ក្រសួង​វប្បធម៌​និង​ក្រសួង​ព័ត៌មាន​មិន​ទាន់​សម្រេច​ចំពោះ​សំណើ​ផ្អាក​បទ​ចម្រៀង​ភ្ជុំ​បិណ្ឌ​នឹក​ស្រុក

ដោយ យន់ សាមៀន
2018-10-07
អ៊ីម៉ែល
មតិ
Share
បោះពុម្ព
អនុរដ្ឋលេខាធិការ​ក្រសួង​ព័ត៌មាន លោក អ៊ុក គឹមសេង ថ្លែង​ក្នុង​កិច្ច​ប្រជុំ​រវាង​មន្ត្រី​ក្រសួង​ព័ត៌មាន ជាមួយ​តំណាង​ស្ថាប័ន​សារព័ត៌មាន​ស្ដីពី​ការ​ប្រើ​គោរមងារ​សម្ដេច នៅ​ព្រឹក​ថ្ងៃ​ទី​១២ ខែ​ឧសភា ឆ្នាំ​២០១៦។
អនុរដ្ឋលេខាធិការ​ក្រសួង​ព័ត៌មាន លោក អ៊ុក គឹមសេង ថ្លែង​ក្នុង​កិច្ច​ប្រជុំ​រវាង​មន្ត្រី​ក្រសួង​ព័ត៌មាន ជាមួយ​តំណាង​ស្ថាប័ន​សារព័ត៌មាន​ស្ដីពី​ការ​ប្រើ​គោរមងារ​សម្ដេច នៅ​ព្រឹក​ថ្ងៃ​ទី​១២ ខែ​ឧសភា ឆ្នាំ​២០១៦។
RFA

ក្រសួង​វប្បធម៌ និង​ក្រសួង​ព័ត៌មាន មិនទាន់​សម្រេច​យ៉ាងណា​នៅឡើយ​ទេ ចំពោះ​សំណើសុំ​ផ្អាក​ការ​ផ្សព្វផ្សាយ​បទ​ចម្រៀង “​ភ្ជុំបិណ្ឌ​នឹក​ស្រុក” ដែល​ក្រសួង​ការងារ​អះអាង ថា ប៉ះពាល់​ដល់​គោលនយោបាយ​របស់​របប​ក្រុងភ្នំពេញ​នោះ។ សាធារណជន​មួយ​ចំនួន​បាន​ប្រតិកម្ម​ខ្លាំង​ៗ​ចំពោះ​ការប៉ុនប៉ង​មិន​ឱ្យ​ចាក់​ផ្សាយ​បទ​ចម្រៀង​នេះ​ពី​សំណាក់​ក្រសួង​ការងារ ដោយ​ពួកគេ​លើកឡើង​ថា បទ​ចម្រៀង​នេះ​ឆ្លុះបញ្ចាំង​ការពិត​នៃ​ជីវិត​កម្មករ​មួយ​ចំនួន។

អ្នកនាំពាក្យ​ក្រសួង​ព័ត៌មាន លោក អ៊ុក គីមសេង បញ្ជាក់​យ៉ាង​ខ្លី​ថា លោក​កំពុង​រង់ចាំ​ការសម្រេច​ចំពោះ​សំណើ​របស់​ក្រសួង​ការងារ​នេះ ពី​លោក ខៀវ កញ្ញារីទ្ធ រដ្ឋមន្ត្រី​ក្រសួង​ព័ត៌មាន៖ «ខ្ញុំ​រង់ចាំ​ការសម្រេច​ពី​រដ្ឋមន្ត្រី។ Okay? សូម​ជម្រាបលា»

កាលពី​ថ្ងៃ​ទី៣ តុលា កន្លងទៅ​លោក អ៊ិត សំហេង រដ្ឋមន្ត្រី​ក្រសួង​ការងារ បាន​ស្នើ​សុំ​ឱ្យ​ក្រសួង​ព័ត៌មាន និង​ក្រសួង​វប្បធម៌ និង​វិចិត្រ​សិល្បៈ ចាត់វិធានការ​ផ្អាក​ការប្រើប្រាស់ និង​ផ្សព្វផ្សាយ​បទ​ចម្រៀង​មួយ​បទ មាន​ចំណងជើង​ថា “​ភ្ជុំបិណ្ឌ នឹក​ស្រុក​” ច្រៀង​ដោយ​លោក ម៉ៅ ហាជី នៃ​ផលិតកម្ម​ថោន (Town Production) ដោយ​ក្រសួង​យល់ថា អត្ថន័យ​នៃ​បទ​ចម្រៀង​នេះ ធ្វើ​ឱ្យ​ប៉ះពាល់​យ៉ាង​ខ្លាំង​ដល់​គោលនយោបាយ​របស់​របប​លោក ហ៊ុន សែន។ ការលើកលែង​របស់​លោក លោក អ៊ិត សំហេង មិន​ឆ្លុះបញ្ចាំង​ទៅ​នឹង​សេចក្ដី​សម្រេច​ប្រាក់ខែ​គោល​ថ្មី​សម្រាប់​ឆ្នាំ២០១៩​ឡើយ។ របប​លោក ហ៊ុន សែន បាន​សម្រេច​ផ្ដល់​ប្រាក់ខែ​គោល​ថ្មី​ដល់​កម្មករ​ត្រឹម ១៨២​ដុល្លារ នៅ​គ្រា​ដែល​សហជីព​ឯករាជ​ទាមទារ​ប្រាក់ខែ​ដល់​ទៅ​ជិត ២០០​ដុល្លារ។

ចំណែក មន្ត្រី​នាំ​ពាក្យ​ក្រសួង​វប្បធម៌ និង​វិចិត្រ​សិល្បៈ លោក ថៃ នរៈសត្យា ថ្លែង​ថា បើ​ក្រសួង​ពិនិត្យ​ឃើញ​ថា បទ​ចម្រៀង​នេះ​មាន​កំហុស​ឆ្គង​មែន នោះ​ក្រសួង​វប្បធម៌​នឹង​សហការ​ជាមួយ​ក្រសួង​ការងារ ក៏ប៉ុន្តែ​ក្រសួង​វប្បធម៌​នឹង​មិន​ចេញ​លិខិត​ហាមឃាត់ ឬ​បំបិទ​ការផ្សាយ​បទ​ចម្រៀង​នេះ បន្ថែម​លើ​លិខិត​របស់​ក្រសួង​ការងារ​ឡើយ៖ «ដោយសារតែ​ពេលវេលា​ខិត​នៅ​ចំ​ពេល​ជិត​ភ្ជុំបិណ្ឌ​ផង​ដែរ ខ្ញុំ​គ្រាន់តែ​បាន​ដឹង​ថា ប្រធាន​ស្ថាប័ន​បាន​ដាក់​ការងារ​ហ្នឹង​ឱ្យ​រដ្ឋបាល អគ្គ​រដ្ឋបាល តាម​ឋានានុក្រម​ហ្នឹង​ពិនិត្យមើល​អ៊ីចឹង​ទៅ ហើយ​ប្រសិនបើ​វា​មាន​អ៊ីចឹង​មែន យើង​គ្រាន់តែ​សហការ​ជាមួយ​ក្រសួង​ការងារ​ទៅ។ យើង​ពុំ​មាន​វិធានការ​អ្វី​ទៅ​ធ្វើ​ជា​ក្រដាស​ស្នាម ឬ​ជា​លិខិត​បទដ្ឋាន​គតិយុត្តិ​ណាមួយ ដែល​ទៅ​ធ្វើ​ការ​បំបិទ​បន្ថែម ទៅលើ​សំណើសុំ​របស់​ក្រសួង​ការងារ​នោះ​ទេ»

លោក អ៊ិត សំហេង រដ្ឋមន្ត្រី​ក្រសួង​ការងារ បាន​ស្នើ​ឱ្យ​ក្រសួង​ទាំងពីរ​ជួយ​ទប់ស្កាត់​ការ​ចាក់​ផ្សាយ​បទ​ចម្រៀង​នេះ ទោះបី​តាម​ប្រព័ន្ធ​ផ្សព្វផ្សាយ​ណា​ក៏​ដោយ ព្រមទាំង​ព្រមាន​ដល់​ផលិតកម្ម​ថោន និង​ណែនាំ​ដល់​ម្ចាស់​ផលិតកម្ម​នានា​ឱ្យ​យកចិត្តទុកដាក់​ខ្ពស់​ចំពោះ​ការ​និពន្ធ ផលិត​បទ​ចម្រៀង ឬ​ការ​សម្ដែង​ទាំងឡាយ​ណា​ពាក់ព័ន្ធ​នឹង​កម្មករ​-​និយោជិក ដែល​មាន​អត្ថន័យ​ផ្ទុយ​ពី​គោលនយោបាយ​របស់​របប​ក្រុងភ្នំពេញ​ផង​ដែរ។

ការប៉ុនប៉ង​មិន​ឱ្យ​ចាក់​ផ្សាយ​បទ​ចម្រៀង “​ភ្ជុំបិណ្ឌ នឹក​ស្រុក” ពី​សំណាក់​ក្រសួង​ការងារ​នេះ បាន​រង​នូវ​ការរិះគន់​យ៉ាង​ខ្លាំង​ពី​សាធារណជន។ អ្នកប្រើប្រាស់​បណ្ដាញ​សង្គម​មួយ​ចំនួន​បាន​រិះគន់​ក្រសួង​ការងារ​កប់ៗ​មាត់​ថា ជា​ក្រសួង​គ្មាន​ការងារ​ធ្វើ ទើប​ទៅ​ហាមឃាត់​មិន​ឱ្យ​ចាក់​ផ្សាយ​បទ​នេះ។ អ្នក​ខ្លះ​ទៀត​សម្ដែង​ការ​ងឿងឆ្ងល់​ថា ហេតុអ្វី​ត្រូវ​ហាមឃាត់​បទ​ចម្រៀង​មួយ​នេះ ព្រោះ​បទ​នេះ​ឆ្លុះបញ្ចាំង​ពី​ការពិត​នៅ​ក្នុង​សង្គម ហើយ​បើ​ចង់​ហាមឃាត់ គួរតែ​ហាម​បទ​ចម្រៀង​ជាច្រើន​ទៀត​កាលពី​ជំនាន់​មុន ដែល​ច្រៀង​រៀបរាប់​ពី​តថភាព​ពិត​ក្នុង​សង្គម​ខ្មែរ​ផង​ដែរ។ អ្នក​ខ្លះ​ទៀត​សរសេរ​ថា ឱ្យ​តែ​បទ​ចម្រៀង​ដែល​បង្កប់​អត្ថន័យ​ពិត​ក្នុង​សង្គម រមែង​ត្រូវ​បាន​ក្រសួង​ហាម​មិន​ឱ្យ​ចាក់​ផ្សាយ ប៉ុន្តែ​បើ​បទ​ណា​មិន​ឆ្លុះ​បញ្ចាំង​ការពិត គ្មាន​ការអប់រំ និង​ពង្វក់​ក្មេងៗ ទើប​ក្រសួង​អនុញ្ញាត​ឱ្យ​ផ្សាយ។

អ្នកនិពន្ធ​បទ​ចម្រៀង “​ភ្ជុំបិណ្ឌ នឹក​ស្រុក​” លោក ងួន សុបិន បាន​ប្រាប់​អាស៊ីសេរី​ថា លោក​បាន​និពន្ធ​បទ​នេះ និង​ផ្ដល់​សិទ្ធិ​ឱ្យ​ផលិតកម្ម​ថោន (Town Production) ជា​អ្នក​ផលិត តាំង​ពីមុន​ពិធីបុណ្យ​ភ្ជុំបិណ្ឌ​ឆ្នាំ២០១៧ ទៅទៀត។ លោក​បន្ត​ថា បទ​នេះ​ចេញផ្សាយ​ជាង​មួយ​ឆ្នាំ​ទៅ​ហើយ និង​ត្រូវ​បាន​ចែក​ជា​ថ្មី ក្នុង​ឱកាស​ពិធីបុណ្យ​ភ្ជុំបិណ្ឌ​ឆ្នាំ ២០១៨ ដោយ​ខាង​ក្រុមហ៊ុន​មិនបាន​ផលិត​ឡើង​វិញ​ឡើយ​។ លោក​អះអាង​ថា លោក​និពន្ធ​បទ​នេះ​ឡើង តាម​សាច់រឿង​នៃ​ជីវិត​ពិត​របស់​កម្មករ​មួយ​ចំនួន ដែល​លោក​បាន​ជួប​នៅ​គ្រានោះ តាម​បែប​សិល្បៈ​ចម្រៀង​មនោសញ្ចេតនា​តែប៉ុណ្ណោះ៖ «និយាយ​រួម​ទាល់តែ​មានរឿង​ជាក់ស្ដែង​ខ្លះ​ទើប​យើង​សរសេរ​បាន វា​មិនមែន​ទូទាំង​ប្រទេស​ទេ វា​មាន​រោងចក្រ​មួយ​ចំនួន​…​ឧទាហរណ៍​ថា​មាន​រោងចក្រ​ខ្លះ​បើក​លុយ​ថ្ងៃ​៥ តែ​ភ្ជុំបិណ្ឌ ថ្ងៃ​ទី​២៤ ឬ២៥ អ៊ីចឹង​រោងចក្រ​គាត់​មិន​អាច​បង្ខំចិត្ត​បើក​២​ដង​ក្នុង​ខែ​ដូច​ឥឡូវនេះ​ទេ»

អ្នកនិពន្ធ​រូប​នេះ អះអាង​ថា លោក​មិន​ចង់​តវ៉ា​រឿង​ក្រសួង​ការងារ​ហាម​មិន​ឱ្យ​ចាក់​ផ្សាយ​បទ​នេះ​ឡើយ ដោយ​មិន​ចង់​មានរឿង​វែងឆ្ងាយ​តទៅទៀត។ តែ​យ៉ាងណា លោក​ស្នើ​ឱ្យ​របប​ដឹកនាំ​បច្ចុប្បន្ន និង​ស្ថាប័ន​ពាក់ព័ន្ធ ជួយ​លើកកម្ពស់​ស្នាដៃ​អ្នកនិពន្ធ និង​បើក​សិទ្ធិ​ឱ្យ​ទូលំទូលាយ​ដល់​អ្នកនិពន្ធ​ទាំងអស់។

ប្រធាន​សហភាព​សហជីព​កម្ពុជា និង​ជា​អ្នកការពារ​សិទ្ធិ​កម្មករ​មួយ​រូប គឺ​លោក រ៉ុង ឈុន អះអាង​ថា បទ​ចម្រៀង “​ភ្ជុំបិណ្ឌ នឹក​ស្រុក​” នេះ ឆ្លុះបញ្ចាំង​ពី​ការពិត​ដែល​បាន​កើតឡើង​ចំពោះ​កម្មករ​-​និយោជិក​មួយ​ចំនួន។ លោក​ថា ការ​ហាមឃាត់​បទ​ចម្រៀង​នេះ បង្ហាញ​ថា ក្រសួង​ការងារ​មាន​ភាព​ចង្អៀតចង្អល់ និង​មិន​ទទួលស្គាល់​ការពិត​រាល់​អ្វី​ដែល​កើត​ឡើងលើ​កម្មករ ទោះបីជា​កន្លងមក​ក្រសួង​បាន​ដោះស្រាយ​បញ្ហា​បាន​មួយ​ចំនួន​រួចហើយ​ក្ដី៖ «គេ​ចង់​បង្ហាញ​ឱ្យ​ឃើញ​ថា សង្គម​មួយ​ហ្នឹង​ល្អៗ​ជាប់​រហូត ទោះបី​ការពិត​ហ្នឹង​វា​មាន​ភាព​អយុត្តិធម៌​សង្គម មាន​ការ​ធ្វើបាប​កម្មករ​យ៉ាងណាក៏ដោយ គេ​មិន​ចង់​ឱ្យ​និយាយ​លេចឮ​ពី​រឿង​អវិជ្ជមាន​នៅ​ក្នុង​សង្គម​នោះ​ទេ។ បើ​យើង​មើល​ខ្លឹមសារ វា​អត់​មាន​អ្វី​ដែល​ធ្វើ​ឱ្យ​ប៉ះពាល់​ដល់​សេចក្ដីថ្លៃថ្នូរ និង​កិត្តិយស​សង្គម​នោះ​ទេ ហើយ​បើ​ក្រសួង​ធ្វើ​បែប​នេះ វា​ជា​ការ​រឹតត្បិត​ទៅលើ​អ្នកនិពន្ធ និង​អ្នក​ច្រៀង​ផង​ដែរ។ យើង​គួរតែ​ចូលរួម​លើក​កម្ពស់​ស្នាដៃ​អ្នកនិពន្ធ និង​អ្នកចម្រៀង​ដែរ ដើម្បី​ឱ្យ​គាត់​ហ៊ាន​សម្ដែង​ការពិត​ឆ្លុះបញ្ចាំង​អ្វី​ដែល​កើត​នៅ​ក្នុង​សង្គម​យើង»

មន្ត្រី​នាំ​ពាក្យ​ក្រសួង​វប្បធម៌ និង​វិចិត្រ​សិល្បៈ លោក ថៃ នរៈសត្យា បញ្ជាក់​ថា ក្រសួង​វប្បធម៌​មិន​ដាក់​ការ​ត្រួតពិនិត្យ​ទៅលើ​ការ​តែង​និពន្ធ​ចម្រៀង​របស់​កវី​ណា​ម្នាក់​ឡើយ ពោល​គឺ​នៅ​ពេល​ពួកគេ​តែង​និពន្ធ​រួច ពួកគេ​អាច​ផលិត​បទ​ចម្រៀង​នោះ រួច​ចេញផ្សាយ​ស្នាដៃ​របស់​ខ្លួន​បាន។ លោក​បន្ត​ថា លើកលែងតែ​ក្នុង​ករណី​ដែល​ចម្រៀង​នោះ ប្រើ​ពាក្យ​ពេចន៍​មិន​សមរម្យ ឬ​មាន​បង្កប់​អត្ថន័យ​ជ្រុល​ហួសហេតុ​ដែល​សាធារណជន​ទូទៅ មិន​អាច​ទទួល​យក​បាន ទើប​ក្រសួង​ដាក់​ចេញ​នូវ​វិធានការ​ហាមឃាត់​ការ​ចាក់​ផ្សាយ​បទ​ចម្រៀង​ទាំងនេះ ដើម្បី​ឆ្លើយតប​នឹង​ការ​ទាមទារ​របស់​សាធារណជន​ដែល​ជា​មតិ​ភាគច្រើន៕

ព័ត៌មាន (0)
Share
គេហទំព័រ​ទាំងមូល