ເຂື່ອນນໍ້າຊໍາ1 ສ້າງຄວາມ ກັງວົນ

ປະຊາຊົນ ບ້ານຊຽງຄູນ ບ້ານນາໄຊ ບ້ານນາເກືອ ແລະບ້ານເຕົ້າ ເມືອງຊຳໃຕ້ ແຂວງຫົວພັນ ປະມານ 200 ປາຍ ຫລັງຄາເຮືອນ ບໍ່ ເຫັນດີກັບ ການສ້າງ ເຂື່ອນນ້ຳຊຳ1 ທີ່ທາງແຂວງ ລົງມາສຳຣວດ ວາງແຜນຈະສ້າງ ໃນອະນາຄົດ ຍ້ອນພວກຂະເຈົ້າ ຈະຖືກໂຍກຍ້າຍ. ດັ່ງຊາວບ້ານ ຜູ້ທີ່ບໍ່ປະສົງ ອອກຊື່ ທ່ານນຶ່ງ ກ່າວຕໍ່ເອເຊັຽເສຣີ ໃນມື້ວັນທີ 23 ມິນາ ນີ້ວ່າ:

"ສ້າງເຂື່ອນຢູ່ໂຄງການນີ້ ມັນມີ ເນື້ອທີ່ນານັ້ນ ຖືວ່າເຮັດເຂື່ອນ ຖ້ວມນັ້ນ ມັນເສັຽເນື້ອທີ່ນາ ປະມານ 100 ປາຍເຮັກຕາແລ້ວ ຖ້າເຮົາຍ້າຍ ໄປຢູ່ບ່ອນອື່ນ ມັນຈະບໍ່ມີ ເນື້ອທີ່ນາ ທົດແທນ ຢູ່ໃນໂຄງການ ເມືອງຊຳໃຕ້ ມັນບໍ່ມີຈຸດໃດ ທີ່ມີ ຣະດັບນາ ຊ່ຳນີ້ ມັນກໍຈະກະທົບ ຕໍ່ປະຊາ- ຊົນເນາະ ດິນນາ ຂອງປະຊາຊົນ ກໍມີຖ້າທຽບໃສ່ ຢູ່ໃນເມືອງຊຳໃຕ້ ນີ້ກໍຢູ່ ລະດັບສອງ ຫລື ລະດັບສາມ ສຳລັບນາ".

ທ່ານກ່າວຕື່ມວ່າ ໂຄງການ ເຂື່ອນນ້ຳຊຳ1 ເປັນເຂື່ອນໄຟຟ້າ ຂນາດນ້ອຍ ທາງການແຂວງ ໄດ້ລົງມາສຳຣວດ ເນື້ອທີ່ບ່ອນຈະສ້າງ ສອງ ຄັ້ງແລ້ວ ຄືໃນກາງປີ 2016 ແລະ ຕົ້ນປີ 2017 ແລະໄດ້ເກັບກຳ ຂໍ້ມູນ ເພື່ອພິຈາຣະນາ ວ່າຈະສ້າງບ່ອນໃດ ເພື່ອບໍ່ໃຫ້ ສົ່ງຜົລກະທົບ ຕໍ່ຊາວບ້ານຫລາຍ ຈະໃກ້ບ້ານເຕົ້າ ຫລື ບ້ານນາໃຊ ທີ່ຕິດກັບ ຊາຍແດນ ວຽດນາມ.

ທ່ານວ່າ ຢາກໃຫ້ທາງການ ສ້າງເຂື່ອນ ໃນລະດັບນ້ຳບໍ່ສູງ ຍ້ອນວ່າ ທັງສອງຈຸດນີ້ ໃກ້ກັບບ້ານເຮືອນ ປະຊາຊົນຫລາຍ ພ້ອມທັງ ຢາກ ຮຽກຮ້ອງໃຫ້ ທາງການ ເຮັດແນວທີ່ ປະຊາຊົນ ຈະບໍ່ຖືກໂຍກຍ້າຍ ເນື່ອງຈາກວ່າ ປະຊາຊົນໃ ນສີ່ຫມູ່ບ້ານນີ້ ເຮັດນາເປັນຫຼັກ ໃນການ ລ້ຽງຊີບ ຫາກຖືກຍ້າຍໄປ ຢູ່ບ່ອນໃຫມ່ ຢ້ານວ່າ ບໍ່ມີເນື້ອທີ່ ໃຫ້ຂະເຈົ້າເຮັດນາ. ຈະເຮັດໃຫ້ຂະເຈົ້າ ທຸກຍາກ ເພີ້ມຕື່ມ:

"ຄັນຈະສ້າງເຂຶ່ອນສູງນັ້ນ ມັນຈະຖ້ວມບ້ານ ປະຊາຊົນແນ່ນອນ ແຕ່ວ່າທຸກມື້ນີ້ ມັນກໍກຳລັງ ສຶກສາຄົ້ນຄວ້າ ຫາກວ່າ ເປີດກອງປະຊຸມ ຢູ່ ຂັ້ນເມືອງ ແລະ ຍັງສເນີໄປຂັ້ນແຂວງ ທາງປະຊາຊົນ ທາງພະນັກງານ ທາງເມືອງ ນີ້ກໍຂໍວ່າ ເຂື່ອນຕົວນີ້ ທີ່ຢູ່ແຕະ ຊາຍແດນ ວຽດນາມ ອະນຸມັດ ໃຫ້ກໍ່ສ້າງ ແຕ່ວ່າບໍ່ໃຫ້ຖ້ວມ ດິນໄຮ່ດິນນາ ຂອງ ປະຊາຊົນ".

ຊາວບ້ານທ່ານນີ້ກວ່າຕື່ມວ່າ ແຜນການເຂື່ອນນີ້ ທາງການຢາກໃຫ້ ປະຊາຊົນ ໃນສີ່ບ້ານ ມີໄຟຟ້າໃຊ້ ຫລັງຈາກ ໃຊ້ໄຟຟ້າ ຈາກລະບົບ ນ້ຳຢອດ ມາເປັນເວລາ ດົນນານ ແຕ່ຖ້າຖືກຍ້າຍບ້ານ ຍ້ອນນ້ຳຖ້ວມ ປະຊາຊົນ ກໍບໍ່ຕ້ອງການ ຢາກໃຫ້ສ້າງ.