ສນາມບິນອັດຕະປືຍັງມີ ໜີ້ສິນ

ຈໍາປາທອງ
2017-10-19
Share
F-attapeu-air ສະໜາມບິນນາໆຊາດ ແຂວງອັດຕະປື
Citizen Journalist

ສາຍການບິນລາວ ເປີດຖ້ຽວບິນ ໄປແຂວງອັດຕະປື ໃນມື້ວັນທີ 30 ພຶສພາ 2015 ແລະໃນມື້ວັນເປີດສະໜາມບິນ ຢ່າງເປັນທາງການ ວັນທີ 1 ມິຖຸນາ ຂອງ ປີດຽວກັນມີ ທ່ານ ຈູມມາລີ ໄຊຍະສອນ ປະທານປະເທດ ໃນຕອນນັ້ນ ແລະ ທ່ານ Truong Tan Sang ປະທານ ປະເທດວຽດນາມ ເປັນຜູ້ເປີດ.

ຕໍ່ມາກໍໄດ້ຢຸດໃຫ້ການບໍຣິການ ຫລັງຈາກເຫັນວ່າ ຖ້ຽວບິນສຸດທ້າຍໃນວັນທີ 26 ຕຸລາ 2016 ບໍ່ມີຜູ້ໂດຍສານພໍເທົ່າໃດຄົນ. ທ່ານ ສົມບູນ ດາວສະຫວັນ ຜູ້ບໍຣິຫານ ສະໜາມບິນ ທົ່ວປະເທດ ກະຊວງໂຍທາທິການ ແລະຂົນສົ່ງໄດ້ກ່າວ ຕໍ່ວິທຍຸເອເຊັຍເສຣີ ໃນມື້ວັນທີ 18 ຕຸລາ ນີ້ວ່າ:

"ເຫດຜົນກະຊິແມ່ນ ຜູ້ໂດຍສານຫຼຸດລົງວືບວາບ ໄປບາດດຽວຫັ້ນແຫຼະ ກະເຮັດໃຫ້ການບິນລາວບໍ່ສາມາດແບກຫາບພາລະ ໜີ້ສິນຫັ້ນ".

ແຕ່ເຖີງຢ່າງໃດກໍຕາມຣັຖບາລ ສປປລາວ ກໍຕ້ອງການຢາກໃຫ້ ການບິນລາວ ເປີດບໍຣິການ ສາຍການບິນຢູ່ຄືເກົ່າ ແຕ່ການບິນລາວ ຂໍ ໃຫ້ຣັຖບາລ ຊ່ວຍແກ້ໄຂ ເຣຶ່ອງໜີ້ສິນໃຫ້ ດັ່ງທ່ານ ສົມບູນ ກ່າວຕື່ມອີກວ່າ:

"ເຮົາໄດ້ສະເໜີຫາຣັຖບານລາວວ່າ ຂັ້ນຊິໃຫ້ການບິນລາວ ບິນ ກະໃຫ້ຣັຖບານລາວ ໄດ້ຊ່ວຍເລື້ອງໜີ້ ເລື້ອງສິນຫັ້ນໃຫ້ ດຽວນີ້ ກະຊວງ ໂຍທາກະໄດ້ ເປັນເຈົ້າການ ສະເໜີຫາຣັຖບານ ດຽວນີ້ຍັງບໍ່ ທັນໄດ້ຮັບຄຳຕອບ ຈາກຣັຖບານເທື່ອ".

ແຕ່ໃນເວລາດຽວກັນ ແຫຼ່ງຂ່າວໃກ້ຊິດບໍຣິສັດ ຮ່ວງອັນຍະລາຍ ໄດ້ກ່າວຕໍ່ວິທຍຸເອເຊັຍເສຣີ ໃນວັນທີ 15 ຕຸລາວ່າ: ການສ້າງສນາມບິນ ແຂວງອັດຕະປື ທີ່ໄດ້ເລີ້ມສ້າງໃນປີ 2013 ນັ້ນບໍ່ແມ່ນ ແນວຄວາມຄິດຂອງການບິນລາວ ແຕ່ເປັນຂອງອາດີດການນຳ ຂອງລາວຣະດັບ ກົມການເມືອງ ສູນກາງພັກທ່ານນຶ່ງ ທີ່ມີຜົນປໂຍດ ຮ່ວມກັນກັບບໍຣິສັດ ຮ່ວງອັນຍະລາຍ ໃຊ້ອິດທິພົນ ສ່ວນຕົວ ໃຫ້ສ້າງ.

ການສ້າງສະໜາມບິນແຫ່ງນີ້ ອຳນວຍຄວາມສະດວກ ໃນການໄປມາໃຫ້ບໍຣິສັດ ດັ່ງກ່າວ ເພາະວ່າຈາກ ສະໜາມບິນ ໄປຫາຫ້ອງການ ບໍຣິສັດ ມີໄລຍະທາງພຽງ 6 ກິໂລແມັດ, ແຕ່ວ່າຈາ ກສນາມ ບິນ ເຂົ້າໄປໃນຕົວ ເມືອງໄກປະມານ 26 ກິໂລແມັດ ແລະ ຍັງບໍ່ມີຣົດ ໂດຍສານ ໃຫ້ການບໍຣິການ. ຕາມຂໍ້ມູນຂອງແຫລ່ງຂ່າວ.ແຫ່ງຂ່າວເວົ້າຕື່ມວ່າ: ໃນເວລາສ້າງສນາມບິນ ໄດ້ຍ້າຍຊາວບ້ານ ອອກຈາກ ເຂດນັ້ນ ແລະຊາວບ້ານ ກໍບໍ່ພໍໃຈ. ປັດຈຸບັນ ມີພຽງເຈົ້າໜ້າທີ່ ຈຳນວນນຶ່ງ ປະຈຳການຢູ່ຕຶກ ສະໜາມບິນ.

ສ່ວນວ່າບໍຣິເວນນອກຕຶກ ເຫັນແຕ່ຫຍ້າ ແລະຂີ້ງົວຂີ້ຄວາຍ ຂອງຊາວບ້ານ ສະໜາມບິນ ທີ່ມີເນື້ອທີ່ 4,300 ແມັດມົນທົນແຫ່ງນີ້ມີທາງ ແລ່ນຂອງເຮືອບິນ ຍາວ 1,850 ແມັດ ແລະຮອງຮັບ ຜູ້ໂດຍສານໄດ້ 300 ຄົນຕໍ່ມື້ ມູນຄ່າການກໍ່ສ້າງແມ່ນ 36 ລ້ານໂດລາສະຫະຣັຖ ໂດຍແມ່ນ ບໍຣິສັດ ຮວງອັນຍະລາຍ ຂອງວຽດນາມ ເປັນຜູ້ລົງທຶນສ້າງກ່ອນ ແລ້ວຣັຖບານລາວ ຈະໃຊ້ແທນຄືນ ຕາມພາຍຫຼັງ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ