អាជ្ញាធរប្រទេសថៃ កំពុងដំណើរការនីតិវិធីប្ដឹងជនជាតិថៃ ៥នាក់ ក្រោយស៊ើបអង្កេតរកឃើញថា ពួកគេគឺជាមេខ្យល់ ឆបោកជនជាតិមីយ៉ាន់ម៉ា ៩នាក់ យកទៅលក់បន្តឱ្យក្រុមឧក្រិដ្ឋជនឆបោកតាមប្រព័ន្ធអនឡាញ ដែលមានទីតាំងនៅក្នុងប្រទេសកម្ពុជា។ មន្ត្រីសង្គមស៊ីវិលថា រដ្ឋាភិបាលកម្ពុជា ត្រូវបង្កើនប្រតិបត្តិការបង្ក្រាបករណីនេះ ឱ្យមានប្រសិទ្ធភាព ដើម្បីធានាសន្តិសុខ សុវត្ថិភាពក្នុងប្រទេស។
នាយកដ្ឋានស៊ើបអង្កេតពិសេស ផ្នែកជួញដូរមនុស្ស របស់ប្រទេសថៃ កាលពីថ្ងៃទី២៥ ខែតុលា បានបញ្ជូនសំណុំរឿងរបស់មេខ្យល់ជនជាតិថៃចំនួន ៥នាក់ ទៅកាន់តុលាការ ដើម្បីស្នើសុំដីកាចាប់ខ្លួន បន្ទាប់ពីពួកគេបានឆបោកជនជាតិមីយ៉ាន់ម៉ា (Myanmar) ចំនួន ៩នាក់ យកទៅលក់បន្តឱ្យឧក្រិដ្ឋជនចាប់ជំរិត និងឆបោកតាមអ៊ីនធឺណិតដែលមានទីតាំងនៅក្នុងប្រទេសកម្ពុជា។ នេះបើតាមការចុះផ្សាយរបស់សារព័ត៌មាន ឥសរា ( ISRA) របស់ថៃ។
អាជ្ញាធរប្រទេសថៃ បានរកឃើញថា មេខ្យល់ជនជាតិថៃទាំង ៥នាក់នោះបានបញ្ឆោតឱ្យជនជាតិភូមា ទៅធ្វើការជាភ្នាក់ងារផ្នែកលក់តាមអនឡាញ នៅក្នុងក្រុមហ៊ុនចិនមួយកន្លែង ដែលមានទីតាំងស្ថិតនៅក្នុងស្រុកកោះធំ ខេត្តកណ្ដាល របស់កម្ពុជា។ តាមការអះអាងរបស់ជនរងគ្រោះបានរៀបរាប់ថា នៅពេលពួកគេទៅដល់ទីតាំងអគារមួយកន្លែងនៅស្រុកកោះធំ នោះភ្លាមពួកគេត្រូវបានក្រុមមេខ្យល់ និងថៅកែដែលពួកគេអះអាងថា គឺជាជនជាតិចិន បានចាប់ឃុំខ្លួន វាយដំធ្វើទារុណកម្ម បង្អត់អាហារ និងបង្ខំពួកគេឱ្យធ្វើការហៅទូរស័ព្ទ ដើម្បីឆបោកអតិថិជនតាមប្រព័ន្ធអនឡាញ។
ក្រោយការស៊ើបអង្កេត នាយកដ្ឋានស៊ើបអង្កេតពិសេស ផ្នែកជួញដូរមនុស្ស របស់ប្រទេសថៃ បានរៀបចំសំណុំរឿង និងភស្តុតាងដើម្បីដាក់ពាក្យបណ្ដឹងទៅតុលាការប្ដឹងថៅកែជនជាតិចិន និងមេខ្យល់ទាំង ៥នាក់ពីបទ "ឃុំឃាំង ជួញដូរមនុស្ស និងធ្វើទារុណកម្ម" និងស្នើសុំដីកាពីព្រះរាជអាជ្ញាដើម្បីស្វែងរកចាប់ខ្លួនជនត្រូវចោទយកមកកាត់ទោសតាមច្បាប់។
ការរកឃើញរបស់អាជ្ញាធរថៃនេះ គឺស្របពេលសារព័ត៌មានបរទេសចុះផ្សាយជាបន្តបន្ទាប់ ពីការរកឃើញករណីឧក្រិដ្ឋកម្មឆបោក និងចាប់ជំរិត ដែលក្រុមជនល្មើសភាគច្រើនជាជនជាតិចិន កំពុងសំងំតាំងមូលដ្ឋាននៅតាមបណ្ដាខេត្តមួយចំនួនក្នុងប្រទេសកម្ពុជា រួមមានក្រុងបាវិត ខេត្តស្វាយរៀង ខេត្តកំពង់ស្ពឺ ក្រុងប៉ោយប៉ែត ខេត្តបន្ទាយមានជ័យ និងក្រុងព្រះសីហនុ ជាដើម។
ទាក់ទិនរឿងនេះ អនុប្រធានអចិន្ត្រៃយ៍ គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស អ្នកស្រី ជូ ប៊ុនអេង ប្រាប់វិទ្យុអាស៊ីសេរី នៅថ្ងៃទី២៦ ខែតុលា ថា កម្ពុជា ក៏ជាប្រទេសដែលរងគ្រោះពីឧក្រិដ្ឋកម្មឆបោក និងចាប់ជំរិតដែរ។ អ្នកស្រីបន្តថា ក្នុងករណីនេះ រដ្ឋាភិបាលនៃប្រទេសសាមី គួរតែរួមគ្នាទប់ស្កាត់ និងប្រយុទ្ធប្រឆាំងនឹងការជួញដូរមនុស្ស ជាជាងការដាក់បន្ទុក និងទម្លាក់កំហុសទៅលើប្រទេសណាមួយ។
លោកស្រី ជូ ប៊ុនអេង៖«ដូចខ្ញុំធ្លាប់និយាយអ៊ីចឹង ថាយើងទទួលស្គាល់ថា កម្ពុជាយើង វាមិនអត់ទេបទល្មើស ហើយបើមកតាំងពីភូមា និងមកពីថៃ មកធ្វើសកម្មភាពនៅកម្ពុជា ខ្ញុំគិតថា នៅពេលពួកគេមកច្បាស់ជាមិនបានប្រាប់សមត្ថកិច្ចណាថា គាត់មកធ្វើបទល្មើសទេ។ អ៊ីចឹងវាហាក់ដូចជាចេតនារបស់ជនល្មើសដែរ ដែលមកបង្កបញ្ហានៅកម្ពុជា ហើយពេលណាមានបញ្ហា ចង្អុលមកកម្ពុជា»។
យ៉ាងណាក៏ដោយចុះ ក្រៅពីជនជាតិភូមា ក៏មានជនជាតិថៃផ្សេងទៀត បានចាញ់បោក និងរងគ្រោះក្នុងឧក្រិដ្ឋកម្មឆបោកនៅកម្ពុជាដែរ ប៉ុន្តែករណីខ្លះ អាជ្ញាធរបានរកឃើញថាជនឆបោកមួយចំនួនមិនមែនជាជនរងគ្រោះដោយសារការបង្ខំឱ្យចូលធ្វើការឆបោកឡើយ។ ក្នុងនោះជនរងគ្រោះពីការបង្ខំឱ្យធ្វើការឆបោកនៅកម្ពុជាបានអះអាងថា នៅពេលមានអាជ្ញាធរកម្ពុជា ចុះមកត្រួតពិនិត្យតាមអាគារម្ដងៗ ក្រុមឧក្រិដ្ឋជនបានជម្លៀសពួកគេទៅកន្លែងមួយផ្សេងទៀត។
ទាក់ទិនរឿងនេះ នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ (Licadho) លោក អំ សំអាត យល់ឃើញថា ការរកឃើញ និងរាយការណ៍ជាបន្តបន្ទាប់ អំពីការជួញដូរមនុស្ស ចាប់ជំរិត និងឧស្សាហកម្មឆបោកតាមប្រព័ន្ធអនឡាញ កំពុងគំរាមកំហែងដល់កេរ្តិ៍ឈ្មោះកម្ពុជា និងសុខសុវត្ថិភាពលើផ្ទៃប្រទេស។
លោក អំ សំអាត៖«ទីមួយ គឺពង្រឹងក្នុងការអនុវត្តច្បាប់ឱ្យបានម៉ឺងម៉ាត់ និងមានប្រសិទ្ធភាព។ ទីពីរ ជនណាក៏ដោយឱ្យតែមានការពាក់ព័ន្ធ ទោះបីមានឋានន្តរសក្ដិណាក៏ដោយ ក៏ត្រូវតែអនុវត្តតាមផ្លូវច្បាប់ជាដាច់ខាត។ ទីបី ត្រូវលុបបំបាត់នូវអំពើពុករលួយ។ ទីបួន គឺត្រូវមានការបណ្ដុះបណ្ដាលបន្ថែមនូវជំនាញវិជ្ជាជីវៈមន្ត្រីនៅក្នុងការអនុវត្តការងារប្រឆាំងនឹងការជួញដូរមនុស្ស»។
នៅក្នុងកិច្ចប្រជុំកំពូលអាស៊ាន នៅរដ្ឋធានីវៀងចន្ទន៍ (Vientiane) ប្រទេសឡាវ (Laos) កាលពីថ្ងៃទី៩ ខែតុលា នាយករដ្ឋមន្ត្រីថៃ អ្នកស្រី ផេថងថាន ស៊ីណាវ៉ាត់ (Paethongtarn Shinawatra) បានលើកយកបញ្ហាឧក្រិដ្ឋកម្មឆ្លងដែននេះ ទៅពិភាក្សាទ្វេភាគីជាមួយលោកនាយករដ្ឋមន្ត្រី ហ៊ុន ម៉ាណែត ដើម្បីរកវិធីដោះស្រាយបញ្ហានេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។