ប្រភេទកង់ដើរដោយថាមពលពន្លឺព្រះអាទិត្យនេះ ត្រូវបានសិក្សាស្រាវជ្រាវផលិតជាលើកដំបូងបង្អស់ដោយអង្គការមិនមែនរដ្ឋាភិបាលក្នុងស្រុកមួយ ឈ្មោះអង្គការអ្នកកសាងសមត្ថភាព ក្នុងអំឡុងឆ្នាំ ២០០៦ -២០០៧ ដោយទទួលបានថវិកាគាំទ្រពីគម្រោងកម្មវិធីខ្នាតតូច របស់មូលនិធីបរិស្ថានពិភពលោក ដែលផ្តល់តាមរយៈកម្មវិធីអភិវឌ្ឍន៍របស់អង្គការសហប្រជាជាតិ (យូ.អ៊ិន.ឌី.ភី) ប្រចាំនៅកម្ពុជា។
លោក តាំង គាតឡេង ពលរដ្ឋបារាំងដើមកំណើតខ្មែរ ដែលបច្ចុប្បន្នរស់នៅទីក្រុងប៉ារីស បានបញ្ជាក់អំពីគម្រោងការផលិតកង់ដែលដើរដោយថាមពលពន្លឺព្រះអាទិត្យក្នុងជំហានដំបូងនេះ ដែលអាចនឹងមានចំនួនពី ៥០ ទៅ ១០០គ្រឿង ដោយត្រូវការដើមទុនប្រមាណជា ៣ម៉ឺនដុល្លារសហរដ្ឋអាមរិក។
លោក តាំង គាតឡេង មានប្រសាសន៍ដូច្នេះ ៖ «បើសិនជាធ្វើទៅល្អមែន ខ្ញុំចង់យកមកបង្ហាញនៅទីក្រុងប៉ារីស ព្រោះថានៅ មែរ៍ ក្រុងប៉ារីសអីហ្នឹង គេមានកន្លែងជួលកង់ឲ្យប្រជាជនទូទៅ ទាំងទីក្រុងប៉ារីសហ្នឹង បើធ្វើទៅបានល្អ ខ្ញុំចង់យកមកបង្ហាញឲ្យគេមើល តើគេចាប់ចិត្តថារបស់ដែលយើងធ្វើហ្នឹងអាចមានគុណភាពទៅបាន អាហ្នឹងខ្ញុំក៏រឹតតែអរដែរ។ ដល់ខែ ១២ នេះ បានខ្ញុំទៅជួបគាត់ ហើយបានសម្រេចថា នឹងចាប់ផ្ដើមធ្វើ...ឲ្យបានច្រើន ហើយចាប់ផ្ដើមផលិត និងពិភាក្សាការផលិតជាមួយកាត់»។
ឯកសារសិក្សាគម្រោងកម្មវិធីខ្នាតតូចរបស់អង្គការយូ.អ៊ិន.ឌី.ភី បានសរសេរឲ្យដឹងថា គោលដៅសំខាន់នៃគម្រោងសាកល្បងផលិតកង់ ដែលដើរដោយថាមពលពន្លឺព្រះអាទិត្យនេះ គឺដើម្បីបង្កើនការយល់ដឹងរបស់ប្រជាពលរដ្ឋអំពីកិច្ចការពារ និងកាត់បន្ថយការបំពុលបរិស្ថានធម្មជាតិនៅក្នុងប្រទេសកម្ពុជា ដោយសារការបញ្ចេញឧស្ម័នកាបូនិកទៅក្នុងអាកាស ដែលជាបញ្ហាដ៏ធំមួយរបស់ពិភពលោកនាពេលបច្ចុប្បន្ននេះ។
លោក តាំង គាតឡេង ពលរដ្ឋខ្មែរ-បារាំង មានកំណើតកើតជានៅស្រុកឆ្លូង ខេត្តក្រចេះ ដែលបច្ចុប្បន្នរស់នៅទីក្រុងប៉ារីសនោះ បានបញ្ជាក់បន្ថែមអំពីការចាប់អារម្មណ៍របស់លោកនៅពេលដែលបានស្តាប់ឮព័ត៌មានផ្សព្វផ្សាយតាមវិទ្យុស្តីអំពីផលិតផលកង់ដើរដោយថាមពលពន្លឺព្រះអាទិត្យនេះ ដែលជាគំនិតស្រាវជ្រាវកែច្នៃលើកទី១ របស់ខ្មែរក្នុងស្រុក។
លោក តាំង គាតឡេង មានប្រសាសន៍ឲ្យដឹងបន្ថែមដូច្នេះ ៖ «ឆ្នាំទៅហ្នឹង ចុងឆ្នាំ ២០០៧ ហ្នឹង ខ្ញុំបានផ្ដល់ ១,៨០០ដុល្លារឲ្យគាត់ទៅរៀបចំធ្វើកង់មួយពីរឡើងមុនសិន ហើយឥឡូវធ្វើបានហើយ ខែ១២ នេះ ខ្ញុំទៅមើលស្ថានភាពយ៉ាងម៉េច ហើយពិភាក្សាជាមួយគាត់ដើម្បីអាចផលិតចេញមកក្នុងទីផ្សារអីលក់បាន។ ក៏ដោយសារតែមានទឹកចិត្តស្រលាញ់ជាតិ បើថារឿងចំណេញរឿងស្អីៗខ្ញុំអត់មានគិតរឿងហ្នឹងវែងឆ្ងាយទេ ខ្ញុំចង់បានសំខាន់បំផុតថា ខ្មែរហ្នឹងក៏អាចផលិតគ្រឿងអ្វីៗមួយដែលចេញមកទីផ្សារអន្តរជាតិអ៊ីចឹងដែរ»។
លោក គង់ ផារិទ្ធិ ប្រធានអង្គការអ្នកកសាងសមត្ថភាព ដែលជាអ្នកផ្តួចផ្តើមគំនិតក្នុងការសិក្សាស្រាវជ្រាវផលិតកង់ពាក់កណ្តាលស្វ័យប្រវត្តិ ដើរដោយថាមពលពន្លឺព្រះអាទិត្យឲ្យចេញជារូបរាងជាលើកដំបូងបង្អស់នៅក្នុងប្រទេសកម្ពុជា ក៏បានបញ្ជាក់ឲ្យដឹងអំពីការកែច្នៃបន្ថែមមួយចំនួនទៅលើកង់ដែលផលិតដោយថវិកាឧបត្ថម្ភរបស់អង្គការយូ.អ៊ិន.ឌី.ភី កាលពីឆ្នាំ ២០០៦ នោះ។
លោក គង់ ផារិទ្ធិ មានប្រសាសន៍ថា ៖ «ការស្រាវជ្រាវវាមិនមែនចប់មួយភ្លែត មិនមែនធ្វើទៅឃើញល្អភ្លាមឯណា ធ្វើទៅវាមានទាស់ត្រង់នេះ មានទាស់ត្រង់នោះ។ ធ្វើនៅកន្លែង យូ.អិន.ឌី.ភីហ្នឹង ធ្វើទៅវាធ្ងន់ក្រោយពេក អ៊ីចឹងខ្ញុំធ្វើក្រោយនេះ ដាក់អាគុយនៅខាងមុខ វាធ្ងន់មុខវិញ មនុស្សជិះពីក្រោយទៅវាស្មើគ្នាអ៊ីចឹងទៅ ធ្វើអ៊ីចឹងវិញ។ ហើយពីមុនខ្ញុំដាក់អាគុយរាងខ្ពស់ អ៊ីចឹងពេលវាដួលអីវាធ្ងន់ណាស់ ព្រោះអាគុយនៅខ្ពស់ អ៊ីចឹងរកបច្ចេកទេសថ្មីដាក់អាគុយទាប នៅម្ដុំឈ្នាន់អីអ៊ីចឹងទៅឲ្យវាធ្ងន់ ដូចម៉ាស៊ីនម៉ូតូវានៅខាងក្រោម ជិះទៅវាអត់សូវបោក ព្រោះទម្ងន់ហ្នឹងវានៅខាងក្រោម រកវិធីដាក់អាគុយអីនៅខាងមុខក្បែរឈ្នាន់»។
លោក គង់ ផារិទ្ធិ ក៏បានឲ្យដឹងបន្ថែមអំពីលទ្ធភាពផ្សេងៗ នៃដំណើរការផលិតកង់ដើរដោយថាមពលពន្លឺព្រះអាទិត្យក្នុងជំហានទីមួយនេះ ដែលបោះទុនដោយពលរដ្ឋខ្មែរនៅប្រទេសបារាំង សម្រាប់គម្រោងដាក់លក់នៅក្នុងស្រុកផង និងនៅលើទីផ្សារអន្តរជាតិផង។
លោក គង់ ផារិទ្ធិ មានប្រសាសន៍បន្ថែមថា ៖ «គាត់ចង់ធ្វើច្រើន ចង់ធ្វើ ៣០-៤០គ្រឿង ហើយក្នុងមួយខែឲ្យបានចេញលក់ ប៉ុន្តែដោយសារតែធនធានដែលយើងត្រូវរកហ្នឹងពិបាក ដូចជាសម្ភារៈផ្សេងៗនៅស្រុកខ្មែរយើងពិបាក អ៊ីចឹងដោយសារថាសម្ភារៈពិបាករកហ្នឹង ខ្ញុំគិតថាទៅជាមួយគាត់ហ្នឹង អាចទៅវៀតណាម ឬក៏ទៅចិន ទៅណា យកប្រដាប់ប្រដាហ្នឹងឲ្យគេដំឡើងឲ្យជាគ្រឿងបន្លាស់ផ្នែកតូចៗ ដូចម៉ូទ័រកង់អីហ្នឹង យើងឲ្យទៅប្រទេសណាដែលគេមានជំនាញធ្វើហ្នឹង ឲ្យគេធ្វើហើយបោះមកឲ្យយើង ឬក៏អាចយកបច្ចេកទេសហ្នឹងទៅដំឡើងកង់នៅស្រុកណាមួយ ហើយយកមកចាប់សូឡារអីនៅស្រុកយើងទៅ ដើម្បីដឹកចេញទៅទៀតទៅ ឬក៏ធ្វើនៅស្រុកគេស្រេចតែម្ដងដឹកចេញទៅលក់ទីផ្សារបរទេស វាទៅជាឧស្សាហកម្មតែម្ដង»។
ផលិតផលកង់ដើរដោយថាមពលពន្លឺព្រះអាទិត្យ ដែលស្រាវជ្រាវកែច្នៃដោយខ្មែរ នៅក្នុងស្រុកជាលើកដំបូងនេះ មានតម្លៃដើមជាង ៣០០ដុល្លារក្នុងមួយគ្រឿង នឹងគ្រោងចេញលក់នៅចុងឆ្នាំ ២០០៩ ខាងមុខនេះ៕