ភ្ញៀវ​ទេសចរ​នៅ​ខេត្ត​សៀមរាប​កើន​ឡើង​ប៉ុន្តែ​ធ្លាក់​ចុះ​នៅ​ខេត្ត​ព្រះសីហនុ​នៅ​ថ្ងៃ​ភ្ជុំបិណ្ឌ

ដោយ សុ ជីវី
2018-10-12
អ៊ីម៉ែល
មតិ
Share
បោះពុម្ព
ទេសចរ​ដើរ​កម្សាន្ត​នៅ​ប្រាសាទ​អង្គរវត្ត ខេត្ត​សៀមរាប ​ក្នុង​ពិធី​បុណ្យ​ចូល​ឆ្នាំ​ចិន-វៀតណាម ឆ្នាំ​២០១៨។
ទេសចរ​ដើរ​កម្សាន្ត​នៅ​ប្រាសាទ​អង្គរវត្ត ខេត្ត​សៀមរាប ​ក្នុង​ពិធី​បុណ្យ​ចូល​ឆ្នាំ​ចិន-វៀតណាម ឆ្នាំ​២០១៨។
រូបថត​ក្រសួង​ទេសចរណ៍

ក្នុង​រយៈពេល​បី​ថ្ងៃ​នៃ​បុណ្យ​ភ្ជុំបិណ្ឌ ពលរដ្ឋ​ដើរលេង​កម្សាន្ត​នៅ​តំបន់​ទេសចរណ៍​នានា​ប្រមាណ ១.២​លាន​នាក់ កើន​ឡើង​ចំនួន​២០​ភាគរយ បើ​ធៀប​ទៅ​និង​បុណ្យ​ភ្ជុំ​ឆ្នាំមុន។ ប៉ុន្តែ​ខេត្ត​ព្រះសីហនុ ភ្ញៀវ​ទៅ​កម្សាន្ត​នៅ​ខេត្ត​ព្រះសីហនុ​បាន​ធ្លាក់​ចុះ​ជាង ១៣​ភាគរយ​បើ​ធៀប​ទៅ​និង​បុណ្យ​ភ្ជុំបិណ្ឌ​ឆ្នាំមុន។

ប្រធាន​អង្គការ​សម្ព័ន្ធ​គណនេយ្យភាព​សង្គម​កម្ពុជា លោក សន ជ័យ យល់ថា បញ្ហា​ចម្បង ដែល​ធ្វើ​ខេត្ត​ព្រះសីហនុ​បាត់បង់​ភ្ញៀវ​ទេសចរ​បែបនេះ ហេតុផល​សំខាន់​ជាងគេ​ដែល​មិន​អាច​ប្រកែក​បាន​គឺ​កំណើន​ជន​ជាតិ​ចិន​រាប់​ម៉ឺន​នៅ​ខេត្ត​នេះ ដែល​កំពុង​បង្ក​ជា​បញ្ហា​ផ្សេងៗ។ លោក​បដិសេធ​ការ​លើកឡើង​របស់​ក្រសួងទេសចរណ៍​ដែល​ថា ពលរដ្ឋ​ទៅលេង​ខេត្ត​ព្រះសីហនុ​ចុះថយ​ដោយសារតែ​បញ្ហា​ផ្លូវ។ លោក សន ជ័យ លើកឡើង​ទៀត​ថា មាន​រមណីយដ្ឋាន​និង​តំបន់​ទេសចរណ៍​ផ្សេងទៀត​មាន​បញ្ហា​ផ្លូវ​លំបាក​ជាង​ខេត្ត​ព្រះសីហនុ​ទៅទៀត ប៉ុន្តែ​បែរជា​មាន​ភ្ញៀវ​ទេសចរ​កើន​ឡើង​ទៅវិញ៖ «ដោយសារតែ​កត្តា​បី ទី១ តម្លៃ​ស្នាក់នៅ​ថ្លៃ​អាហារ រឿង​ទី​ពីរ​បញ្ហា​បរិស្ថាន​អាក្រក់​ដែល​មិនល្អ​ដូច​មុន​និង​រឿង​ទី​បី​វត្តមាន​ជនជាតិ​ចិន​ដែល​ជារឿយៗ​ជនជាតិ​បង្ក​បញ្ហា​បាញ់​ដោយ​បោះ​សេរី»

របាយការណ៍​របស់​ក្រសួងទេសចរណ៍​ចេញផ្សាយ​កាលពី​ថ្ងៃ​ទី​១០ ខែ​តុលា បង្ហាញ​ថា ភ្ជុំបិណ្ឌ​រយៈពេល​បី​ថ្ងៃ​គឺ​ចាប់ពី​ថ្ងៃ​ទី​៨ ដល់ ថ្ងៃ​ទី​១០ តុលា ពលរដ្ឋ​បាន​នាំគ្នា​សម្រុក​ទៅ​ដើរ​កម្សាន្ត​នៅ​ខេត្ត​សៀមរាប ដែល​ធ្វើ​ឲ្យ​ខេត្ត​ប្រវត្តិសាស្ត្រ​មួយ​នេះ​នៅតែ​រក្សា​បាន​កំណើន​ភ្ញៀវ​ទេសចរ​ជាង ២​សែន​នាក់​ដដែល។ ចំណែក​ខេត្ត​កំពត​ក៏​មាន​ពលរដ្ឋ​ទៅលេង​កម្សាន្ត​ច្រើន​ដែរ ហើយ​តំបន់​ដែល​ទាក់ទាញ​ភ្ញៀវ​ទេសចរណ៍​បន្ទាប់​នោះ​គឺ​រមណីយដ្ឋាន​បូកគោ​និង​ទឹកឈូ​។ ដោយឡែក ខេត្ត​ជាប់មាត់​សមុទ្រ​បី​ទៀត​មាន​ខេត្ត​កែប ខេត្ត កោះកុង និង​ខេត្ត​ព្រះសីហនុ បែរជា​បាត់បង់ ភ្ញៀវ​ទៅលេង​កម្សាន្ត​ទៅវិញ។

សកម្មជន​បរិស្ថាន​លោក មួង សូនី ដែល​បាន​ចុះទៅ​អង្កេត​នៅ​ខេត្ត​ព្រះសីហនុ កាលពី​អំឡុង​បុណ្យ​ភ្ជុំបិណ្ឌ​ឲ្យ​អាស៊ីសេរី​ដឹង ថា អ្វី​ដែល​លោក​ឃើញ​ផ្ទាល់​គឺ​ចំនួន​ភ្ញៀវ​ទៅលេង​ខេត្ត​ព្រះសីហនុ​ថយ​ចុះ​ខ្លាំង​ច្រើនជាង​របាយការណ៍​របស់​ក្រសួងទេសចរណ៍​នេះ​បង្ហាញ​ទៅទៀត។ លោក​យល់ថា ដើមហេតុ​ដែល​ធ្វើ​ឲ្យ​ខេត្ត​ព្រះសីហនុ​ថយ​ភ្ញៀវ​បែបនេះ​គឺ​បណ្តាល​មក​ពី​បញ្ហា បរិស្ថាន​ក្នុង​នោះ​សំរាម​ជា​កត្តា​ចម្បង។

លោក មួង សូនី លើកឡើង​ទៀត​ថា ចំនួន​ដ៏​ច្រើន​លើសលប់​នៃ​ជនជាតិ​ចិន​បាន​ធ្វើ​ឲ្យ​តម្លៃ​ផ្ទះ សំណាក់ សណ្ឋាគារ និង​ទំនិញ​ផ្សេងទៀត​នៅ​ក្នុង​ខេត្ត​នេះ​ឡើងថ្លៃ​ខ្លាំង រួម​ទាំង​បញ្ហា​អសន្តិសុខ​សង្គម​ទៀត​ផង៖ «មាន​ទឹក​ហូរ​ចេញពី​លូ ដី​ហុយ ផ្លូវ​ក្រឡិកក្រឡុក ហើយ​ជនជាតិ​ចិន​គាត់​មក​រស់នៅ​ហ្នឹង​ដាក់​សំរាម​ចោល​តាម​ចិញ្ចើម​ផ្លូវ​ហើយ​អត់​ឃើញ​មាន​ឡាន​មក​យក​សំ​តាម​ចេញ»

ទាក់ទង​ការ​លើកឡើង​ទាំងនេះ អភិបាលខេត្ត​ព្រះសីហនុ លោក យន្ត មីន ឲ្យ​អាស៊ីសេរី​ដឹង​ថ្ងៃ​ទី​១១ ខែ​តុលា ថា ភ្ជុំ​បី​ថ្ងៃ​នៅ​ខេត្ត​ព្រះសីហនុ​ភ្ញៀវ​ក្នុងស្រុក​ថយ​ចុះ​ដូច​ក្រសួងទេសចរណ៍​បាន​ចេញ​ផ្សាយ​របាយការណ៍​ពិតមែន ប៉ុន្តែ​ភ្ញៀវ​អន្តរជាតិ​កើន​ឡើង។ លោក​បន្ត​ថា ខេត្ត​ព្រះសីហនុ​សព្វថ្ងៃ​មាន​បញ្ហា​ខ្លះ​ដូចជា​ផ្ទះសំណាក់ និង​សណ្ឋាគារ​ឡើងថ្លៃ បញ្ហា​សោភណភាព​ទីក្រុង​មិនសូវ​ស្អាត​ល្អ ផ្គួប​ផ្សំ​និង​បញ្ហា​ផ្លូវ​លំបាក ព្រមទាំង​មានការ​ចែកចាយ​ព័ត៌មាន​បំផ្លើស​នៅ​លើ​បណ្ដាញ​សង្គម​ផង​នោះ ទើប​ធ្វើ​ឲ្យ​ពលរដ្ឋ​មិន​សូវ​ហ៊ាន​ទៅលេង​កម្សាន្ត​ក្នុង​ខេត្ត​នេះ។

លោក យន្ត មីន ស្នើ​ទៅ​ពលរដ្ឋ​និង​ភ្ញៀវ​ទេសចរ​ឲ្យ​មានការ​យោគយល់​ចំពោះ​បញ្ហា​ខ្លះៗ​ដែល ខេត្ត​ព្រះសីហនុ​កំពុង​ជួបប្រទះ​សព្វថ្ងៃ ហើយ​លោក​បាន​ប្រដូច​ខេត្ត​នេះ​ទៅ​និង​ផ្ទះ​ដែល​កំពុង ជួសជុល​ដូច្នេះ​ហើយ​គឺ​មិនទាន់​ល្អ​ស្អាត​នោះ​ទេ។ លោក​អះអាង​ថា នៅ​ពេល​នេះ​អាជ្ញាធរ​ខេត្ត និង​អ្នក​ពាក់ព័ន្ធ​កំពុង​ដោះស្រាយ​បញ្ហា​ទាំងនេះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល