ຄົນລາວສ່ວນນຶ່ງ ສລອງປີໃໝ່ສາກົລ ພາຍໃນຄອບຄົວ

ຊາວລາວຈໍານວນບໍ່ໜ້ອຍ ບໍ່ໄດ້ເດີນທາງໄປທ່ຽວບຸນປີໃໝ່ສາກົລ 2024 ນີ້ ຢູ່ເມືອງສໍາຄັນຕ່າງໆ ທີ່ເປັນເມືອງຍອດນິຍົມ ຂອງນັກທ່ອງທ່ຽວ ຄື ນະຄອນຫລວງພຣະບາງ ແຂວງຫລວງພຣະບາງ ແລະເມືອງວັງວຽງ ແຂວງວຽງຈັນ ຍ້ອນມີຄວາມຫຍຸ້ງຍາກ ທາງດ້ານການເງິນ, ບັນຫາເງິນເຟີ້ ແລະເສຖກິຈຝືດເຄືອງ ເຮັດໃຫ້ຫລາຍຄົນ ບໍ່ຢາກໃຊ້ຈ່າຍແບບຟູມເຟືອຍ ແລະເລືອກທີ່ຈະຈັດການສລອງ ຢູ່ພາຍໃນຄອບຄົວ ຫລາຍກວ່າ. ອີງຕາມຄໍາເວົ້າ ຂອງຊາວລາວ ຢູ່ແຂວງຫລວງນໍ້າທາ ທ່ານນຶ່ງ ຕໍ່ວິທຍຸເອເຊັຽເສຣີ ໃນມື້ວັນທີ 1 ມົກກະຣານີ້.

“ຊຸມແຊວຢູ່ບ້ານ-ຢູ່ເຮືອນ. ແທ້ ໂອ໋ ສ່ວນຫລາຍກະເປັນແນວນັ້ນ. ໂອ໋ ເງິນລາວມັນຕົກຕໍ່າ ແລ້ວກໍໄປທ່ຽວກໍໄປບໍ່ໄດ້ແຫລ້ວ. ໃຊ້ຈ່າຍມັນເພີ່ມຂຶ້ນສູງນີ້. ເງິນມັນຕົກຕໍ່າເດ້. ແລກປ່ຽນເງິນຕຣາ ມັນກໍເພີ່ມລາຍຈ່າຍຫລາຍໂພດ.”

ທີ່ແຂວງຫລວງພຣະບາງ ຊາວບ້ານທ່ານນຶ່ງ ເວົ້າເຖິງການສລອງປີໃໝ່ສາກົລ ທີ່ຫາກໍຜ່ານໄປນີ້ວ່າ ຊາວບ້ານ ໃນເຂດບ້ານຂອງຕົນ ຈັດກິນລ້ຽງຢູ່ຈຸດໃຜ ຈຸດມັນ. ບາງຄົນ ຈັດແຕ່ຢູ່ໃນລະຄອບຄົວ ຂອງຕົນເອງ, ບໍ່ມີໃຜອອກໄປສລອງປີໃໝ່ ຢູ່ນອກບ້ານ ຍ້ອນເສຖກິຈຕົກຕໍ່າ ແລະເງິນເຟີ້ ຍັງສືບຕໍ່ເຮັດໃຫ້ຫລາຍຄົນຕ້ອງໃຊ້ຈ່າຍ ຢ່າງປະຢັດມັດທະຍັດທີ່ສຸດ ແລະຄິດວ່າ ຈະເປັນແນວນີ້ໄປ ຈົນກວ່າທາງການລາວ ຈະສາມາດແກ້ໄຂ ບັນຫາຫຍຸ້ງຍາກນັ້ນໄດ້.

“ກິນລ້ຽງເປັນຈຸດໆໃດຈຸດມັນ. ໂອ໋ ບໍ່ຢາກທ່ຽວກໍຍ້ອນຫັ້ນລະຕີ໋. ຍ້ອນເສຖກິຈ ເຂົາເຈົ້າລະຕີ໋ບໍ໋. ເສຖກິຈຕົກຕໍ່າໄປໝົດເດ້ເນາະ ບໍ່ວ່າລາວ ບໍ່ວ່າຕ່າງປະເທດ. ຢູ່ໃສເສຖກິຈຕົກຕໍ່າຄືກັນ. ລາວແຮງຮ້າຍ. ໂອ໋ ຄ່າເງິນກີບ ກະອ່ອນຄ່າແດ່.”

ຢູ່ນະຄອນຫລວງພຣະບາງ ຜູ້ປະກອບການທຸຣະກິຈ ນາງນຶ່ງ ເວົ້າຕໍ່ວິທຍຸເອເຊັຽເສຣີ ໃນມືດຽວກັນນີ້ວ່າ ນາງເອງ ບໍ່ໄດ້ໄປທ່ຽວສລອງປີໃໝ່ສາກົລ ຢູ່ຕ່າງແຂວງ ເພື່ອປະຢັດຄ່າໃຊ້ຈ່າຍ, ແຕ່ຈັດຢູ່ພາຍໃນເຮືອນ. ສ່ວນນັກທ່ອງທ່ຽວ ທີ່ມາທ່ຽວຢູ່ນະຄອນຫລວງພຣະບາງ ໃນໄລຍະບຸນປີໃໝ່ສາກົລນີ້ ສ່ວນໃຫຍ່ແມ່ນນັກທ່ອງທ່ຽວ ຈາກໄທຍ, ສ່ວນຄົນລາວ ຍັງບໍ່ມາທ່ຽວເທື່ອ.

“ຢູ່ເຮືອນຊື່ໆແຫລະ. ບໍ່ຢາກເດີນທາງເທື່ອ ຊ່ວງນີ້ນ່າ. ໂອ໋ ປີໃໝ່ ສ່ວນຫລາຍກະເປັນຄົນໄທຍ. ຄົນລາວເຮົາ ເພິ່ນບໍ່ຢາກມາທ່ຽວເທື່ອ ນ່າ.”

ພະນັກງານໂຮງແຮມແຫ່ງນຶ່ງ ຢູ່ນະຄອນຫລວງພຣະບາງ ເວົ້າເຖິງນັກທ່ອງທ່ຽວ ທີ່ເຂົ້າມາທ່ຽວ ໃນໄລຍະບຸນປີໃໝ່ສາກົລນີ້ວ່າ ສ່ວນໃຫຍ່ ມີແຕ່ຄົນຕ່າງປະເທດ, ສ່ວນນັກທ່ອງທ່ຽວລາວ ມີຈໍານວນໜ້ອຍ ຊຶ່ງຕົນເອງເຫັນວ່ານັ້ນ ເປັນບັນຫານຶ່ງ ທີ່ໄດ້ຮັບຜົລກະທົບ ຈາກເສຖກິຈລາວຕົກຕໍ່າ ແລະເງິນກີບອ່ອນຄ່າ.

“ເຂົາເຈົ້າກໍມາຢູ່, ເຈົ້າ. ຄົນວຽງຈັນ ຫລືວ່າ ຄົນທີ່ນີ້, ທີ່ນັ້ນ. ເຂົາເຈົ້າກໍມາທ່ຽວຢູ່ຫລວງພຣະບາງ. ມັນຈະໜ້ອຍກວ່າຄົນຕ່າງປະເທດ. ແມ່ນແຫລະ ອັນນີ້ ກໍເປັນບັນຫາອັນນຶ່ງເດ້.”

ແຕ່ເຖິງຢ່າງໃດກໍຕາມ ພະນັກງານໂຮງແຮມແຫ່ງນຶ່ງ ຢູ່ເມືອງ ວັງວຽງ ແຂວງວຽງຈັນ ເວົ້າຕໍ່ວິທຍຸເອເຊັຽເສຣີ ໃນມື້ວັນທີ 2 ມົກກະຣາວ່າ ໃນໄລຍະບຸນປີໃໝ່ສາກົລນີ້ ມີຄົນໄທຍ ແລະຄົນລາວ ມາຫລາຍຢູ່ ມາເປັນຄອບຄົວ ເດີນທາງມາທ່ຽວ. ສະເພາະຢູ່ເມືອງວັງວຽງນີ້ ສ່ວນໃຫຍ່ໃຊ້ຈ່າຍຢ່າງປະຢັດ ແລະເລືອກເຊົ່າຫ້ອງພັກ ບ່ອນທີ່ລາຄາຖືກ.

“ປີໃໝ່ມື້ວານນີ້ ມີແຕ່ຄົນໄທຍ ເຈົ້າ, ແຕ່ຄົນລາວກະມາຫລາຍຢູ່, ເຈົ້າ; ແຕ່ວ່າເຂົາ ເຈົ້າຈະໄປເລືອກຢູ່ບ່ອນໃດ ທີ່ມັນສະດວກ. ມີບ່ອນຈອດຣົຖບໍ່ ຫລືບໍ່ ສ່ວນຫລາຍຈະໄປນອນຢູ່ບັງກະໂລ ຢູ່ແຄມນໍ້າ. ຄົນລາວມາລະເຂົາເຈົ້າ ມາເປັນຄອບຄົວ ຣົຖຄັນໃຜ ຄັນລາວ.”

ແຕ່ເຖິງຢ່າງໃດກໍຕາມ ໃນຕອນກາງຄືນ ຂອງມື້ວັນທີ 31 ທັນວາທີ່ຜ່ານມານີ້ ຢູ່ແຫລ່ງທ່ອງທ່ຽວບາງແຂວງຂອງລາວ ເປັນຕົ້ນຢູ່ ປະຕູໄຊ ໃນນະຄອນຫລວງວຽງຈັນ ກໍໄດ້ມີການຈັດພິທີ ນັບຖອຍຫລັງ ສົ່ງທ້າຍປີເກົ່າ ຕ້ອນຮັບປີໃໝ່ສາ ກົລ 2024, ມີຊາວລາວ ແລະນັກທ່ອງທ່ຽວຕ່າງປະເທດ ຫລາຍພັນຄົນ ເຂົ້າຮ່ວມມ່ວນຊື່ນ.

ແລະຢູ່ຫໍວັທນະທັມແຫ່ງຊາຕ ໄດ້ມີງານຣາຕຣີ, ສິລປະຂ້າມຊາຕ ລາວ-ຈີນ ໂດຍແມ່ນສະຖານີ ວິທຍຸ ແລະໂທຣະພາບ ແຂວງກວາງຊີ ຂອງຈີນ ແລະໂທຣະພາບ ແຫ່ງຊາຕ ຂອງລາວ ຮ່ວມກັນຈັດຂຶ້ນ, ມີຫລາຍພາກສ່ວນ ເຂົ້າຮ່ວມ. ນຶ່ງໃນນັ້ນ ມີທັງເຈົ້າໜ້າທີ່ ຈາກບໍຣິສັດ ທາງຣົຖໄຟ ລາວ-ຈີນ ຈໍາກັດ ນໍາດ້ວຍ.

ໃນໂອກາດປີໃໝ່ສາກົລ 2024 ນີ້ ທ່ານ ທອງລຸນ ສີສຸລິດ, ປະທານປະເທດ ໄດ້ສົ່ງສານອວຍພອນ ໃຫ້ປະຊາຊົນລາວ ແລະສະແດງຄວາມຊົມເຊີຍ ທຸກພາກສ່ວນ ທີ່ພ້ອມກັນຜ່ານຜ່າ ຄວາມຫຍຸ້ງຍາກ ແລະສິ່ງທ້າທາຍນາໆປະການ ທີ່ປະເທດລາວ ປະເຊີນຢູ່ໃນຂະນະນີ້.