Opens in new windowក្រុមអាជីវករលក់ដូរទំនិញ និងចំណីអាហារនៅក្រុងបានលុង ខេត្តរតនគិរី ត្អូញត្អែរថា នៅរដូវបុណ្យភ្ជុំបិណ្ឌឆ្នាំនេះ មិនមានប្រជាពលរដ្ឋកុះករទិញចំណីអាហារ និងសម្ភារៈប្រើប្រាស់សម្រាប់ធ្វើពិធីបុណ្យឲ្យអធិកអធមដូចបណ្ដាឆ្នាំមុនៗនោះឡើយ។ ប្រជាពលរដ្ឋភាគច្រើន បានធ្វើដំណើរទៅជួបជុំសាច់ញាតិក្រុមគ្រួសារ ធ្វើបុណ្យនៅស្រុកកំណើតវិញ។
ចាប់ពីថ្ងៃ១រោច ខែភទ្របទ ដែលជាថ្ងៃកាន់បិណ្ឌទីមួយរហូតមកទល់នឹងថ្ងៃ១៥រោច ជាថ្ងៃបង្ហើយនៃពិធីបុណ្យភ្ជុំបិណ្ឌប្រពៃណីខ្មែរនៅក្រុងបានលុង ខេត្តរតនគិរី ការធ្វើចរាចរនៅតាមដងផ្លូវ ការលក់ដូរគ្រឿងសម្ភារៈប្រើប្រាស់ និងទីផ្សារលក់នំចំណីបន្លែត្រីសាច់ មានសភាពថយចុះនៃចំនួនប្រជាពលរដ្ឋខុសប្រក្រតី។
គេហដ្ឋាន អគារលក់គ្រឿងសម្ភារៈប្រើប្រាស់ និងហាងលក់ទំនិញ កន្លែងធ្វើសេវាកម្មសាធារណៈនៅទីរួមខេត្ត ភាគច្រើនបិទទ្វារបន្តបន្ទាប់ ហើយប្រជាពលរដ្ឋមួយចំនួននាំក្រុមគ្រួសារធ្វើដំណើរទៅស្រុកកំណើត ដើម្បីចូលរួមបុណ្យភ្ជុំបិណ្ឌ។
អាជីវករលក់សាច់ជ្រូកនៅផ្សារបានលុង អ្នកស្រី អៀ ចាន់ណារី កត់សម្គាល់ថា រដូវភ្ជុំបិណ្ឌឆ្នាំនេះថា អាជីវករមិនអាចរកប្រាក់ចំណូលបានច្រើនដូចរដូវបុណ្យភ្ជុំនាឆ្នាំកន្លងទៅនោះទេ ពីព្រោះបរិមាណអតិថិជនអ្នកមកផ្សារទិញបន្លែត្រីសាច់ បានថយចុះ មិនដូចរដូវបុណ្យចូលឆ្នាំខ្មែរ ឬចូលឆ្នាំចិន-វៀតណាម នោះឡើយ។ លើសពីនេះ រដូវភ្ជុំឆ្នាំនេះភ្លៀងធ្លាក់ច្រើននៅខេត្តរតនគិរី ជាហេតុបង្កការលំបាកដល់ប្រជាពលរដ្ឋក្នុងខេត្តធ្វើដំណើរទៅផ្សារ ទិញចំណីអាហារគ្រឿងប្រើប្រាស់ និងដោយឡែកភ្ញៀវទេសចរ មិនចូលចិត្តមកលេងកម្សាន្តតាមបណ្ដាខេត្តឆ្ងាយដូចខេត្តរតនគិរី ជាដើម៖ «វាស្ងាត់ ហើយណាមួយមនុស្សឥឡូវអត់លុយ ល្មមៗមុខណាដែលអត់បាន គេអត់សិនទៅណា! អត់ដូចរាល់ឆ្នាំៗ រដូវហ្នឹងគេចាយលុយ ដល់ពេលឥឡូវគេកាត់បន្ថយពាក់កណ្ដាល អត់ដូចរាល់ឆ្នាំទេ រាល់ឆ្នាំលក់បានគួរសមដែរ។ បើនិយាយរឿងថ្លៃវិញ ពាក់កណ្ដាលអត់ឡើងថ្លៃបានផង យើងលក់តាមតម្លៃចាស់ដដែលហ្នឹង»។
ដូចគ្នានេះដែរ អាជីវករលក់សម្លៀកបំពាក់នៅក្រុងបានលុង លោកស្រី សួន សុភី កត់សម្គាល់ដែរថា មិនមែនតែរដូវភ្ជុំបិណ្ឌនេះទេ អាជីវករភាគច្រើនចាត់ទុកឆ្នាំ២០១៥ ថាជាឆ្នាំបរាជ័យសម្រាប់ការស្វែងរកប្រាក់ចំណូលបង្កើនសេដ្ឋកិច្ចគ្រួសារ បើប្រៀបធៀបនឹងបណ្ដាឆ្នាំកន្លងទៅនេះ។ លោកស្រីប៉ាន់ប្រមាណថា ដោយសារតែសេដ្ឋកិច្ចគ្រួសាររបស់ពលរដ្ឋឆ្នាំនេះកាន់តែធ្លាក់ ហេតុនេះប្រជាពលរដ្ឋគ្មានលទ្ធភាពចំណាយប្រាក់ច្រើនទិញសម្លៀកបំពាក់ ឬសម្ភារៈប្រើប្រាស់សម្រាប់រដូវបុណ្យភ្ជុំបិណ្ឌ។ លើសពីនេះទៀត ប្រជាពលរដ្ឋក្នុងខេត្តដែលមានស្រុកកំណើតនៅបណ្ដាខេត្តផ្សេងៗ បាននាំក្រុមគ្រួសារទៅធ្វើបុណ្យភ្ជុំនៅភូមិកំណើតរបស់ពួកគេ ហើយចំណាយប្រាក់តិចតួចក្នុងពិធីបុណ្យជួបជុំគ្រួសារនេះ៖ «ស្ងាត់លក់អត់ដាច់ដូចឆ្នាំមុនៗ លក់ដាច់ពីបិណ្ឌមួយដល់បិណ្ឌដប់បួន លក់ដាច់រហូត។ គាត់អត់ទៅណាទេ ប្រហែលជាគាត់រកអត់សូវបាន ប្រើរបស់ចាស់ៗសិន អ្នកទិញតិច។ ប្រហែលប៉ះពាល់ពីសេដ្ឋកិច្ចខេត្តធ្លាក់ចុះ ប្រជាពលរដ្ឋរកអត់សូវបាន ខ្ញុំអាជីវកររកអត់សូវបានដែរ»។
នៅខេត្តរតនគិរី មានវត្តព្រះពុទ្ធសាសនាចំនួន ៣២វត្ត និងមានព្រះសង្ឃចំនួនជាង ២០០អង្គ ដែលពុទ្ធបរិស័ទនៅទូទាំងខេត្តគោរពប្រតិបត្តិធ្វើបុណ្យទាន ចម្រើនកុសលផលបុណ្យ។
ទាក់ទិនពិធីបុណ្យភ្ជុំឆ្នាំនេះដែរ ប្រធានមន្ទីរធម្មការ និងសាសនា ខេត្តរតនគិរី លោក ទេព ណារ៉ា មានប្រសាសន៍ថា ក្នុងវិស័យព្រះពុទ្ធសាសនា ការប្រារព្ធពិធីបុណ្យភ្ជុំបិណ្ឌមិនសំខាន់ទៅលើការចំណាយប្រាក់តិច ឬច្រើនចូលរួមពិធីបុណ្យនោះទេ គឺអាស្រ័យធនធាន និងជំនឿពិតប្រាកដរបស់ប្រជាពលរដ្ឋ។ លោកចាប់អារម្មណ៍ថា ប្រជាពលរដ្ឋអ្នកកាន់ព្រះពុទ្ធសាសនានៅខេត្តរតនគិរី ថ្វីត្បិតនៅមានចំនួនតិចតួច ក៏ប៉ុន្តែអ្នកភូមិនៅតែគោរពប្រតិបត្តិ និងនាំគ្នាយកចង្ហាន់ទៅវត្តប្រគេនព្រះសង្ឃ ដើម្បីឧទ្ទិសកុសលផលបុណ្យជូនបុព្វការីជនទាំងអ្នករស់នៅ និងអ្នកបានចែកឋានទៅកាន់លោកខាងមុខ៖ «បើន័យបុណ្យទានវាដូចតែគ្នា គ្មានអ្នកណាជាងអ្នកណាទេ បើគេណាមានបានចង្ហាន់ល្អទៅ បើអ្នកក្រចង្ហាន់មិនសូវល្អ ប៉ុន្តែវាអាស្រ័យទៅលើជីវភាពប្រជាពលរដ្ឋ វាដូចតែគ្នា វាមិនខុសស្អីគ្នាទេ»។
ជាទូទៅ ប្រជាពលរដ្ឋរស់នៅក្រុងបានលុង ខេត្តរតនគិរី នាំគ្នាធ្វើចង្ហាន់ទៅប្រគេនព្រះសង្ឃនៅគ្រប់វត្តអារាម និងនាំគ្នាជួបជុំគ្រួសារបរិភោគអាហារជុំគ្នា។ ប្រជាពលរដ្ឋខ្លះទៀត នាំក្រុមគ្រួសារទៅកម្សាន្តតាមរមណីយដ្ឋាននានាក្នុងខេត្តនេះ។
ទាក់ទិនទៅនឹងវិស័យទេសចរណ៍នៅរដូវភ្ជុំបិណ្ឌនេះដែរ ប្រធានមន្ទីរទេសចរណ៍ខេត្តរតនគិរី លោក ង៉ែត វិទូ ទទួលស្គាល់ដែរថា បរិមាណភ្ញៀវទេសចរក៏មានចំនួនតិចតួចបំផុត បានមកកម្សាន្តខេត្តរតនគិរី នៅរដូវភ្ជុំបិណ្ឌឆ្នាំនេះ។ លោកបញ្ជាក់ថា ភាពថយចុះនៃចំនួនអ្នកទេសចរ ក៏ជាកត្តាសំខាន់ដែលធ្វើឲ្យក្រុមអាជីវករ និងម្ចាស់សេវាកម្មនានាមិនអាចបង្កើនថ្លៃលក់ដូរបានខ្ពស់ឡើយ៖ «មកដល់ថ្ងៃហ្នឹងស្ងាត់ឈឹង អត់ទាន់មានចំណាកស្រុកណាមកច្រើនទេ ទើបឃើញមាន ៨ឡាន។ ប្រហែលជាគេធ្វើបណ្ដាញខ្សែផ្លូវច្រើនពីខេត្តមួយទៅខេត្តមួយបានស្រួល អ៊ីចឹងគេអាចបំបែកគ្នាទៅដើរលេងគ្រប់កន្លែង ហើយអ្នករតនគិរី ភាគច្រើនចុះទៅក្រោមច្រើន។ ឥឡូវស្ងាត់ផ្សារស្ងាត់ អត់មានអ្នកចូលផ្សារ»។
សេចក្តីរាយការណ៍របស់ស្នងការដ្ឋានប៉ូលិសខេត្តរតនគិរី ឲ្យដឹងថា សុវត្ថិភាព និងសណ្ដាប់ធ្នាប់ទូទៅក្នុងពិធីបុណ្យភ្ជុំឆ្នាំនេះបានល្អប្រសើរច្រើន មិនមានអំពើលួចប្លន់ ឬគ្រោះថ្នាក់ចរាចរណ៍គួរឲ្យកត់សម្គាល់នោះទេ។
អាជ្ញាធរខេត្តរតនគិរី បានរៀបចំសម្អាត និងលំអសោភណភាពក្រុងនាពិធីបុណ្យភ្ជុំបិណ្ឌ ដូចធ្លាប់បានធ្វើរៀងរាល់ឆ្នាំ ជាពិសេសបានចាត់ចែងកងកម្លាំងយាមល្បាតនៅចំណុចគោលដៅសំខាន់ៗ និងតាមវត្តអារាម ដើម្បីការពារសុវត្ថិភាពជូនប្រជាពលរដ្ឋក្នុងពិធីបុណ្យភ្ជុំបិណ្ឌ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។