មនុស្សមួយចំនួនបន្តបាត់ខ្លួនក្នុងគ្រោះអគ្គិភ័យនៅប៉ោយប៉ែត

ដោយ យ៉ង ចាន់តារា
2023.01.04

មនុស្សមួយចំនួនបន្តបាត់ខ្លួនក្នុងគ្រោះអគ្គិភ័យនៅប៉ោយប៉ែត

ទិដ្ឋភាពអគារកាស៊ីណូ ហ្គ្រែន ដាយមិន ស៊ីតធី (Grand Diamond City) នៅប៉ោយប៉ែត ថតពីលើ ក្រោយពន្លត់អគ្គីភ័យ កាលពីថ្ងៃទី៣១ ខែធ្នូ ឆ្នាំ២០២២។

រូប៖ ហ្វេសប៊ុកស្នងការដ្ឋាននគរបាលខេត្តបន្ទាយមានជ័យ

ស្ដាប់ ឬទាញយកសំឡេង

មនុស្សមួយចំនួនបន្តបាត់ខ្លួននៅឡើយ ក្នុងគ្រោះអគ្គិភ័យកាស៊ីណូនៅក្រុងប៉ោយប៉ែត គិតត្រឹមល្ងាចថ្ងៃទី៣ មករា។

កាសែតបាងកកប៉ុស្តិ៍ (Bangkok Post) ផ្សាយកាលពីថ្ងៃទី៣ មករា ដោយស្រង់សម្ដីអាជ្ញាធរថៃថា ជនជាតិថៃចំនួន ៩នាក់ ដែលគេបានប្រទះឃើញក្នុងកាស៊ីណូនៅមុនពេលហេតុការណ៍ភ្លើងឆេះនោះ នៅបន្តបាត់ខ្លួននៅឡើយ។ ពួកគេទាំង ៩នាក់ ស្ថិតក្នុងចំណោមជនជាតិថៃ ៥០នាក់ ដែលគេគិតថា បានបាត់ខ្លួនពីដំបូង ប៉ុន្តែក្រោយមកមនុស្ស ៤១នាក់ ត្រូវបានគេរកឃើញ និងបញ្ជូនត្រឡប់ទៅប្រទេសថៃវិញ។

វិទ្យុអាស៊ីសេរីមិនអាចទាក់ទងអ្នកនាំពាក្យសាលាខេត្តបន្ទាយមានជ័យលោក សេក សុខុម ដើម្បីសាកសួរអំពីរឿងនេះបានទេ កាលពីយប់ថ្ងៃទី៣ មករា។

ហេតុការណ៍ភ្លើងឆេះកាស៊ីណូ ហ្គ្រែន ដាយមិន ស៊ីធី (Grand Diamond City) បានកើតឡើង កាលពីពាក់កណ្ដាលអាធ្រាត្រថ្ងៃទី២៨ ឈានចូលថ្ងៃទី២៩ ខែធ្នូ ឆ្នាំ២០២២។ សមត្ថកិច្ចកម្ពុជាអះអាងថា អគ្គិភ័យនេះបានសម្លាប់មនុស្ស ២៦នាក់ ក្នុងនោះសាកសព ២៥នាក់ ត្រូវបានរកឃើញនៅកន្លែងកើតហេតុ និងម្នាក់ទៀតស្លាប់ក្រោយពេលបញ្ជូនទៅព្យាបាលនៅប្រទេសថៃ។ ជនរងគ្រោះទាំងនោះ រួមមានជនជាតិថៃ ម៉ាឡេស៊ី នេប៉ាល់ ចិន និង ៦នាក់ទៀតមិនទាន់ដឹងអត្តសញ្ញាណនៅឡើយ។ ប៉ុន្តែបើតាមសារព័ត៌មានក្នុងស្រុក ដែលបានស្រង់សម្ដីអ្នកនាំពាក្យសាលាខេត្តបន្ទាយមានជ័យ សាកសពទាំង ៦នាក់នោះ មាន ៣នាក់ អាចជាជនជាតិខ្មែរ ដែលគ្រួសាររបស់ពួកគាត់កំពុងស្វែងរក។

អាជ្ញាធរកម្ពុជាបានចាប់ផ្ដើមវាយកម្ទេចអាគារកាស៊ីណូដែលឆេះនោះហើយ ចាប់តាំងពីថ្ងៃទី២ មករា ក្រោមហេតុផលថា ដើម្បីសម្រួលដល់ការចេញ-ចូលនៅច្រកទ្វារអន្តរជាតិប៉ោយប៉ែត។ ប៉ុន្តែក្រុមមន្ត្រីសិទ្ធិមនុស្សបានរិះគន់ចំណាត់ការដ៏លឿនរហ័សនេះ ព្រោះប្រតិបត្តិការរុករក និងស្រាវជ្រាវធ្វើឡើងក្នុងរយៈពេលដ៏ខ្លី ស្របពេលពលរដ្ឋខ្មែរ និងថៃមួយចំនួនកំពុងស្វែងរក និងដង្ហោយសុំឱ្យសមត្ថកិច្ចបន្តស្វែងរកសមាជិកគ្រួសាររបស់ពួកគេដែលបន្តបាត់ខ្លួននៅឡើយ៕