ຄົນງານຣົດໄຟ ສ່ວນນຶ່ງ ໄດ້ເງິນເດືອນ ແລ້ວ

ຄົນງານລາວປະມານ 20 ປາຍຄົນ ທີ່ເຮັດວຽກກໍ່ສ້າງທາງຣົດໄຟລາວ-ຈີນ ຢູ່ເຂດບ້ານດົງໂພນແຮ່ ເມືອງຫາດຊາຍຟອງ ນະຄອນ ຫຼວງວຽງຈັນ ໄດ້ເງິນເດືອນ ຈາກບໍຣິສັດຈີນ ທີ່ເປັນນາຍຈ້າງແລ້ວ ໃນມື້ວັນທີ 18 ກັນຍານີ້ ພາຍຫຼັງທີ່ພວກເຂົາເຈົ້າ ໄດ້ທວງຖາມ ເອົາເປັນເວລາເດືອນປາຍ ຊຶ່ງໃນນັ້ນມີທັງໄດ້ປິດໄຟຟ້າ ຢູ່ບ່ອນກໍ່ສ້າງເມື່ອສັປດາທີ່ຜ່ານມາ ເພື່ອກົດດັນນາຍຈ້າງຈ່າຍເງິນເດືອນໃຫ້ ດັ່ງຄົນງານນາງນຶ່ງ ເວົ້າຕໍ່ວິທຍຸເອເຊັຽເສຣີ ໃນມື້ວັນທີ 21 ກັນຍານີ້ວ່າ:

“ໄດ້ແລ້ວ ໄດ້ວັນທີ 18 ຫົວໜ້າລາວໄປດັບໄຟ ໄປອັນນັ້ນ ແລ້ວເຂົາກະຈ່າຍໃຫ້ໝົດເລີຍ ດຽວນີ້ ຂະເຈົ້າກັບບ້ານໝົດແລ້ວ ເພາະວ່າ ຈ່າຍເງິນໃຫ້ເຂົາໝົດ ມື້ວານນີ້ ນ້ອງກະໄປຄອບເຈົ້າໜ້າທີ່ ເພາະວ່າເຮົາໄປແຈ້ງກ່ອນແລ້ວເນາະ ບາດນີ້ເຮົາພັດໄດ້ເງິນກ່ອນຫັ້ນນ່າ.”

ນາງເວົ້າຕື່ມວ່າ ຫຼັງຈາກຕົນ ແລະໝູ່ຄົນງານອີກຈໍານວນນຶ່ງ ໄດ້ເງິນເດືອນແລ້ວ ກໍພາກັນລາອອກຈາກ ການເຮັດວຽກໃນໂຄງການ ກໍ່ສ້າງ ທາງຣົດໄຟລາວ-ຈີນ ຢູ່ເຂດດັ່ງກ່າວທັນທີ ເພື່ອໄປຊອກຫາເຮັດວຽກຢູ່ບ່ອນອື່ນ ຍ້ອນຢ້ານວ່າ ອາຈຖືກນາຍຈ້າງຈີນນີ້ ບໍ່ຈ່າຍ ເງິນເດືອນໃຫ້ອີກ. ສ່ວນຄົນງານລາວອີກປະມານ 100 ປາຍຄົນ ທີ່ຍັງບໍ່ທັນໄດ້ເງິນເດືອນນັ້ນ ແມ່ນພວກເຂົາເຈົ້າເຮັດວຽກນໍາ ນາຍ ຈ້າງຈີນໂດຍກົງ ບໍ່ໄດ້ເຮັດວຽກນໍາບໍຣິສັດ ຜູ້ຮັເໝົາກໍ່ສ້າງຄືກັນກັບພວກຕົນ.

ຄົນງານອີກຜູ້ນຶ່ງ ກໍເວົ້າວ່າ ພາຍຫຼັງໄດ້ຮັບເງິນເດືອນຄົບຖ້ວນ ຈາກນາຍຈ້າງຈີນແລ້ວ ຕົນກໍຂໍລາອອກທັນທີ ເພື່ອໄປຊອກຫາ ເຮັດ ວຽກກໍ່ສ້າງຢູ່ບ່ອນອື່ນ ເຮັດວຽກນໍາບໍຣິສັດເອກຊົນລາວ ຍ້ອນໝັ້ນໃຈວ່າ ນາຍຈ້າງຄົນລາວ ຈະຈ່າຍເງິນເດືອນໃຫ້ຕາມເວລາທີ່ກໍານົດ, ບໍ່ຄືນາຍຈ້າງຈີນ:

“ຈ່າຍມາແລ້ວ ເຈົ້າ ໃຫ້ຄົບແລ້ວໄດ້ເງິນ 2 ລ້ານກີບ ຊຸມເຮົາໄດ້ຄົບແລ້ວແຕ່ຊຸມອື່ນກະບໍ່ຮູ້ນ່າ ໄດ້ແລ້ວ ນ້ອງອອກໄປຫາເຮັດວຽກ ບ່ອນໃໝ່ແລ້ວ ເງິນມັນຊ້ານ່າ ເຮົາກະເລີຍບໍ່ຢູ່ນ່າ ສິໄປຫາເຮັດກໍ່ສ້າງນໍາເອກຊົນນີ້ລະ ເງິນມັນສະດວກ ອັນນີ້ເຮົາໄປປິດໄຟ 2 ມື້ ພຸ້ນຈຶ່ງໄດ້.”

ແລະຄົນງານອີກຜູ້ນຶ່ງ ທີ່ໄດ້ເງິນເດືອນແລ້ວ ກໍເວົ້າຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ ຫຼັງຈາກໄດ້ເງິນເດືອນຄົບຖ້ວນແລ້ວ ຄົນ ງານບາງຄົນກໍຕັ້ງໃຈວ່າ ຈະກັບຄືນ ເມືອບ້ານຢູ່ຕ່າງແຂວງກ່ອນ ເນື່ອງຈາກທາງຄອບຄົວເປັນຫ່ວງນໍາຫຼາຍ ແລະ ຖ້າມີໂອກາດ ກໍຈະກັບມາເຮັດວຽກຢູ່ນະຄອນຫຼວງວຽງຈັນອີກ, ແຕ່ເດັດຂາດ ຈະບໍ່ເຮັດວຽກນໍານາຍຈ້າງຈີນອີກ:

“ໄດ້ເງິນແລ້ວ ສິຂໍພັກຜ່ອນກ່ອນນ່າ ເມືອຢາມພໍ່ແມ່ກ່ອນ ທາງພໍ່ແມ່ເຂົາກະເປັນຫ່ວງເຮົາແຮງແຫຼະ ປີປາຍ ຍັງບໍ່ໄດ້ເມືອບ້ານນ່າ ພັກໄດ້ເກືອບສິຮອດເດືອນແລ້ວ ໂອ໋ ຄາເຮັດນໍາລາວມານີ້. ”

ສ່ວນຄົນງານຜູ້ອື່ນໆ ທີ່ເຮັດວຽກໃນໂຄງການ ກໍ່ສ້າງທາງຣົດໄຟລາວ-ຈີນ ຢູ່ເຂດບ້ານດົງໂພສີ ຊຶ່ງຖືກນາຍຈ້າງຈີນ ບໍ່ຈ່າຍເງິນເດືອນ ໃຫ້ຄືກັນນັ້ນ ມາຮອດມື້ນີ້ ກໍຍັງບໍ່ໄດ້ເງີນເດືອນເທື່ອ ແລະ ກໍບໍ່ມີທ່າທີວ່າ ນາຍຈ້າງຈີນຈະຈ່າຍເງິນເດືອນໃຫ້, ເຮັດໃຫ້ພວກເຂົາເຈົ້າ ສ່ວນນຶ່ງຮູ້ສຶກໝົດຫວັງ ແລະກຽມຕົວກັບຄືນບ້ານຢູ່ຕ່າງແຂວງ ໂດຍຈະບໍ່ທວງເອົາເງິນເດືອນຈາກນາຍຈ້າງຈີນຕື່ມອີກ ຊຶ່ງສາເຫດນຶ່ງ ກໍຍ້ອນບໍ່ມີພາກສ່ວນໃດມາຊ່ວຍແກ້ໄຂໃຫ້ ດັ່ງຄົນງານທີ່ຍັງບໍ່ທັນໄດ້ເງິນເດືອນເວົ້າວ່າ:

“ບໍ່ທວງແລ້ວ ເຈົ້າ ຖ້າແຕ່ກັບ ເພາະວ່າທ່າທາງບໍ່ທັນໄດ້ ຖາມແນວນັ້ນແນວນີ້ ລະກະແບບວ່າ ບໍ່ມີໃບເຊັນສັນຍາ ໃບອີ່ຫຍັງຫັ້ນນ່າ ເຈົ້າ ມັນສິບໍ່ໄດ້ຄືນ ເອົາຍາກ ເຮົາຫາທາງກະບໍ່ໄດ້ ເຣື່ອງນີ້ ຄັນໄປທວງແບບໃບເອົາເອກສານ ກະບໍ່ມີຊີ້ນ່າ ໂຕຫຼັກຖານ.”

ກ່ຽວກັບເຣື່ອງນີ້ ວິທຍຸເອເຊັຽເສຣີ ໄດ້ຕິດຕໍ່ໄປຫາຫ້ອງການສັນຕິບານ ເມືອງຫາດຊາຍຟອງ ແລະບໍຣິສັດທາງຣົດໄຟລາວ-ຈີນຈໍາກັດ ເພື່ອຂໍຮູ້ຣາຍລະອຽດ ແຕ່ເຈົ້າໜ້າທີ່ບອກວ່າ ບໍ່ຮູ້ເຣື່ອງດັ່ງກ່າວ ແລະບໍ່ມີຄໍາເຫັນໃດໆ.

ເວົ້າເຖິງເຣື່ອງນີ້ ເຈົ້າໜ້າທີ່ກະຊວງແຮງງານ ແລະສວັດດີການສັງຄົມ ທ່ານນຶ່ງ ຜູ້ຂໍສງວນຊື່ ແລະສຽງເວົ້າວ່າ ທາງກະຊວງນີ້ ຍັງບໍ່ ທັນໄດ້ສົ່ງເຈົ້າໜ້າທີ່ໄປສືບຫາຄວາມຈິງ ແລະຊ່ອຍແກ້ໄຂໃຫ້ເທື່ອ ຖ້າໃຫ້ຄົນງານທີ່ຖືກສໍ້ໂກງເງິນເດືອນ ຂຽນຈົດໝາຍສເນີມາຍັງ ກະຊວງພີ້ໂດຍກົງກ່ອນ.

ຄົນງານລາວ ທີ່ຍັງບໍ່ທັນໄດ້ຮັບເງິນເດືອນ ຈາກນາຍຈ້າງຈີນ ໃນໂຄງການສ້າງທາງຣົດໄຟລາວ-ຈີນ ຢູ່ 2 ເຂດ ບ້ານດັ່ງກ່າວ ມີ ຈໍານວນຢ່າງໜ້ອຍ 100 ປາຍຄົນ, ເປັນເງິນທັງໝົດ ບໍ່ຕໍ່າກວ່າ 100 ປາຍລ້ານກີບ. ຄົນງານລາວ ສ່ວນໃຫຍ່ ມາຈາກຕ່າງແຂວງ ເປັນຕົ້ນ ແຂວງຫຼວງພຣະບາງ, ອຸດົມໄຊ, ໄຊຍະບູຣີ. ສໍາລັບຄົນງານຈາກປະເທດອື່ນ ເປັນຕົ້ນ ຈີນ ແລະ ວຽດນາມ ບໍ່ມີບັນຫາ ເຣື່ອງເງິນເດືອນນັ້ນ.

ມາເຖິງປັດຈຸບັນ ການກໍ່ສ້າງ ທາງຣົດໄຟລາວ-ຈີນ ທີ່ມີຄວາມຍາວ 422 ກິໂລແມັດ ແຕ່ນະຄອນຫຼວງວຽງຈັນ ໄປຫາບໍ່ເຕັນ ແຂວງ ຫຼວງນໍ້າທາ ມີມູນຄ່າປະມານ 6 ຕື້ໂດລາສະຫະຣັດ ຄືບໜ້າໄປໄດ້ເກືອບ 94% ແລ້ວ ແລະມີແຜນທົດລອງແລ່ນ ໃນເດືອນຕຸລາ ທີ່ຈະມາເຖິງນີ້ ກ່ອນຈະເປີດໃຊ້ໃນມື້ວັນທີ 2 ທັນວາ 2021.