ທາງການອາຈແກ້ຄ່າທາງ ເລກທີ 16E

ໄຊຍາ
2021-01-15
Share
ທາງການອາຈແກ້ຄ່າທາງ ເລກທີ 16E ເສັ້ນທາງຫຼວງແຫ່ງຊາດ ເລກທີ 16E ຈາກ ປາກເຊ-ປາກຊ່່ອງ, ທາງການຍັງແກ້ໄຂເຣື່ອງເກັບຄ່າຜ່ານທາງບໍ່ແລ້ວເທື່ອ
ພາບປະກອບ: ນັກຂ່າວພົລເມືອງ

ການສັນຈອນ ຂອງປະຊາຊົນ ໃນເສັ້ນທາງຫຼວງແຫ່ງຊາດ ເລກທີ 16E ຈາກປາກເຊ-ປາກຊ່່ອງ, ທາງການຍັງແກ້ໄຂເຣື່ອງເກັບຄ່າ ຜ່ານທາງນັ້ນແບບຊັກຊ້າ, ອັນໄດ້ສົ່ງຜົລກະທົບຕໍ່ ຜູ້ໃຊ້ທາງເສັ້ນນີ້. ໂດຍກຸ່ມຊາວຄ້າຂາຍ ແລະ ຣົດໂດຍສານໄດ້ຮັບຜົລກະທົບ ໜັກກວ່າໝູ່, ເພາະຕ້ອງໄດ້ຈ່າຍມື້ນຶ່ງ ຫຼາຍຖ້ຽວ. ຜ່ານມາກ່ອນສ້າງທາງເສັ້ນນີ້, ການໄປ-ມາ ບໍ່ໄດ້ຈ່າຍ ຄ່າຜ່ານທາງ, ແຕ່ບໍຣິສັດ ມາ ສັມປະທານ, ຮັບເໝົາກໍ່ສ້າງພາຍຫຼັງສຳເຣັດ, ກັບຕ້ອງໄດ້ຈ່າຍຄ່າຜ່ານທາງ, ດັ່ງປະຊາຊົນເມືອງປາກຊ່ອງໄດ້ກ່າວວ່າ:

"ທາງທັມມະດານີ້ແຫຼະ, ບໍ່ແມ່ນທາງດ່ວນແຕ່ມັນເປັນທາງງາມ, ເສັຽໝົດຄົນພື້ນທີ່ກໍໄດ້ເສັຽ, ໄປກໍເກັບມາກໍເກັບ, ເຮົາກໍຍັງບໍ່ຮູ້ເຣື່ອງ ຣະອຽດໂຕນີ້, ກໍເຫັນດີຢູ່ດອກ ເຮົາບໍ່ກ້ານຳເຂົາ ໂຕນີ້ຫັ້ນນ່າ."

ການແກ້ໄຂບັນຫາ ເກັບຄ່າຜ່ານທາງຫຼວງແຫ່ງຊາດ ເລກທີ 16E ນັ້ນ, ກໍໄດ້ຍີນຂ່າວຢູ່ແຕ່ກໍຍັງບໍ່ຊັດເຈັນວ່າເພິ່ນຈະແກ້ເມື່ອໃດ, ດັ່ງປະຊາຊົນຢູ່ນະຄອນປາກເຊ ແຂວງຈຳປາສັກ ໄດ້ກ່າວຕໍ່ເອເຊັຽເສຣີ ໃນວັນທີ 15 ມົກກະຣາ 2021 ວ່າ.

"ກໍເຂົາປັບບ່ອນເກັບເງິນເພີ່ມຂຶ້ນອີກບ່ອນນຶ່ງ, ບ່ອນທີສອງຍັງບໍ່ທັນແລ້ວ ຫັ້ນນ່າ, ແຕ່ເຂົາວ່າຣາຄາກໍສິຖືກລົງກ່ອນເກົ່າເຂົາວ່າ, ກໍເຫັນດີນໍາເພິ່ນຫັ້ນແຫຼະ ບໍ່ສາມາດທີ່ວ່າໄປຂັດໄດ້ ເນາະວ່າບໍ່ຢາກເສັຽ."

ຕໍ່ກັບເຣື່ອງດັ່ງກ່າວ ທາງການແຂວງຢັ້ງຢືນວ່າຍັງຢູ່ໃນຣະຫວ່າງການປະຊຸມກັນຢູ່, ແຕ່ກໍຍັງບໍ່ຮູ້ຊັດເຈັນວ່າຈະແກ້ໄຂບັນຫາເກັບຄ່າ ຜ່ານທາງຫຼວງແຫ່ງຊາດ ເລກທີ 16Eເມື່ອໃດ ເພາະຍັງບໍ່ທັນມີນິຕິກັມ ອອກມາເທື່ອ. ແຕ່ຕອນນີ້ທາງບໍຣິສັດ ຍັງເກັບຄ່າຜ່ານທາງ ໄປກ່ອນ. ດັ່ງເຈົ້າໜ້າທີ່ ແຂວງຈຳປາສັກ ຜູ້ຂໍສງວນຊື່ ໄດ້ກ່າວຕໍ່ ເອເຊັຽ ເສຣີ ເມື່ອວັນທີ 15 ມົກກະຣາ 2021 ວ່າ:

"ຂ່າວເພິ່ນເວົ້າຫັ້ນແຫຼະ, ເປັນແຜນທີ່ຈະຂຸ້ນຂ້ຽວແກ້ໄຂໂຕນີ້ເນາະ, ແຕ່ວ່າຍັງບໍ່ທັນໄດ້ຮັບການຈັດຕັ້ງປະຕິບັດເດີ້, ແຜນໃນຕໍ່ໜ້າ ເຮົາມີການແນວໃດໃນຕໍ່ໜ້າ ຂອງເພິ່ນຍັງບໍ່ທັນໄດ້ ມີນິຕິກັມແນວໃດ."

ເມື່ອຕົ້ນເດືອນ ສິງຫາ ປີ 2020 ທ່ານ ທອງລຸນ ສີສຸດລິດ ນາຍົກຣັຖມົນຕຼີ ໄດ້ປະກາດວ່າ, ໃຫ້ປ່ຽນຣາຄາເກັບເງິນຄ່າຜ່ານທາງ ຫຼວງແຫ່ງຊາດ 16E ບໍ່ໃຫ້ເກີນ 5,000 ກີບຕໍ່ຄັ້ງ ແລະ ໃຫ້ເກັບສະເພາະຂາໄປເທົ່ານັ້ນ ແລະ ເສັ້ນທາງຕ້ອງເປີດຕລອດ 24 ຊົ່ວໂມງ.

ໃນຂນະທີ່ ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ໄດ້ກ່າວຕໍ່ນັກຂ່າວທ້ອງຖິ່ນ ເມື່ອວັນທີ 8 ມົກກະຣາ 2021 ວ່າ:

"ຣັຖບານໄດ້ຊີ້ນຳໃຫ້ອົງການປົກຄອງ ແຂວງຈຳປາສັກ, ຮ່ວມກັບ ກະຊວງແຜນການ ແລະ ການລົງທຶນ, ກະຊວງໂຍທາທິການ ແລະ ຂົນສົ່ງ ແລະ ບໍຣິສັດ ພັທນາໂຄງການ, ຮ່ວມກັນແກ້ໄຂຄ່າຜ່ານທາງ ຄືນໃໝ່, ໂດຍມີສາມທາງອອກ. ໂດຍໃຫ້ຜູ້ພັທນາ ໂຄງການ ເກັບຄ່າຜ່ານທາງເປັນ 3 ໄລຍະ ເພື່ອ ໃຫ້ມີຣາຄາຫຼຸດລົງ ໂດຍເກັບສະເພາະຕົ້ນທາງ, ຜ່ານຮອດກາງທາງ ແລະ ປາຍທາງ, ໂດຍເອົາຣາຄາທີ່ຕ້ອງຈ່າຍທັງໝົດ, ຂອງ ພາຫະນະ ແຕ່ຣະປະເພດມາຫານສາມ, ແລ້ວຈ່າຍສະເພາະແຕ່ໄລຍະທາງ, ທີ່ພາຫະນະຜ່ານ ເທົ່ານັ້ນ."

ນອກຈາກນີ້ຣັຖບານ ຈະຊອກທຶນມາເພື່ອຊື້ຄືນ, ຈາກຜູ້ພັທນາໂຄງການມາເປັນຂອງຣັຖແລ້ວ, ປັບໃຫ້ຖືກລົງ ແລະ ຈະມີນະໂຍບາຍ ໃຫ້ປະຊາຊົນ ທີ່ອາສັຍຢູ່ເຂດໃກ້ເສັ້ນທາງ ຫຼືໃຊ້ເສັ້ນທາງປະຈຳຊື້ບັດ ເພື່ອຈ່າຍຄ່າຜ່ານທາງທັງໝົດໃນຣາຄາຖືກ. ເຊິ່ງການແກ້ໄຂ ບັນຫາດັ່ງກ່າວ ຄາດວ່າບໍ່ໃຫ້ກາຍປີ 2021.

ກ່ອນໜ້ານີ້ຜູ້ພັທນາໂຄງການ, ບໍຣິສັດດວງດີກໍ່ສ້າງຂົວທາງຈຳກັດໄດ້ໃຫ້ເຫດຜົລວ່າ, ເປັນຫຍັງຈຶ່ງເກັບເງິນ, ເພາະການຂຍາຍທາງ ເສັ້ນທາງຫຼວງ ແຫ່ງຊາດເລກທີ 16E ໃນ ແຂວງຈຳປາສັກ ໄດ້ດຳເນີນການມາແຕ່ປີ 2011, ໃນການກໍ່ສ້າງໃນແລວທາງເກົ່າມີທັງ ເລີກຮື້ຖີ້ມ, ແລະ ປູໃໝ່.

ທາງສາຍນີ້ບ່ອນກວ້າງ 18 ແມັດ ແລະ ແຄບ 16 ແມັດ. ພ້ອມນີ້ ຍັງໄດ້ສ້າງຂົວ 4 ແຫ່ງຍາວ 250 ແມັດ. ເບື້ອງຕົ້ນຄາດວ່າ ຈະລົງທຶນປະມານ 30 ປາຍ ລ້ານ ໂດລາ ສະຫະຣັຖ ເທົ່ານັ້ນ, ແຕ່ເຮັດໂຕຈິງແມ່ນຫຼາຍກວ່ານັ້ນ, ຍ້ອນມີວຽກເພີ່ມ.

ທ່ານໄດ້ກ່າວຕື່ມວ່າ, ສຳລັບການເກັບຄ່າຜ່ານທາງນັ້ນ, ແມ່ນເອົາຣາຄາການກໍໍ່ສ້າງ ໃນຣາຄາຕໍ່າສຸດ ບໍ່ເອົາຣາຄາກໍ່ສ້າງປັຈຈຸບັນ ມາຄິດໄລ່ເພື່ອເກັບກູ້ທຶນ ຖືວ່າເອົາຣາຄາຕໍ່າສຸດ ຂອງຣາຄາສັນຍາ ຕົ້ນມາຄິດໄລ່, ວ່າຈັກປີເຮົາຈະໄດ້ທຶນກ່ອນກຳນົດເປັນຣາຄາ ຜ່ານທາງ.

ກະຊວງໂຍທາທິການ ແລະ ຂົນສົ່ງ ພ້ອມດ້ວຍ ກະຊວງແຜນການ ແລະ ການລົງທືນ, ກະຊວງການເງິນ ໄດ້ລົງມາສົມທົບກັບ ແຂວງຈຳປາສັກເພື່ອມານັບຣົດຜ່ານທາງ ເລກທີ 16E ນີ້ເປັນເວລາ 1 ເດືອນທັງເວັນແລະຄືນ. ຈາກນັ້ນຈຶ່ງແຍກປະເພດຣົດ ເປັນ 9 ຣາຍການ.

ໃນການເກັບຄ່າຜ່ານທາງນີ້, ບໍ່ແມ່ນບໍຣິສັດຕັ້ງຂຶ້ນເອງ ຄິດໄລ່ເອງ, ແມ່ນພາກຣັຖ ທີ່ກ່ຽວຂ້ອງ ເປັນຜູ້ຄິດໄລ່ ແລະ ເປັນຜູ້ກຳນົດ ໂດຍຜ່ານຣັຖບານ ຈຶ່ງແຈ້ງມາໃຫ້ແຂວງແຈ້ງຕໍ່ ບໍຣິສັດ.

ໂດຍບໍຣິສັດໄດ້ປະຕິບັດຕາມ ອັດຕຣານີ້, ຈະຖືກຫຼືແພງ ແມ່ນຂືຶ້ນກັບການຄິດໄລ່. ການເກັບຄ່າຜ່ານທາງແມ່ນເພື່ອ ເອົາເງິນໄປໃຊ້ໜີ້ ທະນາຄານທີ່ຢືມມາລົງທຶນກໍ່ສ້າງ.

ຣາຄາເກັບຄ່າຜ່ານທາງຫຼວງ ແຫ່ງຊາດ 16E ປາກເຊ ຫາ ປາກຊ່ອງ ຣົດຈັກ, ຣົດເກັງ ຣົດກະບະ 15 ພັນກີບ ຕໍ່ຄັ້ງ. ຣົດຕູ້ ແລະ ຣົດ 6 ລໍ້ ນ້ອຍ 20 ພັນກີບຕໍ່ຄັ້ງ, ຣົດເມ 6 ລໍ້ກາງ 30 ພັນກີບ ຕໍ່ຄັ້ງ ແລະ ຣົດ 10 ລໍ້ 40 ພັນກີບຕໍ່ຄັ້ງ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ