ແຂວງບໍ່ແກ້ວ ຊຸກຍູ້ໃຫ້ນັກທຸລະກິດທ້ອງຖິ່ນ ໃຊ້ເງິນກີບ ແທນເງິນຕາຕ່າງປະເທດ

ພະແນກອຸດສາຫະກໍາ ແລະການຄ້າ ແຂວງບໍ່ແກ້ວ ຈະປັບໃໝຮ້ານຄ້າພາຍໃນແຂວງ ທີ່ບໍ່ຕິປ້າຍລາຄາສິນຄ້າ ເປັນພາສາລາວ ແລະບໍ່ຊື້-ຂາຍສິນຄ້າ ເປັນເງິນກີບ ຖ້າກວດພົບ ຍັງລະເມີດເຮັດ ຈະມີການສຶກສາອົບຮົມ-ກ່າວເຕືອນ ແລະຄັນຍັງຝ່າຝືນອີກຕື່ມ ຈະປັບໃໝ ແຕ່ 10 ລ້ານກີບ ຫາ 20 ລ້ານກີບ ແລະຈະປັບໃໝເພີ່ມຂຶ້ນ 2 ເທົ່າ ຄັນຍັງຝ່າຝືນເຮັດຢູ່ຄືເກົ່າ, ເຊິ່ງມາດຕະການດັ່ງກ່າວ ໄດ້ບັງຄັບໃຊ້ໃນເມືອງຕ່າງໆທົ່ວແຂວງ ຍົກເວັ້ນເຂດເສດຖະກິດພິເສດສາມຫຼ່ຽມຄໍາ ທີ່ມີເຈົ້າໜາທີ່ໃນເຂດດັ່ງກ່າວ ກວດກາ ຕິດຕາມສະເພາະ, ດັ່ງເຈົ້າໜ້າທີ່ ພະແນກອຸດສາຫະກໍາ ແລະການຄ້າແຂວງບໍ່ແກ້ວ ທ່ານໜຶ່ງ ກ່າວຕໍ່ວິທຍຸເອເຊັຽເສຣີ ໃນວັນທີ່ 27 ກັນຍາ ນີ້ວ່າ:

“ສິນຄ້າຈໍາໜ່າຍຢູ່ລາວ ຫຼືວ່າຢູ່ຕາມຫ້າງຮ້ານ ເພິ່ນໃຫ້ຕິດສະຫຼາກເປັນເງິນກີບ ແລ້ວກະເປັນພາສາລາວເນາະ ສາມາດແຈ້ງມາຫາເຈົ້າໜ້າທີ່ ຂອງພະແນກການຄ້າ ເອີ່ ຢູ່ໃນເຂດ (ເຂດເສດຖະກິດພິເສດສາມຫຼ່ຽມຄໍາ) ນີ້ ເຮົາກໍ່ບໍ່ໄດ້ເຂົ້າໄປຫຍຸ້ງເນາະ ກະມີການຄຸ້ມຄອງ ມີຄະນະຄຸ້ມຄອງ.”

ໃນຂະນະທີ່ ສະພາບປັດຈຸບັນນີ້ ຮ້ານຄ້າຫຼາຍແຫຼ່ງໃນແຂວງບໍ່ແກ້ວ ກໍ່ລ້ວນແຕ່ຕິດປ້າຍລາຄ້າສິນຄ້າ ເປັນພາສາລາວ ແລະເປັນລາຄາເງິນກີບ ແຕ່ກໍ່ໃຫ້ລູກຄ້າ ສາມາດຈ່າຍຄ່າສິນຄ້າ ເປັນເງິນຕາຕ່າງປະເທດ ເປັນຕົ້ນ ເງິນບາດ ແລະເງິນຢວນ ແທນການຈ່າຍດ້ວຍເງິນກີບ ໂດຍມີການຄິດໄລ່ລາຄາ ຕາມອັດຕາແລກປ່ຽນຂອງເງິນກີບ ກັບເງິນຕາຕ່າງປະເທດ, ດັ່ງຜູ້ປະກອບການທຸລະກິດ ຢູ່ແຂວງບໍ່ແກ້ວ ທ່ານໜຶ່ງ ກ່າວວ່າ:

“ໂອ້ ຮັບເຈົ້າ ເງິນບາດກະເອົາ ເງິນກີບກະເອົາຫັ້ນແຫຼະ ເຮົາໄລ່ຕາມເລດແລ້ວແຕ່ສະດວກ ເຮົາຈ່າຍເງິນເນາະ ບາດກະໃຊ້ໄດ້ ເງິນກີບກະໃຊ້ໄດ້.”

ໃນຂະນະດຽວກັນ ຊາວບ້ານ ຢູ່ເມືອງຕົ້ນເຜິ້ງນາງໜຶ່ງ ກໍ່ຢືນຢັນວ່າ ຮ້ານຄ້າ ແລະທຸລະກິດຫຼາຍແຫ່ງ ໃນເມືອງຕົ້ນເຜິ້ງ ແລະແຂວງບໍ່ແກ້ວ ກໍ່ລ້ວນແຕ່ຮັບເງິນຕາຕ່າງປະເທດ ຈາກລູກຄ້າ ທັງເງິນບາດ, ເງິນຢວນ ແລະເງິນໂດລ້າສະຫະລັດ ຍ້ອນພໍ່ຄ້າ-ແມ່ຄ້າສ່ວນໃຫຍ່ ບໍ່ມັກຖືຄອງເງິນກີບ ເນື່ອງຈາກ ເງິນກີບຍັງສືບຕໍ່ອ່ອນຄ່າຢູ່, ດັ່ງນາງກ່າວວ່າ:

“ເງິນຫຍັງກະໄດ້ ເງິນຫຍັງເຂົາກໍ່ເອົາໝົດ ເຂົາເອົາໝົດຢູ່ທາງພີ້ນ່າ ເງິນກີບ, ເງິນບາດ, ເງິນຢວນ ເຂົາກະຈ່າຍຢູ່ເດີ້.”

ສ່ວນຜູ້ປະກອບການ ດ້ານການນໍາທ່ຽວ ຢູ່ແຂວງບໍ່ແກ້ວ ນາງໜຶ່ງ ກໍ່ເຫັນວ່າ ເປັນເລື່ອງປົກກະຕິຢູ່ແລ້ວ ທີ່ຮ້ານຄ້າຕ່າງໆທົ່ວແຂວງບໍ່ແກ້ວ ມີການຕິດປ້າຍລາຄາສິນຄ້າ ເປັນພາສາລາວ ແລະຕັ້ງລາຄາ ເປັນອັດຕາເງິນກີບ ແຕ່ສ່ວນໃຫຍ່ ລູກຄ້າບໍ່ໄດ້ຈ່າຍເງິນກີບ ໂດຍຈ່າຍເປັນເງິນບາດ ຫຼືເງິນຢວນແທນ ແລະຜູ້ຂາຍ ກໍ່ລ້ວນຮັບເອົາແຕ່ເງິນຕາຕ່າງປະເທດ ຈຶ່ງເປັນເລື່ອງຍາກທີ່ສຸດ ທີ່ຈະສາມາດຫ້າມ ການຊື້-ຂາຍສິນຄ້າ ເປັນເງິນຕາຕ່າງປະເທດ, ດັ່ງນາງກ່າວວ່າ:

“ເຂົາເຈົ້າຊິຕິດ ລາຄາເປັນເງິນກີບເນາະ ແຕ່ວ່າເຮົາມາຈ່າຍ ເປັນເງິນບາດກໍ່ໄດ້ ເຂົາຕີລາຄາຕາມເລດທະນາຄານ ຍັງປົກກະຕິຢູ່ ເງິນບາດນີ້ ຈ່າຍຢູ່ເຈົ້າ ຈ່າຍເງິນຫຍັງກໍ່ເອົາ.”

ທາງດ້ານພະນັກງານ ທີ່ເຮັດວຽກ ທາງດ້ານການເງິນຢູ່ແຂວງບໍ່ແກ້ວ ນາງໜຶ່ງ ກ່າວວ່າ ການລັກໃຊ້ຈ່າຍ ເງິນຕາຕ່າງປະເທດ ຢູ່ແຂວງບໍ່ແກ້ວ ເປັນເລື່ອງທີ່ແກ້ໄຂໄດ້ຍາກ ຍ້ອນພໍ່ຄ້າ-ແມ່ຄ້າຈໍານວນຫຼາຍ ກໍ່ມັກລື້ງເຄີຍ ກັບການຮັບເອົາເງິນຕາຕ່າງປະເທດ ຕັ້ງແຕ່ໃດມາ ດັ່ງນັ້ນ ຈະໃຫ້ແກ້ໄຂໃຫ້ໝົດ ພາຍໃນບາດດຽວ ຈຶ່ງເປັນເລື່ອງຍາກທີ່ສຸດ, ດັ່ງນາງກ່າວວ່າ:

“ຢູ່ບ້ານເຮົາກະຍັງຄຸມກັນບໍ່ໄດ້ ຍັງມີການລັກລອບກັນຢູ່ຫັ້ນນ່າ ຕາມລະບຽບແມ່ນ ເພິ່ນກໍ່ເນັ້ນໃຊ້ເງິນກີບຫັ້ນແຫຼະ ແຕ່ວ່າກໍ່ຍ້ອນຄວາມຊິນເຄີຍ ຖືເບົາ ມັນກໍ່ຄ່ອຍໆປັບ ມັນຊິເຮັດບາດດຽວ ກໍ່ຄືວ່າຈັ່ງໃດເນາະ ແນວມັນເປັນຄວາມຊິນເຄີຍກັນແລ້ວ ມາແລ້ວຫັ້ນນ່າ.”

ຢ່າງໃດກໍ່ຕາມ ສາເຫດໜຶ່ງ ທີ່ເຮັດໃຫ້ຍັງມີການ ໃຊ້ຈ່າຍເງິນຕາຕ່າງປະເທດ ທັງຢູ່ໃນແຂວງບໍ່ແກ້ວ ແລະແຂວງອື່ນໆໃນລາວ ກໍ່ຍ້ອນ ການສັ່ງປິດຮ້ານແລກປ່ຽນເງິນຕາຕ່າງປະເທດຈໍານວນຫຼາຍໃນກ່ອນໜ້ານີ້ ເຮັດໃຫ້ຄົນຕ່າງປະເທດ ແລະນັກທ່ອງທ່ຽວຕ່າງປະເທດ ປະສົບຄວາມຫຍຸ້ງຍາກ ໃນການແລກປ່ຽນເງິນກີບ ຈຶ່ງເຮັດໃຫ້ຈ່າຍແຕ່ເງິນຕາຕ່າງປະເທດ ແລະອີກສາເຫດໜຶ່ງ ກໍ່ຍ້ອນພໍ່ຄ້າ-ແມ່ຄ້າ ບໍ່ຢາກຖືຄອງເງິນກີບ ທີ່ອ່ອນຄ່າ.

ນອກຈາກຮ້ານຄ້າແລ້ວ ຍັງມີອີກຫຼາຍທຸລະກິດ ທີ່ໃຫ້ລູກຄ້າ ສາມາດຈ່າຍເປັນເງິນຕາຕ່າງປະເທດໄດ້ ເຖິງແມ່ນວ່າ ໄດ້ລະບຸປ້າຍລາຄາ ເປັນອັດຕາເງິນກີບກໍ່ຕາມ ເປັນຕົ້ນ ໂຮງແຮມ, ເຮືອນພັກ, ຮ້ານອາຫານ, ຄ່າບໍລິການລົດໂດຍສານຕ່າງໆ ແລະອື່ນໆ.

ເມື່ອປີ 2023 ທີ່ຜ່ານມາ ທ່ານ ດຣ. ສອນໄຊ ສີພັນດອນ ນາຍົກລັດຖະມົນຕີລາວ ໄດ້ອອກຄໍາສັ່ງ ວ່າດ້ວຍການຈັດຕັ້ງປະຕິບັດ ຄຸ້ມຄອງເງິນຕາຕ່າງປະເທດ ໂດຍກໍານົດໃຫ້ບຸກຄົນ ແລະນິຕິບຸກຄົນ ສາມາດຖືຄອງເງິນຕາຕ່າງປະເທດ ໃນຮູບແບບເງິນສົດ ຕາມຈໍານວນທີ່ທະນາຄານແຫ່ງ ສປປ ລາວ ກໍານົດເປັນໄລຍະ ແລະຄັນມີການຖືເງິນຕາຕ່າງປະເທດ ໃນຮູບແບບເງິນສົດ ເກີນຕາມທີ່ທະນາຄານແຫ່ງ ສປປ ລາວ ກໍານົດ ຈະຖືວ່າ ເງິນດັ່ງກ່າວ ບໍ່ຖືກຕ້ອງຕາມກົດໝາຍ.