បក្សសមរង្ស៊ីស្នើគ.ជ.ប.ឲ្យទទួលស្គាល់សមាជិកក្រុមប្រឹក្សាឃុំ-សង្កាត់ថ្មី
2011.07.28
គណបក្ស សម រង្ស៊ី បានស្នើទៅស្ថាប័ន គ.ជ.ប. ឲ្យជួយជំរុញទៅក្រសួងមហាផ្ទៃ ឲ្យពន្លឿនការចេញប្រកាសទទួលស្គាល់សមាជិកក្រុមប្រឹក្សាឃុំ-សង្កាត់ថ្មី ដែលថ្នាក់ដឹកនាំបក្សនេះបានស្នើឲ្យមានការផ្លាស់ប្ដូរ។
លោក យឹម សុវណ្ណ មន្ត្រីនាំពាក្យគណបក្ស សម រង្ស៊ី មានប្រសាសន៍នៅថ្ងៃទី២៨ ខែកក្កដា ថា គណបក្សនេះកាលពីថ្ងៃទី២៦ ខែកក្កដា បានដាក់លិខិតមួយច្បាប់ទៅស្ថាប័ន គ.ជ.ប. ស្ដីពីការផ្លាស់ប្ដូរសមាជិកក្រុមប្រឹក្សាឃុំ-សង្កាត់ និងស្នើសុំតែងតាំងបេក្ខជនបម្រុងបន្ថែមសម្រាប់ឃុំ-សង្កាត់មួយចំនួន ស្របតាមនីតិវិធីដែលកំណត់ដោយក្រសួងមហាផ្ទៃ។
លោកបន្តថា មូលហេតុដែលគណបក្ស សម រង្ស៊ី ស្នើកិច្ចអន្តរាគមន៍ពីស្ថាប័ន គ.ជ.ប. ដោយសារតែកន្លងមកសំណើភាគច្រើនរបស់បក្សខ្លួនមិនត្រូវបានក្រសួងមហាផ្ទៃ យកចិត្តទុកដាក់នោះទេ។
តាមលោក យឹម សុវណ្ណ មានឃុំ-សង្កាត់ចំនួន ៣៤ ដែលគណបក្ស សម រង្ស៊ី បានស្នើសុំទៅក្រសួងមហាផ្ទៃ ដើម្បីធ្វើការផ្លាស់ប្តូរសមាជិកក្រុមប្រឹក្សាឃុំ-សង្កាត់ មានដូចជា នៅខេត្តកំពង់ធំ កំពត កណ្តាល ពោធិ៍សាត់ រតនគិរី បន្ទាយមានជ័យ បាត់ដំបង កំពង់ចាម កំពង់ឆ្នាំង ក្រចេះ សៀមរាប ព្រះសីហនុ តាកែវ ព្រៃវែង និងខេត្តឧត្តរមានជ័យ។
លោក យឹម សុវណ្ណ មានប្រសាសន៍បន្ថែម ៖ «នៅក្នុងប្រទេសកម្ពុជា គេយកស្ថាប័នជាតិទៅធ្វើជាស្ថាប័នបក្ស។ អ៊ីចឹងហើយបានជាមានទំនាស់មិនចេះចប់ និងមានអំពើអយុត្តិធម៌មិនចេះចប់នៅក្នុងសង្គមខ្មែរ។ ឲ្យតែមានបោះឆ្នោតម្តងៗ គឺមានទំនាស់ដោយសារតែគេមើលឃើញថា ស្ថាប័នជាតិត្រូវបានគេប្រើប្រាស់ជាស្ថាប័នបក្ស»។
ចំពោះបញ្ហានេះ លោក ទេព នីថា អគ្គលេខាធិការ គ.ជ.ប. បានថ្លែងថា សំណើផ្លាស់ប្ដូរសមាជិកក្រុមប្រឹក្សាឃុំ-សង្កាត់ របស់គណបក្ស សម រង្ស៊ី មិនមែនស្ថាប័ន គ.ជ.ប. និងក្រសួងមហាផ្ទៃ មិនធ្វើសកម្មភាពដូចការចោទប្រកាន់របស់មន្ត្រីបក្សប្រឆាំងលើកឡើងនោះទេ។
លោក ទេព នីថា បន្ត ៖ «គ.ជ.ប. បានទទួលលិខិតនេះហើយ ហើយយើងខ្ញុំកំពុងរៀបចំធ្វើលិខិតបន្តដើម្បីសុំអន្តរាគមន៍ទៅក្រសួងមហាផ្ទៃ ឲ្យជំរុញនីតិវិធី ឬការចេញសេចក្ដីប្រកាសទទួលស្គាល់សមាជិកថ្មីក្រុមប្រឹក្សាឃុំ-សង្កាត់នេះ»។
ចំណែកលោក ខៀវ សុភ័គ មន្ត្រីនាំពាក្យក្រសួងមហាផ្ទៃ មានប្រសាសន៍ថា គ្រប់សំណើពីគ្រប់គណបក្សនយោបាយទាំងអស់ដែលស្នើមកក្រសួងមហាផ្ទៃ ក្រសួងមិនដែលផ្អឹបទុកចោលមិនចាត់ការនោះទេ គ្រាន់តែប្រើរយៈពេលខ្លី និងវែងប៉ុណ្ណោះ ប៉ុន្តែមិនបានធ្វើឲ្យប៉ះពាល់ដល់សកម្មភាពរបស់បក្សនីមួយៗនោះទេ។
លោក ខៀវ សុភ័គ មានប្រសាសន៍ ៖ «កន្លងមកឲ្យតែគាត់ស្នើមកយើងខ្ញុំតែងតែរៀបចំជូនគាត់ហ្នឹង។ ប៉ុន្តែមិនមែនគាត់ស្នើមកម្សិលមិញ ថ្ងៃនេះចេញឲ្យគាត់បានឯណា យើងត្រូវបញ្ជាក់ឲ្យបានច្បាស់លាស់ពីតាមមូលដ្ឋាន ហើយធម្មតាបែបបទរដ្ឋបាលយើងមិនមែនធ្វើយើងដាក់ថ្ងៃនេះចេញស្អែកទេ។ និយាយរួមមិនបានបំពេញបំណងបន្ទាន់របស់គាត់ ក៏ប៉ុន្តែយើងបានបំពេញតាមតួនាទី និងភារកិច្ចរបស់យើង»។
មន្ត្រីបក្សប្រឆាំងបានឲ្យដឹងពីមូលហេតុនាំឲ្យបក្ស សម រង្ស៊ី ធ្វើការផ្លាស់ប្ដូរសមាជិកក្រុមប្រឹក្សាឃុំ-សង្កាត់ថ្មី ជំនួសក្រុមប្រឹក្សាឃុំ-សង្កាត់ចាស់ ដោយសារតែសមាជិកក្រុមប្រឹក្សាចាស់ភាគច្រើនបានចាកចេញពីគណបក្ស សម រង្ស៊ី ទៅចូលរួមនយោបាយថ្នាក់មូលដ្ឋានជាមួយគណបក្សប្រជាជនកម្ពុជា។
ទាក់ទងបញ្ហានេះដែរ កញ្ញា ចក់ សុភាព ជំនួយការប្រតិបត្តិមជ្ឈមណ្ឌលសិទ្ធិមនុស្សកម្ពុជា មានប្រសាសន៍ថា សមាជិកក្រុមប្រឹក្សាឃុំ-សង្កាត់ គឺជាតួអង្គសំខាន់ដែលត្រូវចូលរួមជាមួយសមាជិករដ្ឋសភា ដើម្បីបោះឆ្នោតជ្រើសរើសសមាជិកព្រឹទ្ធសភាអាណត្តិទី៣ នៅថ្ងៃទី២៩ ខែមករា ឆ្នាំ២០១២។ដូច្នេះក្រសួងមហាផ្ទៃគ្មានហេតុផលណាមួយធ្វើឲ្យយឺតយ៉ាវក្នុងការស្នើសុំឲ្យមានការផ្លាស់ប្ដូរសមាជិកក្រុមប្រឹក្សាឃុំសង្កាត់ស្នើដោយគណបក្ស សម រង្ស៊ី នោះទេ។
កញ្ញា ចក់ សុភាព បន្ថែម ៖ «នេះគឺជាការបង្ហាញនូវការប៉ុនប៉ងមួយក្នុងការពន្យារពេល ឬក៏ធ្វើឲ្យបង្អាក់ការងារគណបក្សដែលគាត់ស្នើសុំនោះ»។
មន្ត្រី គ.ជ.ប. បានឲ្យដឹងថា ការពិនិត្យបញ្ជីឈ្មោះ និងការចុះឈ្មោះប្រចាំឆ្នាំសម្រាប់ការបោះឆ្នោតនឹងចាប់ផ្ដើមពីថ្ងៃទី១ ខែកញ្ញា តទៅ។ រីឯការបោះឆ្នោតរើសសមាជិកក្រុមប្រឹក្សាឃុំ-សង្កាត់ នឹងប្រព្រឹត្តទៅនៅថ្ងៃទី៣ ខែមិថុនា ឆ្នាំ២០១២។ ចំណែកការបោះឆ្នោតរើសសមាជិកព្រឹទ្ធសភា នឹងប្រព្រឹត្តទៅនៅថ្ងៃទី២៩ ខែមករា ឆ្នាំ២០១២ និងការបោះឆ្នោតជ្រើសរើសតំណាងរាស្ត្រនីតិកាលទី៥ នឹងប្រព្រឹត្តទៅនៅថ្ងៃទី២៨ ខែកក្កដា ឆ្នាំ២០១៣។
មន្ត្រីគណបក្ស សម រង្ស៊ី មានជំនឿថា ការបោះឆ្នោតព្រឹទ្ធសភា អាចទទួលបាន ១១អាសនៈក្នុងចំណោមអាសនៈសមាជិកព្រឹទ្ធសភាចំនួន ៥៧ ដែលត្រូវធ្វើការបោះឆ្នោតតាមបែបអសកល។
សមាជិកព្រឹទ្ធសភាទាំងអស់សរុបមានចំនួន ៦១រូប ក្នុងនោះសមាជិក ២រូប ត្រូវបានតែងតាំងដោយព្រះមហាក្សត្រ និង ២រូបទៀត តែងតាំងដោយរដ្ឋសភា។ ចំណែក ៥៧រូប ត្រូវបានជ្រើសតាំងដោយការបោះឆ្នោតអសកល តាមរយៈសមាជិករដ្ឋសភា និងសមាជិកក្រុមប្រឹក្សាឃុំសង្កាត់ជាអ្នកបោះឆ្នោតជ្រើសរើស៕
រឿងដែលគេអានច្រើនបំផុត
RFA
- ធនាគារABA មិនព្រមបើកប្រាក់ជាង១ម៉ឺន ៥ពាន់ដុល្លារ ដែលឧបត្ថម្ភដល់បុគ្គលិកណាហ្គាវើលដ៍
- គណបក្សភ្លើងទៀនស្វាគមន៍វត្តមានលោក រ៉ុង ឈុន អតីតមន្ត្រីជាន់ខ្ពស់ គ.ជ.ប ដែលហក់មកចូលរួមជីវភាពជាមួយគណបក្សនេះ
- ថៃយល់ព្រមឱ្យកម្ពុជាប្រើពាក្យ «គុនខ្មែរ» ក្នុងព្រឹត្តិការណ៍ស៊ីហ្គេម២០២៣
- «ករណីឧកញ៉ា សៀង ចាន់ហេង ប្រគល់ដីឲ្យប្អូនស្រីនាយករដ្ឋមន្ត្រីបង្ហាញថា អ្នកធំតែងឈ្នះ»
- អាមេរិក ផ្តល់ពានរង្វាន់អ្នកការពារសិទ្ធិមនុស្សសកលប្រចាំឆ្នាំឲ្យកញ្ញា ឈឹម ស៊ីថរ
រឿងដែលគេអានច្រើនបំផុត
ព័ត៌មានថ្មីៗ
- លោក ហ៊ុន សែន បន្តប្រកាសថា នឹងការពារមិនឱ្យមានរដ្ឋប្រហារ ដើម្បីអភិវឌ្ឍប្រទេសឱ្យរីកចំរើន
- អ្នកវិភាគថា លោក ហ៊ុន ម៉ាណែត បកស្រាយបំភ្លៃច្បាប់បោះឆ្នោតជ្រើសតាំងតំណាងរាស្ត្រ
- អ្នកឃ្លាំមើលថា គណបក្សប្រជាជនកម្ពុជាពុំបានប្រកាន់ជំហរគោលនយោបាយបរទេសឯករាជ្យ
- ប្រតិភូខ្មែរក្រោមប្រាប់សន្និសិទអន្តរសាសនាស្តីពីការរំលោភសិទ្ធិសាសនាខ្មែរក្រោម
- គណបក្សភ្លើងទៀនចាប់ផ្ដើមយុទ្ធនាការពង្រឹងសមាជិកបក្សតាមមូលដ្ឋាន ដើម្បីទទួលបានការគាំទ្រពីប្រជាពលរដ្ឋ