នៅព្រឹកថ្ងៃសៅរ៍ ទី២៣ ខែកុម្ភៈ ពួកគេបាននាំគ្នាបិទផ្លូវជាតិលេខ២ ដែលនៅខាងមុខរោងចក្រ ក្នុងសង្កាត់ចាក់អង្រែក្រោម និងបានធ្វើអោយចរាចរណ៍លើផ្លូវនេះកកស្ទះជិត ១ម៉ោង។
ក្រុមកម្មករឃីងឡែន បាននាំគ្នាបិទផ្លូវជាតិលេខ២ ក្នុងបំណងស្វែងរកអន្តរាគមន៍ពីភាគីពាក់ព័ន្ធ ជាពិសេសប្រមុខរដ្ឋាភិបាលកម្ពុជា លោកនាយករដ្ឋមន្ត្រី ហ៊ុន សែន អោយផ្ដល់ដំណោះស្រាយនៅពេលរោងចក្រនេះបិទទ្វារជាច្រើនខែ ហើយពួកគេនៅមិនទាន់ទទួលបានសំណង៖ «ឃីងឡែន មានមនុស្សតិចណាស់ មិនច្រើនដូចគេទេ។ សូមរដ្ឋាភិបាលជួយកម្មករផង! ជួយរកដំណោះស្រាយជូនកម្មករផង»។
កម្មកររោងចក្រឃីងឡែន កញ្ញា ភុន វណ្ណា មានប្រសាសន៍ថា នៅព្រឹកថ្ងៃសៅរ៍ ទី២៣ ខែកុម្ភៈ មានមន្ត្រីដោះស្រាយកូដកម្មបាតុកម្មនៃក្រសួងសង្គមកិច្ច និងអតីតយុទ្ធជន បានទៅចរចាជាមួយកម្មករ ដើម្បីចាត់ចែងលក់ដូរគ្រឿងម៉ាស៊ីន និងសម្ភារៈផ្សេងៗទៀតក្នុងរោងចក្រ និងសន្យាថាផ្ដល់ប្រាក់សំណងចំនួន ៤៦ដុល្លារ ក្នុងមួយឆ្នាំដល់ពួកគាត់ ប៉ុន្តែត្រូវក្រុមកម្មករបដិសេធ។
កញ្ញា ភុន វណ្ណា បន្តថា ដោយភាពអស់សង្ឃឹម និងមិនដឹងរំពឹងថានរណាអាចដោះស្រាយបញ្ហាបាន ក្រុមកម្មករដែលកំពុងស្នាក់នៅលើចិញ្ចើមផ្លូវខាងមុខរោងចក្រ បាននាំគ្នាបិទផ្លូវជាតិលេខ២ ដោយរំពឹងថានឹងបានទទួលដំណោះស្រាយ៖ «ក្រសួងគេអត់ដោះស្រាយអោយពួកខ្ញុំផង។ ព្រឹកមិញគាត់មក គាត់នៅតែអោយពួកខ្ញុំលក់ម៉ាស៊ីនយកលុយដាក់ហោប៉ៅសិនទៅ។ បើខ្ញុំលក់ ពួកខ្ញុំនឹងជាប់គុកហើយបង។ ពួកខ្ញុំអស់ជម្រើសហើយបង ពួកខ្ញុំធ្វើតាមច្បាប់ គាត់មិនដោះស្រាយ ពួកខ្ញុំមានតែបិទផ្លូវទេ»។
កម្មករនៅរោងចក្រកាត់ដេរឃីងឡែន សរុបជាង ១០០នាក់ បាននាំគ្នាបិទផ្លូវជាតិលេខ២ រយៈពេលជិត ១ម៉ោង ដោយបានស្រែកអង្វរដល់អ្នកធ្វើដំណើរដែលឆ្លងកាត់ផ្លូវនេះអាណិតអាសូរដល់ពួកគេ៖ «សូមអង្វរពុកម៉ែបងប្អូន សុំទោសណា៎! បងប្អូនដែលធ្វើដំណើរតាមហ្នឹងដឹងហើយថាខ្ញុំលំបាកប៉ុណ្ណា?»។
ទាក់ទិននឹងដំណោះស្រាយសម្រាប់ក្រុមកម្មករនៅរោងចក្រឃីងឡែន នេះ អគ្គលេខាធិការគណៈកម្មការដោះស្រាយកូដកម្មបាតុកម្មនៃក្រសួងសង្គមកិច្ច និងអតីតយុទ្ធជន លោក សឹង មុន មានប្រសាសន៍ថា ការតវ៉ាបិទផ្លូវ គឺជាទង្វើខុសច្បាប់ដែលក្រុមកម្មករត្រូវទទួលខុសត្រូវ។ លោកបន្តថា មានការលំបាកក្នុងការស្វែងរកដំណោះស្រាយ ដ្បិតក្រុមកម្មករទាមទាររកដំណោះស្រាយភ្លាមៗ និងមិនចង់អោយមានការលក់ដូរសម្ភារៈក្នុងរោងចក្រ។ យ៉ាងណាលោកនឹងស្វះស្វែងរកវិធានការបន្ថែមទៀត។
លោក សឹង មុន៖ «ប៉ុន្តែឥឡូវនេះ ជាផ្លូវច្បាប់ អ្នកដែលព្រមលក់មានប្រៀបខាងផ្លូវច្បាប់ជាង ព្រោះតុលាការគេបានឯកភាពអោយលក់ហើយ។ នីតិវិធីចំពោះមុខនេះ វាតទៅទៀត ទាល់តែប្រជុំគណៈកម្មការឡើងវិញ។ ខ្ញុំក៏មិនអាចសម្រេចបានចាំមើលខ្ញុំសុំយោបល់ថ្នាក់ដឹកនាំសិន»។
មន្ត្រីគណៈកម្មការដោះស្រាយកូដកម្មបាតុកម្ម បានយកដីការក្សាការពារមួយដែលចេញដោយតុលាការរាជធានីភ្នំពេញ ទៅបិទនឹងរបងរោងចក្រ។ ដីកានោះបញ្ជាក់ថា សម្ភារៈនៅក្នុងរោងចក្រត្រូវរឹបអូសសម្រាប់លក់ឡាយឡុង ដើម្បីយកប្រាក់ទៅទូទាត់សំណងដល់កម្មកររោងចក្រនេះដែលមានចំនួន ២២០នាក់។ នៅក្នុងដីកាដដែលនោះ បានបញ្ជាក់ដែរថា តាមការសាកសួរតំណាងសហជីពកម្មករបានអោយដឹងថា សំណងសរុបដែលកម្មករត្រូវទទួលបាន គឺមានចំនួនជាង ២០ម៉ឺនដុល្លារ។
ចំណែកក្រុមកម្មករ អះអាងថា បើគិតតាមផ្លូវច្បាប់ គឺពួកគេភាគច្រើនដែលមានអតីតភាពការងារច្រើនឆ្នាំ អាចទទួលបានសំណងពី ១ពាន់ ទៅ ២ពាន់ដុល្លារ គឺខ្ពស់ជាងសំណងដែលគណៈកម្មការដោះស្រាយកូដកម្មបាតុកម្មផ្ដល់អោយក្នុង១ឆ្នាំជាង ៤០ដុល្លារនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។