ក្រុមកម្មកររោងចក្រកាត់ដេររបស់ប្រទេសកូរ៉េ ឈ្មោះ ហាយ ហ្វេសិន ជិត ១ពាន់នាក់ មិនចូលធ្វើការនៅថ្ងៃទី៣ ខែឧសភា ព្រោះគាំទ្រក្រុមអ្នកដឹកជញ្ជូន និងអ្នកផ្គត់ផ្គង់សម្ភារៈឲ្យរោងចក្រនោះជិត ១០នាក់ ដែលថៅកែមិនបើកប្រាក់ថ្លៃសេវាឲ្យតាំងពីដើមឆ្នាំ២០១៣។
ក្រុមអ្នកបើកបរដឹកជញ្ជូនកម្មករច្រើនរថយន្ត និងអ្នកផ្គត់ផ្គង់អុស ប្រេងសាំង ទឹក ដឹកភ្ញៀវ និងអ្នកច្នៃម៉ូដខោអាវ បានអះអាងនៅថ្ងៃទី៣ ខែឧសភា ឆ្នាំ២០១៣ ថា ថៅកែជនជាតិកូរ៉េ នៅរោងចក្រកាត់ដេរឈ្មោះ ហាយ ហ្វេសិន មានទីតាំងនៅក្នុងសង្កាត់ឃ្មួញ ខណ្ឌសែនសុខ បានឆបោកប្រាក់ថ្លៃដឹកជញ្ជូនសេវាបម្រើឲ្យរោងចក្រនោះ។ ថៅកែរោងចក្របោះជំពាក់ខ្លះ ៥ខែ ខ្លះ ៤ខែ ក្នុងម្នាក់ៗថៅកែជំពាក់ច្រើនពាន់ដុល្លារ។
ពួកគាត់បន្តថា ថៅកែរោងចក្រនោះជំពាក់តាំងពីថៅកែចាស់ រហូតថៅកែថ្មី ដែលចូលធ្វើការតាំងពីថ្ងៃទី១១ ខែមេសា។ ពួកគាត់បានជួបចរចាសុំថៅកែថ្មីជួយសង តែថៅកែថ្មីមិនព្រមសង៖ «ថៅកែចាស់ហ្នឹងជាប់ជំពាក់លុយឡានរបស់ខ្ញុំចាប់ពីខែ១២មក រហូតដល់ឥឡូវនេះ ជំពាក់ចំនួន ៥ខែហើយ។ ក្នុង១ខែជំពាក់ ៩៥០ដុល្លារ មានទាំងពី ឲ្យតែសែកមក ប៉ុន្តែទៅបើកក្នុងធនាគារអត់មានលុយនៅក្នុងកុង។ អត់ទេ! គេទើបមកបោកប៉ុន្មានខែហ្នឹង ម្នាក់ ១ពាន់ក៏មាន ម្នាក់ ៥០០ក៏មានអ៊ីចឹង ច្រើនណាស់ ៥-៥នាក់អត់ទាន់បានទាំងអស់ គេប្រាប់ថាចាំខែក្រោយៗអ៊ីចឹង។ គេថាថ្ងៃនេះនិយាយគ្នាម្ដងទៀត បើថាម៉េចៗ ពួកខ្ញុំទៅដាក់ពាក្យប្ដឹងហើយ»។
បុគ្គលិករដ្ឋបាលរោងចក្រកាត់ដេរ ហាយ ហ្វេសិន លោក វីរៈ បានថ្លែងថា រោងចក្រនេះពិតជាជំពាក់ប្រាក់ទៅក្រុមអ្នកដឹកជញ្ជូននោះពិតមែន ប៉ុន្តែការសង ឬមិនសងបំណុលចាស់នោះ លោកមិនបានដឹងទេ។
ចំណែកឯកម្មកររោងចក្រតម្បាញ យាន ដារ៉ុងហ្វុង នៅខេត្តតាកែវ ប្រមាណ ៣០០នាក់ តវ៉ានៅថ្ងៃទី៣ ខែឧសភា សុំឲ្យថៅកែកុំដកយកប្រាក់សុខភាព ៥ដុល្លារ។
កម្មការិនីឈ្មោះ ជិន មុំ ថ្លែងថា កម្មកររោងចក្រនេះសរុបជាង ៦០០នាក់ គឺកម្មករ ៥០% ធ្វើការទទួលប្រាក់ឈ្នួលតាមរដ្ឋាភិបាលកំណត់។ ចំណែក ៥០% ទៀត ធ្វើការបែបម៉ៅការ។
ក្រុមអ្នកធ្វើការម៉ៅការនេះ ពីមុនធ្លាប់បានទទួលប្រាក់ឧបត្ថម្ភសុខភាព ៥ដុល្លាររាល់ខែ។ ប៉ុន្តែចាប់ពីខែឧសភា ទៅ ថៅកែប្រកាសដកប្រាក់នោះយកទៅឲ្យអ្នកដែលទទួលប្រាក់ឈ្នួលតាមរដ្ឋាភិបាលកំណត់វិញ ដើម្បីឲ្យពួកគេនោះទទួលបានប្រាក់ខែពេញ ៨០ដុល្លារ។ ទើបពួកគាត់តវ៉ាសុំកុំឲ្យថៅកែដកយកប្រាក់សុខភាព ៥ដុល្លារនោះ៖ «តវ៉ាដោយសារតែខ្ញុំហ្នឹងស៊ីឡូ ព្រោះអីអាចលើសពីប្រាក់ខែ ៨០ហ្នឹង។ ចំណែកឯគេស៊ីខែ គេអាចបានលុយហ្នឹងជារាល់ខែ ចំណែកខ្ញុំវិញគឺលុយហ្នឹងអត់បានទេ ដ៏អ៊ីចឹងវាបាត់លុយសុខភាពខ្ញុំ ៥រៀលហ្នឹង (ដុល្លារ) ដល់ពេលយើងសួរគេ គេថាយើងហ្នឹងស៊ីឡូ»។
កម្មករឈ្មោះ ខួច ឲ្យដឹងថា រោងចក្រតម្បាញសម្លៀកបំពាក់ យាន ដារ៉ុងហ្វុង នេះបើកដំណើរការពីឆ្នាំ២០០៧ មក មានកម្មករជិត ១ពាន់នាក់ធ្វើការ។ ការតវ៉ារបស់កម្មករសុំយកប្រាក់ថែទាំសុខភាព ៥ដុល្លារនេះ បានធ្វើ ២ថ្ងៃហើយ។ ទើបតែនៅថ្ងៃទី៣ ខែឧសភា សហជីពក្នុងរោងចក្រកំពុងជជែករកដំណោះស្រាយជាមួយថៅកែ ប៉ុន្តែមិនទាន់បានបញ្ចប់ការចរចា និងការតវ៉ានៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។