ពលរដ្ឋ​នៅ​សៀមរាប​តវ៉ា​ជំទាស់​ទៅ​នឹង​ការ​បណ្ដេញ​ចេញ​ពី​លំនៅ

ក្រុម​ប្រជាពលរដ្ឋ​ប្រមាណ​ជិត ១០០​គ្រួសារ​ដែល​ចូល​ទៅ​តាំង​ទីលំនៅ​​ក្នុង​តំបន់​ដី​ថ្មី​​នៃ​ភូមិ​ត្បែងខាងលិច ឃុំ​ត្បែង ស្រុក​បន្ទាយស្រី បាន​ប្រមូល​ផ្ដុំ​គ្នា​ចំនួន ៣​ថ្ងៃ​ជាប់ៗ​គ្នា​​មក​ហើយ ដើម្បី​​តវ៉ា​ជំទាស់​ទៅ​នឹង​មន្ត្រី​រដ្ឋបាល​ព្រៃ​ឈើ​ដែល​កំពុង​ព្យាយាម​បណ្ដេញ​ពួកគេ​ឱ្យ​រុះរើ​លំនៅឋាន​ចាក​ចេញ​ពី​តំបន់​ព្រៃ​ជើង​ភ្នំ​គូលែន ដើម្បី​យក​ដី​ទាំង​នោះ​​ដាំ​ដើម​ឈើ​ឡើង​វិញ។
ដោយ ហង្ស សាវយុត
2011.05.21

ក្រុម​អ្នក​ភូមិ​ទាំង​នោះ​បាន​បង្ហាញ​ជំហរ​ថា ពួកគេ​នឹង​មិន​រុះរើ​លំនៅឋាន​ចាក​ចេញ​ទៅ​តាម​ការ​សន្យា​របស់​មន្ត្រី​រដ្ឋបាល​ព្រៃ​នោះ​ទេ ពីព្រោះ​តែ​ដី​ដែល​ពួកគេ​ចូល​តាំង​ទី​លំនៅ​នោះ​គឺ​ជា​ដី​ចម្ការ​ពនេចរ​របស់​ពួកគេ​ជា​យូរ​មក​ហើយ។

លោក ធួន នឿម តំណាង​ឱ្យ​ក្រុម​ប្រជាពលរដ្ឋ​ទាំង​នោះ​បាន​មាន​ប្រសាសន៍​កាល​ពី​រសៀល​ថ្ងៃ​សៅរ៍ ទី​២១ ខែ​ឧសភា ថា ក្រុម​អ្នក​ភូមិ​របស់​លោក​បាន​ប្រមូល​ផ្ដុំ​គ្នា​នៅ​ក្នុង​ភូមិ​មិន​ហ៊ាន​ចេញ​ទៅ​ណា​ទេ​ចាប់​តាំង​ពី​ថ្ងៃ​ទី​១៩ ខែ​ឧសភា​​មក ដើម្បី​នឹង​ត្រៀម​តវ៉ា​ជាមួយ​មន្ត្រី​រដ្ឋបាល​ព្រៃឈើ​ដែល​ចូល​ទៅ​បណ្ដេញ​ពួកគេ​ឱ្យ​រុះរើ​លំនៅ​ចាក​ចេញ​នោះ។

លោក ធួន នឿម បន្ត​ថា ៖ «អ្ហូ! ដី​នោះ​នៅ​យូរ​ហើយ នៅ ៥-​៦​ឆ្នាំ បើ​ដេញ​ទៀត​យើង​ចុះ​ទៅ​ណា បើ​​វា​រួមរស់​នឹង​នេះ​ហើយ ទៅ​នៅ​ឯ​ណា? ដូច​ខ្ញុំ​អី​នេះ​អស់​ដី​ស្រែ​ចម្ការ​នេះ​ហើយ​ធ្វើ​តាំង​ពី​ដើម។ សូម​សំណូមពរ​​ថា កុំ​ឱ្យ​រឿង​រ៉ាវ​ទៀត​ធ្វើ​ម៉េច​ឱ្យ​បាន​ប្រជាជន​គ្នា​រស់​នៅ​ស្រួលបួល​ទៅ​ណា​កុំ​ឱ្យ​គ្នា​ងាប់​នឹង​ដាច់​បាយ»

ក្រុម​អ្នក​ភូមិ​បាន​អះអាង​ថា កាល​ពី​ថ្ងៃ​ទី​១៩ ខែ​ឧសភា កន្លង​មក មន្ត្រី​រដ្ឋបាល​ព្រៃ​ឈើ​​ជា​ច្រើន​បាន​នាំ​គ្នា​ទៅ​រុះ​រើ​នឹង​ដុត​បំផ្លាញ​ខ្ទម​មួយ​ចំនួន​របស់​ប្រជាពលរដ្ឋ​ដែល​សង់​នៅ​តាម​ដី​នៃ​តំបន់​ជើង​ភ្នំ​គូលែន​នោះ ហើយ​កាល​ពី​ថ្ងៃ​ទី​២០ ខែ​ឧសភា មន្ត្រី​រដ្ឋបាល​ព្រៃឈើ​បាន​បញ្ជូន​គ្រឿង​ចក្រ​ទៅ​ក្នុង​​បំណង​ឈូស​រំលំ​ខ្ទម​ប្រជាពលរដ្ឋ​មួយ​ចំនួន​ទៀត​ផង។

លោក សួ ហៃ នាយក​ផ្នែក​រដ្ឋបាល​ព្រៃ​ឈើ​បន្ទាយ​ស្រី បាន​មាន​ប្រសាសន៍​ថា រដ្ឋបាល​ព្រៃ​ឈើ​ពិត​ជា​មាន​បំណង​ឱ្យ​ប្រជាពលរដ្ឋ​ទាំង​នោះ​រុះរើ​លំនៅឋាន​ចាក​ចេញ​មែន​ ដោយសារ​តំបន់​ដែល​អ្នក​ភូមិ​នាំ​គ្នា​ចូល​ទៅ​សង់​ខ្ទម​រស់​នៅ​នោះ គឺ​ជា​ដី​ដែល​សាលា​ខេត្ត​សៀមរាប បាន​ចេញ​​ដីកា​លេខ​១០២ កាល​ពី​ឆ្នាំ​២០០៦ ដើម្បី​ដក​ហូត​ដី​តាំង​អស់​ចំនួន ១.២៤៧​ហិកតារ​​សម្រាប់​ដាំ​ដើម​ឈើ​ឡើង​វិញ​ជា​ទ្រនាប់​នៃ​ឧទ្យានជាតិ​ភ្នំ​គូលែន។

លោក សួ ហៃ មាន​ប្រសាសន៍​បន្ថែម​ដូច្នេះ ៖ «កន្លែង​ហ្នឹង​វា​ជា​តំបន់​មួយ​ដែល​ថា ប្រភព​ទឹក​ភ្នំ​គូលែន​ដែល​ធ្លាក់​មក​ស្ទឹង​សៀមរាប​ហ្នឹង គឺ​​ចេញ​ពី​ប្រភព​ទឹក​ជួរ​អស់​ហ្នឹង​ណា។ អ៊ីចឹង​មាន​ត្រូវការ​គម្រប​ព្រៃ​ទី​នោះ​ឡើង​វិញ គោលការណ៍​ហ្នឹង​ចង់​ឱ្យ​ដាំ​ឈើ​ទៅ​តាម​កន្លែង​ហ្នឹង​ឡើង​វិញ​ទាំង​អស់ បន្ទាប់​ពី​សាលា​ខេត្ត​បាន​ធ្វើ​ការ​ដក​ហូត​មក​ហើយ​យើង​បាន​យក​បង្គោល​ព្រំ​បោះ​​កំណត់​រួច​ហើយ បន្ទាប់​មក​គេ​ចេញ​ប្រកាស​បង្កើត​ជា​ស្ថានីយ​ផ្សព្វផ្សាយ និង​ស្ដារ​ព្រៃ​ឈើ​ឡើង​វិញ​ដោយ​ក្រសួង​កសិកម្ម»

មន្ត្រី​រដ្ឋបាល​ព្រៃ​ឈើ​បាន​ឱ្យ​ដឹង​ថា ក្រុម​អ្នក​ភូមិ​ទាំង​នោះ​ទើប​តែ​ចូល​ទៅ​តាំង​ទីលំនៅ​​តំបន់​ទ្រនាប់​ឧទ្យានជាតិ​ភ្នំ​គូលែន ក្រោយ​ពេល​ដែល​រដ្ឋបាល​ព្រៃ​ឈើ​​បាន​ទៅ​បោះ​បង្គោល​កំណត់​ទីតាំង​ដី​ដក​ហូត​ប៉ុណ្ណោះ។

លោក សួស ណារិន អ្នក​ស៊ើប​អង្កេត​របស់​សមាគម​ការពារ​សិទ្ធិ​មនុស្ស​អាដហុក (ADHOC) ប្រចាំ​ខេត្ត​សៀមរាប ដែល​បាន​ចុះ​ទៅ​ស៊ើប​អង្កេត​បញ្ហា​នោះ​បាន​មាន​ប្រសាសន៍​ថា តាម​លោក​ពិនិត្យ​មើល​ទៅ​ដី​តំបន់​នោះ គឺ​ជា​របស់​ឧទ្យាន​ជាតិ​ដែល​មាន​ការ​ដក​ហូត​មែន ប៉ុន្តែ​​ប្រជាពលរដ្ឋ​ដែល​ខ្វះ​ដី​ចេះ​តែ​នាំគ្នា​ចូល​ទៅ​សង់​លំនៅឋាន​ទី​នោះ គឺ​ភាគ​ច្រើន​សុទ្ធ​តែ​ជា​ខ្ទម​តូចៗ​មិន​មាន​ផ្ទះ​ធំដុំ​ទេ។

អង្គការ​សិទ្ធិ​មនុស្ស​បាន​រក​ឃើញ​ថា ក្នុង​ចំណោម​អ្នក​ភូមិ​ដែល​ចូល​ទៅ​តាំង​ទីលំនៅ​លើ​ដី​ទ្រនាប់​ឧទ្យានជាតិ​នោះ​មួយ​ចំនួន​គឺ​ជា​អ្នក​ដែល​ទើប​តែ​ចូល​ទៅ​រស់​នៅ​ថ្មី៕​​​​​​​​​​

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

មតិយោបល់៖

Anonymous
May 21, 2011 01:43 PM

ខ្ញុំសូមស្នើសុំ បងប្អូនខ្មែរដែលបញ្ចេញបតិក្នុងគ្រប់សារព៌តមានសេរី ទាំងអស់មេត្តាអាចសរសេរជាភាសារខ្មែរបាន នោះជាការល្អ។ ព្រោះពលរដ្ឋខ្មែរយើង តិចគ្នាណាស់ដែលចេះភាសាបរទេស។ ការពិត សូមអរគុណ និងសូមអភ័យទោសផង។