ស្ថានភាពនៅតាមព្រំដែនកម្ពុជានិងថៃ បានស្ងប់ស្ងាត់លែងឭសំឡេងគ្រាប់ផ្លោងនៅថ្ងៃទី២៩ ខែកក្កដា ខណៈបណ្ដាមេបញ្ជាការទ័ពជួរមុខកម្ពុជានិងថៃ ក្នុងនោះរួមមាន មេបញ្ជាការយោធភូមិភាគទី៤កម្ពុជាលោក ពៅ ហេង និងមេបញ្ជាការយោធភូមិភាគ២ថៃ លោក ប៊ុនស៊ីង ផាកខ្លាង (Boonsin Padklang) បានជួបចរចាគ្នាដើម្បីអនុវត្តតាមបទឈប់បាញ់ នៅច្រកទ្វារអន្តរជាតិអូស្មាច់ ខេត្តឧត្តរមានជ័យ និងខេត្តសុរិន្ទ។
អ្នកនាំពាក្យក្រសួងការពារជាតិអ្នកស្រី ម៉ាលី សុជាតា បានលើកឡើងនៅក្នុងសន្និសីទសារព័ត៌មានថា លទ្ធផលនៃកិច្ចប្រជុំកងទ័ពភូមិភាគកម្ពុជា-ថៃ គឺភាគីទាំងពីរបានព្រមព្រៀងគ្នា គោរពបទឈប់បាញ់ ឈប់បង្កើនទ័ព ភ្ជាប់ទំនាក់ទំនង និងផ្លាស់ប្ដូរព័ត៌មានគ្នាទៅវិញទៅមក និងឆ្លងយោបល់ថ្នាក់លើប្រសិនបើមានបញ្ហាណាមួយ។ អ្នកស្រីបានបន្តថា កិច្ចព្រមព្រៀងឈប់បាញ់បានចងនូវលក្ខខណ្ឌមួយដើម្បីឱ្យកងទ័ពប្រទេសទាំងពីរអនុវត្ត។
លក្ខខណ្ឌទាំងអស់នោះ រួមមានទី១ ឈប់បាញ់គ្នា ទី២ មិនឱ្យមានការចល័តទ័ពឬបន្ថែមទ័ព ទី៣ កងទ័ពនៃភាគីទាំងពីរត្រូវរក្សានៅទីតាំងដដែលរាប់ចាប់តាំងពីម៉ោង ២៤និង០០នាទី ម៉ោងនៅក្នុងតំបន់នៅថ្ងៃទី២៨ ខែកក្កដា ឆ្នាំ២០២៥ និងទី៤ ត្រូវបង្កើតក្រុមការងារទំនាក់ទំនង ដើម្បីធ្វើការជាមួយគ្នា។
— អ្នកស្រី ម៉ាលី សុជាតា
រដ្ឋមន្ត្រីក្រសួងការបរទេសកម្ពុជាលោក ទៀ ស៊ីហា ក៏បានសរសេរបង្ហោះលើហ្វេសប៊ុកថា កងទ័ពកម្ពុជាបានអត់ធ្មត់អនុវត្តតាមកិច្ចព្រមព្រៀងឈប់បាញ់គ្នាតាំងពីម៉ោង១២យប់ ហើយលោកក៏បានហៅទូរស័ព្ទទៅរដ្ឋមន្ត្រីការពារជាតិស្ដីទីរបស់ថៃ ដើម្បីច្រាលចោលការលើកឡើងពីភាគីថៃ ដែលចោទថាកងទ័ពកម្ពុជាមិនបានអនុវត្តតាមកិច្ចព្រមព្រៀងនេះ។
លោក ទៀ សីហា បានបញ្ជាក់ទៀតថា ក្រសួងការពារជាតិនឹងដឹកនាំបណ្ដាអង្គទូត និងអនុព័ន្ធយោធាបរទេសប្រចាំកម្ពុជា ចុះទៅឃ្លាំមើលទីតាំងនិងសភាពការណ៍ជាក់ស្ដែងតាមព្រំដែន ដើម្បីបង្ហាញពីឆន្ទៈយ៉ាងម៉ឺងម៉ាត់របស់កងទ័ពកម្ពុជាក្នុងការអនុវត្តកិច្ចព្រមព្រៀងឈប់បាញ់គ្នា។
ប្រធានសហរដ្ឋអាមេរិកលោក ដូណាល់ ត្រាំ (Donald Trump) បានសរសេរបង្ហោះលើបណ្ដាញសង្គម TruthSocial ថា លោកបានហៅទូរស័ព្ទជាថ្មីទៅនាយករដ្ឋមន្ត្រីកម្ពុជាលោក ហ៊ុន ម៉ាណែត និងនាយករដ្ឋមន្ត្រីស្ដីទីថៃ លោក ភូមិថាំ វេឆាយ៉ាឆៃ (Phumtham Wechayachai) ដើម្បីអបអរសាទរដែលមេដឹកនាំប្រទេសទាំងពីរ ឈានដល់កិច្ចព្រមព្រៀងឈប់បាញ់គ្នាដើម្បីទទួលសន្ដិភាព តាមសំណើរបស់លោក។ លោក ត្រាំ បានបន្តថា លោកបានបញ្ជាឱ្យមន្ត្រីអាមេរិកចាប់ផ្ដើមចរចារឿងពន្ធពាណិជ្ជកម្មជាមួយកម្ពុជានិងថៃឡើងវិញ តាមការសន្យារបស់លោក។
ក្រៅពីប្រធានាធិបតីសហរដ្ឋអាមេរិក បណ្ដាប្រទេសធំៗ ជាច្រើនផ្សេងទៀត រួមមានចិន ជប៉ុន អង់គ្លេស បារាំង និងសហភាពអឺរ៉ុបបានចេញសារបន្តបន្ទាប់ សាទរចំពោះការសម្រេចបានកិច្ចព្រមព្រៀងឈប់បាញ់គ្នារវាងកម្ពុជា និងថៃ តាមការសម្របសម្រួលពីប្រធានប្ដូរវេនអាស៊ានគឺលោកនាយករដ្ឋមន្ត្រីម៉ាឡេស៊ី អាន់វ៉ា អ៊ីប្រាហ៊ីម (Anwar Ibrahim)។
បណ្ដាញសារព័ត៌មានក្នុងស្រុកបានចុះផ្សាយថា អគ្គមេបញ្ជាការកងទ័ពម៉ាឡេស៊ីលោក ម៉ូដ នីហ្សាម ប៊ីន ចាហ្វា (Mohd Nizam bin Jaffar) បានធ្វើដំណើរមកដល់កម្ពុជានៅថ្ងៃទី២៩ ខែកក្កដានេះ ដើម្បីជួបជាមួយអគ្គមេបញ្ជាការកងយោធពលខេមរភូមិន្ទលោក វង្ស ពិសេន ដើម្បីពិភាក្សាលើកិច្ចព្រមព្រៀងបទឈប់បាញ់ និងការស្ដារស្ថិរភាពឡើងវិញរវាងកម្ពុជានិងថៃ។
ជម្លោះប្រដាប់អាវុធតាមព្រំដែនរវាងកម្ពុជានិងថៃរយៈពេល៥ថ្ងៃ គឺចាប់ពីថ្ងៃទី២៤ដល់ថ្ងៃទី២៨ខែកក្កដា បានបណ្ដាលឱ្យជនស៊ីវិលនិងកងទ័ពប្រទេសទាំងសងខាង ស្លាប់និងរបួសជាច្រើននាក់ ក្នុងនោះ បានធ្វើឱ្យពលរដ្ឋរាប់ម៉ឺននាក់ បានចាកចោលពីផ្ទះសម្បែងដើម្បីគេចចេញពីគ្រាប់ផ្លោង ខណៈកងទ័ពថៃ បានប្រើប្រាស់ធន់ធ្ងន់បំពានច្បាប់អន្តរជាតិ ដូចជា គ្រាប់បែកចង្កោម ផ្សែងគីមី និងការប្រើប្រាស់យន្តហោះចម្បាំង F-16 វាយប្រហារមកលើតំបន់ប្រាសាទព្រះវិហារជាសម្បត្តិបេតិកភណ្ឌពិភពលោកជាដើម។
លោកនាយករដ្ឋមន្ត្រី ហ៊ុន ម៉ាណែត បានសរសេរបង្ហោះលើហ្វេសប៊ុកថា រដ្ឋាភិបាលនឹងរៀបចំគោលនយោបាយសម្រាប់គាំទ្រយុទ្ធជនរបួស និងក្រុមគ្រួសារយុទ្ធជនពលីឱ្យបានសមរម្យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។