អាជីវករ​លក់ដូរ​មួយ​ចំនួន​នៅ​ខេត្ត​បាត់ដំបង​​ ត្អូញត្អែរ​ពី​បរិស្ថាន​ផ្សារ​កខ្វក់​ប៉ះពាល់​ដល់​ការ​លក់ដូរ

ដោយ សន ចាន់រដ្ឋា
2022.12.19
អាជីវករ​លក់ដូរ​មួយ​ចំនួន​នៅ​ខេត្ត​បាត់ដំបង​​ ត្អូញត្អែរ​ពី​បរិស្ថាន​ផ្សារ​កខ្វក់​ប៉ះពាល់​ដល់​ការ​លក់ដូរ ទិដ្ឋភាពនៅខាងក្រៅបរិវេណផ្សារ​ស្រុក​កំរៀង ​ខេត្ត​បាត់ដំបង​ កាលពីថ្ងៃទី១៩ ខែធ្នូ ឆ្នាំ២០២២។
រូប៖ ពលរដ្ឋ​ផ្ដល់​ឲ្យ

អាជីវករ​លក់​ដូរ​មួយ​ចំនួន​នៅ​ផ្សារ​ស្រុក​កំរៀង​ខេត្ត​បាត់ដំបង​ រិះគន់​អាជ្ញាធរ និង និង​គណៈកម្មការ​ផ្សារ​ ថា​អសមត្ថភាព​ ក្នុង​ការ​ដោះស្រាយ​បញ្ហា​ទឹក​កខ្វក់ សំរាម និង​សណ្ដាប់ធ្នាប់​ផ្សារ​ ធ្វើ​អោយ​មិនសូវ​មាន​ពលរដ្ឋ​ចូល​ផ្សារ​ដែល​ប៉ះពាល់​ដល់​ជីវភាព​របស់​ពួកគេ​។ មន្ត្រី​សង្គម​ស៊ីវិល​ យល់​ឃើញ​ថា អាជ្ញាធរ​ពាក់ព័ន្ធ​គួរ​បង្កើត​គណៈកម្មការ​ដោះស្រាយ​ ចុះ​ត្រួតពិនិត្យ​ វាយតម្លៃ​ការ​ខូចខាត​ និង​​ផល​ប៉ះ​ពាល់​ដល់​សុខភាព​ពលរដ្ឋ។

អាជីវករ​លក់​ដូរ​ក្នុង​ផ្សារ​ស្រុក​កំរៀង​លើក​ឡើង​ថា ការ​លក់​មាន​សភាព​ស្ងប់ស្ងាត់​ពី​មួយ​ថ្ងៃ​ទៅ​មួយ​ថ្ងៃ​ ដោយសារ​ស្ថានភាព​ផ្សារ​មាន​ទឹក​កខ្វក់​ ការ​ដាក់​សំរាម​អនាធិបតេយ្យ​ ហើយ​មាន​ទឹក​ដក​ ធ្វើ​អោយ​មាន​ក្លិន​ស្អុយ​ ប៉ះពាល់​ដល់​សុខភាព​និង​ការ​លក់ដូរ​របស់​ពួកគេ​។

អាជីវករ​លក់ដូរ​នៅ​ផ្សារ​ស្រុក​កំរៀង​ សុំ​មិន​បញ្ចេញ​ឈ្មោះ​ ប្រាប់​វិទ្យុ​អាស៊ី​សេរី​ថ្ងៃទី១៩ ខែធ្នូ ថា​ លោក​ចូល​លក់ដូរ​ក្នុង​ផ្សារ​រយៈពេល​ប្រមាណ​៥ឆ្នាំ​មក​ហើយ​ មិន​ដែល​មាន​បញ្ហា​បរិស្ថាន​ក្រខ្វក់​ដូច​សព្វ​ថ្ងៃនេះ​ទេ​។ លោក​បន្ត​ថា សព្វថ្ងៃ​នេះ​ផ្សារ​មាន​សភាព​ទ្រុឌទ្រោម​ ដំបូល​ធ្លុះធ្លាយ​ មាន​ដក​ទឹក​ និង​ទឹក​កខ្វក់​នៅ​ពេញ​ផ្លូវ​ជុំវិញ​ផ្សារ​ ដែល​ធ្វើ​អោយ​ប៉ះពាល់​សុខភាព​ទាំង​អាជីវករ​ និង​ពលរដ្ឋ​រស់​នៅ​ក្បែរ​នោះ​។ អាជីវករ​រូប​នេះ​ ថា​លោក​ធ្លាប់​រាយការណ៍​ប្រាប់​ប្អូន​របស់​ប្រធាន​ផ្សារ​ ដែល​ជា​អ្នក​យក​ភាស៊ី​ដែរ​ ប៉ុន្តែ​គ្មាន​ដំណោះស្រាយ​ឡើយ​។ លោក​ថា ចំណែក​អាជ្ញាធរ​ស្រុក​កំរៀង​វិញ ក៏​មិន​ដែល​គិតគូរ​ពី​ការ​ប៉ះពាល់​បែប​នេះ​នោះ​ទេ​។ លោក​បន្ត​ថា សណ្ដាប់​ធ្នាប់ និង​ការ​ទុក​ដាក់​សំរាម​អនាធិបតេយ្យ​ ហើយ​សាច់​ញាតិ​អ្នក​គ្រប់គ្រង​ផ្សារ​មួយ​នេះ​ តែង​តែ​យក​សំរាម​មក​ដាក់​មុខ​តូប​អាជីវករ​ ដែល​ធ្វើ​អោយ​ប៉ះពាល់​កន្លែង​ប្រកប​អាជីវកម្ម​របស់​ពួកគេ​ទៀត​ផង​​៖

«ប្រាប់​អ្នក​ទារ​ភាស៊ី​ប្រាប់​អី​ទៅ​ គាត់​ថា​គេ​ប្រាប់​ដែរ​ ប៉ុន្តែ​ប្អូន​គាត់​នៅ​តែ​ចចេស​ដាក់​ គេ​អាង​បង​របស់​គេ​ជា​ប្រធាន​ផ្សារ​អ៊ីចឹង​ហាស​។​ គេ​ធ្លាប់​ប្រាប់​អី​ដែរ​ តែ​គេ​អត់​ធ្វើ​តាម​ គេ​នៅ​តែ​ដាក់​ ទុក​មួយ​ចំហៀង​អោយ​យើង​ដើរ​ហ្នឹង​ តែ​គ្រាន់​ថា​វា​អាក្រក់​មើល​ វា​ពិបាក​ដើរ​អ៊ីចឹង​ហាស​។ ហៃ​វា​ឆ្កែ​ឆ្មា​វា​មក​ជុះ​អាចម៍​ជុះ​នោម​អ៊ីចឹង​ទៅ​ វា​អត់​អនាម័យ​ បើ​និយាយ​ទៅ​។ ភ្លៀង​ទោ​វា​លិច​មក​ វា​ធ្លាក់​មក​ទទឹក​ក្រណាត់​របស់​យើង​ពិបាក​លើក​ទុក​ដាក់​ទុក​អី​អ៊ីចឹង​ដែរ​បង​ ហៃ​យើង​ជូត​តូប​ជូត​អី​​ អ៊ីចឹង​ទៅ​វា​ខ្ទាត​ចូល​តូប​។ ហៃ​ពាក់ព័ន្ធ​លូ​ទឹក​ស្អុយ​ លូ​អី​ហ្នឹង​ គេ​អ្នក​នៅ​ជ្រុង​ៗ​ហ្នឹង​ គេ​អត់​ហ៊ាន​ប្ដឹង​ទៅ​អ្នក​ណា​មួយ​ទេ​ អង្គការ​ណា​មួយ​ទេ​ ព្រោះ​អី​គេ​ខ្លាច​ និយាយ​មួយ​ម៉ាត់​ទៅ​គេ​ខ្លាច»

ស្រដៀង​គ្នា​នេះ​ដែរ​អាជីវករ​ម្នាក់​ទៀត​ លើកឡើង​ថា​ ​ផ្សារ​កំរៀង​ ពិត​ជា​មាន​​ដក​ទឹក​ស្អុយ​នៅ​លើ​ផ្លូវ​ និង​ប៉ះពាល់​ដល់​សុខភាព​របស់​អាជីវករ​ និង​ពលរដ្ឋ​មួយ​ចំនួន​រស់​នៅ​ក្បែរ​នោះ​មែន​។ លោក​បន្ត​ថា​ សម្រាប់​ការ​ប្រើប្រាស់​ភ្លើង​ លោក​សង្កេត​ឃើញ​ថា​មាន​ការ​កើន​ឡើង​ខុស​ប្រក្រតី​ជិត​ពាក់​កណ្ដាល​ការ​ប្រើប្រាស់​ពី​មុន​ ហើយ​កន្លងមក​អាជីវករ​ធ្លាប់​​តវ៉ា​ដែរ​ ប៉ុន្តែ​គ្មាន​ដំណោះស្រាយ​នោះ​ទេ​​៖ 

«ផ្សារ​រៀបចំ​អី​អោយ​ស្អាត​បន្តិច​មក​ ព្រោះ​ភាស៊ី​អី​ យើង​វា​គាត់​ឡើង​ថ្លៃ​ឡើង​អី​ យើង​ក៏​មិន​ដែល​តវ៉ា​អី​ គ្រាន់​តែ​ទឹក​ដក ទោ​លិច រួច​ភាស៊ី​ យើង​បិទ​ទ្វា​អត់​បាន​ទេ​ បើបិទទ្វាក៏មួយថ្ងៃអស់ជាង១ម៉ឺនដែរ ​​​(១០,០០០៛)ថ្លៃ​ភាស៊ី​អនាម័យ​ហ្នឹង កុងទ័រ​ភ្លើង​ក៏​ឡើង​ថ្លៃ​អី​ក៏​ឡើង​ថ្លៃ​។ អូ! បង​អើយ​ទឹក​ស្អុយ​តែ​ម្ដង​ហាស​ ទឹក​ដក​ហូរ​កាត់​ផ្លូវ​តែ​ម្ដង​ហាស​ យើង​ប្រាប់​គាត់​រាប់​មិន​អស់​ហើយ​ គាត់​អត់​រវល់​ផង​ បើ​យើង​ចង់​ប្ដឹង​អាជ្ញាធរ​ទៅ​ប្ដឹង​ម៉េច​កើត​ បើ​អភិបាល​ស្រុក​អី​សុទ្ធ​ភាគ​ហ៊ុន​ផ្សារ​អ៊ីចឹង​»

ក្រុម​អាជីវករ​ ស្នើ​ឱ្យ​អាជ្ញាធរ​ គួរ​តែ​សហការ​ជាមួយ​ប្រធាន​ផ្សារ​ និង​គណៈកម្មការ​​ផ្សារ​ ដើម្បី​ដោះស្រាយ​បរិស្ថាន​ក្រខ្វក់​នៅ​ជុំវិញ​ផ្សារ​មួយ​នេះ​ ហើយ​ជួសជុល​ប្រព័ន្ធ​លូ​ទឹក​ ដំបូល​ផ្សារ​ និង​ត្រួតពិនិត្យ​ឡើង​វិញ​នៅ​គីឡូ​អគ្គិសនី​ផ្សារ​ដែល​មិន​ប្រក្រតី​។ ពលរដ្ឋ​លើកឡើង​ថា​ កន្លងមក​ពួកគេ​​ធ្លាប់​ប្រាប់​ទៅ​អាជ្ញាធរ​ដែរ​ តែ​គ្មាន​វិធានការ​អ្វី​នោះ​ឡើយ​។

វិទ្យុ​អាស៊ី​សេរី​មិន​អាច​ទាក់ទង​ប្រធាន​ផ្សារ​ស្រុក​កំរៀង​ ដើម្បី​សុំ​ការ​បក​ស្រាយ​ជុំវិញ​រឿង​នេះ​បាន​ទេ​ ថ្ងៃទី១៩ ខែធ្នូ។ ចំណែក​អភិបាល​ស្រុក​កំរៀង​ លោក សុខ ដែន ប្រាប់​វិទ្យុ​អាស៊ី​សេរី​ថា​ បញ្ហា​នេះ​លោក​បាន​ចុះ​ទៅ​ត្រួត​ពិនិត្យ​ម្ដង​ហើយ​ កាល​ពី​ខែ​វិច្ឆិកា ហើយ​និង​មាន​គម្រោង​សម្រាប់​សាង​សង់​ និង​ជួសជុល​រួចហើយ​ ប៉ុន្តែ​ខាង​ផ្សារ​លើក​ឡើង​ថា​ចាប់​អនុវត្ត​គម្រោង​ដើម​ឆ្នាំ​ ២០២៣។ លោក​បន្ត​ថា ពាក់ព័ន្ធ​ភ្លើង គឺ​ក្រុមហ៊ុន​មុន​ជំពាក់​ថ្លៃ​ភ្លើង​ក្រុមហ៊ុន​ថៃ​ ដោយ​ប្រើ​កុងទ័រ​ខូច ហើយ​ខាតបង់​រត់​បាត់​ ទើប​ក្រុមហ៊ុន​ថៃ​ដេញ​ថ្លៃ​យក​ និង​ប្ដូរ​កុងទ័រ​ស្វ័យ​ប្រវត្តិ​ថ្មី​ ចំណែក​បញ្ហា​ដែល​ពលរដ្ឋ​ថា​មាន​ការ​កើន​កុងទ័រ​ខ្លាំង គឺ​លោក​ថា លោក ​និង​អោយ​ខាង​បច្ចេកទេស​ត្រួតពិនិត្យ​ឡើង​វិញ​៖ 

​​«ទឹក​លូ​ ប្រព័ន្ធ​លូ​ហ្នឹង​គឺ​នៅ​ខាង​ពលរដ្ឋ​ទេ​ ហើយ​ទឹក​ដែល​ហូរ​ចូល​ហ្នឹង​ គឺ​ហូរ​ទៅ​ពី​ផ្សារ​លក់​ត្រី​លក់​បន្លែ​លក់​ត្រី​។ ផ្សារ​ហ្នឹង​មិនមែន​ជា​ផ្សារ​ ខេ អរ ឌី ( Kom​Reang​District) ទេ គ្រាន់​តែ​អ្នក​ស្គាល់​គ្នា​គេ​សុំ​ដាក់​កន្លែង​គេ​ជួល​តូប​ជួល​អី​។ ឥឡូវ​ខាង​ KRD គេ​រៀប​ចំ​បិទ​អត់​អោយ​ផ្សារ​២​ហ្នឹង​ដំណើរ​ការ​ទេ​ ព្រោះ​កន្លងមក​វា​មាន​បញ្ហា​ ថ្នាក់​លើ​ ដូច​អ្នក​កាសែត​អ្នក​អី​ហ្នឹង​ យល់​ច្រឡំ​ថា​ផ្សារ​ KRD ទាំង​អស់​។ ហៃ​អត់​អី​ទេ​ផ្សារ​ហ្នឹង​គឺ​អា​កន្លែង​ពិ​ដាន​ធ្លុះ​អី​នឹង​ គឺ​មាន​គម្រោង​ជួសជុល​ហើយ​ ប៉ុន្តែ​គ្រាន់តែ​ថា​យើង​ថា​ជួសជុល​ ជួសជុល​ភ្លាម​យើង​ទៅ​រកលុយ​ឯណា​ទាន់​លោក​អើយ​ទើប​តែ​ផុត​ពី​កូវីត​ផង​ ហៃ​មួយ​រយៈ​កូវីត​ហ្នឹង​បិទ​ផ្សារ​មួយ​រយៈ​ដែរ​ហ្នឹង​»

ផ្សារ​កំរៀង​ស្ថិត​នៅ​ភូមិ​អូរដាលើ ឃុំ​បឹងរាំង ស្រុក​កំរៀង ខេត្ត​បាត់ដំបង​ និង​មាន​ចម្ងាយ​ប្រមាណ​១គីឡូម៉ែត្រ​ពី​ព្រំដែន​កម្ពុជា​ ថៃ ។ ផ្សារ​នេះ ​មាន​អាជីវករ​លក់ដូរ​​ជិត៤០០ តូប និង​មាន​ផ្ទះ​ប្រជាពលរដ្ឋ​លក់ដូរ​ជុំវិញ​ផ្សារ​អម​សង​ខាង​ផ្សារ​ជា​ច្រើន​ខ្នង​ផ្ទះ។

ជុំវិញ​រឿង​នេះ​ អ្នក​សម្របសម្រួល​ផ្នែក​ឃ្លាំ​មើល​ការ​រំលោភ​សិទ្ធិ​មនុស្ស​ នៃ​អង្គការ​លីកាដូ​ ប្រចាំ​នៅ​ខេត្ត​បាត់ដំបង ​​លោក អ៊ិន គង់​ជិត មានប្រសាសន៍ថា អាជ្ញាធរ ​ស្រុក​កំរៀង​ គួរ​តែ​បង្កើត​ក្រុម​ការងារ​មួយ​ចុះ​ទៅ​ពិនិត្យ​ វាយ​តម្លៃ​ពី​ការ​រៀបចំ​សណ្ដាប់ធ្នាប់ និង ផល​ប៉ះពាល់​ដល់​​សុខភាព​របស់​ពលរដ្ឋ​។ លោក​ថា ចំណែក​ខាង​អគ្គិសនី​ខេត្ត​បាត់ដំបង​វិញ​ គួរ​តែ​ចុះ​​ត្រួត​ពិនិត្យ​រក​មើល​ភាព​មិន​ប្រក្រតី​ ពាក់ព័ន្ធ​កុងទ័រ​អគ្គិសនី។ លោក​បន្ត​ថា អាជីវករ តែង​បង់​ប្រាក់​ឈ្នួល​តូប​ និង​ភាស៊ី​ផ្សារ​ ហើយ​ម្ចាស់​ផ្សារ​ ដែល​ទទួល​បាន​សិទ្ធិ​គួរ​តែ​ទទួល​ខុស​ត្រូវ​ក្នុង​ការ​ថែ​ទាំ​ផ្សារ​ និង​សោ​ភណ្ឌ​ភាព​បរិស្ថាន​ផ្សារ​៖ 

«​ក្នុង​មួយ​ឆ្នាំ​ៗ​ម្ចាស់​ផ្សារ​គាត់​គិត​តែ​ពី​ដំឡើង​តម្លៃ​ឈ្នួល​តូប​ ដោយ​លើក​យក​ករណី​ថ្លៃ​អនាម័យ​ ថ្លៃ​សន្តិសុខ​ ប៉ុន្តែ​ករណី​ដែល​អាជីវករ​លក់ដូរ​រាល់​ថ្ងៃ​ដែល​គាត់​ត្អូញត្អែរ​ហ្នឹង​ថា​ សូម្បី​តែ​តូប​ដែល​ខូចខាត​ត្រូវ​ជួសជុល​ ត្រូវ​ដាក់​បន្ទុក​លើ​ពួកគាត់​ទៀត​ ហើយ​ចំណែក​ម្ចាស់​ផ្សារ​អត់​មាន​បាន​កែ​លំអ​ តូប​ទាំង​នោះ​អោយ​មាន​ភាព​ប្រសើរ​ឡើង​នោះ​ឡើយ​។ ចំណែក​អនាម័យ​ ហើយ​នឹង​ការ​រៀបចំ​ប្រព័ន្ធ​លូ​ទឹក​ស្អុយ​នៅ​ផ្នែក​ខាង​ក្រោម​ហ្នឹង​ ក៏​រៀប​ចំ​មិន​បាន​ត្រឹមត្រូវ​ដែរ​ ដូច​ករណី​នេះ​ម្ចាស់​ផ្សារ​គួរ​តែ​មាន​ការ​គិត​គូ​ខ្ពស់​រៀបចំ​អោយ​មាន​សណ្ដាប់ធ្នាប់​អោយ​មាន​សោ​ភណ្ឌ​ភាព​ប្រកប​ដោយ​អនាម័យ​ ដើម្បី​ទាក់ទាញ​ទេសចរណ៍​ ឬ​ក៏​គាត់​អ្នក​ចូល​ទៅ​ទិញ​ឥវ៉ាន់​នៅ​ក្នុង​ផ្សារ​ហ្នឹង​​»

អាជីវករ និង​​សង្គម​ស៊ីវិល​ ​ស្នើ​ដល់​អាជ្ញាធរ​ពាក់ព័ន្ធ​គួរ​ស្វែង​រក​ដំណោះ​ស្រាយ​បញ្ហា​នេះ​ឱ្យ​បាន​ឆាប់​ ដោយ​កែ​លំ​អ​ផ្សារ ផ្លូវ​ជុំវិញ​ផ្សារ​ និង​ត្រួតពិនិត្យ​​ស្តង់ដារ​កុងទ័រ​ភ្លើង​ត្រឹមត្រូវ​ ដើម្បី​ជួយ​ដល់​សុខុមាលភាព​និង​ការ​រស់​នៅ​របស់​ប្រជាពលរដ្ឋ​នៅ​តំបន់​នោះ​៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។