ក្រសួងសុខាភិបាលអំពាវនាវឲ្យពលរដ្ឋទៅទទួលសេវាសុខភាពនៅមន្ទីរពេទ្យដែលមានច្បាប់
2015.02.26
គ្រូពេទ្យពិនិត្យសុខភាពជូនស្ត្រីមានផ្ទៃពោះនាមន្ទីរសុខភាព ពន្សាំង ឋិតនៅសង្កាត់ពន្សាំង ខណ្ឌព្រែកព្នៅ រាជធានីភ្នំពេញ កាលពីព្រឹកថ្ងៃទី២៥ ខែកុម្ភៈ ឆ្នាំ២០១៥។
នៅពេលដែលមានបញ្ហាឆ្លងរាលដាលមេរោគអេដស៍នៅខេត្តបាត់ដំបង មក រដ្ឋមន្ត្រីក្រសួងសុខាភិបាល អំពាវនាវឲ្យពលរដ្ឋទៅស្វែងរកសេវាថែទាំសុខភាព និងព្យាបាលជំងឺនៅមន្ទីរពេទ្យរដ្ឋ ឬឯកជនដែលមានច្បាប់អនុញ្ញាតត្រឹមត្រូវ។
ការអំពាវនាវរបស់រដ្ឋមន្ត្រីក្រសួងសុខាភិបាល លោកវេជ្ជបណ្ឌិត ម៉ម ប៊ុនហេង ឲ្យពលរដ្ឋទៅស្វែងរកសេវាថែទាំសុខភាព និងព្យាបាលជំងឺនៅមន្ទីរពេទ្យរដ្ឋ ឬឯកជនដែលត្រឹមត្រូវ គឺធ្វើឡើងនៅក្នុងអំឡុងពេលដាក់សម្ពោធឲ្យប្រើប្រាស់ជាផ្លូវការ នូវមណ្ឌលសុខភាពថ្មីមួយនៅសង្កាត់ពន្សាំង ខណ្ឌព្រែកព្នៅ រាជធានីភ្នំពេញ នៅព្រឹកថ្ងៃទី២៥ កុម្ភៈ៖ «សុំឲ្យបងប្អូនធ្វើយ៉ាងណាថែរក្សាសុខភាពរបស់បងប្អូន ហើយមិនមកពេទ្យ ព្រោះយើងមានពេទ្យនៅជិតផ្ទះហើយ។ កុំទៅទទួលសេវាពេទ្យដែលគេចាក់តាមភូមិ អត់មានសញ្ញាបត្រ អត់មាននរណាទទួលស្គាល់។ សុំកុំប្រើប្រាស់សេវាដែលរដ្ឋមិនទទួលស្គាល់ ហើយដើររកស៊ីរខេករខាក ហើយចេះតែជឿគេ។ កុំប្រើប្រាស់សេវាហ្នឹង»។
ទន្ទឹមគ្នានេះដែរ លោកថ្លែងថា ក្រសួងកំពុងត្រួតពិនិត្យលើសេវាផ្ដល់ការថែទាំសុខភាព និងព្យាបាលជំងឺឯកជនដែលមិនមានលក្ខណៈត្រឹមត្រូវតាមច្បាប់ និងអំពាវនាវឲ្យអាជ្ញាធរចាត់វិធានការលើអ្នកផ្ដល់សេវាទាំងនោះ៖ «សុំអាជ្ញាធរជួយ បើឃើញដាក់រកស៊ីផ្ដេសផ្ដាសអ៊ីចឹង សុំជួយណែនាំអប់រំ ហើយរាយការណ៍ទៅអាជ្ញាធរមានសមត្ថកិច្ចសុខាភិបាល ក៏ដូចជាក្រុមប្រឹក្សា គណៈអភិបាលឃុំសង្កាត់ ដើម្បីឲ្យមានវិធានការចំពោះអ្នករកស៊ីអ៊ីចឹង»។
លោកវេជ្ជបណ្ឌិត ម៉ម ប៊ុនហេង មានប្រសាសន៍ថា ដើម្បីពង្រីកសេវាសុខភាពឲ្យបានងាយស្រួលដល់ពលរដ្ឋនៅតាមមូលដ្ឋាន គឺក្រសួងបង្កើតមណ្ឌលសុខភាពឲ្យបានច្រើននៅតាមមូលដ្ឋាន ជាពិសេស សុខភាពមាតា និងទារក និងការចាក់ថ្នាំបង្ការជំងឺដល់កុមារ។ លោកថា ការអង្កេតប្រជាសាស្ត្រនៅឆ្នាំ២០១៤ បង្ហាញថា អត្រាមរណៈរបស់មាតា និងទារកនៅប្រទេសកម្ពុជា បានថយចុះជាងពាក់កណ្ដាល៖ «ពីមុនយើងមាន ៤០០ជាង ឥឡូវចុះមកនៅ ១៧០ លើ ១០០.០០០ (១សែន) កំណើតនៃទារករស់។ យើងសង្ឃឹមថាចុះបន្តទៀត បើយើងពង្រីកសេវាយើងកាន់តែល្អ ប្រជាពលរដ្ឋកាន់តែមកចូលរួមអ៊ីចឹង មកពេទ្យយើង ពេទ្យយើងនឹងផ្ដល់សេវាជូន។ ការពិនិត្យផ្ទៃពោះក៏ល្អ»។
លោកវេជ្ជបណ្ឌិតបន្តថា អត្រាមរណភាពកុមារក៏ចុះមកនៅទាប ដែលពីមុន ៥០ ទៅ ៧០ជាង ឥឡូវនៅសល់តែ ២០ជាង។ ការថយចុះនៃអត្រាមរណភាពរបស់មាតា និងកុមារ ក៏ព្រោះតែការចូលរួមមួយចំណែករបស់ពលរដ្ឋខ្លួនឯងដែរ គឺដោយការនាំយកកូនចៅទៅចាក់ថ្នាំបង្ការ ការបំបៅដោះកូន ការពិនិត្យផ្ទៃពោះទៀងទាត់៖ «វាផ្គុំគ្នានឹងការរីកចម្រើន សុខសន្តិភាពរបស់ប្រទេសជាតិ សន្តិសុខសង្គម ជីវភាពរស់នៅ ហើយសេវារបស់យើងក៏បានពង្រីកទៅដល់មូលដ្ឋាន។ យើងបានបញ្ជូនឆ្មបមន្ត្រីបុគ្គលិកសុខាភិបាលយើងទៅដល់មូលដ្ឋាន។ បន្ទាប់មក រាជរដ្ឋាភិបាលបានលើកទឹកចិត្តដល់ឆ្មបរបស់យើង គឺការឲ្យប្រាក់បន្ថែម ដែលកើតកូនមួយនៅតាមមណ្ឌលសុខភាព។ លោកឲ្យថែម ៦ម៉ឺនរៀល ហើយបើកើតកូនមួយនៅមន្ទីរពេទ្យបង្អែក លោកឲ្យថែម ៤ម៉ឺនរៀលទៀត។ បានន័យថា ១៥ដុល្លារនៅមណ្ឌលសុខភាព និង ១០ដុល្លារនៅមន្ទីរពេទ្យបង្អែក បន្ថែមដល់ឆ្មបឲ្យបង្កើតឲ្យបានល្អ»។
លោកបញ្ជាក់ថា រហូតមកដល់ពេលនេះ ស្ត្រីមានផ្ទៃពោះចំនួនជាង ៩០% បានទៅពិនិត្យ និងសម្រាលកូននៅមន្ទីរពេទ្យដែលមានគ្រូពេទ្យឆ្មបសម័យ។
ថ្វីបើនៅពេលនេះ ស្ត្រីឆ្លងទន្លេនៅមានប្រើសេវាឆ្មបបុរាណក្ដី ក៏ លោក ម៉ម ប៊ុនហេង ថ្លែងថា នៅមានតិចតួចទេ ហើយភាគច្រើននៃឆ្មបទាំងនោះបានចូលរួមហ្វឹកហ្វឺន និងធ្វើការនៅមណ្ឌលសុខភាពដែរ៖ «មានអី បើថាមកធ្វើការជាមួយពេទ្យយើង បញ្ជូនមកទៅ គាត់ស្គាល់គ្នាទៅ គាត់បានលាភការខ្លះទៅពីពេទ្យរដ្ឋរបស់យើង ដែលធ្វើការជាមួយគ្នានេះ។ ហើយបន្ទាប់មកទៀត គាត់យល់ថាឥឡូវគេទំនើប។ គាត់ចង់ឲ្យគេមកមើលនៅពេទ្យទំនើបទៅ ព្រោះអីគេមានឧបករណ៍ទំនើប។ គាត់គ្រាន់តែមានបទពិសោធន៍។ ក្មេងៗក៏អត់ចង់ធ្វើអ៊ីចឹងដែរ ក្មេងតកូនចៅរបស់គាត់ មិនចង់ចេះដោយអត់រៀនសូត្រទេ។ គាត់មករៀនសាលាពេទ្យត្រឹមត្រូវទៅ អាចបន្តមុខវិជ្ជាជីវៈហ្នឹងបាន»។
ប្រធានមណ្ឌលសុខភាពពន្សាំង លោកវេជ្ជបណ្ឌិត ឱ សាមី មានប្រសាសន៍ថា ប្រជាពលរដ្ឋនៅក្នុងតំបន់ភាគច្រើនដែលមករកសេវាពីកន្លែងលោក គឺជាជំងឺស្រាលៗ ដោយសារពេលនោះនៅជាប៉ុស្តិ៍សុខភាពនៅឡើយ។ ទោះជាយ៉ាងនេះក្ដី នៅពេលដែលទីនេះក្លាយជាមណ្ឌលសុខភាព មានប្រជាពលរដ្ឋមករកសេវាកាន់តែច្រើន ជាពិសេសការពិនិត្យផ្ទៃពោះ ការពន្យារកំណើត និងការចាក់ថ្នាំបង្ការ។ លោកកំពុងសំណូមពរគ្រូពេទ្យឆ្មបបន្ថែម៖ «សព្វថ្ងៃត្រឹមតែមាន អាំងហ្វែរមីញ៉េ (infirmière) ៣នាក់ ឆ្មប ២នាក់ទេ។ វានៅខ្វះ។ អ៊ីចឹងវាអាចសំណូមពរសុំឆ្មបបន្ថែម ២នាក់ទៀតមកបានគ្រប់ចំនួន។ សំណូមពរឲ្យប្រជាពលរដ្ឋដែលនៅក្នុងសង្កាត់ពន្សាំង ទាំងមូលហ្នឹង ឲ្យគាត់មកទទួលការព្យាបាលនៅមណ្ឌលសុខភាពយើងនេះ»។
ស្ត្រីនៅភូមិបឹងពេជ្រ សង្កាត់ពន្សាំង មួយរូបឈ្មោះ ចន្ធី ដែលយកកូនមកចាក់ថ្នាំបង្ការ មានប្រសាសន៍ថា អ្នកស្រីធ្លាប់នាំសាច់ញាតិមកទទួលសេវានៅទីនេះ ប៉ុន្តែពេលសម្រាលកូន អ្នកស្រីសម្រេចទៅសម្រាលនៅពេទ្យជប៉ុន រាជធានីភ្នំពេញ ព្រោះទីនេះនៅជាប៉ុស្តិ៍សុខភាពតូចនៅឡើយ។ អ្នកស្រី ចន្ធី សង្ឃឹមថា នៅពេលដែលប៉ុស្តិ៍សុខភាពនេះក្លាយទៅជាមណ្ឌលសុខភាព ហើយបំពាក់ឧបករណ៍ប្រសើរជាងមុន នឹងអាចជួយឲ្យពួកគាត់មិនចាំបាច់ធ្វើដំណើរទៅឆ្ងាយ៖ «ប្រជាជនពីមុនពេលគាត់ឈឺអ៊ីចឹង គាត់ទៅ (មណ្ឌលសុខភាព) ប្រសិទ្ធិអីអ៊ីចឹងទៅ។ មានមណ្ឌលសុខភាពច្រើន មានមណ្ឌលសុខភាពប្រសិទ្ធិ ទៅស្នោ ហើយមធ្យោបាយមានម៉ូតូ ឬឡាន។ មានមណ្ឌលសុខភាពបើកច្រើនអ៊ីចឹងខ្ញុំសប្បាយចិត្ត ព្រោះអីបាននៅជិតផ្ទះ។ ប្រជាពលរដ្ឋគាត់ខ្វះមធ្យោបាយធ្វើដំណើរ ក៏គាត់អាចមកបានដែរ ព្រោះអីវាជិត»។
រដ្ឋមន្ត្រីក្រសួងសុខាភិបាល លោក ម៉ម ប៊ុនហេង ឲ្យដឹងថា រហូតមកដល់ពេលនេះ ក្រសួងសុខាភិបាល បានពង្រីកឲ្យមានមណ្ឌលសុខភាពនៅតាមឃុំសង្កាត់ចំនួនជាង ១.២០០មណ្ឌលហើយ ហើយក្រសួងនឹងបង្កើតបន្ថែមទៀត ដើម្បីឲ្យអត្រាមាតា និងទារកស្លាប់ថយចុះបន្ថែមទៀតដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- ជនជាតិឥណ្ឌា ៦៧នាក់ទៀត ត្រូវបានសង្គ្រោះចេញពីកន្លែងឆបោកតាមអនឡាញនៅកម្ពុជា
- លោក ស៊ុន ចាន់ថុល អះអាងថា ក្រុមហ៊ុនអាមេរិកាំងច្រើនចាប់អារម្មណ៍ចង់មកវិនិយោគនៅកម្ពុជា
- APHR ជំរុញឱ្យកម្ពុជាដោះលែងពលករខ្មែរ នួន តឿន និងអ្នកកាសែត លោក ម៉ិច ដារ៉ា
- អ្នកឃ្លាំមើលសង្គមបារម្ភថា ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័ននៅកម្ពុជាប៉ះពាល់ដល់សន្តិសុខជាតិ