ការបណ្តុះផ្សិតមិនថាផ្សិតចំបើង ឬផ្សិតអំបោះនោះទេ ត្រូវធ្វើច្រើនដំណាក់កាល។ វិធីដែលងាយគឺត្រូវទិញមេផ្សិតយកមកបណ្តុះ។ តែបើពុំអាចរកទិញមេផ្សិតបានទេ ចាំបាច់ត្រូវផលិតមេផ្សិតដោយខ្លួនឯង ដែលជាវិធីស្មុគស្មាញបន្តិច គឺត្រូវពង្រីកមេដោយយកសាច់ ឬជាលិកាផ្សិតមកបង្កាត់នៅលើចំណីពិសេសជាចាហួយធ្វើពីដំឡូងបារាំង ស្ករ និងសារាយ ជាភាសាអង់គ្លេសគេហៅថា P.D.A.។
លុះស្ព័ររបស់ផ្សិតរីកសុះសាយក្នុងដបសំប៉ែតហើយ ទើបយកទៅពង្រីកធ្វើមេទី២ គឺយកទៅបណ្តុះលើគ្រាប់ស្រូវក្នុងដប ឬកំប៉ុងម្សៅទឹកដោះគោម្តងទៀត មុននឹងយកទៅបណ្តុះលើរងចំបើង ឬក្នុងកញ្ចប់បណ្តុះជាការស្រេច។
តទៅនេះខ្ញុំសូមស្រង់ប្រសាសន៍ លោក ថា សុមេធ អ្នកបណ្តុះផ្សិតអំបោះលក់នៅបន្ទាយមានជ័យ ស្តីពីការបង្កាត់មេផ្សិតទី១ ៖ «ខ្ញុំនៅបឹងត្រកួន ជាប់នឹងព្រំដែនចម្ងាយ ៥គីឡូម៉ែត្រពីតាប់ព្យា។ នៅនេះខ្ញុំលក់បាន ១គីឡូក្រាម ៤ពាន់រៀល ស្មើនឹង ៤០បាតដែរ លក់បោះឲ្យម៉ូយនៅផ្សារ។ បើនៅស្វាយ នៅបន្ទាយមានជ័យ គេលក់បាន ១គីឡូក្រាមតែ ៣ពាន់រៀលទេ កន្លែងផ្សារហ្នឹង ប៉ុន្តែនៅនេះវាដាច់ស្រយាលតែឯងខ្ញុំលក់បាន»។
លោក ថា សុមេធ ប្រាប់ខ្ញុំបាទថា ដំបូងគេត្រូវមានចាហួយដែលធ្វើពីដំឡូងបារាំង ស្ករនិងសារាយសម្រាប់ជាបរិស្ថាន និងជាអាហារឲ្យសាច់ ឬជាលិកាផ្សិតដុះលូតលាស់ជាស្ព័រ ឬសរសៃផ្សិត ៖ «យកដំឡូងបារាំង មកចិតសំបកចេញ យើងដាក់ថ្លឹង ២០០ក្រាម។ ចិតប៉ុនម្រាមដៃ គេហៅចង្វាមូល រួចយើងដាក់ទឹកសុទ្ធ ១លីត្រ ហើយយើងយកទៅស្ងោរ។ ស្ងោរមិនយូរទេ ស្ងោរប្រហែលរយៈពេល ១៥-២០នាទី យើងចុចមើលទៅផុយហើយយើងយកមកចម្រោះចាក់យកតម្រងត្រងយកតែទឹកវា កាកយើងហូបបានទេតើ! ហើយបានយើងវាល់ទៀត យើងថែមទឹកសុទ្ធទៀតឲ្យគ្រប់ ១លីត្រ យើងយកទៅដាក់ឆ្នាំងមួយទៀត យើងប្រើទាំងអស់ពីរ។ ឆ្នាំងមួយយើងស្ងោររួចហើយយើងមិនអាចដាក់រម្ងាស់បានទេ ស្ងោរទៅវាមានជាតិជ័រ តែយើងដាក់ឆ្នាំងមួយទៀត យើងដាក់ឲ្យគ្រប់មួយលីត្រ»។
កាលណាបានទឹកដំឡូងហើយ គេត្រូវបន្ថែមសារាយនិងស្ករកូរឲ្យខាប់ ៖ «យើងទិញសារាយរូបត្រី ដាក់ ១០ក្រាមទៅនឹងឆ្នាំងថ្មីដែលយើងរម្ងាស់ទឹកដំឡូងបារាំងហ្នឹង យើងត្រងហើយដាក់កូរភ្លាម ហើយយើងដាក់ស្ករ ២០ក្រាមទៅ ដាក់ស្ករស ប៉ុន្តែភាគច្រើនប្រើអាម៉ត់ៗដូចម្សៅ បើយើងអត់ ប្រើស្ករស។ ដាក់រួចហើយយើងកូរៗឲ្យដាច់ទឹក យើងមើលទៅដាច់ទឹកហើយរាងស្អិតៗ យើងយកមកដាក់ច្រកដបយើង»។
ដបដែលច្រកចាហួយសារាយគួរជាដបសំប៉ែត តែបើរកមិនបានយកដបមូលមកប្រើក៏បាន គ្រាន់តែចាំបាច់រកអ្វីកល់កុំឲ្យរមៀល ៖ «ដបសំប៉ែតក៏បាន ខ្ញុំដាក់ដបមូលៗ។ យើងដាក់មួយកូនវែក មិនមែនវែកធំ វែកល្មម យើងដាក់ទៅ មួយដបមួយវែកៗ យើងយកឆ្នុកសំឡីយើងហ្នឹងចុកឲ្យណែន។ ឧទាហរណ៍ថាមួយលីត្រយើងត្រូវបានប៉ុន្មានដប? ឧទាហរណ៍យើងដាក់រាងច្រើនទៅបាន ១៥ដប បើយើងដាក់តិចបាន ២០ទៅ។ បើយើងចង់ធ្វើច្រើនដាក់ទឹក ២លីត្រទៅ បើទឹក ២លីត្រវាទៅតាមហ្នឹងទៀត អ៊ីចឹងវាឡើងគុណនឹងពីរ សារាយឡើង ២០ទៅ ហើយស្ករឡើងទៅ ៤០វិញ។ ដាក់ក្នុងដបហើយយើងចុក ចុករួចយើងយកទៅដាក់ក្នុងឆ្នាំងចំហុយ។ យើងដាក់ចំហុយប្រើហ្គាស់ ប្រើធ្យូងមិនសូវពូកែទេ ធ្យូងវាបិទបើកអត់បាន។ ប្រើហ្គាស់»។
លោក ថា សុមេធ អធិប្បាយពីវិធីចំហុយដបមេសារាយដូច្នេះ ៖ «គេដាក់ក្នុងរួចចំហុយ ដាក់ទឹកដាក់អត់ឲ្យដល់ដបទេ យើងដាក់ឲ្យនៅសល់ប្រហែលជិត ១ថ្នាំងដៃចុះឲ្យដល់ដបហើយគ្របឲ្យជិត ចាប់ផ្ដើមដុតហ្គាស់ទៅ ហើយបានវាផ្ទុះ ផ្ទុះ៣ដង។ ផ្ទុះលើកទី១ ផ្ទុះលើកទី២ ផ្ទុះលើកទី៣ ផ្ទុះលើកទី៣អត់ទាន់បិទ(ហ្គាស់)ទេ ទុក ១៥នាទី ដល់គ្រប់ ១៥នាទីហើយយើងបិទតែម្ដង ពន្លត់ទុកឲ្យនាឡិកាចុះនៅសូន្យ ដល់បើកមើលទៅនៅក្ដៅដែរ ទាល់តែមានស្រោមដៃបានអាចចាប់បាន ហ្នឹងមេសារាយ។ យើងបានដបសារាយមកយើងយកមកតម្រៀបទុក ២៤ម៉ោងយ៉ាងតិច យើងចង់ទុក ២-៣ថ្ងៃក៏បានដែរ ប៉ុន្តែឲ្យតិច ២៤ម៉ោង»។
ក្រោយបានដបមេសារាយហើយ គេចាប់ផ្តើមយកផ្សិតដែលគេជ្រើសរើសថាធំថ្លោសយកមកកាត់យកសាច់ ឬជាលិកាមកបង្កាត់ គឺយកឡាមអារយកសាច់ផ្សិតមកបណ្តុះលើដុំសារាយក្នុងដប។ កម្មវិធីនេះត្រូវប្រព្រឹត្តទៅក្នុងទីដែលគ្មានមេរោគ ប្រៀបបានទៅនឹងមន្ទីរពិសោធន៍ដែរ ចាំបាច់ត្រូវមានធុង ឬទូបិទជិត មានភ្លើងសម្រាប់ដុតរោលគ្រឿងឧបករណ៍សម្លាប់មេរោគ។
លោក ថា សុមេធ ប្រាប់ដូច្នេះ ៖ «កន្លែងគេដាក់ប្រដាប់ប្រដាច្រើនណាស់ មានទាំងអាកុល ដូចពេទ្យអ៊ីចឹងឯង គេដាក់នៅធុងគេ ហើយមានកាំបិតកាត់មានអីរោលទាំងអស់»។
តើគេត្រូវធ្វើយ៉ាងណាទៀតដើម្បីបញ្ចូលសាច់មេផ្សិតទៅក្នុងដប? លោក ថា សុមេធ នៃខេត្តបន្ទាយមានជ័យ នឹងរៀបរាប់ជូនស្តាប់អំពីវិធីធ្វើមេផ្សិតបន្តទៀតនៅភាគក្រោយ៕