ເຂື່ອນປາກແບງຕ້ອງລໍຖ້າ ການສຶກສາ ຜົນກະທົບ

ຣັຖບານລາວຍັງບໍ່ອະນຸຍາດ ໃຫ້ມີການເຣີ້ມລົງມື ສ້າງເຂື່ອນປາກແບງ ຕາມແຜນທີ່ ວາງໄວ້ນັ້ນເທື່ອ ຕ້ອງລໍຖ້າ ການສຶກສາ ຜົນກະທົບ ສໍາເຣັດກ່ອນ. ຕາມຄໍາເວົ້າ ຂອງເຈົ້າໜ້າທີ່ ກ່ຽວຂ້ອງ ແຂວງອຸດົມໄຊ ກ່າວ ໃນວັນທີ 14 ມີນາ ນີ້ວ່າ:

“ເລື້ອງກໍ່ສ້າງເຂື່ອນ ທັງໝົດນັ້ນ ຍັງບໍ່ທັນໄດ້ເຮັດຫຍັງໝົດ ຍ້ອນວ່າ ບໍ່ທັນອະນຸມັດເທື່ອ ທັງໝົດນັ້ນແມ່ນຍ້ອນວ່າ ມັນແມ່ນໂຄງການ ໃຫຍ່ ມີຫລາຍພາກສ່ວນກ່ຽວຂ້ອງນໍາກັນ ມັນຈະມີປະເທດໄທແດ່ ກັບບັນດາປະເທດ ລຸ່ມນໍ້າຂອງ ອັນນີ້ ຂະເຈົ້າຈະໄປ ປືກສາກັນກ່ອນ ຕາມຄູ່ກະຊວງ ເພາະວ່າ ບາງປະເທດ ກໍ່ເຫັນດີ ບາງປະເທດ ກໍ່ບໍ່ໍເຫັນດີ ມັນມີຫຼາຍປະເທດ ຕ້ອງຖ້າກ່ອນ.”

ທ່ານອະທິບາຍ ເພີ້ມວ່າ ໂຄງການເຂື່ອນປາກແບງ ໄດ້ໂຈະການສ້າງ ມາແຕ່ ປີ 2016 ຍ້ອນຣັຖບານລາວ ແລະການໄຟຟ້າຂອງໄທ ບໍ່ ຕົກລົງຊື້ຂາຍ ໄຟ້ຟ້າກັນເທື່ອ. ອີກທັງວ່າ ຍັງມີບາງປະເທດ ໃນເຂດລຸ່ມນໍ້າຂອງ ບໍ່ເຫັນພ້ອມ ນໍາການສ້າງເຂື່ອນ ດັ່ງກ່າວ ຍ້ອນຢ້ານວ່າ ຈະສົ່ງຜົນກະທົບ ຕໍ່ປະຊາຊົນ ທີ່ອາສັຍຢູ່ຕາມລຸ່ມ ແມ່ນໍ້າຂອງ.

ສໍາລັບຄວາມຄືບໜ້າ ໃນການສຶກສາຜົນກະທົບ ຈາກເຂື່ອນປາກແບງນັ້ນ ປັດຈຸບັນ ຍັງຢູ່ໃນຂັ້ນຕອນ ທີ່ຄນະຈັດສັນ ເຂື່ອນປາກແບງ ແລະ ກຸ່ມຮັກຊຽງຂອງ ກໍາລັງຊອກຫາ ນັກວິຊາການສະເພາະ ມາສຶກສາຮ່ວມກັນ, ດັ່ງ ທ່ານສົມກຽດ ເຂື່ອນຊຽງສາ ນັກອະນຸຮັກນໍ້າຂອງ ກຸ່ມຮັກຊຽງຂອງ ກ່າວຕໍ່ວິທຍຸ ເອເຊັຍເສຣີ ໃນວັນທີ 14 ມິນາ ນີ້ວ່າ:

“ຢູ່ໃນຂັ້ນຕອນ ຊອກຫານັກວິຊາການສະເພາະດ້ານ ເຂົ້າມາຮ່ວມເປັນທີມ ສຶກສາຂອງເຮົາ ປຶກສາຮ່ວມກັບ ທາງມະຫາວິທຍາລັຍ ຊຽງໃໝ່ ຕອນນີ້ ກໍາລັງຢູ່ໃນຂະບວນການ ຊອກຫາຜູ້ທີ່ມີຄວາມຊ່ຽວຊານ ສະເພາະດ້ານ ທີ່ມີຄວາມເປັນກາງ ມາຮ່ວມ ທີມສຶກສາ ຫລັງຈາກນັ້ນ ກໍຈະເອົາຣາຍຊື່ ມາສເນີກັນວ່າທາງຝ່າຍພຸ້ນ ແລະເຮົາຈະຮັບໄດ້ບໍ່.”

ທ່ານສົມກຽດ ກ່າວຕື່ມວ່າ ເຂື່ອນປາກແບງ ຈະມີການສ້າງແນ່ນອນ ແຕ່ຄົງຈະບໍ່ແມ່ນພາຍໃນ 2 ປີນີ້ ເນື່ອງຈາກ ການສຶກສາ ຜົນກະທົບ ມີຫຼາຍຂັ້ນຕອນ ແລະຕ້ອງໃຊ້ເວລາ ໃນການສຶກສາ ຢ່າງຮອບຄອບ.

ເຂື່ອນປາກແບງຈະເປັນເຂື່ອນ ແມ່ນໍ້າຂອງແຫ່ງທີ 3 ໃນລາວ ຈະສາມາດຜລິດໄຟຟ້າໄດ້ 912 ເມກາວັດ ສົ່ງຂາຍໃຫ້ໄທ 90 ສ່ວນຮ້ອຍ.

ເຖິງຢ່າງໃດກໍຕາມ ຈົນເຖິງປັດຈຸບັນ ການໄຟຟ້າ ຝ່າຍຜລິດ ແຫ່ງປະເທດໄທ ຍັງບໍ່ທັນເຊັນສັນຍາ ຊື້ຂາຍໄຟຟ້າ ຈາກເຂື່ອນ ປາກແບງ ນີ້ເທື່ອ.