សន្និសីទកំពូលនេះមានឈ្មោះថា វេទិកាពិភពលោកស្ដីពីការកាត់បន្ថយគ្រោះថ្នាក់ធម្មជាតិ (Global Platform for Disaster Risk Reduction) ដែលរៀបចំធ្វើឡើងរៀងរាល់ ២ឆ្នាំម្តង។ គេរំពឹងថា អ្នកដែលចូលរួមក្នុងសន្និសីទកំពូលនេះមានប្រមាណជា ៤.០០០នាក់ ដែលមកពីប្រទេសចំនួន១០០ ខ្លះជានិស្សិត សិស្ស ជាមន្ត្រីរដ្ឋាភិបាល មន្ត្រីអង្គការក្រៅរដ្ឋាភិបាល អ្នកវិទ្យាសាស្ត្រ និងភ្នាក់ងារអង្គការសហប្រជាជាតិ។
យុវជន ហេង មៀង អាយុ ១៧ឆ្នាំ និងយុវតី សូ ភឿន អាយុ ១៨ឆ្នាំ បានសម្ដែងក្តីរីករាយជាខ្លាំងដែលមានឱកាសបានចែករំលែកបទពិសោធន៍របស់ខ្លួន និងមតិយោបល់មួយចំនួនពាក់ព័ន្ធនឹងវិធីការពារគ្រោះមហន្តរាយធម្មជាតិ ដូចជាទឹកជំនន់ជាដើម។ បន្ថែមពីនេះ ពួកគេនឹងផ្លាស់ប្ដូរយោបល់ស្ដីពីគម្រោងវិធីស្ដារឡើងវិញនៅក្នុងសហគមន៍ ក្រោយពីគ្រោះមហន្តរាយធម្មជាតិ។
យុវជន ហេង មៀង ពីខេត្តកំពង់ចាម បានចូលរួមយ៉ាងសកម្មជាមួយយុវជនដទៃទៀត ដើម្បីស្វែងរកដំណោះស្រាយ និងអប់រំណែនាំ ក្រោយពីមានគ្រោះមហន្តរាយក្នុងសហគមន៍របស់គេ ជាពិសេស គឺជួយណែនាំដល់កុមារតូចៗដែលបានស្លាប់រាប់រយនាក់ក្នុងមួយឆ្នាំៗ ដោយសារទឹកជំនន់នៅក្នុងប្រទេសកម្ពុជា។
ចំណែកយុវតី សូ ភឿន វិញ ដែលមកពីខេត្តសៀមរាប ក៏បានចូលរួមយ៉ាងសកម្មក្នុងសហគមន៍របស់គេផងដែរ ដើម្បីជំរុញឲ្យបង្កើតជាសាលាសម្រាប់បង្រៀនដល់សិស្សដែលទទួលរងគ្រោះដោយសារគ្រោះមហន្តរាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។