យ៉ាង​តិច​ក្មេង​៣​នាក់​ស្លាប់​និង​របួស​ជិត​១០​នាក់​ក្នុង​គ្រោះថ្នាក់​ចរាចរណ៍

គ្រោះថ្នាក់​ចរាចរណ៍​មួយ​នៅ​លើ​មហាវិថី​ព្រះ​នរោត្តម នៅ​ម៉ោង​ជាង ៥​ល្ងាច ថ្ងៃ​ទី១ ខែ​មីនា បណ្ដាល​ឲ្យ​សម្លាប់​ក្មេង​យ៉ាង​តិច ៣​នាក់ និង​របួស​ជិត ១០​នាក់។
ដោយ សុ ជីវី
2013.03.01
Share on WhatsApp
Share on WhatsApp

រថយន្ត​ពណ៌​ស្ករ ម៉ាក​កាមរី (Camry) ឬ​ស្គាល់​ជា​ទូទៅ​ថា បាឡែន បើកបរ​ដោយ​យុវតី​អាយុ ២៣​ឆ្នាំ​ម្នាក់​ជា​និស្សិត​ឆ្នាំ​ទី៦ នៃ​សាកលវិទ្យាល័យ​វេជ្ជសាស្ត្រ និង​វិទ្យាសាស្ត្រ​សុខាភិបាល បាន​បុក​រះ​លើ​អ្នក​ម៉ូតូ និង​កង់​អ្នក​ដំណើរ​ជា​ច្រើន​គ្រឿង ចាប់​តាំង​រថយន្ត​នេះ​បាន​ចេញ​ពី​ខាង​មុខ​សាកលវិទ្យាល័យ​បញ្ញា​សាស្ត្រ ជិត​វិមាន​ឯករាជ្យ បន្ត​រហូត​ដល់​បុក​ជាប់​របង​ខាង​មុខ​ក្រសួង​មហាផ្ទៃ។

លោក ប៉ែន ឃុន នាយ​រង​ការិយាល័យ​ចរាចរណ៍​ជើង​គោក នៃ​ស្នងការដ្ឋាន​នគរបាល​រាជធានី​ភ្នំពេញ មាន​ប្រសាសន៍​ថា របាយការណ៍​បណ្ដោះ​អាសន្ន​គ្រោះថ្នាក់​នោះ​បាន​សម្លាប់​មនុស្ស ៣​នាក់ និង​ជិត ១០​នាក់​បាន​រង​របួស៖ «ពេល​នេះ​យើង​រក​ឃើញ​ថា​ស្លាប់ ៣​នាក់ កុមារី ២​នាក់ ម្នាក់​អាយុ ៨​ឆ្នាំ ម្នាក់​ទៀត​អាយុ ១២​ឆ្នាំ ក្មេង​ប្រុស​ម្នាក់ ៨​ឆ្នាំ។ ហើយ​នឹង​របួស​ធ្ងន់ ៦​នាក់»

មន្ត្រី​នគរបាល​បាន​អោយ​ដឹង​ថា នារី​បង្ក​គ្រោះថ្នាក់​មាន​ប័ណ្ណ​បើកបរ​ត្រឹមត្រូវ ប៉ុន្តែ​នៅ​ពេល​កើត​ហេតុ នាង​មាន​អាការៈ​ភាន់ភាំង​ស្មារតី៖ «គាត់​ថា ក្រោយ​ពី​គាត់​ទៅ​យក​ប្អូន​គាត់​នៅ​បញ្ញា​សាស្ត្រ គាត់​ចេញ​ដំណើរ​ទៅ​ផ្ទះ​គាត់​នៅ​ភូមិ​ដើម​មាន ក្នុង​ក្រុង​តាខ្មៅ។ គាត់​បាន​បុក​ម៉ូតូ ១​គ្រឿង ហើយ​គាត់​ភាំង គាត់​មិន​ដឹង​យ៉ាង​ម៉េច គាត់​បុក​ជា​ច្រើន​គ្រឿង បុក​រហូត​ទាល់​តែ​ប៉ូលិស​ឃាត់​ទៅ ទើប​គាត់​ដឹង​ខ្លួន»

ទោះ​យ៉ាង​ណា គិត​ត្រឹម​ម៉ោង ៨​យប់​ថ្ងៃ​ទី១ ខែ​មីនា សមត្ថកិច្ច​នៅ​ពុំ​ទាន់​មាន​របាយការណ៍​លំអិត​ពី​ករណី​គ្រោះ​ថ្នាក់​ចរាចរណ៍​នេះ​នៅ​ឡើយ​ទេ ដោយ​ត្រូវ​ប្រមូល​ព័ត៌មាន​បន្ថែម​ពី​ជន​រងគ្រោះ​ដែល​នាំ​ទៅ​ព្យាបាល​តាម​មន្ទីរពេទ្យ និង​ខ្លះ​ត្រូវ​បញ្ជូន​ទៅ​ផ្ទះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
RFA
ធនាគារ​ABA មិន​ព្រម​បើកប្រាក់​ជាង​១​ម៉ឺន ៥​ពាន់​ដុល្លារ ដែល​ឧបត្ថម្ភ​ដល់​បុគ្គលិក​ណាហ្គាវើលដ៍
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។