ຣັຖບານ ຍັງແກ້ໄຂ ບັນຫາເງິນກີບອ່ອນຄ່າ, ການແລກປ່ຽນເງິນ ບໍ່ທັນໄດ້ເທົ່າທີ່ຄວນ

ເຖິງແມ່ນວ່າ ສູນສະຖິຕິແຫ່ງຊາຕ ຈະຣາຍງານວ່າ ໃນເດືອນກັນຍາ 2023 ທີ່ຜ່ານມາ ໃນລາວ ມີອັດຕຣາເງິນເຟີ້ ຢູ່ທີ່ 25.7% ແມ່ນວ່າ ການຣາຍງານ ຈະບໍ່ແຮງງານຈະບໍ່ຮຸນແຮງປານໃດ ແຕ່ສະພາບໂຕຈິງ ໝວດສະບຽງອາຫານ, ຮ້ານອາຫານ, ໂຮງແຮມ, ເຄື່ອງດື່ມທີ່ບໍ່ມີທາດເຫຼົ້າ ກໍຍັງມີອັດຕຣາສູງຂຶ້ນ ບໍ່ມີທ່າທີຈະຫຼຸດລົງ ຕາມການຣາຍງານ ຂອງສູນສະຖິຕິແຫ່ງຊາຕ.

ໂດຍສະເພາະ ສິນຄ້າທີ່ນໍາເຂົ້າມາຈາປະເທດໄທຍ ເປັນເຄື່ອງອຸປໂພກ ແລະບໍຣິໂພກ ແລະອື່ນໆ ກໍຍັງມີລາຄາສູງ ເປັນຕົ້ນ ນໍ້າປາ ຂນາດ 300 ml, ລາຄາ 30-50 ບາທ ຈາກແຕ່ກ່ອນ 25 ບາທ, ເຂົ້າສານເປົານຶ່ງ 45 ກິໂລກຣາມ, ລາຄາ 1,650 ບາທ ຈາກແຕ່ກ່ອນ 1,250 ບາທ.

ດັ່ງຊາວຄ້າຂາຍ ໃນແຂວງບໍ່ແກ້ວ ທ່ານນຶ່ງ ກ່າວຕໍ່ວິທຍຸເອເຊັຽເສຣີ ໃນວັນທີ 16 ຕຸລາ ນີ້ວ່າ:

“ລາຄາ ຍັງສູງຢູ່ໃດ໋ ມັນບໍ່ມີລົງ ມີແຕ່ມັນຂຶ້ນທຸກມື້ ຂອງກິນຂອງໃຊ້ປະຈໍາວັນນີ້ນ່າ ມັນຈະພຸ່ງສູງຂຶ້ນສູງຫຼາຍ ເພາະວ່າ ຂອງມັນເອົາມາແຕ່ໄທຍ ນໍ້າປາ ແຕ່ກ່ອນນີ້ຈະຢູ່ທີ່ 25 ບາທ ຂຶ້ນມາເປັນ 30 ບາທ ບາງຮ້ານເຂົາກໍຂາຍ 45 ບາທ ບາງຮ້ານ ເຂົາກໍຂາຍ 50 ບາທ ເຂົ້າສານກໍຂຶ້ນ ຖົງນຶ່ງ ມັນມີ 45 ໂລ ດຽວນີ້ ມັນຕົກຢູ່ເປົານຶ່ງ 1,650 ບາທ.”

ຊາວຄ້າຂາຍ ທ່ານນີ້ ຍັງກ່າວຕື່ມວ່າ ຊາວຄ້າຂາຍໃນແຂວງບໍ່ແກ້ວ ຫາກເປັນໄປໄດ້ ເຂົາເຈົ້າ ກໍໃຊ້ເງິນບາທໃນການຊື້ຂາຍ ເພາະບໍ່ຫຼຸບທຶນ ເງິນກີບກໍຮັບເຊັ່ນກັນ ແລະຈາກນີ້ ທະນາຄານໃນລາວ ກໍຍັງບໍ່ມີເງິນຕຣາຕ່າງປະເທດ ໃຫ້ຊາວລາວໄດ້ແລກປ່ຽນຄືເກົ່າ ຍັງມີຄວາມຫຍຸ້ງຍາກຫຼາຍ ເປັນຕົ້ນ ທ່ານເອງ ຕ້ອງການເອົາເງິນກີບ ໄປແລກເປັນເງິນບາທ 40,000-100,000 ບາທ ເພື່ອຈະໄປຊື້ເຄື່ອງຢູ່ໄທຍ ມາຂາຍ ແຕ່ທະນາຄານໃຫ້ແລກໄດ້ພຽງ 2,000 ບາທ ເຊິ່ງກໍຍັງຕ້ອງໄປແລກປ່ຽນ ເງິນຕຣາຕ່າງປະເທດ ນອກລະບົບ ຄືເກົ່າ.

“ດຽວນີ້ 100 ບາທ 65 ພັນກີບ ທະນາຄານນີ້ ມັນຢູ່ 62 ທະນາຄານ ເຂົາບໍ່ປ່ຽນໃຫ້ເດ້ ເຂົາເວົ້າວ່າ ບໍ່ມີ ສົມມຸດວ່າເຮົາຕ້ອງການໄປຊື້ຂອງຢູ່ໄທຍຊີ້ 40,000, 50,000, 100,000 ໄປປ່ຽນຢູ່ທະນາຄານ ຢ່າງເກັ່ງ ເຂົາປ່ຽນໃຫ້ຢູ່ 2,000 ບາທ. ໂຫ້ ທາງການ ຢູ່ລາວນີ້ ຊ່ວຍເຫຼືອນີ້ ຄືຊິບໍ່ມີແຫຼະ.”

ຂະນະທີ່ ເຈົ້າໜ້າທີ່ໂຮງແຮມ ໃນແຂວງຫຼວງພຣະບາງ ທ່ານນຶ່ງ ກໍກ່າວວ່າ ປັດຈຸບັນ ສິນຄ້າຕ່າງໆໃນລາວ ກໍຍັງມີລາຄາສູງ ໂດຍສະເພາະ ເຄື່ອງອຸປະໂພກ ແລະບໍຣິໂພກ ຕາມອັດຕຣາແລກປ່ຽນ ເງິນຕຣາ ທີ່ບໍ່ແນວໂນ້ມຈະຫຼຸດເທືື່ອ ມີແຕ່ຈະເພີ່ມຂຶ້ນ ສ່ວນຄ່າຫ້ອງ ທີ່ຈ່າຍເປັນເງິນກີບ ຖືວ່າເພີ່ມຂຶ້ນປະມານ 30-50%.

“ກະຍັງບໍ່ແມ່ນຍັງບໍ່ຫຼຸດ ຢ້ານຂຶ້ນຕື່ມຢູ່ນ່າ ເພາະວ່າ ເຣດເງິນນີ້ ເຫັນເລັ່ງຂຶ້ນທຸກມື້ນ່າ ຊ່ວງນີ້ນ່າ ສ່ວນຫຼາຍຈະເປັນ ເຄື່ອງອຸປະໂພກບໍຣິໂພກນີ້ແຫຼະ ຊື້ເປັນເງິນບາທ ແລ້ວມາຂາຍເປັນເງິນລາວ ໃຫ້ຄົນລາວ ຖືວ່າສູງ ໂຕຢ່າງ ຮ້ານອາຫານ ເຮືອນພັກ ທີ່ວ່າ ຊິເປັນເວລາເງິນກີບ ອາດຂຶ້ນ 20,30 ຫຼືວ່າ 50% ແຕ່ວ່າເຣດເງິນນີ້ ແມ່ນຂຶ້ນກາຍເຄິ່ງແລ້ວເດ້ ຄັນໃສ່ກ່ອນໂຄວິດ.”

ພ້ອມກັນນີ້ ຊາວລາວ ໃນນະຄອນຫຼວງວຽງຈັນ ທ່ານນຶ່ງ ກໍກ່າວວ່າ ກໍຮູ້ສຶກໜັກໃຈຫຼາຍ ເພາະສິນຄ້າຕ່າງໆໃນປັດຈຸບັນນີ້ ກໍຍັງມີທ່າອຽງຈະຫຼຸດລົງເທື່ອ ເປັນຕົ້ນ ແປ້ງນົວ, ນໍ້າຕານ, ນໍ້າປາ, ເຂົ້າສານ ເຊິ່ງເຂົ້າສານນີ້ ແຕ່ກ່ອນ 70,000-80,000 ກີບຕໍ່ເປົາ, ດຽວນີ້ 1,100,000 ປາຍກີບຕໍ່ເປົາແລ້ວ ລວມເຖິງ ອັດຕຣາແລກປ່ຽນເງິນຕຣາ ກໍບໍ່ມີທ່າທີຈະຫຼຸດລົງເຊັ່ນກັນ ເຊິ່ງປັດຈຸບັນ ປະຊາຊົນ ທີ່ຕ້ອງການເອົາເງິນກີບ ໄປແລກປ່ຽນເງິນຕຣາຕ່າງປະເທດ ຍັງໄປແລກລະບົບເຖື່ອນກັນຢູ່.

“ໜັກໃຈຫັ້ນແຫຼະ ແຕ່ມັນກໍເວົ້າຫຍັງບໍ່ໄດ້ ກະສູງຂຶ້ນຢູ່ ກໍຕີງໄປຕາມເງິນ ບໍ່ອຶດເຣື່ອງແລກເງິນ ແລກກໍມີແຕ່ແລກ ກໍມີແຕ່ແລກຢູ່ເຖື່ອນຫັ້ນແຫຼະ ບໍ່ໄດ້ແລກນໍາຣັຖເດ້ ຕອນນີ້ 63 ເຂົ້າກໍຂຶ້ນ ເພາະວ່າ ເຮົາຊື້ເປັນເປົາເນາະ ເປົານຶ່ງ ແຕ່ຕອນຊື້ 7-8 ແສນ ດຽວນີ້ມາເປັນລ້ານ ລ້ານເອັດ ຊົ່ວຊິໝົດ ຊື້ໃໝ່ຂຶ້ນອີກ.”

ດ້ານຊາວລາວ ໃນນະຄອນຫຼວງວຽງຈັນ ອີກທ່ານນຶ່ງ ກໍກ່າວວ່າ ການເປັນຢູ່ທຸກມື້ນີ້ ໜັກໃຈແຮງ ພາກຣັຖ ບໍ່ເຫັນຈະແກ້ໄຂອັນໃດ ສິນຄ້າຕ່າງໆກໍຍັງມີລາຄາສູງຢູ່ ເຊິ່ງເຂົາເຈົ້າ ກໍອີງຕາມອັດຕຣາແລກປ່ຽນເງິນຕຣາ ທຸກມື້ນີ້ເງິນກີບໄປແລກເປັນເງິນບາທ ກໍ 60 ປາຍພັນກີບແລ້ວ ຫຼາຍຄົນ ກໍລັກລອບແລກປ່ຽນກັນເອງ ເພາະທະນາຄານໃນລາວ ຍັງບໍ່ມີເງິນຕຣາຕ່າງປະເທດໃຫ້ແລກປ່ຽນ.

“ກະໜັກໃຈໝົດທຸກຄົນຫັ້ນແລ້ວ ໜັກສົມຄວນແຫຼະ ຊີວິດການເປັນຢູ່ດຽວນີ້ ບໍ່ເຫັນແກ້ຫຍັງນີ້ ສູງຂຶ້ນກວ່າເກົ່າ ສິນຄ້າເປັນຂອງສໍາເຣັດຮູບຫັ້ນແຫຼະ ເຄື່ອງຄົວຫັ້ນແຫຼະ ອາຫານການກິນ ໄລ່ຕາມເງິນບາທ 6 ພັນປາຍແລ້ວ ໄດ້ລັກແລກກັນເອງ ແລກທະນາຄານ ເຈົ້າມີເງິນກີບ ໄປແລກເງິນບາທ ເງິນໂດລ້າຣ໌ບໍ່ໄດ້.”

ສໍາລັບເຣື່ອງດັ່ງກ່າວນີ້ ເຈົ້າໜ້າທີ່ອຸດສາຫະກັມ ແລະການຄ້າ ທ່ານນຶ່ງ ຜູ້ຂໍສງວນຊື່ ແລະຕໍາແໜ່ງ ກໍໃຫ້ຄວາມເຫັນວ່າ ຖ້າໃຫ້ເວົ້າຕາມສະພາບໂຕຈິງ ໃນເຣື່ອງອັດຕຣາເງິນເຟີ້ ໃນປັດ ກໍຍັງຖືວ່າສູງກວ່າ ຕາມການຣາຍງານ ຂອງສູນສະຖິຕິຣາຍງານ ວ່າ ເດືອນກັນຍາ 2023 ອັດຕຣາເງິນເຟີ້ ຢູ່ທີ່ 25.7% ນັ້ນ ເພາະຍັງເຫັນວ່າ ອັດຕຣາແລກປ່ຽນເງິນຕຣາຕ່າງປະເທດ ຍັງສູງຢູ່ ແລະທະນາຄານ ຍັງບໍ່ມີເງິນຕຣາຕ່າງປະເທດ ໃຫ້ແລກ.

“ໂຕຈິງ ຢ້ານກວ່າ 25 ແລ້ວເນາະ ມັນຢາກສູງເດ້ ອັດຕຣາເງິນເຟີ້ ຍັງບໍ່ທັນລົງ ວ່າຊັ້ນສາເນາະ ລັກສະນະວ່າ ຍັງຂຶ້ນຢູ່ເບາະ ເຣດທະນາຄານຫັ້ນນ່າ ເຮົາໄປປ່ຽນບັດບໍ່ໄດ້ ບໍ່ມີຈັ່ງຊີ້ນ່າ. ເງິນບາທຫັ້ນນ່າ ກໍປະມານ 6 ແສນບາທບໍ່ ເງິນໂດລ້າຣ໌ 100 ໂດລ້າຣ໌ ດຽວນີ້ ຫັ້ນນ່າ 2 ລ້ານ ເກືອບ 3 ລ້ານ 3 ແສນປາຍເດ້.”

ຢ່າງໃດກໍຕາມ ເຈົ້າໜ້າທີ່ອຸດສາຫະກັມ ແລະການຄ້າ ທ່ານນີ້ ກໍໄດ້ຕື່ມວ່າ ເບື້ອງຕົ້ນ ກໍເຫັນຣັຖບານພະຍາຍາມ ແກ້ໄຂບັນຫາເງິນເຟີ້ ແລະສິນຄ້າທີ່ມີລາຄາສູງນີ້ຢູ່ ໂດຍມີການແຕ່ງຕັ້ງ ຄະນະສະເພາະກິຈ ຈາກສູນກາງ ລົງກວດກາຕາມທ້ອງຖິ່ນ ໃນເຣື່ອງການແລກປ່ຽນເງິນຕຣາ ຕ່າງປະເທດ ນອກລະບົບ ແລະການຄວບຄຸມລາຄາສິນຄ້າ ແຕ່ຍອມຮັບວ່າ ກໍຍັງມີການແລກແລກປ່ຽນ ຢູ່ລະບົບນອກຄືເກົ່າ ແລະສິນຄ້າ ຍັງມີລາຄາສູງຢູ່.