លោក ព្រំ សៅរ៍នរ៉ា វិស្វករខ្មែរអាមេរិកាំងបានច្នៃប្រឌិតកាំបិតប្រលេះគ្រាប់ស្វាយចន្ទីលក់ក្នុងតម្លៃថោកជាងរបស់ឥណ្ឌា និងយៀកណាម ហើយមានប្រសិទ្ធភាពខ្ពស់ ដើម្បីជួយឲ្យកសិករដាំស្វាយចន្ទីអាចចំហុយនិងប្រលេះគ្រាប់បានដោយខ្លួនឯង។
មានមិត្តអ្នកស្តាប់ខ្លះចាប់អារម្មណ៍អំពីមុខរបរផលិតគ្រាប់ស្វាយចន្ទីលក់ដូចដែលនាទីកសិកម្មវិទ្យុអាស៊ីសេរី បានស្នើកាលពីសប្តាហ៍កន្លងទៅ។ ដោយពិតទៅសាច់គ្រាប់ស្វាយចន្ទីលីងលក់បានតម្លៃល្អណាស់តាមហាង ភោជនីយដ្ឋាន ឬរង្គសាល ឬបានានា ដែលអតិថិជននិយមទទួលទានគ្រាប់ស្វាយចន្ទីក្លែមជាមួយស្រាបៀរ និងភេសជ្ជៈផ្សេងៗទៀត។
ដូចធ្លាប់ជម្រាបហើយថា កសិករម្ចាស់ចម្ការស្វាយចន្ទីនៅកម្ពុជា មិនតិចនាក់ទេដែលនាំគ្នាកាប់ដើមស្វាយចន្ទីចោលដើម្បីយកដីទៅដាំដំណាំផ្សេងទៀត ព្រោះរកទីផ្សារលក់គ្រាប់ស្វាយចន្ទីឆៅមិនបាន ត្រូវបង្ខំចិត្តលក់ឲ្យឈ្មួញកណ្តាលជាពិសេសឈ្មួញយៀកណាម ដែលសង្កត់កទិញក្នុងតម្លៃថោកសែនថោក។
ឧទាហរណ៍លោកគ្រូ អូន ស៊ីឡឹប នៃវិទ្យាល័យហ៊ុនសែន-បល្ល័ង្ក ខេត្តកំពង់ធំ ធ្លាប់សួរវិទ្យុអាស៊ីសេរីដូច្នេះ «ខ្ញុំបានចាប់អារម្មណ៍ចំពោះការដាំដំឡូងមី ខ្ញុំចង់ឲ្យខាងបង (វិទ្យុអាស៊ីសេរី) ជួយរករបៀបដាំដំឡូងមី។ ខ្ញុំកំពុងតែកាប់ចម្ការចោល ចម្ការស្វាយចន្ទី»។
លោក ព្រំ សៅរ៍នរ៉ា វិស្វករខ្មែរ-អាមេរិកាំង និងជាប្រធានក្រុមហ៊ុនសិប្បកម្មធម្មជាតិខ្មែរនៅផ្សារដើមថ្កូវ ក្រុងភ្នំពេញ មានប្រសាសន៍ថា ក្រៅពីបងប្អូនដែលមានដើមទុនអាចបណ្តាក់ទុនប្រមូលទិញគ្រាប់ស្វាយចន្ទីពីកសិករយកមកបកសំបកហើយ អ្នកដាំស្វាយចន្ទីគួរណាស់តែធ្វើដោយខ្លួនឯង។
លោក ព្រំ សៅរ៍នរ៉ា មានប្រសាសន៍ដូច្នេះ ៖ «នេះគឺត្រឹមត្រូវល្អជាងគេបំផុត ប៉ុន្តែមធ្យោបាយមួយសំខាន់ត្រូវតែដឹងគឺថា គ្រាប់ហ្នឹងត្រូវតែហាលថ្ងៃយ៉ាងតិច ២ថ្ងៃ បានយកទៅទុកហើយវាមិនដុះ រួចហើយយើងយកទៅច្រកបាវ បាវធម្មតាស្រុកយើងវាមានបាវក្រចៅហ្នឹងក៏បាន ឬក៏បានប្លាស្ទីកសរសៃៗដែរ ធ្វើដូចជាបាវ គឺថាវាមានខ្យល់ចេញចូល។ ប៉ុន្តែរឿងសំខាន់គឺថាយើងត្រូវទុកវានៅក្នុងកន្លែងដែលយើងទុកវាហ្នឹងធ្វើដំបូលយកស័ង្កសី ហើយកុំឲ្យទុកផ្ទាល់ដីដើម្បីកុំឲ្យវាមានជាតិទឹកហ្នឹងឡើងមកប៉ះអាហ្នឹង។ បើថាយើងទុកដំបូលធម្មតា ដំបូលស្លឹកអីហ្នឹងវាអាចធ្វើឲ្យមានសើម កន្លែងហ្នឹងមួយសំខាន់ គឺថាយើងត្រូវហាលឲ្យស្ងួត២ថ្ងៃយ៉ាងតិច»។
តើត្រូវមានទុនប៉ុន្មានដើម្បីធ្វើការបកគ្រាប់ស្វាយចន្ទីដោយខ្លួនឯងដោយមិនចាំបាច់លក់គ្រាប់ឆៅឲ្យឈ្មួញកណ្តាល? លោក ព្រំ សៅរ៍នរ៉ា មានប្រសាសន៍ថា ៥០០ដុល្លារអាចទិញបានគ្រឿងឧបករណ៍គ្រប់គ្រាន់សម្រាប់ការប្រលេះគ្រាប់ រួមមានឆ្នាំងចំហុយ កាំបិតកាត់គ្រាប់ ទូសម្ងួត និងម៉ាស៊ីនខ្ចប់។
លោក ព្រំ សៅរ៍នរ៉ា ឲ្យដឹងដូច្នេះ ៖ «មានម៉ាស៊ីនចំហុយមួយ មានប្រដាប់កាត់២ ហ្នឹងតាមដែលយើងចង់បាន មួយប្រហែល ៦៥ដុល្លារទេ កាំបិតកាត់ហ្នឹង។ យើងអាចធ្វើទូសម្ងួតហ្នឹង គឺថាយើងអាចប្រើកម្ដៅព្រះអាទិត្យ ឬក៏យើងប្រើគ្រឿងដុតកម្ដៅយកដូចថាមែកឧស ឬក៏សំបកស្វាយចន្ទីហ្នឹងក្រោយពីយើងកិនយកប្រេងហ្នឹងចេញហើយ យើងនៅសល់អាហ្នឹងយើងយកមកធ្វើឥន្ធនៈដុតវា។ គឺថាយើងអាចទិញម៉ាស៊ីនកាត់ បើថាយើងចង់ថែមតុទៀត គ្រឿងថែមតុ គឺថាត្រូវការជាន់ជើង ដើម្បីកុំឲ្យវាហត់ដៃយកសង្កត់។ តុហ្នឹងប្រហែលជា... ព្រោះវាត្រូវធ្វើ Frame (ស៊ុម) ដែកដាក់ពីលើ ឬមួយក៏ស័ង្កសី ឬមួយក៏ត្រូវដាក់ក្ដារ រួចហើយបានយើងត្រូវដាក់ស័ង្កសីពីលើ...»។
ប្រាកដណាស់ត្រូវមានទុនច្រើនជាងនេះព្រោះត្រូវប្រើពលកម្មបន្ថែម។
លោក ព្រំ សៅរ៍នរ៉ា អធិប្បាយថា ក្នុងសិប្បកម្មប្រលេះគ្រាប់ស្វាយចន្ទីមួយ ចាំបាច់ត្រូវប្រើកម្មករពី៣ទៅ ៤នាក់ ក្នុងម៉ាស៊ីននីមួយៗ ៖ «អ្នកដាំចំហុយហ្នឹង ហើយនិងអ្នកបកសំបក ព្រោះគ្រាប់យើងកាត់មកវាធ្លាក់មកទាំងអស់ហើយ ធ្លាក់ទាំងសំបក ធ្លាក់ទាំងសាច់វាមកជាមួយគ្នា។ មនុស្សម្នាក់ត្រូវរើសអាហ្នឹងបំបែកវាចេញ ដល់បំបែកវាចេញហើយបានយកទៅហាលវា យើងសម្ងួតដើម្បីឲ្យវាស្ងួត បានយើងឆ្កឹះយកសំបកស្ដើងៗចេញ។ ដល់ឆ្កឹះអាហ្នឹងចោលហើយបានយើងទៅខ្ចប់ ដូច្នេះហើយមនុស្សអាចត្រូវការអ្នកកាត់មួយហ្នឹងគឺជាមនុស្សសំខាន់ហើយ អ្នករើសបំបែកគ្រាប់និងសំបកចេញពីគ្នាហ្នឹង ហើយនិងមនុស្សចំហុយអាចនឹងប្រើមនុស្សម្នាក់ហើយ ហើយមនុស្សម្នាក់ទៀតសម្រាប់សម្ងួត និងឆ្កឹះចេញ ហើយនិងធ្វើខ្ចប់អាចម្នាក់ទៀតហើយ។ ដូច្នេះម៉ាស៊ីនកាត់មួយអាចត្រូវការមនុស្ស ៣នាក់ ឬ ៤នាក់តាមសមត្ថភាព តាមជំនាញ តាមបច្ចេកទេសប៉ិនប្រសប់របស់អ្នកធ្វើហ្នឹង»។
ចំពោះកាំបិត ឬម៉ាស៊ីនកាត់ប្រើដៃមានតម្លៃ ៦៥ដុល្លារ តែបើមានទូផងដើម្បីអាចប្រើជើងធាក់បានផងកុំឲ្យរួយដៃពេកនោះមានតម្លៃ ២៦៥ដុល្លារ។ ចំពោះឆ្នាំងចំហុយមានធុនតូចធុនធំតែធុនមធ្យមមានចំណុះ ២០លីត្រ ៖ «វាមានមួយទៅយើងអាចចំហុយម្ដង ព្រោះវាត្រូវការប្រហែលតែកន្លះម៉ោងអីទេ កាលណាយើងដាក់សម្ពាធវាទៅវាឆាប់ឆ្អិនទេ កន្លះម៉ោង ៤៥នាទីយ៉ាងយូរ»។
រីឯម៉ាស៊ីនវេចខ្ចប់ដែលក្រុមហ៊ុនសិប្បកម្មធម្មជាតិនាំចូលពីប្រទេសចិន អាចប្រើបាននឹងថង់ប្លាស្ទីកធម្មតា ឬស្បោងប្លាស្ទីក ពិសេសសម្រាប់បឺតយកខ្យល់ចេញអស់អាចទុកគ្រាប់បានក្នុងរយៈពេលយូរ ៖ «ស្បោងសម្រាប់បឺតហ្នឹង គឺថាស្បោងហ្នឹងយើងអាចដាក់បោះពុម្ពម៉ាកអីពីក្រៅឲ្យហើយអស់អ៊ីចឹង យើងចង់ដាក់ប៉ុន្មានគីឡូស្បោងហ្នឹង យើងគិតឲ្យអស់អ៊ីចឹងហើយ ហើយយើងយកស្បោងហ្នឹងឲ្យគេបោះពុម្ពម៉ាកអីឲ្យហើយអស់ទៅ យើងដាក់មកថ្លឹងហើយចាក់ទៅបានយើងបឺតមក ស្បោងហ្នឹងវាជិតល្អវាអត់មានខ្យល់នៅក្នុងហ្នឹង យើងទុកបានមួយឆ្នាំពីរឆ្នាំអ៊ីចឹងទៅ។ ប៉ុន្តែបើយើងថាឥឡូវយើងគ្រាន់តែដាក់ស្បោងទទេមិនបាច់បឺត យើងអាចយកស្បោងប្លាស្ទីកធម្មតា ហើយយើងបិទមាត់ពីក្រៅទៅ គ្រាន់តែថាវាមិនបានយូរវាមានជាតិទឹកនៅក្នុងហ្នឹង។ ប៉ុន្តែបើថាយើងគ្រាន់តែលក់តាមបាតាមស្អី ការ៉ាសឡាន ឬដើរលក់ដូចពួកអ្នកគេលក់ធម្មតាអ៊ីចឹង យើងយកតែស្បោងប្លាស្ទីកធម្មតាយើងបិទធម្មតាទៅមិនជាខុសអីទេ ១ខែ ២ខែ ៣ខែអី»៕