នីតិ​វិធី​ក្នុង​ការ​បញ្ជូន​សំណុំ​រឿង​ពី​តុលាការ​មួយ​ទៅ​តុលាការ​មួយ

ការ​ដោះស្រាយ​ទំនាស់​នៅ​ក្នុង​រឿង​ក្តីក្តាំ​តាម​ផ្លូវ​ច្បាប់ គេ​ត្រូវ​អនុវត្ត​តាម​ប្រព័ន្ធ​តុលាការ​ដែល​ជា​ស្ថាប័ន​មួយ​មាន​សមត្ថកិច្ច​រក​យុត្តិធម៌​សម្រាប់​ភាគី​ទំនាស់។
ដោយ ឡេង ម៉ាលី
2010-01-19
អ៊ីម៉ែល
មតិ
Share
បោះពុម្ព

ស្ថាប័ន​តុលាការ​ដែល​កំពុង​អនុវត្តន៍​នៅ​ប្រទេស​កម្ពុជា​មាន​បី​លំដាប់​ថ្នាក់ គឺ​សាលា​ដំបូង សាលា​ឧទ្ធរណ៍​និង​សាលា​កំពូល។

មាន​លោក​អ្នក​ស្តាប់​វិទ្យុ​អាស៊ី​សេរី​ម្នាក់​ឈ្មោះ ឆែម ស៊ីណាត និង​ប្រពន្ធ​ឈ្មោះ សុខ សំណាង នៅ​ខេត្ត​កណ្តាល មាន​ចម្ងល់​មួយ​ចំនួន​ទាក់ទង​នឹង​នីតិ​វិធី​របស់​តុលាការ​ក្នុង​ការ​បញ្ជូន​សំណុំ​រឿង​សម្រាប់​ជំនុំ​ជម្រះ​ពី​សាលាក្តី​មួយ​ទៅ​សាលាក្តី​មួយ​ទៀត ជា​ពិសេស​ដំណាក់កាល​នៃ​បណ្តឹង​ឧទ្ធរណ៍​នៅ​ពេល​ភាគី​ណា​មួយ​មិន​សុខចិត្ត។

សំណួរ​របស់​លោក ឆែម ស៊ីណាត និង​ប្រពន្ធ​ឈ្មោះ សុខ សំណាង គឺ​ទាក់ទង​ទៅ​នឹង​រឿង​ក្តី​របស់​គាត់​ទាំង​ពីរ​ផ្ទាល់​ដែល​បាន​ទិញ​ដី​មួយ​កន្លែង។

អ្នកស្រី សុខ សំណាង បាន​ឲ្យ​ដឹង​អំពី​ដំណើរ​រឿង​ក្តី​នោះ​ដោយ​សង្ខេប​ដូច្នេះ ៖ «ពី​ដំបូង​ដី​ហ្នឹង​ខ្ញុំ​ទិញ​គេ ទិញ​គាត់​ហ្នឹងៗ គាត់​ក៏​សុំ​ខ្ញុំ​នៅ ខ្ញុំ​ក៏​ឲ្យ​នៅ​ទៅ។ ដល់​ពេល​ខ្ញុំ​ឲ្យ​គាត់​ចេញ គាត់​ប្រែ​ថា ខ្ញុំ​ឲ្យ​លុយ​គាត់​អត់​ទាន់​គ្រប់។ ហ្នឹង​តាម​ដំណើរ​រឿង​ឡើង​មក​តុលាការ​ដំបូង។ ខ្ញុំ​ឲ្យ​លុយ​គាត់​គ្រប់​ហើយ ហើយ​គាត់​ប្រគល់​ទាំង​ប្លង់ ទាំង​កិច្ចសន្យា​អី​ឲ្យ​ខ្ញុំ​អស់​ហើយ»

រឿង​ក្តីក្តាំ​នេះ​ទាំង​អ្នកស្រី សុខ សំណាង និង​លោក ឆែម ស៊ីណាត អះ​អាង​ថា បាន​ឆ្លង​កាត់​ការ​ជំនុំ​ជម្រះ​របស់​សាលា​ដំបូង​និង​សាលា​ឧទ្ធរណ៍​រួច​ហើយ ដោយ​ឲ្យ​ខាង​គាត់​ឈ្នះ​និង​មាន​សម្រង់​សាលក្រម​ទៀត​ផង។

លោក ឆែម ស៊ីណាត រៀប​រាប់​ថា ៖ «សាលដីកា​មិន​ទាន់​ឲ្យ​អនុវត្ត​ហ្នឹង កាល​ចេញ​ថ្ងៃ​ទី​២៨ ខែ​១២ ឆ្នាំ​២០០៥ ប៉ុន្តែ​សម្រេច​ឲ្យ​ហើយ​នៅ​ថ្ងៃ​ទី​១៦ ខែ​១ ឆ្នាំ​២០០៦។ ប៉ុន្តែ​មិន​អាច​អនុវត្ត​បាន​ទេ ពីព្រោះ​ស្ថិត​នៅ​ក្នុង​បណ្តឹង​កំពូល»

ដោយសារ​ស្ថិត​នៅ​ក្នុង​បណ្តឹង​សារ​ទុក្ខ​ទៅ​តុលាការ​កំពូល​ចាប់​តាំង​ពី​ឆ្នាំ​២០០៦​មក​មាន​រយៈ​ពេល​បួន​ឆ្នាំ​ហើយ ដែល​សាលដីកា​របស់​សាលា​ឧទ្ធរណ៍​មិន​អាច​អនុវត្ត​បាន។

ក្នុង​រយៈ​ពេល​យូរ​ដូច្នេះ លោក ឆែម ស៊ីណាត មាន​ចម្ងល់​លើក​ឡើង​ថា ៖ «ខ្ញុំ​ឆ្ងល់​ថា តើ​គេ​បញ្ជូន​សំណុំ​រឿង​ខ្ញុំ​ហ្នឹង​ទៅ​ដល់​ណា? ពេល​ខ្ញុំ​ទៅ​រកៗ​អត់​ឃើញ។ អ៊ីចឹង​ខ្ញុំ​ឆ្ងល់​ថា តើ​សម្រង់​សាលដីកា​សាលា​ឧទ្ធរណ៍​ហ្នឹង​គេ​អាច​ទុក​ប៉ុន្មាន​ឆ្នាំ​បាន​ចេញ​ឲ្យ​ខ្ញុំ? ក្នុង​នាម​ខ្ញុំ​ភាគី​ចុង​បណ្តឹង​វិញ ដើម្បី​អនុវត្តន៍​សេចក្តី​សម្រេច​សាល​ដីកា​របស់​សាលា​ឧទ្ធរណ៍​ហ្នឹង»

ទាក់ទង​នឹង​ចម្ងល់​របស់​លោក ឆែម ស៊ីណាត អ្នក​រៀបរៀង​កម្មវិធី​ច្បាប់​របស់​វិទ្យុ​អាស៊ី​សេរី បាន​ជម្រាប​សួរ​ទៅ​លោក​មេធាវី គង់ សំអុន ជា​សមាជិក​គណៈមេធាវី​នៃ​ព្រះរាជាណាចក្រ​កម្ពុជា និង​ជា​នាយក​សេវាកម្ម​មេធាវី​កម្ពុជា ដោយ​លោក​បាន​ពន្យល់​ជា​ដំបូង​អំពី​សម្រង់​សាលក្រម​ដូច្នេះ​ថា ៖ «សាលក្រម​សម្រង់​ហ្នឹង​ជា​ផ្នែក​មួយ ដូចជា​ការ​ផ្តល់​ព័ត៌មាន​ដល់​ភាគី ឬ​អ្នក​ជាប់​ពាក់ព័ន្ធ​ដល់​រឿង​ក្តី​ហ្នឹង​អ៊ីចឹង។ ហើយ​វា​ចូល​ជា​ធរមាន​បាន​លុះ​ណា​តែ​ពេល​ប្តឹង​ឧទ្ធរណ៍ ឬ​ប្តឹង​សារ​ទុក្ខ​ហ្នឹង​កន្លង​ផុត ឬ​មួយ​ក៏​អាច​ថា ភាគី​សុខ​ចិត្ត​ព្រម​ទទួល​នូវ​សេចក្តី​សម្រេច ហើយ​ធ្វើការ​ដោះស្រាយ​គ្នា​បញ្ចប់​តែម្តង​ទៅ អាហ្នឹង​វា​អាច​ចាត់​ទុក​ថា ជា​ធរមាន​បាន​ដែរ បើ​ភាគី​យល់​ព្រម។ អាហ្នឹង​បើ​រឿង​រដ្ឋប្បវេណី»

ចំពោះ​សំណួរ​របស់​លោក ឆែម ស៊ីណាត អំពី​រយៈពេល​រក្សា​ទុក​សាលដីកា​បាន​ប៉ុន្មាន​ឆ្នាំ​ទម្រាំ​អនុវត្ត​បាន​នោះ លោក​មេធាវី គង់ សំអុន ពន្យល់​ថា ដំបូង​គេ​ត្រូវ​ពិនិត្យ​អង្គហេតុ​ថា តើ​ភាគី​ម្ខាង​ទៀត​បាន​ប្តឹង​ឧទ្ធរណ៍​ឬ​ក៏​អត់​ក្នុង​រយៈ​ពេល​កំណត់​១​ខែ។ ប្រសិន​បើ​ហួស​រយៈពេល​នេះ សាលដីកា​នឹង​ចូល​ជា​ធរមាន។ ប៉ុន្តែ​ភាគី​ឈ្នះ​ក្តី​ត្រូវ​សុំ​ការ​អនុវត្ត​សាលដីកា។

ប្រសិន​បើ​ភាគី​ម្ខាង​ទៀត​បាន​ប្តឹង​ឧទ្ធរណ៍​វិញ សាលដីកា​នេះ​មិន​អាច​អនុវត្ត​បាន​ទេ ហើយ​រយៈ​ពេល​ចាត់ការ​ក្តី​បន្ត​អាច​យូរ​ឬ​ឆាប់​មិន​ទៀង ៖ «រយៈ​ឧទ្ធរណ៍ ឬ​បណ្តឹង​សារ​ទុក្ខ​ហ្នឹង​រយៈ​ពេល​មួយ​ខែ ប៉ុន្តែ​រយៈ​ដោះ​ស្រាយ​គេ​អត់​មាន​កំណត់​ទេ។ គេ​អាច​ដោះស្រាយ​ទៅ​តាម​ភាព​ជាក់​ស្តែង​នៃ​សាច់​រឿង​របស់​យើង។ ជួនកាល​រឿង​ខ្លះ​គេ​ធ្វើ​បី​ឬ​បួន​ខែ គេ​ធ្វើ​ចប់ រឿង​ខ្លះ​ទៅ​ក៏​មួយ​ឆ្នាំ​ពីរ​ឆ្នាំ​បាន​ធ្វើ​ចប់ វា​អត់​ទៀង។ យើង​អត់​អាច​គ្រប់គ្រង​ទៅ​ខាង​ហ្នឹង​បាន​ទេ វា​ជា​ការងារ​រដ្ឋបាល»

រឿង​ក្តី​នេះ អ្នកស្រី សុខ សំណាង និង​លោក ឆែម ស៊ីណាត ត្រូវ​មន្រ្តី​សាលា​ឧទ្ធរណ៍​ប្រាប់​ថា នៅ​ជាប់​បណ្តឹង​ទៅ​សាលា​កំពូល ហើយ​អ្នកស្រី សុខ សំណាង ថ្លែង​ថា ៖ «ប្តឹង​ពី​ខ្ញុំ​អត់​ឡើង​មក​កាត់​ក្តី​ទេ ហើយ​ថា ខ្ញុំ​មក​សាលា​កំពូល​ទៀត ក៏​អត់​ឃើញ​ទៀត។ ប្រគល់​ក៏​មិន​ប្រគល់ ហើយ​ប្តឹង​ក៏​មិន​ឃើញ»

លោក ឆែម ស៊ីណាត មាន​ចម្ងល់​ថា ៖ «គេ​ថា គេ​បញ្ជូន​ទៅ​ហើយ​ខាង​ក្រឡា​បញ្ជី​សាលា​ឧទ្ធរណ៍​ហ្នឹង ដល់ខ្ញុំ​ទៅ​សួរ​កំពូលៗ គេ​ថា​អត់​ឃើញ។ គេ​ថា បើ​បញ្ជូន​មក ម៉េច​លេខ​ដីកា​មិន​សុំ​ពី​ក្រឡា​បញ្ជី? ដល់​ពេល​ខ្ញុំ​បក​មក​ក្រឡា​បញ្ជី ក្រឡា​បញ្ជី​ប្រាប់​ខ្ញុំ​ថា គេ​មិន​ចាំបាច់​ដីកា​បញ្ជូន​ទេ។ សំណុំ​គេ​បញ្ជូន​ទៅ​បាត់​ហើយ អត់​មាន​លេខ​ដីកា​បញ្ជូន​ទេ ។ ឆ្ងល់​ត្រង់​ថា នៅ​សាលា​ដំបូង​វា​មាន​លេខ​ដីកា​បញ្ជូន​ពី​ប្រធាន​តុលាការ ហើយ​ដល់​មក​សាលា​ឧទ្ធរណ៍​វា​ទៅ​ជា​អត់​មាន​លេខ​ដីកា​បញ្ជូន​របស់​សាលា​ឧទ្ធរណ៍​វិញ។ អ៊ីចឹង​បាន​ខ្ញុំ​ឆ្ងល់​ថា សាលា​ឧទ្ធរណ៍​និង​សាលា​ដំបូង​វា​យ៉ាង​ម៉េច​ពីរ​ហ្នឹង?»

ពាក់ព័ន្ធ​នឹង​នីតិ​វិធី​នៃ​ការ​បញ្ជូន​សំណុំ​រឿង​ពី​តុលាការ​មួយ​ទៅ​តុលាការ​មួយ​ទៀត​តាម​លំដាប់ ត្រូវ​លោក​មេធាវី គង់ សំអុន ពន្យល់​ដូច្នេះ ៖ «យើង​ត្រូវ​ទៅ​រក​នៅ​សាលា​ឧទ្ធរណ៍​ជា​ដំបូង បើ​ថា​រឿង​ក្តី​នៅ​សាលា​ឧទ្ធរណ៍ ហើយ​ក្រឡា​បញ្ជី​ណា​អ្នក​កាន់​ក្តី​ហ្នឹង ឬ​ចៅក្រម​ណា យើង​សួរ​ទៅ។ រក​តាម​រយៈ​ហ្នឹង​ទៅ​ឃើញ​ហើយ ពីព្រោះ​រឿង​ដែល​គេ​បញ្ជូន​ទៅ​ពី​សាលា​ឧទ្ធរណ៍​ទៅ​តុលាការ​កំពូល​គេ​មាន​កន្លែង​ទទួល មិន​មែន​យើង​កាន់​សំណុំ​រឿង​ហ្នឹង​យក​ទៅ​ឲ្យ​នរណា​ក៏​បាន​នៅ​តុលាការ​កំពូល​ទេ អ៊ីចឹង​វា​មាន​កន្លែង​គេ​ទទួល​បណ្តឹង។ បណ្តឹង​គេ​បញ្ជូន​មក​ពី​ខាង​ណាៗ គេ​មាន​កន្លែង​គេ​តែមួយ​សម្រាប់​ចូល។ អ៊ីចឹង​គេ​រក​ឃើញ​ហើយ ឲ្យ​ឬ​មិន​ឲ្យ​ភស្តុតាង​នៅ​លើ​ហ្នឹង​ហើយ។ជួនកាល​ទៅ​អ្នក​ដែល​កាន់​សំណុំ​រឿង​ហ្នឹង​គាត់​ធ្វើ​បាត់ អាហ្នឹង​គឺ​រឿង​អនុវត្ត​និង​រឿង​ទទួល​ខុស​ត្រូវ​របស់​គាត់»

អ្នកស្រី សុខ សំណាង និងលោក ឆែម ស៊ីណាត មាន​ប្រសាសន៍​ថា ពួកគាត់​បាន​ព្យាយាម​តាម​រក​សំណុំ​រឿង​របស់​គាត់​ទាំង​នៅ​សាលា​ឧទ្ធរណ៍​និង​សាលា​កំពូល ប៉ុន្តែ​សំណុំ​រឿង​អាច​បាត់ ហើយ​ពួកគាត់​សង្ស័យ​ថា មន្ត្រី​សាលា​ឧទ្ធរណ៍​ភូត​កុហក​គាត់។

ក្នុង​ករណី​នេះ លោក ឆែម ស៊ីណាត មាន​សំណួរ​ថា ៖ «បើ​សិន​ជា​អ្នក​ហ្នឹង​ភ តើ​ប្រជាពលរដ្ឋ​អាច​ប្តឹង​អ្នក​ហ្នឹង​បាន​ទេ? ប្តឹង​ក្រឡា​បញ្ជី​ហ្នឹង»

លោក​មេធាវី គង់ សំអុន មាន​ប្រសាសន៍​ថា ៖ «រឿង​ហ្នឹង​ខ្ញុំ​មិន​ទាន់​និយាយ​រឿង​ប្តឹង​ឬ​មិន​ប្តឹង​ទេ​ សំខាន់​យើង​រក​មើល​សិន​ថា តើ​សំណុំ​រឿង​ហ្នឹង​នៅ​កន្លែង​ណា? បើ​អត់​យើង​អាច​សុំ​ឲ្យ​អនុវត្ត បើ​សិន​ជា​ចង់​បាន​ការ​អនុវត្ត​សេចក្តី​សម្រេច​សាល​ដីកា​សាលា​ឧទ្ធរណ៍​ហ្នឹង។ ចំពោះ​ករណី​ការ​ប្តឹង​ក្រឡា​បញ្ជី​ដែល​មិន​បាន​ធ្វើការ​ត្រឹមត្រូវ ជា​សិទ្ធិ​របស់​ប្រជាពលរដ្ឋ កាល​ណា​គាត់​យល់​ឃើញ​ថា សិទិ្ធ​របស់​គាត់​ត្រូវ​បាន​បំពាន អាហ្នឹង​គាត់​អាច​ប្តឹង​បាន​ហើយ។ អាហ្នឹង​ជា​រឿង​ទូទៅ មន្រ្តី​ណា​ក៏​ប្រជាពលរដ្ឋ​មាន​សិទិ្ធ​ប្តឹង​ដែរ ហើយ​ក្នុង​ករណី​ហ្នឹង គឺ​ថា ក្រឡា​បញ្ជី​ដែល​កាន់​សំណុំ​រឿង​ហ្នឹង គាត់​ត្រូវ​ទទួល​ខុស​ត្រូវ​ហើយ ពីព្រោះ​ថា មិន​អាច​ធ្វើ​បាត់​សំណុំ​រឿង​របស់​គេ​ទេ។ បើ​សិន​ជា​សំណុំ​រឿង​ហ្នឹង​ទៅ​ដល់​តុលាការ​កំពូល អ៊ីចឹង​វា​ត្រូវ​មាន​កន្លែង​ទទួល អ្នក​ណា​ជា​អ្នក​ទទួល គឺ​មន្ត្រី​ណា​មួយ​ជា​អ្នក​ទទួល​សំណុំ​រឿង ហើយ​គេ​បញ្ជូន​ទៅ​ណា? ចាត់ការ​ទៅ​ណា? វា​មិន​អាច​បាត់​ទេ និយាយ​ទៅ​សំណុំ​រឿង​វា​មិន​អាច​បាត់​ទេ»

ព័ត៌មាន (0)
Share
គេហទំព័រ​ទាំងមូល