ຄ່ານໍ້າຄ່າໄຟຈະຍັງ ຢູ່ເກົ່າ

ມະນີຈັນ
2020-04-24
Share
F-Elect-water ຣັຖບານລາວ ຍັງບໍ່ເຫັນດີ ໃຫ້ຫລຸດຄ່າ ໄຟຟ້າ ແລະ ນໍ້າປະປາລົງ ຕາມການສເນີ ຂອງຣັຖວິສາຫະກິດໄຟຟ້າລາວ
ຮູບຈາກ : ນັກຂ່າວພົລເມືອງ

ທ່ານ ຈະເລີນ ເຢັຍປາວເຮີ ຣັຖມົນຕຣີ ປະຈໍາສໍານັກງານ ນາຍົກຣັຖມົນຕຣີ ສປປລາວ ຣາຍງານກ່ຽວກັບຜົລກອງປະຊຸມຣັຖບານ ປະຈໍາ ເດືອນເມສາ ຊຶ່ງໄດ້ຖືກຈັດຂຶ້ນໃນມື້ວັນທີ 23 ເມສາ 2020 ນີ້ວ່າ ການທີ່ຣັຖວິສາຫະກິດໄຟຟ້າລາວ ສເນີໃຫ້ຣັຖບານຫລຸດຄ່າໄຟຟ້າ ແລະ ນໍ້າປະປາໃຫ້ປະຊາຊົນ ແລະພາກທຸຣະກິດ ທີ່ໄດ້ຮັບຜົລກະທົບ ຈາກການຣະບາດຂອງເຊື້ອພຍາດ ໂຄວິດ-19 ນັບຕັ້ງແຕ່ເດືອນ ພຶສພາ ເປັນຕົ້ນໄປນັ້ນ ຣັຖບານຍັງບໍ່ເຫັນດີນໍາ ແລະຈະຄົ້ນຄວ້າ ເຣື່ອງນີ້ໃຫ້ລະອຽດຕື່ມ ຍ້ອນມັນຈະກະທົບຕໍ່ການເກັບຣາຍຮັບ ຫລາຍສົມຄວນ, ດັ່ງທີ່ທ່ານໄດ້ກ່າວຕອນນຶ່ງວ່າ:

“ສໍາລັບການສເນີ ຂໍຫລຸດອັດຕຣາອາກອນ ມູລຄ່າເພີ່ມໄຟຟ້າ ນໍ້າປະປານັ້ນ ເນື່ອງຈາກຈະມີຜົລກະທົບ ຕໍ່ການເກັບຣາຍຮັບຫຼາຍສົມຄວນ ຈຶ່ງເຫັນວ່າບໍ່ທັນຕົກລົງໄດ້ເທື່ອ ຈະນໍາໄປຄົ້ນຄວ້າຢ່າງລະອຽດ ຈະແຈ້ງຕື່ມ ແລ້ວຈຶ່ງຄ່ອຍພິຈາຣະນາ ຈຶ່ງຄ່ອຍຕົກລົງຕໍ່ໄປ.”

ທ່ານເວົ້າວ່າ ໃນໄລຍະເກີດການຣະບາດຂອງເຊື້ອພຍາດໂຄວິດ-19 ນີ້ເຮັດໃຫ້ລາວ ໄດ້ຮັບຜົລກະທົບໜັກ ແລະຂາດຣາຍໄດ້ຈາກທຸກແຫຼ່ງ ຢ່າງຫຼວງຫຼາຍໂດຍສະເພາະເຣຶ່ອງການທ່ອງທ່ຽວ ແລະການສົ່ງ ສິນຄ້າອອກໄປຕ່າງປະເທດ, ດັ່ງນັ້ນຈຶ່ງເຫັນວ່າມາຕການຫລຸດຄ່າໄຟຟ້າ ແລະ ນໍ້າປະປານີ້ ຕ້ອງໄດ້ຄົ້ນຄວ້າ ແລະ ພິຈາຣະນາຕື່ມ.

ກ່ຽວກັບເຣຶ່ອງທີ່ວ່ານີ້ ເຈົ້າຂອງຮ້ານແປງຣົດຜູ້ນຶ່ງ ຢູ່ແຂວງວຽງຈັນ ກ່າວຕໍ່ວິທຍຸເອເຊັຍເສຣີ ໃນມື້ວັນທີ 24 ເມສາ ນີ້ວ່າ ໄລຍະຜ່ານມາ ກໍເຫັນຣັຖບານລາວແຈ້ງວ່າ ຈະຫຼຸດຜ່ອນຄ່າໄຟຟ້າ ແລະຄ່ານໍ້າປະປາ ໃຫ້ປະຊາຊົນ ແຕ່ຖ້າຫາກຣັຖບານບໍ່ຫຼຸດໃຫ້ ຕາມທີ່ຣັຖວິສາຫະກິດ ໄຟຟ້າລາວ ສເນີໄປນັ້ນ ປະຊາຊົນຜູ້ຫາເຊົ້າກິນຄໍ່າ ກໍຈະບໍ່ມີເງິນຈ່າຍໃຫ້ ເພາະບໍ່ມີຣາຍໄດ້ຄືແຕ່ກ່ອນ ຈໍາເປັນຕ້ອງໄດ້ຕິດໜີ້ຄ່ານໍ້າຄ່າໄຟ ດັ່ງທີ່ທ່ານກ່າວວ່າ:

“ເຫັນແຕ່ເຂົາເວົ້າ ເຂົາເວົ້າຢູ່ ຄັນມັນບໍ່ມີເງິນຈ່າຍ ມັນກະຈໍາເປັນໄດ້ຕິດໜີ້ເນາະ ເອົາເງິນສິໄດ໋ມາຈ່າຍ ເງິນສິຊື້ກິນຍັງບໍ່ມີຕິດໜີ້ຢູ່ຫັ້ນແລ້ວ ມີເງິນແລ້ວກະຈັ່ງຈ່າຍ.”

ແລະຊາວນະຄອນຫລວງວຽງຈັນ ຜູ້ນຶ່ງ ທີ່ບໍ່ປະສົງອອກຊື່ ແລະສຽງກ່າວຕໍ່ RFA ໃນມື້ດຽວກັນນີ້ວ່າ:

“ເຫັນຣັຖບານລາວແຈ້ງວ່າ ຈະບໍ່ເກັບຄ່າໄຟຟ້າ ຄ່ານໍ້າປະປານໍາປະຊາຊົນ ແຕ່ກໍບໍ່ຮູ້ວ່າຈະເປັນເດືອນໃດ ແຕ່ເມື່ອກາງເດືອນເມສານີ້ກໍຍັງ ມີເຈົ້າໜ້າທີ່ໄຟຟ້າ ມາເກັບເງິນນໍາຢູ່ ແລະຄ່າໄຟຟ້າກໍແພງຂຶ້ນເກືອບ 1 ແສນກີບ ຫາກເດືອນຖັດໄປ ຖ້າບໍ່ຫລຸດຄ່າໄຟຟ້າລົງ ປະຊາຊົນ ກໍຈະໄດ້ຈ່າຍແພງກວ່າເດືອນກ່ອນ ແນ່ນອນ.”

ສ່ວນເຈົ້າຂອງຮ້ານຂາຍເຄື່ອງຍ່ອຍຜູ້ນຶ່ງ ຢູ່ແຂວງອັດຕະປື ເວົ້າວ່າໄດ້ປິດຮ້ານຂາຍເຄຶ່ອງມາ ເດືອນເຕັມແລ້ວ ບໍ່ມີຣາຍໄດ້ແຕ່ຍັງຕ້ອງມາ ເສັຍຄ່າໄຟຟ້າ ແພງກວ່າໄລຍະຜ່ານມາ, ຖ້າຣັຖບານຍັງບໍ່ຫຼຸດຜ່ອນ ຄ່າໄຟຟ້າຄ່ານໍ້າປະປາໃຫ້ ປະຊາຊົນທີ່ໄດ້ຮັບ ຜົລກະທົບນັ້ນກໍຄົງ ເດືອດຮ້ອນ:

“ທາງພີ້ຄ່າໄຟຟ້າຊິຂຶ້ນໂອ໋! ຂຶ້ນຂນາດວ່າອີ່ພໍ່ບໍ່ຢູ່ເປັນເດືອນແລ້ວນີ໋ ເກັບປົກຕິແລ້ວ. ທັມດາເຮົາກໍຕ້ອງບໍ່ເກັບ ຄືລູກວ່າຫັ້ນແລ້ວນໍ໊ ຄັນບໍ່ມີ ຣາຍຮັບ ແລະ ຣາຍໄດ້ຫັ້ນ.”

ກ່ຽວກັບເຣຶ່ອງນີ້ ເຈົ້າໜ້າທີ່ຣັຖວິສາຫະກິດໄຟຟ້າລາວ ທ່ານນຶ່ງເວົ້າຕໍ່ RFA ໃນມື້ວັນທີ 24 ເມສານີ້ວ່າຍັງບໍ່ທັນໄດ້ຮັບແຈ້ງການຈາກທາງ ຣັຖບານເທື່ອ:

“ຫັ້ນແຫລະ ຍັງບໍ່ທັນເຫັນໜັງສືໂຕນັ້ນ ຖ້າເຫັນໜັງສືໂຕນັ້ນ ອາຈມີຄວາມຄືບໜ້າ ຈະໄດ້ຈັດຕັ້ງປະຕິບັດຕາມເພິ່ນວ່າເນາະ ແຕ່ວ່າທາງເຮົາ ຍັງບໍ່ໄດ້ໜັງສືໂຕນັ້ນເທື່ອ ມີແຕ່ວ່າກະສິນໍາໃຊ້ຫລຸດເດືອນ 5.”

ທ່ານກ່າວຕື່ມວ່າ ແຕ່ເຖິງຢ່າງໃດ ຣັຖວິສາຫະກິດໄຟຟ້າລາວ ຈະຍັງປະຕິບັດຕາມມາຕການເດີມ ຄືຈະຫລຸດຄ່າໄຟຟ້າ ໃຫ້ປະຊາຊົນ ແລະ ພາກທຸຣະກິດ ທີ່ໄດ້ຮັບຜົລກະທົບ ຈາກການຣະບາດຂອງເຊື້ອພຍາດ ໂຄວິດ-19 ຊຶ່ງຈະເລິ້ມແຕ່ເດືອນພຶສພານີ້ໄປ ແຕ່ຖ້າຣັຖບານມີແຈ້ງ ການມາຣັຖວິສາຫະກິດໄຟຟ້າລາວ ກໍຈະແຈ້ງໃຫ້ປະຊາຊົນຊາບ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ