ຂ.ບໍ່ແກ້ວ ຍົກເລີກ ບຸນດອກງິ້ວ

ອໍານາດການປົກຄອງເມືອງຕົ້ນເຜິ້ງ ແຂວງບໍ່ແກ້ວ ໄດ້ອອກແຈ້ງການ ກ່ຽວກັບການຍົກເລີກງານບຸນດອກງິ້ວ ປະຈໍາປີ 2021 ເພື່ອເປັນການປ້ອງກັນການແຜ່ຣະບາດ ຂອງໂຄວິດ19 ຄືໄດ້ຍົກເລີກບຸນປະຈໍາປີນີ້ ເປັນປີທີ 2 ແລ້ວ, ຍ້ອນວ່າເມື່ອປີ 2020 ກໍບໍ່ໄດ້ຈັດຂຶ້ນ, ອີງຕາມຄໍາເວົ້າຂອງເຈົ້າໜ້າທີ່ ຫ້ອງການປົກຄອງເມືອງ ຕົ້ນເຜິ້ງຜູ້ຂໍບໍ່ບອກຊື່ ຕໍ່ RFA ໃນມື້ວັນທີ 5 ກຸມພາ ນີ້:

“ກໍມັນສະພາບໂຄວິດ-19 ລໍາບາກ, ບັນດາປະເທດຂ້າງຄຽງ ກໍມີແຜ່ຫລາຍຢູ່ ເຮົາກໍບໍ່ສາມາດຈະເປີດງານບຸນດອກງິ້ວໄດ້. ເຣື່ອງ ຜົລກະທົບນີ້ມີຢູ່ແລ້ວ ທົ່ວປະເທດມີຜົລກະທົບ ເໝືອນກັນໝົດ, ບໍ່ແມ່ນແຕ່ແຂວງແຕ່ເມືອງເຮົາ. ເວລາເຮົາເປີດມາ ຫາກມີການແຜ່ ຣະບາດມາແຮງ ມັນສິແຮງຍາວນານໄປອີກ.”

ທ່ານເວົ້າຕື່ມວ່າ ການຍົກເລີກງານບຸນດອກງິ້ວ ຈະສົ່ງຜົລໃຫ້ການຈັດເກັບຣາຍຮັບ ເຂົ້າເມືອງຕົ້ນເຜິ້ງ ຈາກການທ່ອງທ່ຽວເສັຽໄປ ປະມານ 50 ພັນໂດລາ ສະຫະຣັຖ ຕໍ່ປີ ຊຶ່ງຄິດໄລ່ ສະເລັ່ຽແລ້ວ ແມ່ນເກັບຄ່າເຂົ້າຊົມງານບຸນ ຈາກນັກທ່ອງທ່ຽວ ຄົນລະ 1 ໂດລາ ສະຫະຣັຖ ແລະວ່າ ທີ່ຜ່ານມາ ງານບຸນດອກງິ້ວ ດຶງດູດນັກທ່ອງທ່ຽວ ທັງພາຍໃນ ແລະ ຕ່າງປະເທດ ເຂົ້າມາຊົມຢ່າງຫລວງຫລາຍ ເປັນຕົ້ນແມ່ນນັກທ່ອງທ່ຽວຈີນ, ໄທ ແລະ ພະມ້າ, ທັງໝົດເຖິງ 3-4 ແສນຄົນຕໍ່ປີ.

ເຈົ້າໜ້າທີ່ຫ້ອງການປົກຄອງ ເມືອງຕົ້ນເຜິ້ງ ຜູ້ດຽວກັນນີ້ ກ່າວຕື່ມອີກວ່າ ມາຕການປ້ອງກັນໂຄວິດ-19 ຢູ່ໃນເມືອງນີ້ ຜ່ອຍຄາຍລົງ ແດ່ແລ້ວໃນປັດຈຸບັນນີ້ ຄືອະນຸຍາດໃຫ້ປະຊາຊົນ ໄປມາຫາສູ່ກັນໄດ້ປົກກະຕິ, ຫາກມີງານບຸນ ກໍບໍ່ໃຫ້ຈັດໃຫຍ່ ແລະໂຮງຮຽນກໍໄດ້ຮັບ ອະນຸຍາດໃຫ້ເປີດ ການຮຽນ-ການສອນ ໄດ້ແລ້ວ.

“ຜ່ອນຄາຍແລ້ວ ການໄປມາຫາສູ່ກັນ ກໍໄດ້ຕາມປົກກະຕິ. ການຈັດບຸນຈັດງານ ກໍເຮັດໄປແຕ່ວ່າ ບໍ່ໃຫ້ມັນໃຫຍ່ເນາະ ເຮັດນ້ອຍກໍບໍ່ ໄດ້ຫ້າມດອກ. ງານບຸນປະເພນີຕ່າງໆ ກໍໃຫ້ເຮັດຕາມຮີດຄອງຄືເກົ່າ ເຮົາມີແຕ່ວ່າ ວາງມາຕການວ່າ ບໍ່ໃຫ້ເຮັດໃຫຍ່ ແຕ່ວ່າບາງຄົນ ໄປໃຫຍ່ ກໍບໍ່ຊ່າງສິວ່າ ຄວາມຢ້ານກົວຂອງພໍ່ແມ່ ປະຊາຊົນ ຄັນວ່າເຂົາໄປ ກໍສິເປັນຫຍັງ.”

ແລະວ່າມາຕການຜ່ອນຜັນນີ້ ແມ່ນໄດ້ເລີ່ມປະຕິບັດ ພາຍຫລັງ ແຂວງບໍ່ແກ້ວ ບໍ່ກວດພົບຄົນພາຍໃນ ແລະຄົນທີ່ມາຈາກ ຕ່າງປະເທດ ຕິດໂຄວິດ-19. ຊາວເມືອງຕົ້ນເຜິ້ງ ຜູ້ຂໍບໍ່ອອກຊື່ ນາງນຶ່ງເວົ້າຕໍ່ RFA ໃນມື້ດຽວກັນນີ້ວ່າ ເຫັນດີນໍາທາງການ ທີ່ ປະກາດຍົກເລີກ ງານບຸນດອກງິ້ວ ຍ້ອນຫາກມີການຈັດງານນີ້ ກໍຈະເຮັດໃຫ້ມີຄົນຫລາຍມາຊົມ ແລະ ປະຊາຊົນລາວ ກໍຈະມີ ຄວາມສ່ຽງ ຕິດໂຄວິດ-19 ຫລາຍຂຶ້ນ.

ນາງເວົ້າວ່າກ່ອນປີ 2020 ທີ່ຍັງບໍ່ມີການຣະບາດຂອງໂຄວິດ-19, ງານບຸນດອກງິ້ວ ມີນັກທ່ອງທ່ຽວທັງພາຍໃນ ແລະຕ່າງປະເທດ ຮວມທັງຈີນ ໄທ ເຂົ້າມາທ່ຽວຫລາຍ ແລະ ເຫັນວ່າ ການຊື້-ຂາຍຢູ່ພາຍໃນງານບຸນ ກໍຄຶກຄັກ.

“ດອກງິ້ວ ບໍ່ໄດ້ຈັດ ປີນີ້ກໍບໍ່ໄດ້ຈັດ ປີແລ້ວກໍບໍ່ໄດ້ຈັດ ເພາະວ່າໂຄວິດ-19 ເພາະວ່າມັນກາຍແລ້ວເດ໋ ດອກງີ້ວກໍຫລົ່ນໝົດແລ້ວ ກໍດີໃຈຢູ່ ເພາະວ່າປ້ອງກັນເນາະ ກໍຢ້ານ ຄົນຫລາຍກໍຢ້ານ.”

ໃນຂນະດຽວກັນ ຊາວບ້ານເຂດເມືອງເມິງ ແຂວງບໍ່ແກ້ວ ນາງນຶ່ງພັດເວົ້າວ່າ ບໍ່ເຫັນດີນໍາທາງການ ທີ່ປະກາດຍົກເລີກງານບຸນ ດອກງິ້ວ ຍ້ອນເປັນງານ ທີ່ຊ່ອຍໃຫ້ພໍ່ຄ້າແມ່ຄ້າ ມີຣາຍໄດ້ດີ ຈາກການຂາຍເຄື່ອງຂອງ. ແລະຖ້າຫາກມີງານບຸນນັ້ນ ຈະເຮັດໃຫ້ ຜູ້ຄົນມີຄວາມມ່ວນຊື່ນ ບໍ່ງຽບເຫງົາ.

“ຄັນວ່າເຂດເຮົາ ບໍ່ມີໃຜເປັນຫຍັງ ໃຈເຮົາກໍບໍ່ຢາກໃຫ້ຍົກເລີກແຫລະ ໂຕນີ້ກໍມີງານແບບປະກວດ ແບບຂາຍສິນຄ້າ ໂຊສິນຄ້າ ຄັນໃຜຢາກ ຂາຍເຄື່ອງ ກໍໄປຂາຍ ແລ້ວກໍມີບ່ອນ ຫລິ້ນເດັກນ້ອຍ ບ່ອນກິນເຫລົ້າກິນເບັຽ ຜູ້ໃຫຍ່ ແລ້ວມັນກໍສິມ່ວນອີກ ບໍ່ງຽບເຫງົາອີກ. ອັນນີ້ງຽບເຫງົາໂພດ.”

ກິຈກັມສໍາຄັນໃນງານບຸນດອກງິ້ວ ໃນໄລຍະທີ່ຜ່ານມາ ແມ່ນເນັ້ນໃສ່ໃຫ້ນັກທ່ອງທ່ຽວ ເບິ່ງຄວາມສວຍງາມຂອງດອກງິ້ວບານ. ພ້ອມກັນ ນັ້ນ ກໍມີຕລາດນັດ, ການແຂ່ງຂັນກິລາ, ການສະແດງວັທນະທັມ ຂອງຊົນເຜົ່າຕ່າງໆ ພາຍໃນເມືອງ 10 ຊົນເຜົ່າ ແລະອື່ນໆອີກ.