សិក្ខាសាលាលើកកម្ពស់ប្រសិទ្ធភាពអភិបាលកិច្ចល្អសង្គមស៊ីវិលនៅកម្ពុជា
2014.10.17
សិក្ខាសាលាលើកកម្ពស់ប្រសិទ្ធភាពអភិបាលកិច្ចល្អសង្គមស៊ីវិលនៅកម្ពុជាលើកទី១ កាលពីថ្ងៃទី១៦ ខែតុលា ឆ្នាំ២០១៤។
អង្គការធំៗចំនួន៥ដែលជាអង្គការសមាជិកភាព និងអង្គការម្ចាស់ជំនួយ បានជួបជុំគ្នាជាមួយបណ្ដាញអង្គការសមាគមជាដៃគូចំនួន៧០ ដើម្បីលើកកម្ពស់ប្រសិទ្ធភាពអភិបាលកិច្ចល្អរបស់ខ្លួន។
ការជួបប្រជុំគ្នាក្នុងសិក្ខាសាលាលើកកម្ពស់ប្រសិទ្ធភាពអភិបាលកិច្ចល្អសង្គមស៊ីវិលនៅកម្ពុជា នេះ បានធ្វើឡើងជាលើកទី១នៅថ្ងៃទី១៦ ខែតុលា។
អង្គការសង្គមស៊ីវិលមួយចំនួន នៅពុំទាន់មានភាពរឹងមាំផ្នែកអភិបាលកិច្ចល្អ នាំឲ្យខកខានក្នុងការគ្រប់គ្រង នាំឲ្យមានអំពើពុករលួយ ហើយមិនបានបង្ហាញពីតម្លាភាព និងគណនេយ្យភាពពេញលេញ ដើម្បីឆ្លើយតបនូវតម្រូវការរបស់ម្ចាស់ជំនួយ និងអ្នកទទួលផលនៅថ្នាក់មូលដ្ឋាន។
ប្រធានផ្នែកសិក្សាស្រាវជ្រាវ និងរៀនសូត្រនៃគណៈកម្មាធិការសហប្រតិបត្តិការដើម្បីកម្ពុជា ហៅកាត់ថា ស៊ីស៊ីស៊ី (CCC) លោក ស៊ឹង ទីប៉ូ មានប្រសាសន៍ថា យោងតាមការសិក្សាស្រាវជ្រាវ និងរកឃើញហេតុផលជាច្រើនថា ការប្រតិបត្តិរបស់អង្គការសង្គមស៊ីវិលមួយចំនួននាពេលបច្ចុប្បន្ន ពុំទាន់មានប្រសិទ្ធភាពនៅឡើយ។ ការប្រតិបត្តិដែលពុំមានប្រសិទ្ធភាពនោះ អាចនាំឲ្យបាត់បង់តម្លាភាពក្នុងការអនុវត្តសកម្មភាពការងាររបស់ខ្លួន។
លោក ស៊ឹង ទីប៉ូ៖ «អង្គការសង្គមស៊ីវិលតែងតែទាមទារឲ្យរដ្ឋាភិបាល ធ្វើការកែលំអ ឬក៏ពង្រឹងអភិបាលកិច្ចល្អអ៊ីចឹងទៅ។ ក៏ប៉ុន្តែ អង្គការសង្គមស៊ីវិល ក៏ត្រូវតែមើលលើខ្លួនឯងថា អភិបាលកិច្ចល្អរបស់ខ្លួនឯងយ៉ាងម៉េចផងដែរ។ ថ្ងៃនេះ គឺយើងមានគោលបំណង ដើម្បីឲ្យថ្នាក់ដឹកនាំ ឬក៏ឲ្យក្រុមប្រឹក្សាភិបាល និងថ្នាក់ដឹកនាំរបស់អង្គការ អ៊ិនជីអូ (NGOs) ហ្នឹង គាត់បានយល់ដឹងរួមគ្នាអំពីថាអ្វីទៅជាអភិបាលកិច្ចល្អ អ្វីទៅជាការគ្រប់គ្រង និងអ្វីទៅជាអភិបាលកិច្ចរួម។ មួយទៀតនោះ អាចឲ្យគាត់ឆ្លុះបញ្ចាំងពីអ្វីដែលគាត់បានប្រតិបត្តិរាល់ថ្ងៃ ថាតើមានចំណុចខ្វះខាតអី មានចំណុចត្រូវកែលំអអី ហើយនិងចំណុចល្អអ្វីខ្លះ ដើម្បីចែករំលែកគ្នា យកចំណុចទាំងអស់ហ្នឹងទៅប្រើប្រាស់ក្នុងស្ថាប័នរបស់ខ្លួន ដើម្បីពង្រឹងស្ថាប័នរបស់ខ្លួនហ្នឹង»។
លោក ស៊ឹង ទីប៉ូ ថ្លែងបែបនេះនៅក្នុងសិក្ខាសាលាស្ដីពីការលើកកម្ពស់ប្រសិទ្ធភាពអភិបាលកិច្ចរបស់អង្គការមិនមែនរដ្ឋាភិបាល និងទំនាក់ទំនងល្អរវាងក្រុមប្រឹក្សាភិបាល និងនាយកប្រតិបត្តិ នៅថ្ងៃទី១៦ តុលា នាមជ្ឈមណ្ឌលសហប្រតិបត្តិការកម្ពុជាកូរ៉េ។ សិក្ខាសាលានេះ រៀបចំដោយអង្គការម្ចាស់ជំនួយចំនួន៥ គឺអង្គការ ស៊ីស៊ីស៊ី (CCC) អង្គការ អែសអេឌីភី (SADP) អង្គការ ខត (CORD) អង្គការ ឌេនមិសសិន (DENMISSION) និងអង្គការអាកសិនអេត (ACTIONAID)។
អ្នកសម្របសម្រួល និងជាតំណាងប្រចាំប្រទេសនៃអង្គការកម្មវិធីអភិវឌ្ឍន៍អាស៊ីអាគ្នេយ៍ ហៅកាត់ថា អែសអេឌីភី (SADP) លោក ហ្គ្រេម ប្រោន (Graeme Brown) បានថ្លែងថា អង្គការលោក គឺជាអង្គការមួយជាអ្នកផ្ទេរមូលនិធិទៅអង្គការក្នុងស្រុកក្នុងប្រទេសកម្ពុជា ដែលធ្វើការលើផ្នែកធនធានធម្មជាតិ ព្រៃឈើ ជលផល និងសិទ្ធិជនជាតិដើមភាគតិច។ លោកថា មានអង្គការជាច្រើនបានប្រតិបត្តិត្រឹមត្រូវ ក៏ប៉ុន្តែមួយចំនួនមិនទាន់បានអនុវត្តត្រឹមត្រូវនៅឡើយ។ លោកបន្តថា អង្គការម្ចាស់ជំនួយពេញចិត្តចំពោះការជួបប្រជុំគ្នាបែបនេះ ក្នុងគោលដៅពង្រឹងអភិបាលកិច្ចខ្លួនឯង។ លោក ហ្គ្រេម ប្រោន បានអះអាងថា ប្រធានអង្គការមួយចំនួនមានប្រពន្ធជាអ្នកគ្រប់គ្រងហិរញ្ញវត្ថុ និងដាក់សាច់ញាតិជាអ្នកគ្រប់គ្រងហិរញ្ញវត្ថុ។ ចំណែកប្រធានអង្គការខ្លះ បានកិបកេងលុយជំនួយ ដោយសារពុំមានប្រព័ន្ធគ្រប់គ្រងរឹងមាំ។
លោក ហ្គ្រេម ប្រោន៖ «ធ្លាប់មានករណីមួយចំនួនថានាយករបស់អង្គការគេ ឆ្លៀតឱកាសដូចគេអត់មានប្រព័ន្ធរឹងមាំ ដូច្នេះគេមានឱកាសធ្វើមិនសូវត្រឹមត្រូវ ស្ដីពីការគ្រប់គ្រង ជាពិសេសការគ្រប់គ្រងហិរញ្ញវត្ថុពេលខ្លះ គេទៅឆ្ងាយពីទស្សនៈ ឬគោលបំណងរបស់ប្រជាជន។ សំខាន់មានក្រុមឯករាជ្យថាក្រុមអភិបាលកិច្ចណែនាំអង្គការ ដើម្បីបំពេញតួនាទីរបស់អង្គការ និងអត់បើកចំហសម្រាប់បញ្ហាកើតឡើង។ ម្ចាស់ជំនួយយើងមើលមុន យើងឲ្យលុយយើងចង់មើលឃើញទៅអង្គការនោះមានប្រព័ន្ធ អង់គ្លេសថា Check and balance មានអ្នកឯករាជ្យមើលទេ ដើម្បីអាចធានាអត់មានបញ្ហាអីទេ»។
ទោះជាយ៉ាងណា លោក ហ្គ្រេម ប្រោន បញ្ជាក់ថា ក្រុមប្រឹក្សាភិបាលរបស់អង្គការសង្គមស៊ីវិលនៅកម្ពុជា មួយចំនួន គ្រាន់ជាក្រុមប្រឹក្សាយោបល់។ ពួកគេពុំមានសិទ្ធិពេញលេញ ដែលផ្ទុយត្រង់ថា ក្រុមប្រឹក្សាភិបាល គឺក្រុមឯករាជ្យមានឥទ្ធិពលទៅលើនាយកអង្គការ មានសិទ្ធិដកនាយកប្រតិបត្តិ ឬប្រធានអង្គការដែលមានកំហុសចេញពីតួនាទី រួចដាក់ជំនួសអ្នកថ្មីនោះ។
នៅក្នុងការជួបប្រជុំគ្នានោះ បណ្ដាញអង្គការសង្គមស៊ីវិលដែលចូលរួមប្រមាណ៧០ បានពិភាក្សាគ្នាយ៉ាងផុលផុស ពង្រឹងការយល់ដឹងពីអភិបាលកិច្ចក្នុងអង្គការសង្គមស៊ីវិល តួនាទី និងការទទួលខុសត្រូវរបស់ក្រុមប្រឹក្សាភិបាល។ ក្នុងពេលនោះដែរ គណៈកម្មាធិការសហប្រតិបត្តិការដើម្បីកម្ពុជា ក៏ជំរុញឲ្យអង្គការសង្គមស៊ីវិល បន្តដាក់ពាក្យមកប្រព័ន្ធ ជីភីភី (GPP) ហៅជាភាសាអង់គ្លេសថា Good Governance Professional Practice គឺមានន័យថា អង្គការដែលមានការប្រតិបត្តិប្រកបដោយវិជ្ជាជីវៈ ដើម្បីទទួលបានវិញ្ញាបនបត្រសម្រាប់អង្គការសង្គមស៊ីវិល ដែលអនុវត្តល្អត្រឹមត្រូវ។
នៅប្រទេសកម្ពុជា អង្គការសង្គមស៊ីវិលដែលបានចុះបញ្ជីក្នុងក្រសួងមហាផ្ទៃ មានជាង ៤ពាន់អង្គការ ប៉ុន្តែមានអង្គការជាង ១.៣០០អង្គការប៉ុណ្ណោះ ដែលកំពុងធ្វើសកម្មភាព។ ចំណែកអង្គការដែលបានដាក់ពាក្យចូលប្រព័ន្ធអង្គការប្រតិបត្តិប្រកបដោយវិជ្ជាជីវៈ មានចំនួន ១២៨អង្គការ ប៉ុន្តែអ្នកដែលបានជាប់ និងទទួលវិញ្ញាបនបត្រមានចំនួន ៤៧អង្គការប៉ុណ្ណោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលករខ្មែរមួយចំនួនធ្វើការនៅប្រទេសថៃប្រកាសស្វាគមន៍អមដំណើរលោក សម រង្ស៊ី វិលចូលស្រុកវិញ
- លោក ហ៊ុន សែន អះអាងថា សេដ្ឋកិច្ចកម្ពុជាលែងត្រូវការប្រព័ន្ធអនុគ្រោះពន្ធEBA ពីអឺរ៉ុបហើយ
- ម្ចាស់អាជីវកម្មទាំងខ្នាតតូច និងខ្នាតធំកំពុងជួបវិបត្តិបង្វិលសាច់ប្រាក់មិនទាន់
- ពលរដ្ឋបង្ខំចិត្តចាកចេញពីតំបន់អង្គរ ប្រឈមនឹងជីវភាពខ្វះខាត និងបាត់បង់មុខរបរ
- អ្នកវិភាគថា លោក សម រង្ស៊ី ជាន់ទឹកដីម៉ាឡេស៊ី ប្រៀបដូចជាការទះកំផ្លៀងលោក ហ៊ុន សែន
