វិធីទុកដាក់និងប្រើប្រាស់ថ្មពិលនៅតាមលំនៅឱ្យមានសុវត្ថិភាព (ភាគ១)
2010.12.30
ឯកសារនានានៃក្រុមអ្នកវិទ្យាសាស្ត្របានបង្ហាញថា វិធីដែលអាចជួយការពារ និងកាត់បន្ថយគ្រោះថ្នាក់ដែលបណ្ដាលមកពីសារធាតុគីមី នៅក្នុងថ្មពិល និងអាគុយ គឺទី១ ជ្រើសរើសប្រើថ្មពិល និងអាគុយ ដែលអាចសាកបញ្ចូលថាមពលអគ្គិសនីហើយប្រើបានឡើងវិញ។ ទី២ គឺប្រមូលទុកដាក់ និងកែច្នៃសំណល់ថ្មពិល និងអាគុយ ឱ្យបានត្រឹមត្រូវទៅតាមការណែនាំនៃក្រុមអ្នកជំនាញ។
អ្នកស្រី ប្រាក់ សឿន កសិកររស់នៅភូមិសំរោង ឃុំត្រឡាច ស្រុកទ្រាំង ខេត្តតាកែវ បានមានប្រសាសន៍បញ្ជាក់ថា ក្រុមគ្រួសារអ្នកស្រីប្រើថ្មពិល សម្រាប់ដាក់វិទ្យុ ពិលចុចបំភ្លឺ នាឡិកាប៉ោល និងនាឡិកាដៃ ដែលជាប្រភេទថ្មប្រើអស់ហើយបោះចោល។
អ្នកស្រីបានបញ្ជាក់ប្រាប់ផងដែរថា ពុំបានដឹងអំពីវិធីទុកដាក់ និងគ្រោះថ្នាក់ដែលបណ្ដាលមកពីថ្មពិលនោះទេ ហើយភាគច្រើន ថ្មចាស់ៗដែលប្រើអស់ហើយនោះ គឺច្រើនតែបោះចោលទៅលើដី ៖ «អត់ដឹងផង បោះចោល បោះចោលពេញទឹកពេញដីហ្នឹង បើវាអស់ហើយ មិនដឹងទុកបានប្រយោជន៍អីផង។ អ្នកភូមិផងរបងជាមួយក៏បោះចោលដូចតែគ្នា ប៉ុន្តែខ្ញុំមាននៅខ្លះ ទុកខ្លះ ច្រកថង់ទុក អត់ដឹងទុកធ្វើអីទេ ចេះតែព្យួរទុកចោល បោះចោលទៅ វាជ្រាំក្បែរផ្ទះ»។
សារធាតុគីមីដែលនៅក្នុងថ្មពិល ប្រសិនបើបោះចោលទៅក្នុងបរិស្ថានគឺនឹងបង្កឱ្យខូចប្រភពទឹកធម្មជាតិ គុណភាពដី ព្រមទាំងប៉ះពាល់សត្វមានជីវិត និងរុក្ខជាតិផងដែរ ហើយដែលជាយថាហេតុ នឹងបណ្ដាលឱ្យមានផលអាក្រក់មកលើសុខភាពមនុស្ស។
អតីតអភិបាលរងរាជធានីភ្នំពេញ លោក ម៉ាន់ ឈឿន ដែលបច្ចុប្បន្នបានចូលនិវត្តន៍ទៅហើយនោះ បានមានប្រសាសន៍អំពីកម្មវិធីប្រមូលទុកដាក់ថ្មពិល ដែលអនុវត្តរួមគ្នាដោយសាលាក្រុងភ្នំពេញ និងក្រសួងបរិស្ថាន ក្នុងរយៈពេលកន្លងមកនេះ ជាពិសេសនៅតាមសាលារៀនមួយចំនួនក្នុងរាជធានី ៖ «យើងបានបំផុសរឿងហ្នឹងថា កុំឱ្យបោះចោលអ៊ីចឹង ឱ្យប្រមូលមក យើងយកទៅទុកដាក់ធ្វើបំបែកវាវិញ។ ខាងប៊ែលហ្សិក ក៏គេឱ្យគំនិតថា ឱ្យសិក្សាមើលទៅ ហើយមានការគាំទ្រ ឯកឧត្ដមអភិបាល (រាជធានី) គាត់បើកយុទ្ធនាការហៅថា «រួមគ្នាដើម្បីរាជធានីភ្នំពេញ គេចផុតពីគ្រោះថ្នាក់នៃសំណល់ថ្មពិល»។
អ្នកស្រី ពូន ប៉ុក រស់នៅក្នុងរាជធានីភ្នំពេញ បានមានប្រសាសន៍ថា ពុំបានដឹងច្បាស់លាស់ពីផលវិបាកដែលបណ្ដាលមកពីថ្មពិលនោះឡើយ ប៉ុន្តែក៏បានណែនាំកូនតូចៗឱ្យប្រយ័ត្នផងដែរ។
ចំពោះថ្មដែលប្រើអស់ហើយវិញនោះ អ្នកស្រីបានបញ្ជាក់ថា បានដឹងអំពីកម្មវិធីប្រមូលទុកដាក់ ជាពិសេសនៅតាមសាលារៀន ប៉ុន្តែភាគច្រើនគឺទម្លាប់បោះចោលចូលធុងសំរាម ៖ «ភាគច្រើនដូចជាមិនមានការយល់ដឹងអំពីការវេចខ្ចប់អីទេ។ គេដាក់កេសទឹកសុទ្ធ ឬកេសអីមួយទៅ គេបិទផ្លាករូបកាកសំណល់ថ្មពិល គេឱ្យយើងបោះចូល។ ប៉ុន្តែភាគច្រើន យើងមិនបានទៅដល់ហ្នឹងទេ ជួនកាលយើងបោះចោលត្រឹមធុងសំរាមផ្ទះយើងធម្មតាជាមួយនឹងសំរាមផ្សេងៗទៀត។ និយាយដោយស្មោះត្រង់ទៅ អត់ដឹងថា បញ្ហាហ្នឹងវាដល់កម្រិតណាទេដែរ តែគ្រាន់តែធ្លាប់ឃើញគេប្រមូលកាកសំណល់ថ្មពិលហ្នឹងថា វាមានបញ្ហា អ៊ីចឹងក៏ចាប់ផ្ដើមហាមកូន ពេលថ្មពិលអស់កុំឱ្យវាលេងអីអ៊ីចឹង»។
ក្រុមអ្នកជំនាញផ្នែកគីមីវិទ្យាបានគូសបញ្ជាក់ថា ថ្មគ្រប់ប្រភេទទាំងអស់ ទោះជានៅថ្មីមិនទាន់ប្រើទាល់តែសោះ ឬមួយក៏ថ្មចាស់ប្រើរួចហើយ នៅពេលវាមានការបែកធ្លាយ ឬបោះចោលទៅក្នុងបរិស្ថាន គឺសុទ្ធតែបង្កឱ្យមានផលវិបាកអាក្រក់ដូចគ្នាទាំងអស់។
លោក ម៉ាន់ ឈឿន ដែលបច្ចុប្បន្នបម្រើការងារជាអនុប្រធានគណៈកម្មាធិការជាតិដើម្បីប្រជាជន និងការអភិវឌ្ឍនៃទីស្ដីការគណៈរដ្ឋមន្ត្រី និងជាប្រធានក្រុមប្រឹក្សាមូលនិធិអភិវឌ្ឍន៍កាត់បន្ថយភាពក្រីក្រប្រជាជនក្រុងភ្នំពេញ បានមានប្រសាសន៍អំពីប្រការដ៏គ្រោះថ្នាក់ទៅលើកុមារតូចៗដោយការលេងថ្មពិល ៖ «ដែលចង់ឱ្យប្រយ័ត្នបំផុតនោះ ជាពិសេសថ្មពិលឡាហ៊្សែ អាថ្មពិលតូចៗ គេហៅថា ថ្មពិលឡេវអាវ គឺចៅៗខ្លះវាឃើញវាយកទៅបៀមលេង អាហ្នឹងគ្រោះថ្នាក់ធ្ងន់ណាស់នៅពេលវាបៀមទៅ អា Positive -Negative វាជ្រាបទៅតាមសរីរាង្គ វាធ្វើឱ្យញ័រដៃ គ្រវីក្បាល ទៅជាឈឺក្បាល សរសៃប្រសាទក៏មានដែរ គឺដោយសារតែបៀមថ្មពិល»។
គ្រូបង្រៀនផ្នែកមន្ទីរពិសោធន៍នៅមហាវិទ្យាល័យគីមី នៃវិទ្យាស្ថានបច្ចេកវិជ្ជាកម្ពុជា លោក ប៉ុក ល័ក្សរាសី បានមានប្រសាសន៍បញ្ជាក់អំពីផលវិបាករយៈពេលខ្លីចំពោះករណីដែលកុមារបានលេបថ្មពិលចូលទៅក្នុងពោះ គឺក្នុងរយៈពេល ២ម៉ោង វានឹងធ្វើឱ្យរលាកប្រព័ន្ធរំលាយអាហារ ឬមួយរលាកប្រព័ន្ធដកដង្ហើមរបស់ក្មេង។
លោកគ្រូមានប្រសាសន៍បន្ថែមអំពីផលប៉ះពាល់ក្នុងករណីដែលមិនអាចយកថ្មចេញពីក្នុងខ្លួនក្មេងបានក្រោយពីរយៈពេល ២ម៉ោង តាមលក្ខណៈនៃប្រតិកម្មសារធាតុគីមី នៅក្នុងថ្មពិល ៖ «ផលប៉ះពាល់រយៈពេលវែង គឺនៅពេលដែលយើងមិនអាចដកយកថ្មពិលនោះចេញបាន វាធ្លាក់ចូលទៅដល់ក្រពះ ពោះវៀន ពេលនោះសារធាតុបារ៉ត ក៏ដូចជាសារធាតុប្រាក់ដែលមាននៅក្នុងថ្មពិលហ្នឹងនោះ ជ្រាបពេញសារពាង្គកាយរបស់ក្មេងនោះ ហើយពេលនោះជាតិពុលនឹងជ្រាបចូលទៅដល់ប្រព័ន្ធសរីរាង្គទាំងអស់របស់ក្មេង ដែលធ្វើឱ្យគ្រឿងក្នុងរបស់ក្មេងប៉ះពាល់យ៉ាងធ្ងន់ធ្ងរ ហើយសុខភាពរបស់ក្មេងនឹងជួបបញ្ហាយ៉ាងធ្ងន់ធ្ងរទៅថ្ងៃអនាគត»។
អាស្រ័យហេតុនេះលោក ប៉ុក ល័ក្សរាសី បានមានប្រសាសន៍រំឭកដល់មាតាបិតាថា គួរគប្បីប្រុងប្រយ័ត្នជាទីបំផុតក្នុងការទុកដាក់ថ្មពិលគ្រប់ប្រភេទនៅក្នុងផ្ទះឱ្យខ្ពស់ផុតពីដៃក្មេង និងពន្យល់ណែនាំកូនចៅកុំឱ្យលេងថ្មពិល។
លោកគ្រូបានអធិប្បាយអំពីវិធីទុកដាក់ និងប្រើប្រាស់ថ្មពិលត្រឹមត្រូវ ដើម្បីចៀសវាងពីគ្រោះថ្នាក់ផ្សេងៗ ៖ «ថ្មពិលដែលយើងប្រើសព្វថ្ងៃនេះមានច្រើនប្រភេទ។ ថ្មពិលខ្លះ គ្រាន់តែដាក់វាលាយឡំជាមួយថ្មពិលប្រភេទផ្សេងទៀត ក៏អាចបង្កឱ្យមានការផ្ទុះបានដែរ។ ថ្មពិលខ្លះ នៅពេលដាក់វានៅជិតឧបករណ៍ដែលបញ្ចេញកម្ដៅ ដូចជាអំពូលអគ្គិសនី ចង្ក្រានភ្លើង វាអាចធ្វើឱ្យផ្ទុះ។ ថ្មពិលប្រភេទអាល់កាឡាំង វាងាយនឹងផ្ទុះ មិនអាចបោះចូលក្នុងភ្លើងបានទេ វានឹងបណ្ដាលឱ្យផ្ទុះ»។
ឯកសារនៃក្រុមអ្នកវិទ្យាសាស្ត្រផ្នែករូបវិទ្យា និងគីមី បានផ្ដល់ការណែនាំឱ្យមានការប្រុងប្រយ័ត្នចៀសវាងកុំឱ្យប៉ះពាល់សារធាតុគីមីនៅក្នុងថ្មពិល។ ប្រសិនបើពាល់ត្រូវថ្មពិលចាស់ៗ ឬថ្មពិលដែលបែកធ្លាយ គឺប្រញាប់ស្រូតរូតលាងសម្អាតដៃនឹងសាប៊ូចេញភ្លាមៗ និងចៀសវាងកុំយកដៃមកប៉ះនឹងភ្នែក ព្រោះវាអាចបណ្ដាលឱ្យរលាកភ្នែក៕
អត្ថបទពេញនិយម
RFA
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កញ្ញា ឈឹម ស៊ីថរ រក្សាជំហរតស៊ូ ដើម្បីសេរីភាពសហជីព និងការពារផលប្រយោជន៍កម្មករក្រោយមានសេរីភាព
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់
- ហេតុអ្វីបានជាអាមេរិកដាក់ទណ្ឌកម្ម «ស្តេចកោះកុង»?
- ពលរដ្ឋរិះគន់អាជ្ញាធរអប្សរាបណ្តោយឱ្យអ្នកមានលុយមានអំណាចសង់ផ្នូរខ្មោចចិនមួយធំក្នុងតំបន់អង្គរ