សហជីពថា ត្រឹមការអំពាវនាវរបស់លោក ហ៊ុន សែន មិនអាចទប់ស្កាត់ការឡើងថ្លៃផ្ទះជួលកម្មករឡើយ
2019.12.26
កម្មកររោងចក្រW&D ជាង៥០០នាក់ ប្រមូលផ្ដុំគ្នានៅក្បែរផ្ទះលោកនាយករដ្ឋមន្ត្រី ហ៊ុន សែន ក្នុងក្រុងភ្នំពេញ ស្នើសុំកិច្ចអន្តរាគមន៍ជាថ្មីទៀត នៅថ្ងៃទី១៨ ខែមីនា ឆ្នាំ២០១៩។
Photo courtesy of CCAWDU
សហជីពឯករាជ្យស្នើប្រមុខរដ្ឋាភិបាលកម្ពុជា ឱ្យដាក់ចេញនូវវិធានការជាក់លាក់បន្ថែមទៀត ក្នុងការទប់ស្កាត់ការឡើងថ្លៃផ្ទះជួលសម្រាប់កម្មករ។ ការអំពាវនាវនេះ ធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន បានស្នើដល់ម្ចាស់ផ្ទះជួល កុំឱ្យដំឡើងថ្លៃឈ្នួលផ្ទះ ឬបន្ទប់ ដែលប៉ះពាល់ដល់ប្រយោជន៍របស់កម្មករ។
ប្រធានសហព័ន្ធសហជីពកម្ពុជា (CATU) អ្នកស្រី យ៉ាង សុភ័ណ្ឌ ថ្លែងថា ការប្រកាសជាញឹកញាប់របស់ប្រមុខរដ្ឋាភិបាល និងក្រសួងការងារមិនឱ្យម្ចាស់ផ្ទះជួលដំឡើងថ្លៃឈ្នួលនោះ គ្មានប្រសិទ្ធភាពឡើយ ដោយសារខ្វះការអនុវត្តជាក់ស្ដែង និងគ្មានយន្តការច្បាស់លាស់។ អ្នកស្រីសង្កេតឃើញថា ម្ចាស់ផ្ទះជួលភាគច្រើននៅតែដំឡើងថ្លៃឈ្នួល ស្រេចតែនឹងចិត្ត ប៉ះពាល់ដល់ជីវភាពរបស់កម្មករ ដែលទទួលបានប្រាក់ខែតិច តែត្រូវរ៉ាប់រងការចំណាយជាច្រើន។ អ្នកស្រីយល់ថា បញ្ហានេះអាចដោះស្រាយទៅបាន ទាល់តែរដ្ឋាភិបាលចេញជាលិខិតបទដ្ឋានគតិយុត្តិ ដូចជា ច្បាប់ អនុក្រឹត្យ ឬប្រកាស ជាដើម មិនមែនត្រឹមតែជាការនិយាយចោលនោះទេ៖ «សុទ្ធតែជាចំណុចដែលយើងចង់បានបំផុតហើយ។ យើងស្នើសុំកុំឱ្យមានការដំឡើងតម្លៃផ្ទះ ហើយយើងគិតថា ចំណុចហ្នឹងជាចំណុចអាទិភាពរបស់កម្មករដែលស្នើសុំ។ បើមានសេចក្ដីប្រកាស មានសារាចរណែនាំ មានអនុក្រឹត្យអ្វីផ្សេងៗ វាជាចំណុចមួយដែលធ្វើឱ្យម្ចាស់ផ្ទះហ្នឹងមិនអាចដំឡើងតាមអំពើចិត្តរបស់ពួកគាត់បានទេ»។
ប្រតិកម្មរបស់មេដឹកនាំសហជីពរូបនេះ គឺនៅក្រោយពេលលោកនាយករដ្ឋមន្ត្រី ហ៊ុន សែន បានអំពាវនាវដល់ម្ចាស់ផ្ទះជួលជាថ្មីម្ដងទៀត កុំឱ្យដំឡើងថ្លៃឈ្នួលផ្ទះ ឬបន្ទប់ ឱ្យលើសពីអ្វីដែលកម្មករទទួលបាន។
ថ្លែងក្នុងពិធីចែកសញ្ញាប័ត្រដល់និស្សិតនៅព្រឹកថ្ងៃទី២៦ ធ្នូ លោក ហ៊ុន សែន បានបញ្ជាឱ្យអាជ្ញាធរមូលដ្ឋានធ្វើការជាមួយម្ចាស់ផ្ទះជួល ដើម្បីធ្វើយ៉ាងណាទប់ស្កាត់ការឡើងថ្លៃ ក្នុងគោលដៅធានាថា កម្មករទទួលបានអត្ថប្រយោជន៍ពីការដំឡើងប្រាក់ឈ្នួលពី១៨២ ទៅ១៩០ ដុល្លារ ក្នុងមួយខែនៅឆ្នាំ២០២០ ខាងមុខ៖ «កម្មករឡើងប្រាក់ខែតែ ៨ដុល្លារ ដល់ពេលយើងឡើងបន្ទប់ជួលដល់១០ ដុល្លារអ៊ីចឹង វាចាប់ផ្ដើមរួញ។ អ៊ីចឹងបានជាអាជ្ញាធរនៅតាមមូលដ្ឋានត្រូវធ្វើការជាមួយម្ចាស់ផ្ទះឈ្នួល ដើម្បីធានាថា នៅពេលដែលដំឡើងបៀរវត្សនេះទទួលបាននូវផលប្រយោជន៍ពិតប្រាកដ»។
ប្រធានសហព័ន្ធសហជីពកម្ពុជា (CATU) អ្នកស្រី យ៉ាង សុភ័ណ្ឌ ឱ្យដឹងថា សព្វថ្ងៃកម្មករត្រូវចំណាយចាប់ពី ៣០ដុល្លារទៅ ៦០ដុល្លារក្នុងមួយខែ ចំពោះផ្ទះ ឬបន្ទប់ជួល ដោយមិនទាន់គិតថ្លៃទឹកនិងថ្លៃភ្លើងនៅឡើយទេ។ អ្នកស្រីថា កម្មករត្រូវចំណាយអស់ប្រហែល ៣០% នៃប្រាក់ខែរបស់ពួកគាត់សម្រាប់តែការស្នាក់នៅប៉ុណ្ណោះ ដែលការចំណាយនេះច្រើនជាងលុយចំណាយលើថ្លៃហូបចុកប្រចាំខែទៅទៀត។
ទោះជាយ៉ាងណា មេដឹកនាំសហជីពរូបនេះយល់ថា ប្រសិនបើរដ្ឋាភិបាលគិតពីប្រយោជន៍កម្មករពិតមែន រដ្ឋាភិបាលត្រូវតែធ្វើយ៉ាងណារក្សាប្រព័ន្ធអនុគ្រោះពន្ធ EBA ពីទីផ្សារសហភាពអឺរ៉ុប ព្រោះការរក្សាបាន EBA មានន័យស្មើនឹងការធានាបាននូវនិរន្តភាពការងារសម្រាប់កម្មករយ៉ាងដូច្នេះដែរ។ អ្នកស្រីបញ្ជាក់ថា បើប្រព័ន្ធអនុគ្រោះពន្ធ EBA ត្រូវកាត់ផ្ដាច់ នោះកម្មករជាច្រើននឹងបាត់បង់ការងារ ហើយប្រាក់ខែដែលពួកគាត់ត្រូវទទួលបាននោះ ក៏លែងមានតទៅទៀតដែរ៖ «ទាល់តែយើងរក្សាស្ថិរភាពការងាររបស់បងប្អូនកម្មករសិន ទើបកម្មករយើងទទួលបានលុយដែលយើងបានជជែកគ្នាក្នុងការចរចា ឬក៏ដំឡើងជូនគាត់នៅក្នុងឆ្នាំ២០២០ ហ្នឹង។ ចុះបើវិស័យហ្នឹងមិនមានស្ថិរភាព សួរថាគាត់ម៉េចបានទទួល ហើយគាត់ម៉េចបានយកលុយហ្នឹងទៅផ្គត់ផ្គង់គ្រួសាររបស់គាត់បាន?»។
សហភាពអឺរ៉ុបនឹងសម្រេចចិត្តជាចុងក្រោយថា តើត្រូវរក្សាទុក ឬផ្ដាច់ការអនុគ្រោះពន្ធ EBA ពីកម្ពុជា នៅខែកុម្ភៈឆ្នាំ២០២០ ខាងមុខ។ ទោះជាយ៉ាងណា សហភាពអឺរ៉ុបបានប្រកាសប្រាប់រដ្ឋាភិបាលលោក ហ៊ុន សែន រួចហើយថា មានតែការស្ដារសិទ្ធិមនុស្ស និងប្រជាធិបតេយ្យឡើងវិញទេ ទើបកម្ពុជាអាចរក្សាបាន EBA ព្រោះសហភាពអឺរ៉ុបបានរកឃើញការរំលោភសិទ្ធិមនុស្សធ្ងន់ធ្ងរ និងជាប្រព័ន្ធនៅកម្ពុជា ដែលផ្ទុយទៅនឹងលក្ខខណ្ឌពាណិជ្ជកម្មរបស់អឺរ៉ុប៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សភាកម្ពុជាប្រតិកម្មទៅនឹងការសម្រេចរបស់សភាអឺរ៉ុបរឿងដកប្រព័ន្ធអនុគ្រោះពន្ធEBA បន្ថែម
- មន្ត្រីជាន់ខ្ពស់ និងឧកញ៉ា សុំលោក ហ៊ុន សែន ឱ្យជួយរកយុត្តិធម៌ដោយមិនពឹងតុលាការ
- កម្ពុជារកចំណូលបាន ១.៤ពាន់លានដុល្លារ ពីកំណើនភ្ញៀវទេសចរបរទេសក្នុងឆ្នាំ២០២២
- លោក ហ៊ុន សែន មិនគាំទ្រដីកាតុលាការICCដើម្បីចាប់ខ្លួនមេដឹកនាំរុស្ស៊ី
- ស្ត្រីដែលគ្រូពេទ្យវះកាត់ខុសបច្ចេកទេសបានបាត់បង់ជីវិត