ຈີນໄດ້ດິນປູກກ້ວຍອີກ 600 ເຮັກຕາ

ພູວົງສ໌
2019-05-15
ອີແມວລ໌
ຄໍາເຫັນ
Share
ພິມ
ສວນປູກກ້ວຍ ຂອງນັກລົງທຶນຈີນ ຢູ່ເມືອງຮຸນ ແຂວງອຸດົມໄຊ ທີ່ມີຢູ່ແລ້ວ ແລະ ເຄີຍເປັນທົ່ງນາປູກເຂົ້າ
ສວນປູກກ້ວຍ ຂອງນັກລົງທຶນຈີນ ຢູ່ເມືອງຮຸນ ແຂວງອຸດົມໄຊ ທີ່ມີຢູ່ແລ້ວ ແລະ ເຄີຍເປັນທົ່ງນາປູກເຂົ້າ
ຮູບພາບຈາກ : ນັກຂ່າວພົລເມືອງ

ຫຼາຍແຂວງທາງພາກເໜືອຂອງລາວ ຍັງສືບຕໍ່ອະນຸຍາດ ໃຫ້ນັກລົງທຶນຈີນ ທີ່ໝົດສັນຍາສັມປະທານດິນ ໄປແລ້ວ ສືບຕໍ່ປູກກ້ວຍຢູ່ຕໍ່ໄປ ແລະ ຍັງໃຫ້ເຂົ້າມາບຸກເບີກເນື້ອທີ່ປູກກ້ວຍ ແຫ່ງໃໝ່ ຕື່ມອີກ. ໃນນັ້ນ, ກໍມີທັງ ແຂວງອຸດົມໄຊ, ເຊິ່ງໃນປີ 2019 ນີ້ ກໍໄດ້ອະນຸມັດໃຫ້ ນັກລົງທຶນຈີນ ເຂົ້າມາສັມປະທານ ເນື້ອທີ່ປູກກ້ວຍ ຢູ່ເມືອງຮຸນ ໃນເນື້ອທີ່ປະມານ 600 ປາຍເຮັກຕ້າ, ອີງຕາມຄວາມເວົ້າ ຂອງເຈົ້າໜ້າທີ່ ແຂວງອຸດົມໄຊ ທ່ານນຶ່ງ ທີ່ໄດ້ກ່າວຕໍ່ຜູ້ສື່ຂ່າວເອເຊັຽເສຣີ ໃນມື້ວັນທີ 15 ພຶສພາ ນີ້ວ່າ:

“ແມ່ນຈີນໝົດນັ້ນແຫຼະ ເຣື້ອງປູກກ້ວຍຫັ້ນ, ລາວເຮົານັ້ນບໍ່ມີ. ໂຕປູກໃໝ່ຫັ້ນປະມານ 600 ປາຍເຮັກຕ້າ. ຂະເຈົ້າກ້າແລ້ວ ເຣີ້ມສິປູກປີນີ້ ແຫຼະ ຢູ່ເມືອງຮຸນ, ແຕ່ຂະເຈົ້າຕ້ອງປະຕິບັດ ຕາມຣະບຽບຂອງກະສິກັມຫັ້ນແຫຼະ.”

ທາງການແຂວງອຸດົມໄຊ ອະນຸມັດໃຫ້ບໍຣິສັດຈີນ ເຂົ້າມາບຸກເບີກເນື້ອທີ່ ປູກກ້ວຍປະມານ 600 ປາຍເຮັກຕ້າ ພາຍຫຼັງທີ່ບໍຣິສັດໄດ້ເຮັດ ບົດບັນທຶກ ແລະ ສັນຍາວ່າ ຈະຍິນຍອມໃຫ້ເຈົ້າໜ້າທີ່ ຜແນກກະສິກັມ ແລະ ປ່າໄມ້ ແລະ ຜແນກອຸດສາຫະກັມ ແລະ ການຄ້າແຂວງ ຕິດຕາມກວດກາ ການນຳໃຊ້ສານເຄມີ ແລະຜົລກະທົບຕໍ່ສິ່ງແວດລ້ອມ ຕັ້ງແຕ່ເຣີ້ມປູກກ້ວຍ ຈົນຮອດໝົດສັນຍາສັມປະທານ. ປະຈຸບັນ, ເນື້ອທີ່ປູກກ້ວຍ ຢູ່ແຂວງອຸດົມໄຊ ຫຼຸດລົງເຫຼືອ 4,800 ເຮັກຕ້າ ຈາກທີ່ແຕ່ກ່ອນມີເກືອບ 7,000 ເຮັກຕ້າ.

ນອກຈາກນີ້, ທົ່ວແຂວງຜົ້ງສາລີ ກໍມີການປູກກ້ວຍໃນເນື້ອທີ່ ທັງໝົດປະມານ 1,000 ເຮັກຕ້າ, ເຊິ່ງເປັນຂອງນັກລົງທຶນຈີນ 3 ບໍຣິສັດ ແລະ ມາຮອດດຽວນີ້ ສັນຍາປູກກ້ວຍນັ້ນ ກໍໄດ້ໝົດລົງແລ້ວ ແລະ ທາງການກໍກຳລັງລໍຖ້າຢູ່ວ່າ ທັງ 03 ບໍຣິສັດນີ້ ຈະຂໍສເນີປູກກ້ວຍ ອີກຕໍ່ໄປ ຫຼືບໍ່ ຫຼືຈະຫັນໄປ ປູກກາເຟແທນ. ຫາກສືບຕໍ່, ກໍຈະອະນຸມັດ ຍ້ອນຂະເຈົ້າເຮັດກະສິກັມສະອາດ ແລະ ໄດ້ຕາມມາຕຖານ ຂອງທາງການແຂວງວາງອອກ. ດັ່ງເຈົ້າໜ້າທີ່ແຂວງຜົ້ງສາລີ ທ່ານນຶ່ງ ໄດ້ກ່າວໃນມື້ດຽວກັນນີ້ວ່າ:

“03 ບໍຣິສັດໄດ໋ ມັນໝົດອາຍຸແລ້ວ. ກໍດຽວນີ້ກຳລັງປະເມີນວ່າ ທາງບໍຣິສັດ ຈະສືບຕໍ່ບໍ່? ຫຼືວ່າຊິໂຈະພື້ນທີ່ສວນກ້ວຍຫັ້ນ. ແລ້ວກໍຊິຫັນໄປ ໃສ່ພື້ນທີ່ກາເຟ. ດຽວນີ້ຫາກໍເວົ້າກັນຢູ່ ຄັນບໍ່ສືບຕໍ່ ເຂົາກໍຈະໃຫ້ຫັນໄປທາງໂຄງການກາເຟ ໃນພື້ນທີ່ໝາກກ້ວຍນີ້ນະ.”

ເຖິງຢ່າງໃດກໍຕາມ, ເຖິງແມ່ນວ່າຈະມີຄຳສັ່ງ ຈາກກະຊວງກຳສິກັມ ແລະ ປ່າໄມ້ ຫ້າມເດັດຂາດ ບໍ່ໃຫ້ນັກລົງທຶນ ຂຍາຍພື້ນທີ່ ປູກກ້ວຍ ບໍ່ໃຫ້ສືບຕໍ່ ແລະ ບໍ່ໃຫ້ບຸກເບີກພື້ນທີ່ປູກກ້ວຍໃໝ່, ແຕ່ໃຫ້ຫັນໄປປູກພືດອື່ນ ທີ່ບໍ່ສົ່ງຜົລກະທົບຕໍ່ດິນ, ແຫຼ່ງນ້ຳ, ສິ່ງແວດລ້ອມ ແລະ ສຸຂພາບຂອງປະຊາຊົນ, ແຕ່ກໍຍັງມີຫຼາຍແຂວງ ທີ່ບໍ່ປະຕິບັດຕາມ ແລະ ອຳນາດການປົກຄອງທ້ອງຖິ່ນ ຍັງມີການອະນຸຍາດໃຫ້ປູກກ້ວຍຢູ່ ຮວມທັງນະຄອນຫຼວງວຽງຈັນ ແລະ ບັນດາແຂວງໃກ້ຄຽງ.

ເຕັມຫນ້າ