដែលជាតំបន់ប្រវត្តិសាស្ត្ររបស់អតីតព្រះមហាក្សត្រ ព្រះបាទនរោត្តម សីហនុ ព្រះបរមរតនកោដ្ឋ និងព្រះរាជអគ្គមហេសី ស្នាក់ព្រះកាយ ក្នុងពេលព្រះអង្គយាងមកខេត្តសៀមរាប។
សួននេះកសាងឡើង ក្នុងសម័យអាណានិគមបារាំងអំឡុងឆ្នាំ ១៨៦៣ ដល់ ឆ្នាំ១៩៥៣។
ចំណែកអ្នកប្រើប្រាស់បណ្តាញសង្គមហ្វេសប៊ុក(Facebook)មួយចំនួន រស់នៅខេត្តសៀមរាបក៏ផ្ទុះប្រតិកម្មជុំវិញរឿងនេះដែរ។ ពួកគាត់បានសរសេរក្នុងខ្ទង់ខាំមិន(Comment)ឬប្រអប់សារលើគេហទំព័ររបស់អាជ្ញាធរខេត្តសៀមរាបដោយមិនគាំទ្VYរដាច់ខាតចំពោះទង្វើនេះ ហើយជំរុញឱ្យអាជ្ញាធរត្រូវរក្សាឈ្មោះដើមវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។