ករណីតវ៉ាពីការផាកពិន័យលើការដឹកទំនិញលើសចំណុះត្រូវសម្របសម្រួល
2013.03.11
ការយល់ព្រមរបស់មន្ត្រីក្រសួងសាធារណការនេះ បន្ទាប់ពីក្រុមម្ចាស់ឡានដឹកទំនិញបាននាំគ្នាតវ៉ាបើកឡានដាក់ទទឹងផ្លូវជាតិ នៅក្បែរភ្នំសន្ទុក កាលពីថ្ងៃទី៩ មីនា អស់រយៈពេលជាច្រើនម៉ោង។
ការបើករថយន្តធំបិទផ្លូវជាតិតវ៉ាចំពោះការផាកពិន័យចំនួនច្រើនក្នុងការដឹកទំនិញ នៅខេត្តកំពង់ធំ បានដោះស្រាយហើយ នៅថ្ងៃទី១០ មីនា។
ក្រុមម្ចាស់ឡានដឹកទំនិញលើសចំណុះបានឲ្យដឹងថា ខាងមន្ត្រីថ្លឹងជញ្ជីងចល័តនៃក្រសួងសាធារណការ និងដឹកជញ្ជូនបានយល់ព្រមតាមសំណើរបស់ពួកគាត់ ដោយបញ្ចុះតម្លៃបង់ពិន័យមកនៅត្រឹម ៥០% នៃថ្លៃពិន័យសរុប បន្ទាប់ពីធ្វើការសម្របសម្រួលគ្នា។
បុរសមួយរូបដែលអះអាងថា ជាតំណាងឲ្យម្ចាស់រថយន្តធំដឹកស្រូវលើសទម្ងន់នោះបានរៀបរាប់ថា នៅព្រឹកថ្ងៃទី១០ មីនា នេះ ខាងមន្ត្រីថ្លឹងជញ្ជីងចល័ត បានយល់ព្រមបញ្ចុះតម្លៃបង់ផាកពិន័យមកនៅតម្លៃពាក់កណ្ដាលនៃតម្លៃសរុប។ លោកបញ្ជាក់ថា តម្លៃបង់ពិន័យនោះ មានឡានខ្លះក្នុងចំណោមឡាន ៤គ្រឿងដែលសមត្ថកិច្ចឃាត់នោះ ត្រូវបង់ ១២លានរៀល ទៅ ១៤លានរៀល ដូច្នេះក្នុងឡានមួយត្រូវបង់តម្លៃផាកពិន័យនោះ ៦លានរៀល ឬ ៧លានរៀលក្នុងឡានមួយ។
ទោះជាយ៉ាងនេះក្ដី បុរសរូបនេះបានលើកឡើងថា ការចាប់ផាកពិន័យលើការដឹកស្រូវលើសទម្ងន់នេះ គឺខាងមន្ត្រីសាធារណការមិនប្រកាសឲ្យពួកគាត់ដឹងជាមុនទេ ពិសេសទៅទៀតនោះ មានឡានខ្លះដែលជាបក្សពួកមន្ត្រីថ្លឹងជញ្ជីងចល័ត ឬឡានដឹកឈើដឹកលើសទម្ងន់ដូចគ្នាបែរជាគេមិនចាប់ទៅវិញ។
ការស្រុះស្រួលគ្នាអំពីការចរចាបង់តម្លៃផាកពិន័យនេះ នៅបន្ទាប់ពីក្រុមម្ចាស់ដឹកឡានចំនួន ៤ ដែលគេចាប់នោះ និងឡានដឹកទំនិញផ្សេងទៀត បាននាំគ្នាបើកឡានដាក់ទទឹងផ្លូវធ្វើជារបាំងនៅភូមិស្ដុកស្ដម្ភ ស្រុកសន្ទុក ខែត្រកំពង់ធំ ដើម្បីទាមទារឲ្យមន្ត្រីសាធារណការបញ្ចុះតម្លៃផាកពិន័យ និងសុំឲ្យអនុវត្តច្បាប់ឲ្យស្មើភាព ពីព្រោះថា ឡានខ្លះមិនត្រូវបានក្រុមសមត្ថកិច្ចចាប់នោះទេ។
អភិបាលខែត្រកំពង់ធំ លោក ឈុន ឈន់ មានប្រសាសន៍ថា បញ្ហាចាប់ឡានដឹកទំនិញលើសចំណុះនេះ មិនមែនជាភារកិច្ចរបស់ខែត្រទេ លោកបញ្ជាក់ថា ជាភារកិច្ចរបស់ក្រសួងសាធារណការ និងដឹកជញ្ជូន។
វិទ្យុអាស៊ីសេរីមិនអាចសុំការបំភ្លឺពីមន្ត្រីថ្លឹងជញ្ជីងចល័តនៃក្រសួងសាធារណការ និងដឹកជញ្ជូន ដើម្បីសួរអំពីបញ្ហានេះបានទេ នៅថ្ងៃទី១០ ខែមីនា។
បុរសឈ្មោះ គីម ស្រេង ជាម្ចាស់ឡានដឹកស្រូវមួយរូបទៀត បានឲ្យដឹងថា ពួកគាត់ទៅដើរទិញប្រមូលស្រូវពីខែត្រកំពង់ធំ យកទៅលក់នៅវៀតណាម ឆ្លងកាត់ខែត្រស្វាយរៀង។ លោកបញ្ជាក់ថា ពួកគាត់យកស្រូវទៅលក់នេះ ក្នុងមួយជើងយ៉ាងច្រើនចំណេញ ៦០ម៉ឺនរៀលទេ ពីព្រោះថា ត្រូវបង់ឲ្យមន្ត្រីនគរបាលនៅតាមផ្លូវកន្លែងខ្លះ ២ម៉ឺន កន្លែងខ្លះទៀត ១០ម៉ឺនរៀល។
ក្រុមម្ចាស់ឡានដឹកស្រូវចំនួន ៤គ្រឿង ដែលគេចាប់នោះ អះអាងថា បន្ទាប់ពីពួកគាត់បង់លុយផាកពិន័យរួច គេតម្រូវឲ្យពួកគាត់ជួលឡានផ្សេងយកមកសាងស្រូវនៅលើឡានរបស់ពួកគាត់ គឺឡានពួកគាត់មិនទាន់ចាកចេញពីកន្លែងដែលគេឃាត់នោះទេ។ ពួកគាត់ព្រួយបារម្ភថា ពួកគាត់មិនទាន់ដឹងច្បាស់ទេថា តើឡានរបស់ពួកគាត់ត្រូវគេអនុញ្ញាតឲ្យយកចេញពីកន្លែងបន្ទាប់ពីសាងស្រូវនៅលើឡាននោះអស់ ឬយ៉ាងណាទេ ពីព្រោះថា មកទល់ថ្ងៃទី១០ មីនា នេះ ក្រុមសមត្ថកិច្ចនៅឡោមព័ទ្ធយាមឡានរបស់ពួកគាត់ដដែល គេមិនទាន់ដកខ្លួនចេញនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- មន្ត្រីជាន់ខ្ពស់ និងឧកញ៉ា សុំលោក ហ៊ុន សែន ឱ្យជួយរកយុត្តិធម៌ដោយមិនពឹងតុលាការ
- អ្នកឃ្លាំមើល ថា លោក ហ៊ុន សែន ទំនងលែងទុកចិត្តអ្នកណាក្រៅពីកូនរបស់ខ្លួនហើយ
- លោក ស ខេង ចង់ឱ្យមានការធ្វើតេស្ដរកគ្រឿងញៀនលើពលរដ្ឋចាប់ពីអាយុ១៣ឆ្នាំដល់ក្រោម៤៥ឆ្នាំ
- អាជ្ញាធរក្រុងភ្នំពេញ ចាប់ខ្លួនមន្ត្រីគណបក្សភ្លើងទៀន៣នាក់
- មន្ត្រីសិទ្ធិមនុស្សថា ការចាប់ខ្លួនអ្នកគាំទ្រលោក កឹម សុខា ពីរនាក់ជាការបំបិទសិទ្ធិបញ្ចេញមតិ
