ក្រុម​យុវជន​អាស៊ាន​និង​កម្ពុជា​ពិភាក្សា​ពី​បញ្ហា​ការងារ​ឆ្លង​ដែន

ដោយ អ៊ុក សាវបូរី
2014-10-14
អ៊ីម៉ែល
មតិ
Share
បោះពុម្ព
ក្រុម​យុវជន​កម្ពុជា និង​ក្រុម​យុវជន​មក​ពី​ប្រទេស​អាស៊ី ជួប​ជុំ​គ្នា​ពិភាក្សា​អំពី​លទ្ធភាព​សហប្រតិបត្តិការ​អភិវឌ្ឍ​ក្រោយ​ឆ្នាំ​២០១៥ និង​តួនាទី​របស់​យុវជន ក្នុង​ការ​ចូលរួម​ធ្វើ​ឲ្យ​សង្គម​មាន​ការ​រីក​ចម្រើន កាល​ពី​ថ្ងៃ​ទី​១៣ ខែ​តុលា ឆ្នាំ​២០១៤។
ក្រុម​យុវជន​កម្ពុជា និង​ក្រុម​យុវជន​មក​ពី​ប្រទេស​អាស៊ី ជួប​ជុំ​គ្នា​ពិភាក្សា​អំពី​លទ្ធភាព​សហប្រតិបត្តិការ​អភិវឌ្ឍ​ក្រោយ​ឆ្នាំ​២០១៥ និង​តួនាទី​របស់​យុវជន ក្នុង​ការ​ចូលរួម​ធ្វើ​ឲ្យ​សង្គម​មាន​ការ​រីក​ចម្រើន កាល​ពី​ថ្ងៃ​ទី​១៣ ខែ​តុលា ឆ្នាំ​២០១៤។
RFA/Ouk Savborey

យុវជន​អង្គការ​នាវា​សន្តិភាព ប្រមាណ ៣០​នាក់ ជួប​ជុំ​នៅ​មជ្ឈមណ្ឌល​សង្គម​កូរ៉េ សម្រាប់​សេវាកម្ម​អាស៊ី ក្នុង​រាជធានី​ភ្នំពេញ ដើម្បី​ពិភាក្សា​ពី​ទស្សនទាន​នៃ​ការ​អភិវឌ្ឍ​ក្រោយ​ឆ្នាំ​២០១៥ និង​តួនាទី​របស់​យុវជន។

នៅ​ក្នុង​ការ​ពិភាក្សា​រវាង​យុវជន​កម្ពុជា និង​យុវជន​មក​ពី​ប្រទេស​អាស៊ី នោះ ពួក​គេ​បាន​និយាយ​អំពី​ការ​អភិវឌ្ឍ​ជាតិ និង​ពិភពលោក អំពី​ផល​វិបាក​នៃ​ការ​មិន​អាច​ចូលរួម​ជួយ​អភិវឌ្ឍ​ជាតិ​បាន ដោយសារ​សំឡេង​យុវជន មិន​ត្រូវ​បាន​រដ្ឋាភិបាល​ប្រទេស​នីមួយៗ​យក​ចិត្ត​ទុក​ដាក់ ជាដើម។

ក្រុម​យុវជន​កម្ពុជា ជាមួយ​ក្រុម​យុវជន​មក​ពី​ប្រទេស​អាស៊ី​ផ្សេង​ទៀត បាន​ជួប​ជុំ​គ្នា​នៅ​ថ្ងៃ​ទី​១៣ ខែ​តុលា ពិភាក្សា​អំពី​លទ្ធភាព​សហប្រតិបត្តិការ​អភិវឌ្ឍ​ក្រោយ​ឆ្នាំ​២០១៥ និង​តួនាទី​របស់​យុវជន ក្នុង​ការ​ចូលរួម​ធ្វើ​ឲ្យ​សង្គម​មាន​ការ​រីក​ចម្រើន។

ការ​ត្រៀម​របស់​ក្រុម​យុវជន​អាស៊ាន​នេះ បាន​ធ្វើ​ឡើង​នៅ​គ្រា​ដែល​តំបន់​អាស៊ី នៅ​ឆ្នាំ​២០១៥ ខាង​មុខ មាន​ការ​បង្កើត​សហគមន៍​អាស៊ាន។ ដូច្នេះ ពួក​គេ​នឹង​សហការ​គ្នា​ផ្តល់​ព័ត៌មាន​អំពី​ការងារ អំពី​ប្រទេស​ណា​មួយ​ខ្វះ​ធនធាន​មនុស្ស​ខាង​ជំនាញ​ណា​មួយ ដែល​យុវជន​អាច​ចល័ត មិន​ប្រកាន់​ព្រំដែន​ក្នុង​ការ​ស្វែងរក​ការងារ​ធ្វើ​ក្នុង​តំបន់​អាស៊ី។

នាយក​ប្រតិបត្តិ​គណៈកម្មាធិការ​សហប្រតិបត្តិ​ការ​ដើម្បី​កម្ពុជា (CCC) លោក សឿង សារឿន ថ្លែង​ថា យុវជន​នៃ​អង្គការ​នាវា​សន្តិភាព មាន​ទីតាំង​នៅ​ប្រទេស​ជប៉ុន មក​ទស្សនកិច្ច​សិក្សា​ជា​លើក​ដំបូង​នៅ​កម្ពុជា ដើម្បី​បង្កើន​កិច្ច​សហការ​រវាង​យុវជន​កម្ពុជា និង​យុវជន​អាស៊ី អំពី​តួនាទី​របស់​យុវជន​ក្រោយ​ឆ្នាំ​២០១៥ សម្រាប់​អនាគត ដើម្បី​ឲ្យ​យុវជន​អាច​ចូលរួម​បាន​ច្រើន ក្នុង​ការ​អភិវឌ្ឍ​ប្រទេស និង​តំបន់​អាស៊ាន៖ «គឺ​ខ្វះ​ការ​ចូលរួម​របស់​យុវជន​ក្នុង​ការ​កសាង​គោល​នយោបាយ ក្នុង​ការ​អភិវឌ្ឍ​ជាតិ​អី​ជាដើម។ល។ ហើយ​ទី​២ ដែល​យើង​បារម្ភ​សំខាន់​នោះ ថា​តើ​នៅ​ក្រោយ​ឆ្នាំ​២០១៥ មតិ​យោបល់​នៅ​ក្នុង​ការ​ចូលរួម​របស់​យុវជន​ហ្នឹង ត្រូវ​បាន​ធានា​ដែរ​ឬ​ក៏​អត់ បើ​យើង​មើល​នៅ​ក្នុង​បរិបទ​នៅ​ស្រុក​ខ្មែរ​យើង គឺ​ច្បាប់​ស្តី​អំពី​ការ​គ្រប់គ្រង​ឧក្រិដ្ឋកម្ម​តាម​ប្រព័ន្ធ​អ៊ីនធឺណិត​ហ្នឹង កំពុង​តែ​ដាក់​ជា​សេចក្តី​ព្រាង ហើយ​បើ​យើង​មើល​នៅ​ក្នុង​សេចក្តី​ព្រាង​នេះ ដែល​យើង​ទទួល​បាន​ក្រៅ​ផ្លូវ​ការ គឺ​ថា​សេចក្តី​ព្រាង​នឹង​មាន​ផល​ប៉ះពាល់​អវិជ្ជមាន​មែន​ទែន​ទៅ​ដល់​ការ​ចូលរួម​របស់​យុវជន ជា​ពិសេស​យុវជន​ដែល​គាត់​កំពុង​ប្រើ​ហ្វេសប៊ុក (facebook) ឬ​ក៏​ការ​ទំនាក់ទំនង​តាម​ប្រព័ន្ធ​ផ្សព្វផ្សាយ ជាដើម»

នាយក​ប្រតិបត្តិ​អង្គការ​នាវា​សន្តិភាព លោក កាវ៉ាសាគី អាគីរ៉ា (KAWASAKI Akira) ថ្លែង​ថា យុវជន ១១​នាក់​មក​ពី​ប្រទេស​ជប៉ុន ភូមា ហ្វីលីពីន និង​សិរីលង្កា ពិភាក្សា​ជាមួយ​យុវជន​កម្ពុជា ស្ដីពី​ការ​អភិវឌ្ឍ​ជាតិ​ប្រកប​ដោយ​និរន្តរភាព។ លោក​បន្ត​ថា ក្រុម​យុវជន​មក​ពី​អង្គការ​នាវា​សន្តិភាព​នេះ កំពុង​តែ​សិក្សា​អំពី​ភាព​សុខដុម​នៃ​សង្គម និង​ការ​កសាង​សន្តិភាព​ដែល​ការ​ពិភាក្សា​នេះ នឹង​ផ្តល់​គំនិត​ទៅ​យុវជន ឲ្យ​ពួក​គេ​បង្កើត​សន្តិភាព​ក្នុង​ការ​អភិវឌ្ឍ​ជាតិ ដែល​គ្មាន​ហិង្សា​ទៅ​អនាគត៖ «Youth vision ដោយសារ​ថា​សំឡេង​របស់​យុវជន​ហ្នឹង មិន​ត្រូវ​បាន​គេ​ទទួល​ច្រើន​ទេ ហើយ​យុវជន​ហ្នឹង​ក៏​មិន​មាន​តំណាង​ច្រើន​ដែរ។ ដូច្នេះ ប្រការ​សំខាន់ គឺ​ថា​ត្រូវ​ធ្វើ​ម៉េច​ឲ្យ​សំឡេង​យុវជន និង​សង្គម ឮ​សំឡេង​របស់​ពួក​គាត់»

យុវជន​មក​ពី​សមាគម​យុវជន​ខ្មែរ ឈ្មោះ ទីន សុខលីម ឲ្យ​ដឹង​ថា យុវជន​កម្ពុជា មាន​កង្វល់​ពី​វិបត្តិ​គ្មាន​ការងារ​ធ្វើ​ក្រោយ​បញ្ចប់​ការ​សិក្សា ហើយ​ក៏​ចង់​ស្វែងរក​ការងារ ឬ​ចង់​បន្ត​ការ​សិក្សា​នៅ​បរទេស ប៉ុន្តែ​បើ​សិន​ជា​មាន​ការ​រឹតត្បិត ការ​ប្រើប្រាស់​ប្រព័ន្ធ​អ៊ីនធឺណិត នោះ​យុវជន​ក្នុង​តំបន់​អាស៊ី​ក៏​ដូច​នៅ​លើ​ពិភពលោក នឹង​គ្មាន​ទំនាក់ទំនង​គ្នា​ល្អ​បាន​ទេ៖ «អ្វី​ដែល​សំខាន់ គឺ​ចាប់​ផ្ដើម​ពី​យុវជន​ម្នាក់ៗ​បង្កើន​សមត្ថភាព​ខ្លួន​ឯង ហើយ​អ្វី​ដែល​ខ្លួន​បាន​ចេះ ត្រូវ​ចែក​រំលែក​ទៅ​កាន់​យុវជន​ដទៃ​ទៀត​តាម​សមត្ថភាព លទ្ធភាព​នឹង​អាច​ធ្វើ​បាន ដូចជា​ប្រើ​ប្រព័ន្ធ​ផ្សព្វផ្សាយ​ហ្វេសប៊ុក និង​យុវជន ដែល​នៅ​ជុំវិញ​ខ្លួន ជាដើម»

នាយក​រង​នៃ​អង្គការ​កម្មវិធី​អភិវឌ្ឍន៍​ធនធាន​យុវជន លោក រៀម រដ្ឋាមុន្នី ថ្លែង​ថា យុវជន​ជា​អ្នក​ផ្លាស់ប្ដូរ​សង្គម​របប​នយោបាយ ហើយ​ចូលរួម​ជួយ​សង្គម និង​លើក​តម្កើង​លទ្ធិប្រជាធិបតេយ្យ បន្ទាប់​ពី​ពួក​គេ​បាន​ចងក្រង​គ្នា​ជា​ក្រុម ប្រាប់​គ្នា​អំពី​ហេតុការណ៍​បាន​កើត​ឡើង​តាម​ហ្វេសប៊ុក។ លោក​ថា តាម​រយៈ​ហ្វេសប៊ុក យុវជន​បាន​មើល​ឃើញ​ហេតុការណ៍​កើត​ឡើង​នៅ​បរទេស ចំណែក​នៅ​ប្រទេស​កម្ពុជា ហ្វេសប៊ុក​ក៏​មាន​ការ​ផ្លាស់ប្ដូរ​ទស្សនៈ​យុវជន ក្នុង​ការ​សម្រេច​បោះ​ឆ្នោត​ជ្រើស​រើស​ថ្នាក់​ដឹក​នាំ​កន្លង​ទៅ​ដែរ៖ «ក៏ប៉ុន្តែ​យុវជន​ខ្លួន​ឯង ត្រូវ​តែ​បង្ហាញ​ថា តើ​យើង​ខ្លួន​ឯង​នឹង​មាន​សមត្ថភាព ឬ​ក៏​មាន​លទ្ធភាព​យ៉ាង​ណា​ខ្លះ ក្នុង​ការ​ចូលរួម​ដោះស្រាយ​បញ្ហា​ពិភពលោក»

លោក​បន្ត​ថា យុវជន​ជាង ៣,៥​កោដិ​នៅ​លើ​ពិភពលោក ក្នុង​នោះ​ជាង ៥០% ពួក​គេ​ទទួល​ស្គាល់​ថា គេ​មាន​តួនាទី​ក្នុង​ការ​អភិវឌ្ឍ​ពិភពលោក។ យុវជន​ខ្លួន​ឯង ត្រូវ​មាន​សមត្ថភាព និង​លទ្ធភាព​ប៉ុណ្ណា ក្នុង​ការ​ចូលរួម​ដោះស្រាយ​បញ្ហា​កើត​ឡើង​លើ​ពិភពលោក។ លោក​ថា នេះ​ជា​ការ​ពិភាក្សា​បន្ត​ទៀត​រវាង​យុវជន​កម្ពុជា និង​យុវជន​អាស៊ាន សម្រាប់​ការ​សហការ​គ្នា​នៅ​ក្រោយ​ឆ្នាំ​២០១៥៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

អ្នក​អាន​អនាមិក

ពី kampong cham

យុវជនជា សរសរ ទ្រូង ជាតិ ពួកគាត់ មានចំណេះដឹង ខ្ពស់ មានគំនិត ថ្មី​ ពួឲ៉ន្ធ័

Oct 14, 2014 11:06 AM

គេហទំព័រ​ទាំងមូល