ປະຊາຊົນຮຽກຮ້ອງຣັຖບານ ແກ້ໄຂ ການເປັນຢູ່

ມະນີຈັນ
2020-05-11
Share
F-VT ປະຊາຊົນລາວ ທີ່ ອອກຫາເຊົ້າກິນຄໍ່າ ຢູ່ ນະຄອນຫຼວງວຽງຈັນ
RFA/TS

ວັນທີ 6 ພຶສພາ 2020 ກະຊວງແຜນການແລະ ການລົງທຶນ ໄດ້ປະຊຸມປຶກສາຫາຣື ແລະ ຕຽມແຜນພັທນາເສຖກິດ-ສັງຄົມ ຄັ້ງທີ 9 ປີ 2021 ຫາ 2025 ເພື່ອກໍານົດທິດທາງ ໃນການພັທນາປະເທດ ແລະບັນລຸ ເງື່ອນໄຂການຫລຸດພົ້ນ ຈາກປະເທດດ້ອຍພັທນາ ຊຶ່ງຊາວນະ ຄອນຫລວງວຽງຈັນ ທ່ານນຶ່ງ ກ່າວຕໍ່ RFA ວ່າເຫັນດີນໍາແຜນພັທນາ ເສຖກິດ-ສັງຄົມ 5 ປີ ໝົດທຸກເຣື່ອງ ແຕ່ຣັຖບານຕ້ອງຄໍານຶງເຖິງ ການແກ້ໄຂບັນຫາ ປາກທ້ອງຂອງປະຊາຊົນ ໃຫ້ມີຢູ່ມີກິນ ຢ່າງແທ້ຈິງນໍາດ້ວຍ ໂດຍສະເພາະປະຊາຊົນ ໃນເຂດຊົນນະບົດ-ຫ່າງໄກ:

“ເພິ່ນເຮັດນີ້ກະເຫັນດີຢູ່ ແຕ່ວ່າສໍາຄັນສູ່ມື້ນີ້ໂຄວິດ-19 ເຂົ້າມາເຫັນບໍ່ໄປມາຫາກັນບໍ່ໄດ້. ອາຫານເດ໊ ສິໄປເອົາຢູ່ໃສມາ ມັນສິພັທນາປະເທດ ໃນ 5 ປີ ນີ້ສິເຮັດຫຍັງກໍເຫັນດີຢູ່ ແຕ່ກ່ອນອື່ນ ສໍາຄັນກ່ອນອື່ນໝົດ ລະແມ່ນເຣື່ອງບັນຫາປາກທ້ອງ ນີ້ແຫລະກ່ອນ.”

ທ່ານກ່າວຕື່ມວ່າ ນັບແຕ່ມື້ເກີດການຣະບາດ ຂອງເຊື້ອພຍາດໂຄວິດ-19 ໃນປະເທດລາວມາ ປະຊາຊົນລາວ ກໍຫາຢູ່ຫາກິນລໍາບາກ, ບໍ່ມີການຄ້າ ການຂາຍ, ຫລາຍຢ່າງຖືກໂຈະຊົ່ວຄາວ ຍິ່ງເຮັດໃຫ້ປະຊາຊົນ ທຸກຍາກລົງຕື່ມ ໂດຍສະເພາະ ຢູ່ເຂດຊົນນະບົດ. ດັ່ງນັ້ນ ຣັຖບານລາວ ຄວນເອົາໃຈໃສ່ແກ້ໄຂບັນຫາ ປາກທ້ອງຂອງປະຊາຊົນ ຫລາຍຂຶ້ນ.

ພ້ອມດຽວກັນນີ້ ຊາວນະຄອນຫລວງວຽງຈັນ ອີກຜູ້ນຶ່ງ ກ່າວໃນມື້ດຽວກັນນີ້ວ່າ ຢາກໃຫ້ຣັຖບານລາວ ເນັ້ນໜັກໃສ່ການແກ້ໄຂບັນຫາ ເສຖກິດ ເນື່ອງຈາກວ່າດຽວນີ້ ສິນຄ້າເກືອບທຸກຢ່າງແພງຂຶ້ນ, ແຕ່ປະຊາຊົນ ຜັດມີຣາຍໄດ້ສໍ່າເກົ່າ ຮວມເຖິງການແກ້ໄຂບັນຫາ ເງິນກີບ ເຟີ້ແຮງຊຶ່ງກະທົບກະເທືອນ ປະຊາຊົນຫລາຍ:

“ກະດີໃດ໋ ເຈົ້າໂທມາເນາະ ປະຊາຊົນຫລາຍຄົນ ເຂົາກະຢາກເວົ້າຢາກວ່າເນາະ ກ່ຽວກັບເຣື່ອງຫາເງິນຫາຄໍາ ມັນຫາເງິນຍາກ. ເງິນກະ ຕົກຣາຄາ, ຣາຄາເຄື່ອງກະຂຶ້ນບາດນີ໋ ສິນຄ້າທຸກຢ່າງ ບໍຣິສັດໃດກະແຈ້ງ ຂຶ້ນໝົດ.”

ເຈົ້າໜ້າທີ່ຜແນກແຜນການ ແລະການລົງທຶນ ແຂວງຫລວງພຣະບາງ ທ່ານນຶ່ງກ່າວຕໍ່ RFA ໃນມື້ດຽວກັນນີ້ວ່າ ແຜນພັທນາ ເສຖກິດ- ສັງຄົມ 5 ປີຄັ້ງທີ 9 ນີ້ ຣັຖບານ ພວມຄົ້ນຄວ້າເອົາໃຈໃສ່ ຢ່າງໜັກແໜ້ນ ໃນເຣື່ອງການສ້າງອາຊີບ ໃຫ້ປະຊາຊົນຢູ່ເຂດຊົນນະບົດ ເພື່ອໃຫ້ມີຣາຍໄດ້ທີ່ໝັ້ນຄົງ:

“ພາຍໃນ 3-4 ປີ ຕໍ່ໜ້ານີ້ ຣັຖບານສິເຮັດແນວໃດ ເຮັດໃຫ້ຖານຣາຍຮັບຂອງຊົນນະບົດຫັ້ນ ມີຄວາມໝັ້ນຄົງ. ຍັງມີຄວາມອ່ອນໄຫວ ຍັງມີຄວາມບອບບາງ ໃນການສ້າງຣາຍຮັບ ຢູ່ໃນຊົນນະບົດ ຫັ້ນນ່າ.”

ທ່ານເວົ້າວ່າ ໃນຕໍ່ໜ້ານີ້ ການພັທນາປະເທດ ບໍ່ແມ່ນຈະສນັບສນູນ ໃຫ້ຄົນຕ່າງປະເທດ ເຂົ້າມາລົງທຶນພຽງຢ່າງດຽວ. ແຕ່ຣັຖບານຕ້ອງ ສ້າງວຽກເຮັດງານທໍາ ໃຫ້ປະຊາຊົນ ຄຽງຄູ່ກັນໄປພ້ອມ ຍ້ອນວ່າ ປັດຈຸບັນ ປະຊາຊົນລາວສ່ວນຫລາຍ ຍັງບໍ່ມີອາຊີບ ແລະຣາຍໄດ້ທີ່ ໝັ້ນຄົງ ຊຶ່ງຈໍານວນຫລາຍຍັງບໍ່ຢູ່ໃນຣະບົບ ປະກັນສັງຄົມ ແລະບໍ່ມີສວັດດິການ.

ນັກເສຖສາຕລາວທ່ານນຶ່ງ ກໍໄດ້ໃຫ້ທັສນະຕໍ່ RFA ໃນມື້ດຽວກັນນີ້ວ່າ ການສ້າງແຜນພັທນາ ເສຖກິຈ-ສັງຄົມ ຂອງຣັຖບານລາວຄັ້ງທີ 9 ປີ 2021-2025 ເປັນສິ່ງທີ່ມາຖືກທາງ ແລະ ໃນຂັ້ນຕໍ່ໄປ ກໍຄວນເນັ້ນໃສ່ ການສົ່ງເສີມ ການໃຊ້ໄຟຟ້າພາຍໃນໃຫ້ຫຼາຍຂຶ້ນ, ການພັທນາ ອຸດສາຫະກັມພາຍໃນ ໃຫ້ຫຼາກຫຼາຍ ແລະ ເຂັ້ມແຂງຂຶ້ນ ເພື່ອເຮັດໃຫ້ຄົນໃນທ້ອງຖິ່ນຕ່າງໆ ມີວຽກເຮັດງານທຳ:

“ລາວນີ້ຄວນຈະຫັນມາ ສ້າງຄວາມຕ້ອງການ ການໃຊ້ໄຟຟ້າຢູ່ພາຍໃນຫຼາຍກວ່າ. ລົງທຶນອື່ນໆ ເຣື່ອງອຸດສາຫະກັມ ການບໍຣິການ ອີ່ຫຍັງ ຕ່າງໆ ໃຫ້ມັນມີຄວາມສະດວກຂຶ້ນ ແລະ ມີຄວາມຍາກລຳບາກ ໜ້ອຍລົງ, ມີຄ່າສິ້ນເປືອງໜ້ອຍລົງ. ມັນກະເປັນກາລະເວລາ ທີ່ຈຳເປັນ ທີ່ລາວຕ້ອງມາເອົາໃຈໃສ່ກັບການ ເຮັດໃຫ້ການລົງທຶນພາຍໃນນີ້ ມັນສະດວກ, ງ່າຍ ແລະ ຖືກລົງ.”

ກ່ຽວກັບເຣື່ອງນີ້ ເຈົ້າໜ້າທີ່ກະຊວງແຜນການ ແລະການລົງທຶນ ຜູ້ຂໍສງວນຊື່ແລະສຽງທ່ານນຶ່ງ ກ່າວຕໍ່ RFA ໃນມື້ດຽວກັນວ່າ ແຜນພັທນາ ເສຖກິດ-ສັງຄົມ 5 ປີຄັ້ງທີ 9 ປີ 2021 ຫາ 2025 ນີ້ພວມຢູ່ໃນຂັ້ນ ຕອນຮ່າງແຜນເບື້ອງຕົ້ນ ແລະຄາດວ່າຈະສໍາເຣັດ ໃນທ້າຍປີນີ້ ແລະ ສເນີໃຫ້ສະພາແຫ່ງຊາດຮັບຮອງ ກ່ອນຈະປະກາດໃຊ້ຢ່າງເປັນທາງການ ໃນຕົ້ນປີ 2021.

ແຜນພັທນາເສຖກິດ-ສັງຄົມ 5 ປີ ເບື້ອງຕົ້ນ  ຣັຖບານລາວ ໄດ້ວາງ 6 ເປົ້າໝາຍໃຫຍ່ແບບລວມໆ ໃນການປຶກສາຫາຣື ແລະຄົ້ນຄວ້າ ເປັນຕົ້ນ ການພັທນາເສຖກິດແຫ່ງຊາດ ໃຫ້ຂຍາຍໂຕຕໍ່ເນື່ອງ ມີຄຸນນະພາບແລະຍືນຍົງ, ການພັທນາຊັພຍາກອນມະນຸດ ການຍົກຣະດັບ ຊີວິດການເປັນຢູ່ ຂອງປະຊາຊົນ, ການປົກປັກຮັກສາສິ່ງແວດລ້ອມໃຫ້ມີຄວາມສົມດູນ ແລະຕຽມພ້ອມຮັບມືພັຍທັມຊາດ, ການສ້າງພື້ນຖານ ໂຄງຮ່າງໃຫ້ເຂັ້ມແຂງແລະສົ່ງເສີມ ການຮ່ວມມືກັບສາກົລ, ແລະການສ້າງໃຫ້ປະເທດລາວ ເປັນຣັຖແຫ່ງກົດໝາຍ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ