"អ្នក​ប្រើ​ទូរស័ព្ទ​ទំនើប​កើន​ឡើង​មិន​ឆ្លុះ​បញ្ចាំង​ពី​ការ​កើន​ប្រាក់​ចំណូល"

0:00 / 0:00

ការ​នាំ​ចូល​ទូរស័ព្ទ​ទំនើប ឬ​ហៅ​ថា ស្មាត ហ្វូន (Smart Phone) បាន​កើន​ឡើង​គួរ​ឲ្យ​កត់​សម្គាល់​​នៅ​ក្នុង​ឆ្នាំ​២០១៤។ ការ​កើន​ឡើង​នេះ បាន​បង្ហាញ​អំពី​ការ​រីក​ចម្រើន​នៃ​ប្រាក់​ចំណូល​ប្រជាពលរដ្ឋ និង​ចំណេះ​វិជ្ជា​នៃ​ការ​ប្រើប្រាស់​សម្ភារៈ​ទំនើប។ ប៉ុន្តែ​អ្នក​វិភាគ​សង្គម​បាន​អះអាង​ផ្ទុយ​ពី​នេះ​ថា ការ​កើន​ឡើង​នៃ​ការ​ប្រើប្រាស់​ទូរស័ព្ទ​​ទំនើប​ មិន​ឆ្លុះ​បញ្ចាំង​ពី​​ការ​កើន​ឡើង​ប្រាក់​ចំណូល​របស់​​ប្រជាពលរដ្ឋ​ពិត​ប្រាកដ​ឡើយ។

ស្ថាប័ន​​ផ្ដល់​ជំនួយ​នានា​បាន​លើក​ឡើង​ថា អ្នក​មាន​និង​អ្នក​ក្រ​មាន​គម្លាត​ខុស​ឆ្ងាយ​ពី​គ្នា​ខ្លាំង​នៅ​ឡើយ​នៅ​ប្រទេស​កម្ពុជា ប៉ុន្តែ​ការ​នាំ​ចូល​សម្ភារៈ​ទំនើប​​វិញ ដូច​ជា​ការ​នាំ​ចូល​ទូរស័ព្ទ​បាន​កើន​ឡើង​ពី​មួយ​ឆ្នាំ​​ទៅ​មួយ​ឆ្នាំ។ បញ្ហា​នេះ អ្នក​វិភាគ​​បញ្ហា​សង្គម ក្រុមហ៊ុន​នាំ​ចូល​ទូរស័ព្ទ​ រួម​ទាំង​ស្ថាប័ន​ស្រាវជ្រាវ​​ទីផ្សារ​នានា បាន​អះអាង​​ផ្ទុយ​​គ្នា​អំពី​ការ​កើន​ឡើង​ចំនួន​នៃ​ការ​នាំ​ចូល​ទូរស័ព្ទ​ទំនើប​នេះ។

ការ​រក​ឃើញ​ស្ថាប័ន​ស្រាវជ្រាវ​អន្តរជាតិ​​មួយ​បាន​រក​ឃើញ​ថា កម្ពុជា​បាន​នាំ​ចូល​ទូរស័ព្ទ​​ទំនើប​ប្រមាណ​ជិត ​២​លាន​គ្រឿង ដើម្បី​បំពេញ​សេចក្ដី​ត្រូវ​ការ​​​របស់​ប្រជាពលរដ្ឋ​កម្ពុជា ជាក់​ស្ដែង​នៅ​ពេល​បច្ចុប្បន្ន។

ការ​ស្រាវជ្រាវ​ដោយ​ក្រុមហ៊ុន ជី.អ្វេស.ខេ (GFK) ដែល​មាន​មូលដ្ឋាន​នៅ​ប្រទេស​សិង្ហបុរី បាន​​បង្ហាញ​ថា ប្រជាពលរដ្ឋ​កម្ពុជា បាន​​​​​ចំណាយ​​ទឹក​ប្រាក់​ប្រមាណ​ជិត ៣០០​លាន​ដុល្លារ​អាមេរិក​ក្នុង​ឆ្នាំ​២០១៣ ដើម្បី​ទិញ​ទូរស័ព្ទ​ទំនើប​​ប្រើប្រាស់​ផ្ទាល់​ខ្លួន។ ទូរស័ព្ទ​ចំនួន ១.៧​លាន​គ្រឿង​បាន​លក់​ចេញ​កាល​ពី​ឆ្នាំ​​២០១៣ ប៉ុន្តែ​ចំនួន​នេះ​បាន​ថយ​ចុះ​ប្រមាណ ២០% បើ​ធៀប​នឹង​ឆ្នាំ​២០១២ ដោយសារ​​តម្លៃ​លក់​ទូរស័ព្ទ​ទំនើប​បាន​កើន​ឡើង។ ការ​ស្រាវជ្រាវ​ដដែល​​នោះ បាន​គូស​បញ្ជាក់​ថា ​ទន្ទឹម​នឹង​ការ​លក់​ទូរស័ព្ទ​ទំនើប​ថយ​ចុះ ប៉ុន្តែ​ការ​លក់​​ទូរស័ព្ទ​ធម្មតា​​វិញ​បាន​កើន​ឡើង​រហូត​ដល់ ៥០% បើ​គិត​ត្រឹម​ខែ​មីនា ឆ្នាំ​២០១៤។

អ្នក​វិភាគ​សេដ្ឋកិច្ច​បាន​លើក​ឡើង​ថា ការ​ធ្លាក់​ចុះ​នេះ បណ្ដាល​មក​ពី​ការ​រឹត​បន្តឹង​នៃ​ការ​នាំ​ចូល​ផលិត​ផល​ដោយ​ខុស​ច្បាប់​​នៅ​តាម​ព្រំដែន។ ម៉្យាង​វិញ​​ទៀត​ រដ្ឋាភិបាល​កម្ពុជា បាន​ដំឡើង​ពន្ធ​លើ​ការ​នាំ​ចូល​​ទូរស័ព្ទ​ចំនួន ១០% បន្ថែម​ទៀត កាល​ពី​ដើម​ឆ្នាំ​​២០១៤ ដែល​ធ្វើ​តម្លៃ​លក់​ទូរស័ព្ទ​ទំនើប​កើន​ឡើង និង​ការ​នាំ​ចូល​ទូរស័ព្ទ​មាន​ការ​ធ្លាក់​ចុះ។

ទូរស័ព្ទ​ទំនើប​ដែល​នាំ​ចូល​មក​លក់​នៅ​កម្ពុជា មាន​រហូត​ដល់​ជាង ២០​ប្រភេទ ប៉ុន្តែ​ប្រភេទ​​​ដែល​ប្រជាពលរដ្ឋ​​និយម​ប្រើ​នៅ​ប្រទេស​កម្ពុជា​ រួម​មាន​ម៉ាក​អែបផល (Apple) សាំស៊ុង (Samsung) និង​ម៉ាក អិល.ជី (LG) ជា​ដើម។

ប្រធាន​ផ្នែក​ទីផ្សារ​​នៃ​​ក្រុមហ៊ុន​​​នាំ​ចូល​ផលិតផល​ម៉ាក អិល.ជី លោក ហ៊ ហាប់ បាន​ឲ្យ​ដឹង​ថា ការ​ប្រើប្រាស់​ទំនើប​បាន​ផ្ដល់​ផល​ប្រយោជន៍​យ៉ាង​ច្រើន​សម្រាប់​អ្នក​​ប្រើប្រាស់ ប៉ុន្តែ​​​ស្ថានភាព​នៃ​អ្នក​ដែល​មាន​ចំណេះ​ដឹង​ប្រើប្រាស់​ទូរស័ព្ទ​ទំនើប​វិញ​​ មាន​តិច​តួច​ប៉ុណ្ណោះ។

«សំឡេង»

​​លោក ហ៊ ហាប់ ​បាន​ឲ្យ​ដឹង​បន្ថែម​ទៀត​ថា​ ចំពោះ​​​ការ​នាំ​ចូល​ទូរស័ព្ទ​​ទំនើប​​ម៉ាក អិល.ជី បាន​កើន​ឡើង ៥% នៅ​ក្នុង​ឆ្នាំ​២០១៣។ ប៉ុន្តែ​និន្នាការ​នៃ​​អ្នក​ដែល​មាន​​ចំណេះ​ដឹង​អាច​ប្រើប្រាស់​នឹង​កើន​ឡើង​ ស្រប​ពេល​ដែល​​បច្ចេកវិទ្យា​ដែល​បញ្ជូន​នៅ​ក្នុង​ទូរស័ព្ទ​ទំនើប​​មាន​កំណើន​ខ្ពស់​​នៅ​​រយៈ​ពេល ២ ឬ ​៣​ឆ្នាំ​ខាង​មុខ។

អ្នក​វិភាគ​បញ្ហា​សង្គម​លោក កែម ឡី មាន​ប្រសាសន៍​ថា កំណើន​នៃ​​ការ​នាំ​ចូល​​​សម្ភារៈ​ប្រើប្រាស់​ទំនើប ​បាន​ឆ្លុះ​បញ្ចាំង​ពី​ការ​អភិវឌ្ឍ​ប្រទេស​​ និង​​​ជីវភាព​ប្រជាពលរដ្ឋ​ ប៉ុន្តែ​​​ការ​អភិវឌ្ឍ​នៅ​ប្រទេស​កម្ពុជា​វិញ បាន​បង្ហាញ​អំពី​អ្នក​ទទួល​ផល​ពី​កំណើន​សេដ្ឋកិច្ច​ស្មើ​ភាព​គ្នា ឬ​ប្រជាពលរដ្ឋ​មួយ​ក្រុម​តូច​ប៉ុណ្ណោះ​​ដែល​មាន​លទ្ធភាព​ប្រើប្រាស់​សម្ភារៈ​​ទំនើប។ ម៉្យាង​វិញ​​ទៀត​ ការ​​កើន​ឡើង​នៃ​ការ​នាំ​ចូល​ ទូរស័ព្ទ​​ទំនើប​នេះ ក៏​ជា​កត្តា​ទាក់ទាញ​ឲ្យ​គ្រួសារ​ដែល​ចំណូល​មធ្យម​កាន់​តែ​ក្រីក្រ ដោយសារ​តែ​ការ​លើក​តម្កើង​​សម្ភារៈ​និយម។

«សំឡេង»

ទោះ​ជា​យ៉ាង​ណា​ក៏​ដោយ លោក​ កែម ឡី បាន​បញ្ជាក់​ទៀត​ថា​ ការ​ប្រើប្រាស់​ទូរស័ព្ទ​ទំនើប​បង្ហាញ​ពី​ការ​ចូល​​រួម​​​របស់​ប្រជាពលរដ្ឋ​វ័យ​ក្មេង ជា​ពិសេស​​​យុវជន ក្នុង​ការ​អភិវឌ្ឍ​សង្គម។

អ្នក​ប្រើប្រាស់​ទូរស័ព្ទ​ទំនើប​ម្នាក់ កញ្ញា លី ឡាយហ៊ុយ បាន​ឲ្យ​ដឹង​ថា ទូរស័ព្ទ​អាច​ឲ្យ​យើង​ទទួល​ព័ត៌មាន​ផ្សេងៗ ការ​កម្សាន្ត និង​ការ​បញ្ចេញ​យោបល់​នានា​ ដើម្បី​ចូល​រួម​ការ​ការ​អភិវឌ្ឍ​សង្គម។ ប៉ុន្តែ​​កញ្ញា​បាន​បញ្ជាក់​ថា ទន្ទឹម​នឹង​ការ​ផ្ដល់​ប្រយោជន៍​ដល់​អ្នក​ប្រើប្រាស់ ទូរស័ព្ទ​ទំនើប​ក៏​អាច​ជះ​ឥទ្ធិពល​ដល់​អ្នក​ប្រើប្រាស់​ដែរ​ ជា​ពិសេស​ភាព​ខ្ជះខ្ជាយ​ពេល​វេលា​ អំពី​ការ​ប្រើប្រាស់​​ខុស​គោលដៅ។

«សំឡេង»

​ទោះ​ជា​​​យ៉ាង​ណា​ក៏​ដោយ ​កំណើន​នៃ​ការ​ប្រើប្រាស់​ទូរស័ព្ទ​ទំនើប​នៅ​កម្ពុជា ​បាន​ឆ្លុះ​បញ្ចាំង​​ពី​​ស្ថានភាព​នៃ​ចំនួន​អ្នក​ដែល​ទទួល​បាន​ព័ត៌មាន​ និង​​សេរីភាព​នៃ​​ការ​បញ្ចេញ​មតិ​កម្ពុជា មាន​ការ​កើន​ឡើង។ ក្រៅ​ពី​នេះ គណបក្ស​នយោបាយ​​​ភាគ​ច្រើន​ក៏​បាន​ពង្រឹង​ការ​ផ្សព្វផ្សាយ​របស់​ខ្លួន​លើ​ការ​ឃោសនា​តាម​​​បណ្ដាញ​សង្គម​នានា​​ ដែល​ប្រើប្រាស់​​ទូរស័ព្ទ​ទំនើប​អាច​ទទួល​យក​បាន។ បញ្ហា​នេះ អាច​ធ្វើ​សង្គម​មាន​ការ​ផ្លាស់​ប្ដូរ​នៅ​ពេល​អនាគត ​តាម​រយៈ​ការ​ផ្សព្វផ្សាយ​ព័ត៌មាន​​នៅ​លើ​ទូរស័ព្ទ​ទំនើប ស្រប​ពេល​ដែល​​ប្រជាពលរដ្ឋ​កម្ពុជា ​កំពុង​ផ្លាស់ប្ដូរ​ឈប់​ប្រើប្រាស់​ទូរស័ព្ទ​ប្រភេទ​ធម្មតា។

តាម​ការ​ប៉ាន់​ស្មាន​របស់​ក្រុមហ៊ុន​ស្រាវជ្រាវ​ទីផ្សារ​របស់​ក្រុមហ៊ុន ជី.អ្វេស.ខេ បាន​បង្ហាញ​ថា​ តម្រូវ​ការ​ប្រើប្រាស់​ទូរស័ព្ទ​ធម្មតា​នៅ​ប្រទេស​កម្ពុជា​​ មាន​ចំនួន​ចន្លោះ​ពី ២ ទៅ ៣​លាន​គ្រឿង​ក្នុង​មួយ​ឆ្នាំ ប៉ុន្តែ​នៅ​រយៈ​ពេល ៥​ឆ្នាំ​​ក្រោយ ​អ្នក​ដែល​ប្រើប្រាស់​ទូរស័ព្ទ​ធម្មតា​​​ប្រមាណ ៨០% នឹង​​ផ្លាស់​ប្ដូរ​ប្រើប្រាស់​ទូរស័ព្ទ​ទំនើប​វិញ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។