ປະຊາຊົນວ່າຄ່າໄຟແພງ ເກີນເຫດ

ມະນີຈັນ
2020-05-02
Share
F-Bill.jpg ເມື່ອປະມານ ນຶ່ງປີຜ່ານມາ ກໍມີຊາວລາວເບິ່ງໃບບິລຄ່າໄຟຟ້າ ດ້ວຍຄວາມຕົກໃຈ ແລະຈົ່ມວ່າຢ່າງນ້ອຍໃຈ ທີ່ເຫັນຄ່າໄຟຟ້າສູງຂຶ້ນ ຢ່າງບໍ່ໜ້າເຊື່ອ ແບບບໍ່ຮູ້ສາເຫດ
RFA/NY

ປະຊາຊົນລາວ ຢາກໃຫ້ຣັຖວິສາຫະກິດໄຟຟ້າລາວ ກວດກາຄ່າໄຟຟ້າ ໃນເດືອນມິນາ ແລະເດືອນເມສາ ນັ້ນຄືນ ຍ້ອນມີມັນສູງເກີນເຫດ ທັງໆທີ່ບໍ່ໄດ້ໃຊ້ໄຟຟ້າຫລາຍ. ເຈົ້າຂອງຮ້ານອາຫານ ແຫ່ງນຶ່ງໃນ ນະຄອນຫລວງວຽງຈັນ ເວົ້າວ່າຄ່າໄຟຟ້າ ເດືອນ ເມສາ ຢູ່ຮ້ານຂອງຕົນ ແພງກວ່າເດືອນມິນາ ເກືອບ 1 ເທົ່າຕົວ ທັ້ງໆທີ່ໄດ້ໃຊ້ໄຟຟ້າ ຕາມປົກກະຕິ ບໍ່ຕ່າງຈາກເດືອນກ່ອນ, ແຕ່ເມື່ອໄປຖາມ ເຈົ້າໜ້າທີ່ໄຟຟ້າ ລາວ ພັດບໍ່ໄດ້ຮັບຄໍາຊີ້ແຈງ ວ່າເປັນຍ້ອນຫຍັງ ຄ່າໄຟຟ້າຈຶ່ງແພງຂຶ້ນ, ດັ່ງທີ່ນາງກ່າວຕໍ່ RFA ໃນມື້ວັນທີ 1 ພຶສພາ ນີ້ວ່າ:

“ເດືອນແລ້ວ ຂ້ອຍຈ່າຍໄຟຟ້ານີ້ ຂ້ອຍມີແຕ່ລ້ານຫ້າ ເດືອນນີ້ເກືອບ 3 ລ້ານ ປົກຕິຮ້ານຂ້ອຍເປີດ ຂ້ອຍກະຈ່າຍບໍ່ໄດ້ຫຼາຍປານນີ້ ຮ້ານເປີດ ແຕ່ວ່າໄຟຟ້າຂ້ອຍເພີ່ມຫລາຍ ທັ້ງໆທີ່ແອປິດ ທຸກຢ່າງປິດໝົດ ແຕ່ບໍ່ ຮູ້ວ່າເປັນຫຍັງ ຄ່າໄຟມັນຂຶ້ນຫລາຍແທ້ ຂະເຈົ້າມາຈົດຄ່າໄຟແລ້ວ ກະເອົາບິນໄຟມາກະຖາມ ເພິ່ນວ່າບໍ່ຮູ້ເດ໋.”

ນາງເວົ້າຕື່ມວ່າ ມື້ວານນີ້ ໄດ້ໄປຈ່າຍບິນຄ່າໄຟຟ້າແລ້ວ ແຕ່ກໍບໍ່ໄດ້ຮັບຄໍາຊີ້ແຈງແນວໃດເລີຍ ຈາກພວກເພິ່ນ ແຕ່ເຖິງຢ່າງໃດກໍຕາມຢາກໃຫ້ ບໍຣິສັດຣັຖວິສາຫະກິດໄຟຟ້າລາວ ກວດກາຄ່າໄຟຟ້າທີ່ແພງຂຶ້ນ ນັ້ນຄືນ ແລະໃຫ້ຄໍາຊີ້ແຈງນໍາດ້ວຍ ຊຶ່ງກໍອາດເປັນໄປໄດ້ ຍ້ອນຄວາມຜິດ ພາດຂອງພະນັກງານຜູ້ຈົດກົງເຕີໄຟ ແລະວ່າຫາກເປັນໄປໄດ້ ກໍຢາກໃຫ້ຫລຸດຄ່າໄຟຟ້າ ເດືອນພຶສພານີ້ລົງເພື່ອຊ່ອຍປະຊາຊົນ ທີ່ໄດ້ຮັບ ຜົລກະທົບນັ້ນ.

ເຈົ້າຂອງເຮືອນພັກແຫ່ງນຶ່ງ ຢູ່ນະຄອນຫລວງວຽງຈັນ ກໍເວົ້າວ່າ ຄ່າໄຟຟ້າ ເດືອນເມສາ ຢູ່ເຮືອນພັກຂອງຕົນ ແພງຂອ້ນຜິດປົກກະຕິໂດຍ ບໍ່ຮູ້ສາເຫດ ແຕ່ກໍຍັງບໍ່ຮູ້ວ່າແພງຂຶ້ນເທົ່າໃດ ຍ້ອນຍັງບໍ່ທັນໄດ້ເອົາ ທຽບໃສ່ເດືອນມິນາ ທີ່ຜ່ານມາ ແລະຈະຮ້ອງຂໍໃຫ້ທາງຣັຖວິສາຫະກິດ ໄຟຟ້າລາວ ກວດກາຄືນຄັກແນ່ ດັ່ງທີ່ນາງເວົ້າວ່າ:

“ແມ່ນ ເຈົ້າ ແພງຄືກັນເຈົ້າ ແຕ່ວ່າບໍ່ຮູ້ສາເຫດ ຍັງ ຍັງບໍ່ຮູ້ເທື່ອ ເຮົາຍັງບໍ່ໄດ້ໄປວຽກເທື່ອນະ ເຈົ້າ.”

ແຕ່ໃນຂນະດຽວກັນ ເຈົ້າຂອງຮ້ານອາຫານອີກແຫ່ງນຶ່ງ ໃນນະຄອນຫລວງວຽງຈັນ ເວົ້າວ່າ ຄ່າໄຟຟ້າເດືອນເມສາ ຢູ່ຮ້ານຂອງຕົນກໍ ປົກກະຕິ ເທົ່າກັນກັບເດືອນກ່ອນໆ ບໍ່ແພງຂຶ້ນຄືກັນກັບຢູ່ເຂດອື່ນໆ ທີ່ປະຊາຊົນພາກັນຈົ່ມ ດັ່ງນັ້ນຈຶ່ງບໍ່ມີຄວາມສົງສັຍເຣຶ່ອງຄ່າໄຟຟ້າ:

“ກະປົກຕິ ກະຖືກຢູ່ 6-7 ແສນກະປົກຕິ ເພາະວ່າເຮົາເປີດຮ້ານອາຫານເດ໋ ເພາະວ່າເຮົາເປີດແອເດ໋ ມັນມີແອໜ່ວຍນຶ່ງເດ໋ ມັນກະປົກຕິ ເອົາໃບເຈັ້ຽໃບໂຕນັ້ນມາ ໃຫ້ເຮົາເບິ່ງຄືກັນ ປົກຕິຢູ່ 2 ເດືອນນີ້ປົກກະຕິ ມັນກະໄຄແນ່ຢູ່."

ກ່ຽວກັບບັນຫາດັ່ງກ່າວ ເຈົ້າໜ້າທີ່ຣັຖວິສາຫະກິດໄຟຟ້າລາວ ເວົ້າວ່າ ສາເຫດທີ່ຄ່າໄຟຟ້າຢູ່ເຮືອນບາງຫລັງ ແລະບາງຮ້ານແພງຂຶ້ນນັ້ນ ອາດເປັນໄປໄດ້ວ່າ ພະນັກງານຈົດກົງເຕີໄຟໄຟ້ ຜິດພາດດ້ານເຕັກນິກ ເຮັດໃຫ້ການຄິດໄລ່ຄ່າໄຟຟ້າແພງເກີນເຫດ.

ແຕ່ເຖິງຢ່າງໃດກໍຕາມ ທ່ານກໍແນະນໍາວ່າ ສໍາລັບຜູ້ໃຊ້ໄຟທີ່ຄິດວ່າ ຄ່າໄຟເດືອນເມສາ ແພງຜິດປົກກະຕິ ກໍສາມາດຮ້ອງຮຽນມາຍັງຣັຖ ວິສາຫະກິດ ໄຟຟ້າລາວ ເພື່ອທີ່ຈະໄດ້ກວດກາຄືນໃຫ້ ດັ່ງທີ່ທ່ານກ່າວວ່າ:

“ຄັນວ່າຖ້າຜິດພາດແທ້ໆ ກະມັນນ່າຈະຢູ່ໃນການຈົດໂຕເລກ ພະລັງງານຫລາຍກວ່າຫັ້ນນະ ເພາະວ່າຣາຄາໄຟຫົວໜ່ວຍ ຢູ່ໃນບິນນີ໋ກະ ເປັນຣາຄາເດີມ ເຈົ້າ ຄ່າໄຟຂອງໄຟຟ້າລາວນີ໊ ບໍ່ໄດ້ປັບຂຶ້ນແນ່ນອນ ເຈົ້າ ກະສາມາດເຂົ້າໄປແຈ້ງ ທີ່ການໄຟຟ້າໃຫ້ຂະເຈົ້າກວດສອບ ໃຫ້ໄດ້ຕົວນີ້.”

ກ່ອນໜ້ານີ້ ຣັຖວິສາຫະກິດໄຟຟ້າລາວ ໄດ້ສເນີໄປຍັງຣັຖບານ ຂໍໃຫ້ຫລຸດຣາຄາໄຟຟ້າ ນັບຕັ້ງແຕ່ເດືອນພຶສພາ 2020 ນີ້ເປັນຕົ້ນໄປ ເພື່ອຫລຸດຜ່ອນຜົລກະທົບ ທີ່ເກີດຈາກການຣະບາດ ຂອງໄວຣັສ ໂຄວິດ-19, ແຕ່ມາເຖິງປັດຈຸບັນ ທາງຣັຖບານກໍຍັງບໍ່ທັນຕອບຕົກລົງ ເທື່ອວ່າຈະຫລຸດໃຫ້ ຫລືບໍ່.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ