ពលករខ្មែរជាច្រើនពាន់នាក់ បានចោទក្រុមហ៊ុន ទូច ម៉ាណាក់ មេនផៅវ័រ (Touch Manak Manpower) និងសាខារបស់ក្រុមហ៊ុនឈ្មោះ អឹមជី មេនផៅវ័រ (MG Manpower) ដែលមានទីស្នាក់ការនៅទីក្រុងភ្នំពេញ នោះ ថាកំពុងឆបោកលុយកាក់ប្រជាពលរដ្ឋខ្មែរអស់ជាច្រើនពាន់ដុល្លារ តាមរយៈការឃោសនានាំពលករទៅធ្វើការនៅប្រទេសថៃ។
លោក ស៊ន សុគុណ អាយុ ២៥ឆ្នាំ រស់នៅភូមិចែង ឃុំចែងមានជ័យ ស្រុកបាណន់ ខេត្តបាត់ដំបង ថ្លែងថា ពលករជាច្រើននាក់បានទៅចុះឈ្មោះនៅមណ្ឌល អឹមជី មេនផៅវ័រ។ នៅពេលចុះឈ្មោះនោះ អ្នកខ្លះបានបង់លុយចំនួន២៥០ អ្នកខ្លះ ២៧០ ទៅ ៣០០ដុល្លារ ទៅឲ្យមណ្ឌលដើម្បីយកទៅធ្វើលិខិតឆ្លងដែនទៅធ្វើការនៅប្រទេសថៃ។ នៅថ្ងៃទី២៣ ខែមិថុនា ឆ្នាំ២០១២ ក្រុមហ៊ុនបាននាំពួកគាត់ទៅធ្វើលិខិតឆ្លងដែន ដោយសន្យាថាក្នុងរយៈពេល ១០០ថ្ងៃ ចាប់ពីថ្ងៃធ្វើលិខិតឆ្លងដែន រួចនឹងនាំទៅធ្វើការនៅប្រទេសថៃ បើខាងក្រុមហ៊ុនខកខាន នឹងសងលុយវិញ១ទ្វេជាបួន។ ប៉ុន្តែ រហូតមកដល់បច្ចុប្បន្ន ពួកគាត់ពុំត្រូវបានក្រុមហ៊ុននាំចេញទៅធ្វើការនៅប្រទេសថៃ នោះទេ៖ «ខ្ញុំអត់ចង់សុំអីទេ សុំសម្រួលឲ្យពួកខ្ញុំវិញមក រឿងលុយកាក់ហ្នឹង ព្រោះការកុហករបស់គាត់ហ្នឹង គឺច្រើនលើកច្រើនសារ តាំងពីភ្ជុំរួចភ្ជុំចូលឆ្នាំ ឥឡូវបោះឆ្នោតរួចអត់ទាន់ទៀតដែរ»។
សៅ ស្រីពេជ្រ អាយុ ២៦ឆ្នាំ រស់នៅភូមិនិគម ឃុំជ្រោយស្ដៅ ស្រុកថ្មគោល ខេត្តបាត់ដំបង បញ្ជាក់ថា រូបគាត់ និងប្ដីឈ្មោះ ស៊ុន រ៉ាស៊ី បានបង់លុយចំនួន ៥៤០ដុល្លារ ទៅសាខា អឹមជី មេនផៅវ័រ ដើម្បីទៅធ្វើការនៅប្រទេសថៃ។ មណ្ឌល អឹមជី មេនផៅវ័រ ដែលមានទីស្នាក់ការនៅសង្កាត់ស្ទឹងមានជ័យ ក្រុងភ្នំពេញ នោះ បានកុហកពលករជាច្រើនសារ។ ម្ដងប្រាប់ឲ្យរង់ចាំពេលវេលា ម្ដងប្រាប់ឲ្យទៅតវ៉ានៅក្រុមហ៊ុន ទូច ម៉ាណាក់ មេនផៅវ័រ ដោយអះអាងថា ក្រុមហ៊ុននេះជាអ្នកទទួលខុសត្រូវក្នុងការនាំពលករចេញទៅប្រទេសថៃ៖ «សុំឲ្យបងប្អូនទាំងអស់ដែលបានឮសំឡេងខ្ញុំ ឲ្យនាំគ្នាធ្វើបាតុកម្មទាមទារភាពយុត្តិធម៌មកវិញ ព្រោះអីព្យាយាមបោកពួកខ្ញុំច្រើនពេក ម្ដងសម្ដេចសោយទិវង្គត ម្ដងប្រទេសថៃ លិចទឹក ម្ដងភ្ជុំ ម្ដងចូលឆ្នាំ គ្មានកន្លែងណាដែលឲ្យពួកខ្ញុំមានជំនឿជឿជាក់ថានឹងបានចេញទេ ហើយលុយបើសិនជាពួកខ្ញុំរកបានដោយងាយ ផលិតលុយ ឬកន្លែងបោះពុម្ព ខ្ញុំអត់ស្ដាយទេ តែលុយចងការគេទៅការកាន់តែឡើងរកបង្វិលឲ្យគេមិនទាន់»។
តំណាងសាខា អឹមជី មេនផៅវ័រ លោក ព្រំ វិចិត្រ ថ្លែងថា មណ្ឌល អឹមជី មេនផៅវ័រ ជាសាខាមួយជ្រើសរើសពលករបញ្ជូនទៅឲ្យក្រុមហ៊ុន ទូច ម៉ាណាក់ មេនផៅវ័រ ដែលមានអាជ្ញាប័ណ្ណ។ ក្រុមហ៊ុននេះជាអ្នកបញ្ជូនពលករទៅប្រទេសថៃ។ ដូច្នេះបញ្ហាពលករ និងបញ្ហាលិខិតឆ្លងដែន ជារឿងរបស់ក្រុមហ៊ុន ទូច ម៉ាណាក់ មេនផៅវ័រ។ ចំណែកឯមណ្ឌល អឹមជី មេនផៅវ័រ គ្រាន់តែជាអ្នករកកម្រៃជើងសារតែប៉ុណ្ណោះ។ កន្លងមក មណ្ឌល អឹមជី មេនផៅវ័រ បានបញ្ជូនសំណុំឯកសាររបស់ពលករជាង ១ពាន់នាក់ ទៅឲ្យក្រុមហ៊ុន ទូច ម៉ាណាក់ មេនផៅវ័រ ដោយភ្ជាប់ជាមួយលុយរបស់ពលករម្នាក់ៗចំនួន ១៥០ដុល្លារ។ ប៉ុន្តែខាងក្រុមហ៊ុនបានយកលុយបន្ថែមពីពលករក្នុងម្នាក់ៗ ៥០ដុល្លារថែមទៀត នៅពេលនាំពលករចេញទៅធ្វើការនៅប្រទេសថៃ ទើបកើតមានបញ្ហា។
លោកបន្តថា ក្រោយពីមានបញ្ហាមក មណ្ឌល អឹមជី មេនផៅវ័រ ក៏ដាក់ពាក្យលាឈប់ និងបានបិទទ្វារតាំងពីខែកក្កដា ឆ្នាំ២០១២៖ «ធម្មតា គោលការណ៍របស់ក្រុមហ៊ុនគាត់ឲ្យយើងអត់មានប្រាក់ខែទេ។ ទីមួយ គាត់ឲ្យកម្រៃទីផ្សារហ្នឹងម្នាក់បង់ ២០០ ឬក៏ ២៥០ដុល្លារ ក្រុមហ៊ុនគេយក ១៥០ដុល្លារ។ អ៊ីចឹង យើងត្រូវយកកម្រៃទីផ្សារដើម្បីចិញ្ចឹមការិយាល័យ អ៊ីចឹងយើងនៅតែការពារពលករ អ៊ីចឹងពលករអត់មានប្ដឹងអ្នកណាប្ដឹងតែយើង»។
លោក ព្រំ វិចិត្រ បន្តថា ខាងមណ្ឌល អឹមជី មេនផៅវ័រ មានឯកសារគ្រប់គ្រាន់របស់កម្មករដែលបញ្ជូនទៅក្រុមហ៊ុន ទូច ម៉ាណាក់ មេនផៅវ័រ។
មន្ត្រីព័ត៌មានរបស់ក្រុមហ៊ុន ទូច ម៉ាណាក់ មេនផៅវ័រ លោក វង់ ភារៈ បំភ្លឺថា ក្រុមហ៊ុនកំពុងដោះស្រាយជូនកម្មករ។ ក្រុមហ៊ុនកំពុងរៀបចំបញ្ជូនពលករទៅធ្វើការងារនៅប្រទេសថៃ ឡើងវិញ និងទីពីរ ក្រុមហ៊ុននឹងទាមទារលុយពលករដែលបានបង់លើសនោះយកឲ្យពលករវិញ៖ «ពលករដែលគាត់មិនបានទទួលលេខទូរស័ព្ទរបស់ក្រុមហ៊ុនផ្ទាល់ គាត់អាចទាក់ទងមកលេខខ្ញុំ ឬមួយគាត់អាចឡើងមកភ្នំពេញ មិនចាំបាច់ឡើងមកទាំងអស់ទេ។ យើងអាចមានតំណាងយើងមួយក្នុងចំណោមយើង ២០នាក់ ឬ ៣០នាក់ គាត់អាចមក គាត់អាចមកជួបខ្ញុំផ្ទាល់ ឲ្យឈ្មោះ លេខទូរស័ព្ទ ដើម្បីខ្ញុំទាក់ទងគាត់រៀបចំគាត់ចេញ និងទាមទារនូវអ្វីដែលគាត់បានបង់លើសមកវិញ»។
ប្រភពបានឲ្យដឹងថា មានពលករខ្មែរជាច្រើនពាន់នាក់ ដែលបានចុះឈ្មោះបង់លុយទៅឲ្យក្រុមហ៊ុន ប៉ុន្តែពួកគេនៅពុំទាន់បានចេញទៅធ្វើការនៅប្រទេសថៃ។ ពលករទាំងនោះសម្ដែងការខកចិត្ត ហើយភាគច្រើន អះអាងថា ពួកគេចង់បានលុយដែលបង់ទៅឲ្យក្រុមហ៊ុនមកវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។