កម្មករបារម្ភរឿងប្រាក់ឈ្នួលព្រោះរោងចក្រខ្លះត្រូវផ្អាកដំណើរការទាំងស្រុង
អគាររោងចក្រមួយកន្លែងម្ដុំផ្សារត្រពាំងផ្លឹង នៅតាមបណ្ដោយផ្លូវវេងស្រេង រាជធានីភ្នំពេញ។
រូបពីហ្វេសប៊ុក
កម្មកររោងចក្រជាច្រើន កំពុងព្រួយបារម្ភរឿងប្រាក់ឈ្នួល ដោយសារ រោងចក្រមួយចំនួន ពិសេសនៅម្ដុំខណ្ឌមានជ័យ និងខណ្ឌពោធិ៍សែនជ័យ ត្រូវផ្អាកដំណើរការទាំងស្រុង ខណៈកម្មករ រងការបិទខ្ទប់មិនឱ្យចេញពីបរិវេណម្ដុំបន្ទប់ជួលដាច់ខាត។
កម្មករខ្លះ បង្ហាញកង្វល់គ្មានលុយសងបំណុលធនាគារ ហើយក៏គ្មានលុយសម្រាប់ទិញម្ហូបអាហារដែលមានតម្លៃថ្លៃ ដែលលក់នៅតាមបន្ទប់ជួលតទៅទៀតដែរ ព្រោះតែគ្មានការងារធ្វើ។
កម្មការិនីម្នាក់ធ្វើការនៅរោងចក្រ ឌីនហាន (DIN HAN) លោកស្រី ថុន ធី ឱ្យដឹងថា កម្មករទាំងអស់ ជាងពីរពាន់នាក់ ជាប់កាតព្វកិច្ចចត្តាឡីស័ក តាំងពីមុនចូលឆ្នាំ ដូច្នេះមិនអាចទៅធ្វើការបានទេ។ លោកស្រីថា កម្មករនាំគ្នាទូរស័ព្ទទៅសួរខាងរដ្ឋបាលរោងចក្រដែរ អំពីប្រាក់ឈ្នួលសម្រាប់ខែមេសា តែខាងរោងចក្រ មិនទាន់ឆ្លើយតបទេ។ លោកស្រីបារម្ភថា បើរោងចក្រមិនបើកប្រាក់ឈ្នួលឱ្យ ឬកាត់ប្រាក់ឈ្នួលនៅខែមេសានេះ កម្មករនឹងប្រឈមការលំបាកធ្ងន់ធ្ងរបន្ថែមទៀត៖ «រឿងប្រាក់ខែ ខ្ញុំអត់ដឹងយ៉ាងម្ដេចដែរបង។ ឆាតសួរជំនួយការដែរ តែជំនួយការគាត់ប្រាប់ថា គេមិនទាន់ដឹងថា គិតយ៉ាងម្ដេច? ប្រសិនបើបានខ្ញុំអរ។ តែបើអត់បាន គឺអត់មានអ្វី បង់ធនាគារទេ។ បញ្ហាហូបចុក ក៏អត់មានអ្វីដែរហ្នឹង ព្រោះអ្វីគេឃុំ ១៤ថ្ងៃ។ ដល់ពេលអ៊ីចឹង អត់មានបានហូបអ្វី។ ហូបតែមី ត្រីខ ទិញគេមកហ្នឹងណា»។
ចំណែកកម្មការិនីម្នាក់ទៀត ធ្វើការនៅរោងចក្រ ឌីន ឡាក់ នៅម្ដុំផ្លូវវេងស្រេង កញ្ញា នី សុគន្ធ ក៏បារម្ភពីបញ្ហានេះដែរ។ កញ្ញាឱ្យដឹងថា កម្មករច្រើនម៉ឺននាក់ ដែលធ្វើការនៅតាមរោងចក្រម្ដុំវេងស្រេង បានធ្វើការបាន ១សប្ដាហ៍គត់ នៅដើមខែមេសា។ បន្ទាប់មក ខាងរោងចក្របានផ្អាកសកម្មភាព ហើយតម្រូវឱ្យកម្មករធ្វើចត្តាឡីស័ក តាមបន្ទប់ជួលរៀងៗ ខ្លួន។
កញ្ញាបន្តថា ខាងរោងចក្រ ឌីនឡាក់ នៅមិនទាន់បើកប្រាក់ឈ្នួលសម្រាប់ខែមីនា ឱ្យកម្មករទេ ព្រោះតាំងពីថ្ងៃទី៧ មេសាមក ខាងរោងចក្របានផ្អាកសកម្មភាពការងារទាំងស្រុង។ កម្មការិនីរូបនេះ ក៏លែងទទួលបានដំណឹងពីរោងចក្រដែរ៖ «គឺខ្ញុំអត់ទាន់បានដឹងច្បាស់ដែរ ព្រោះអ្វីខាងរោងចក្រ ប្រាប់ដំបូងឱ្យចូលធ្វើការថ្ងៃទី១៩ វិញ។ តែឥឡូវ អត់បានចូលទេ។ គេពន្យារដល់ថ្ងៃទី២៨ វិញ បានគេឱ្យចូលធ្វើការ»។
ជុំវិញបញ្ហាប្រាក់ឈ្នួលនេះ អាស៊ីសេរី មិនអាចសុំការបញ្ជាក់ពីខាងអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ និងអគ្គលេខាធិការសមាគមរោងចក្រកាត់ដេរនៅកម្ពុជា លោក ខេន លូ បានទេ នៅថ្ងៃទី១៨ មេសា។
តែយ៉ាងណា អ្នកឃ្លាំមើលសិទ្ធិកម្មករឱ្យដឹងថា កម្មករពិតជាកំពុងប្រឈមបញ្ហានេះមែនដោយសាររោងចក្រមួយចំនួន ផ្អាកសកម្មភាពទាំងស្រុង ក្នុងពេលនេះ។
ប្រធានសម្ព័ន្ធសហជីពស៊ីខៅឌូ (CCAWDU) លោក គង់ អាទិត្យ ឱ្យដឹងថា កង្វល់របស់កម្មករនេះ មិនទាន់ទទួលបានដំណោះស្រាយទេ។ លោកអះអាងថា កម្មករនឹងជួបការលំបាកថែមទៀត បើរោងចក្រមិនផ្ដល់ប្រាក់ឈ្នួលសម្រាប់ខែមេសា ឱ្យមែន។ សហជីពរូបនេះ ស្នើសុំឱ្យក្រសួងការងារដោះស្រាយបញ្ហានេះ និងជំរុញរដ្ឋាភិបាល ឱ្យដាក់ចេញគោលនយោបាយជួយកម្មករបន្ថែមទៀត៖ «ទី២ គឺសុំឱ្យមានគណៈកម្មការ ឬក៏ក្រុមការងារពិសេស របស់រោងចក្រ ឬក៏ក្រសួងហ្នឹង ដើម្បីរៀបចំដាក់លុយឱ្យកម្មករតាមវីង ឬតាមអ្វីដែលគាត់អាចបើកបានក្នុងសហគមន៍របស់គាត់។ យើងក៏ដឹងថា វាមានឧបសគ្គរឿងឆ្លងដែរ តែយើងត្រូវធ្វើកិច្ចការហ្នឹង ឱ្យបានព្រោះកម្មករត្រូវការលុយ។ បើឱ្យនៅផ្ទះហើយ អត់លុយទៀត គឺយ៉ាប់ណាស់វាកាន់តែយ៉ាប់ទៅៗ»។
គិតត្រឹមថ្ងៃទី១៨ មេសា ក្រសួងការងារ និងបណ្ដុះបណ្ដាលវិជ្ជាជីវៈ មិនទាន់បង្ហាញទិន្នន័យរោងចក្រ និងកម្មករ ដែលរងផលប៉ះពាល់ដោយសារការឆ្លងជំងឺកូវីដ១៩ (Covid-19) ក្នុងព្រឹត្តិការណ៍សហគមន៍២០ កុម្ភៈ នៅឡើយទេ។ អនុគណៈកម្មការស្រាវជ្រាវជំងឺកូវីដ-១៩ ឱ្យដឹងថា មានកម្មករ កម្មការិនី និងអ្នកពាក់ព័ន្ធ សរុបចំនួន ៧៨៨នាក់ នៅក្នុងរោងចក្រសរុបចំនួន ៣៦ ត្រូវបានរកឃើញមានវិជ្ជមានជំងឺកូវីដ-១៩ គិតចាប់ពីថ្ងៃទី២១ ខែមីនា ដល់ថ្ងៃទី១៥ ខែមេសា។ ក្រុមកម្មករព្រួយបារម្ភថា រោងចក្រជាច្រើន អាចនឹងបន្តបិទទ្វារ ហើយប៉ះពាល់ដល់ប្រាក់ខែ និងជីវភាពរស់នៅរបស់ពួកគាត់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
- ស្ដាប់ផ្ទាល់ (ព្រឹក ៥:៣០-៦:៣០ ល្ងាច ៧:៣០-៨:៣០)
- សំឡេង
- តុលាការដោះលែងឧកញ៉ា គិត ធាង ដែលជាមេក្លោងចែកចាយគ្រឿងញៀន
- ពលរដ្ឋមួយចំនួនស្នើលោក ហ៊ុន សែន ឱ្យចុះចេញពីតំណែងដោយសារគ្មានសមត្ថភាពជួយពលរដ្ឋក្នុងគ្រាអាសន្ន
- អ្នកឃ្លាំមើលបរិស្ថាន ថាបរាជ័យតំណក់ប្រេងសម្រាប់មេដឹកនាំផ្ដាច់ការ គឺជាពរជ័យសម្រាប់អ្នកប្រជាធិបតេយ្យ
- លោក សម រង្ស៊ី ផ្ញើលិខិតស្នើសុំសមាជិកសភាអាមេរិកជួយប្រជាជនកម្ពុជាក្នុងគ្រាវិបត្តិកូវីដ
- អ្នកជំងឺកូវីដម្នាក់ស្លាប់ ក្រោយមន្ទីរពេទ្យមួយចំនួនបដិសេធព្យាបាល និងទារសេវាថ្លៃ
