គ្រោះថ្នាក់ចរាចរណ៍ បានកើតឡើងជារៀងរាល់ថ្ងៃ និងបណ្ដាលឲ្យមនុស្សស្លាប់ប្រមាណ ៥នាក់ជារៀងរាល់ថ្ងៃ និងរបួសជាច្រើននាក់ទៀត។
សិស្សសាលាបឋមសិក្សាអនុវត្តន៍ រាជធានីភ្នំពេញ និងក្រុមយុវជនស្ម័គ្រចិត្តកាកបាទក្រហម រួមគ្នាទាមទារអោយមានផ្លូវសុវត្ថិភាពសម្រាប់ថ្មើរជើង ដោយសំអាងថា ជាផ្នែកមួយក្នុងការកាត់បន្ថយគ្រោះថ្នាក់ចរាចរណ៍។
ពួកគេបានលើកបង្ហាញនូវបដាជាច្រើន ដែលបានសរសេរថា ពួកគេដើរដើម្បីសុវត្ថិភាពថ្មើរជើង ដើម្បីកាត់បន្ថយគ្រោះថ្នាក់របស់អ្នកថ្មើរជើង និងដើម្បីសុវត្ថិភាពចរាចរណ៍។
តំណាងសិស្សសាលាបឋមសិក្សាអនុវត្តន៍ បានថ្លែងនៅក្រោយពិធីហែក្បួនថា សិស្សសាលាបឋមសិក្សាដូចរូបនាង តែងព្រួយបារម្ភពីសុវត្ថិភាពផ្ទាល់ខ្លួន ដោយសារពុំមានផ្លូវសុវត្ថិភាពសម្រាប់ថ្មើរជើង ខ្វះខាតភ្លើងសញ្ញា និងស្លាកសញ្ញានៅតំបន់សាលារៀន។ ផ្លូវថ្នល់នៅរាជធានីភ្នំពេញ និងខេត្តក្រុងមួយចំនួន មានបែងចែកជាផ្លូវសម្រាប់អ្នកថ្មើរជើង សម្រាប់ម៉ូតូ និងរថយន្តបើកបរ។ ប៉ុន្តែ ចំណែកផ្លូវសម្រាប់អ្នកថ្មើរជើង ភាគច្រើនត្រូវអ្នកលក់ដូរដាក់តាំងអីវ៉ាន់លក់ពាសពេញ មិនមានផ្លូវដើរ ទើបបណ្ដាលឲ្យមានគ្រោះថ្នាក់ដល់អ្នកថ្មើរជើង។
ស្របគ្នានេះ នាងបានស្នើអោយសាធារណជន ជាពិសេសអ្នកបើកបរអោយគោរពសិទ្ធិថ្មើរជើង៖ «ដាក់តាំងទំនិញចតយានជំនិះ ឬដាក់វត្ថុផ្សេងៗលើចិញ្ចើមថ្នល់ ជាឧបសគ្គមិនអាចអោយយើងខ្ញុំដើរបាន។ សូមអោយមានភ្លើងសញ្ញា និងស្លាកសញ្ញាចរាចរណ៍នៅតាមផ្លូវតំបន់សាលារៀន ដើម្បីអោយអ្នកបើកបរបន្ថយល្បឿន និងឈប់បណ្ដោះអាសន្នពេលសិស្សចេញពីសាលារៀន។ សូមអោយមានភ្នាក់ងារនគរបាលអ្នកជួយសម្រួលចរាចរនៅមុខសាលារៀន ជាពិសេសនៅពេលសិស្សចេញ និងចូលសាលារៀន»។
ការហែក្បួនរបស់ក្រុមសិស្សសាលា ធ្វើឡើងដោយមានការគាំទ្រពីគណៈកម្មការសុវត្ថិភាពចរាចរណ៍ផ្លូវគោក អង្គការសុខភាពពិភពលោក ចលនាដើម្បីសុខភាព និងអង្គការអន្តរជាតិមួយចំនួនទៀត ធ្វើការងារទាក់ទងនឹងសុវត្ថិភាពចរាចរណ៍។
តំណាងអង្គការសុខភាពពិភពលោក លោក ភីតធើ វ៉ាន់ម៉ារ៉េន (Pieter JM Van Marren) មានប្រសាសន៍ថា នៅកម្ពុជា ១៣% នៃអ្នកស្លាប់ដោយគ្រោះថ្នាក់ចរាចរណ៍ គឺជាអ្នកថ្មើរជើង។ អ្នកស្លាប់ទាំងនោះ ភាគច្រើនជាកុមារ និងសិស្សសាលា។ លោក វ៉ាន់ម៉ារ៉េន ស្នើរដ្ឋាភិបាល និងដៃគូសុវត្ថិភាពចរាចរណ៍ អោយបន្ត និងបង្កើនការវិនិយោគក្នុងផ្នែកសុវត្ថិភាពចរាចរណ៍ ដើម្បីធានាការពារមិនអោយមានថ្មើរជើងណាម្នាក់ស្លាប់ចាប់ពីសប្ដាហ៍នេះតទៅ។
លោក ភីតធើ វ៉ាន់ម៉ារ៉េន៖ «គឺចិញ្ចើមផ្លូវ និងផ្លូវសម្រាប់ថ្មើរជើងត្រូវបានគេប្រើប្រាស់សម្រាប់ដាក់លក់ចំណីអាហារ ឬសម្រាប់ចតយានយន្តទៅវិញ ដែលត្រូវបង្ខំអោយថ្មើរជើងត្រូវដើរនៅលើទ្រូងផ្លូវដែលអាចអោយប្រឈមនឹងគ្រោះថ្នាក់ចរាចរណ៍។ នៅពេលផ្លូវថ្នល់មានសុវត្ថិភាព ប្រជាជនយើងនឹងចូលចិត្តដើរ ព្រោះការដើរជាមធ្យោបាយជាមូលដ្ឋានសម្រាប់យើងទាំងអស់គ្នា ហើយយើងក៏អាចកាត់បន្ថយនូវសំឡេងយានយន្ត និងការបំពុលខ្យល់ទៀតផង។ ធ្វើអោយយើងមានសុខភាពល្អប្រពៃ និងមិនមានជាតិខ្លាញ់ច្រើន ហើយកាត់បន្ថយជំងឺបេះដូង និងបញ្ហានានាទាក់ទងនឹងភាពធាត់ហួស»។
រដ្ឋលេខាធិការក្រសួងសាធារណការ និងដឹកជញ្ជូន និងជាអនុប្រធានគណៈកម្មាធិការសុវត្ថិភាពចរាចរណ៍ផ្លូវគោក លោក តូច ចាន់កុសស មានប្រសាសន៍ថា ក្រសួងនឹងខិតខំបន្ថែមទៀតទាំងការកែលំអផ្លូវថ្នល់ និងរឹតបន្តឹងច្បាប់ចរាចរណ៍។
លោក តូច ចាន់កុសស៖ «យើងនឹងខិតខំបន្ថែមទៀតក្នុងការកសាង និងការធ្វើអោយប្រសើរឡើងនូវហេដ្ឋារចនាសម្ព័ន្ធផ្លូវថ្នល់ ជាពិសេសចិញ្ចើមផ្លូវ។ ផ្លូវឆ្លងកាត់សម្រាប់ថ្មើរជើង និងការបំពាក់ស្លាកសញ្ញាចរាចរណ៍បានគ្រប់គ្រាន់នៅកន្លែងដែលមានអ្នកថ្មើរជើងឆ្លងកាត់ច្រើន ដូចជាសាលារៀន និងមន្ទីរពេទ្យជាដើម»។
របាយការណ៍នៃប្រព័ន្ធជនរងគ្រោះនៅកម្ពុជា បានអោយដឹងថា នៅកម្ពុជា ជារៀងរាល់ថ្ងៃជាមធ្យមមានមនុស្ស ៥នាក់ បានស្លាប់ដោយគ្រោះថ្នាក់ចរាចរណ៍។ របាយការណ៍បណ្ដោះអាសន្នសម្រាប់ឆ្នាំ២០១២ អោយដឹងថា ក្នុងចំណោមមនុស្សចំនួន ១.៩៦៦នាក់ដែលស្លាប់ដោយគ្រោះថ្នាក់ចរាចរណ៍ មានថ្មើរជើងចំនួន ២០៧នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។